سەرەکی » وتار » ئاشتی‌ عه‌بدوڵڵا‌ » تاكەی هەر یەكتری خەڵات دەكەین؟

وته‌ی‌ ژنۆرناڵ

تاكەی هەر یەكتری خەڵات دەكەین؟

ئەگەر رۆژانە هەر بۆ پیاسەیەكیش بێت سەردانی ناو بازار و شوێنە گشتی و فەرمانگە حكومی و تەنانەت لە دەرگا داخراوەكانی ماڵان بدەین، دەبینین بە سەدان ژن قۆڵی بوێری و سەربەرزی لێهەڵماڵیوە و هەریەكە بەجۆرێك كاردەكات، دەی گومانی تێدانییە هەریەك لەم ژنانە لەپێشەوەی ریزەكانی خەباتن بۆ بەدیهێنانی یەكسانی، ژن هەیە لە شەقامەكانی ناو بازار چەندین ساڵە بەدیار چارۆكەیەك سەوزەوە تا دنیا تاریك دەكات هاوار دەكات و نانی سەربەرزی پەیدا دەكات، ژنانێك چەندین ساڵە لەنێو فەرمانگەكاندا پرچیان سپی كرد و لەوێدا خزمەت ئەكەن، ژنانێك لەو دیو دەرگا داخراوەكانەوە، نەوە لە دوای نەوەیان پەروەردەكردو ئازارەكانی نادادپەروەریی خێزان و كۆمەڵگە چۆكی پێدا نەدانوو هەر ئەو دایكە نموونەییە بوون، كە شانازیان پێوەدەكرێ‌، جا باسی كام ژنانەیتر بكەم، كە خزمەتیان بارتەقای كاری زۆربەمانە، بەڵام ئەوان بەهۆی نابینایی ئێمەوە ونن !!
كەچی ئێمە لە لیژنەی ژنانی پەرلەمانە بێ‌ دەسەڵاتەكەمان و لەنێو حكومەتە بێ‌ خەمەكەمان و لە رێكخراوە زۆرو بۆرەكانماندا زۆر بە دەگمەن ئەو ژنە ماندوو و ونانەمان لەبیرە، چەندین ساڵ ژنە ونەكان هێندەی ئێمەو بگرە دوو ئەوەندە ماندوون، دەمارەكانی دەستیان شاهیدی رەنجدانیانە، بەڵام كەس ئەوانی لەبیرنییە و لەبری ئەوان چەندین ساڵە ئێمە بەكەشخەیی و رازاوەیی و لەبەردەم كامێراكاندا هەر خۆمان خۆمان خەڵات دەكەینەوە، گەرچی ئەم نوخبەیەش چالاكن و كاردەكەن، بەڵام ئێمە كار بۆ خەڵاتی خۆمان ناكەین دەبوو ئێمە پێشەنگ بین بۆ هاندانی ئەوان.
دەكرا كاتێك خەڵاتمان پێ‌ رەوابووایە، كە كەیسی كوشتنەكانی ژنانمان ئاشكرا بكردایە ، دەكرا ئەو كاتەی كەببوینایە بە خاوەنی بڕیار لەنێو دەسەڵاتدا، ئەوکات شیرینیمان بەسەر یەكدا دابەشكردایە و خەڵاتی یەکترمان بکردایە.
ئێمە هێشتا لەڕێگاین و خەباتمان بۆ یەكسانی زۆری ماوە، زۆری ماوە ژیانێكی ئارام و گوزەرانێكی باش بۆ ژنانی كۆمەڵگە دابین بكەین، هێشتا زۆرمان ماوە، لە خەڵاتكردنی یەكترگەڕێن، چونکە زۆرن ئەو ژنانەی كە لەئێمەی پێشەنگ بۆ خەباتی یەكسانی لەپێشترن، ئەكرێت لەكۆتایشدا بپرسم بۆ لیژنەی ژنان خۆیان چ خزمەتێكی جیاو گرنگیان پێشكەش كرد، تا ببنە خەڵات بەخش؟

print

 67 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*