سەرەکی » وتار » ته‌ها سلێمان‌ » گه‌ڕانه‌وه‌ بۆ ئاوایی

له‌ نێوان ئێره‌ و ئه‌وێ دا

گه‌ڕانه‌وه‌ بۆ ئاوایی

65
باوكم ڕادوێیه‌كی له‌شارۆ هاوردوی وبویه‌ عاجواتی و وه‌گوێی خۆم ئه‌مژنه‌فت ژنه‌كان له‌سه‌ر كۆل و بیره‌كانی چه‌م ئاوایی ئه‌یانوت: كنا باوانتان نه‌شێوێ ئێژێ سڵێمان خه‌لیفه‌ عیسا چشتێكی هاوردوه‌ ڕادوێی پێ ئێژن و وه‌ی ڕۆزاره‌ خه‌ڵكه‌كه‌ی ناوی قسه‌ ئه‌كه‌ن و گۆرانی ئێژن و ده‌میان ناخه‌نه‌ بان یه‌ك و هیلاك ناون. وه‌هه‌ردوو گوێی خۆمیش ئه‌یه‌م ژنه‌فت میم غه‌یره‌ وه‌ دایكمی ئه‌وت: مه‌یره‌م باشه‌ نایه‌ژن ئه‌ی شته‌ بیچكه‌ چۆین چوێنی ڕێی گشت ئه‌و خه‌ڵكه‌ی تیا ئه‌وێتۆ وا قسه‌ی تیا ئه‌كه‌ن؟ دایكمیش گوایه‌ تێی بگه‌یه‌نێ پێی وت: تاتی غه‌یره‌ ئه‌یانه‌ هان له‌شارو كاروكاسبیان قسه‌كردنه‌و له‌ شه‌رقه‌وه‌ ئه‌یوه‌ن بۆ غه‌رب. ده‌ی سا باوه‌ڕتان بوێ، دایكم خۆیشی نه‌یئه‌زانی شه‌رق و غه‌رب چیه‌و زۆرجاریش له‌جیاتی شه‌رق و غه‌رب ئه‌یانوت ئه‌شریق و مه‌شریق و ئینجا تۆبێ و ئه‌شریق و مه‌شریق شه‌رح بكه‌و سه‌ری لێ ده‌ربكه‌؟
رۆژێكیان نازانم كاممان پاتری ڕادوێكه‌مان ده‌ركردوی و دوای سه‌روقوین خستویمانه‌ شوێنی خۆی، باوكم له‌ماڵ نه‌وی وله‌به‌غا ئیشی ئه‌كرد. دایكم ده‌ستی برد ڕادوێكه‌ بخاته‌ ئیش و كوت ئیشی نه‌كرد، كه‌سیشمان نه‌چویمانه‌ ژێری كه‌ ده‌ستكاریمان كردوه‌، ئه‌ترسیاین له‌وه‌ی سه‌قه‌تمان كردوێ و ئیتر چاك نه‌وێتۆ. بیرم تێ دایكم په‌ڕۆیه‌كی پێچایه‌ ڕادوێكه‌وه‌و بردی بۆ بان ته‌په‌ی ئاوایی و كه‌سیان سه‌ریان لێده‌رنه‌ئه‌كرد چیه‌تی، له‌بان ته‌په‌ی ئاوایۆ شۆڕبیوۆ بۆ ماڵ غه‌زێم فه‌تاح و بردی بۆ لای حه‌مه‌ غه‌زه‌، ئه‌ویش بڕێك هاوردی و بردی نه‌یزانی چیه‌تی وئێمه‌ش وه‌ك نه‌دی وبدی هه‌ر وه‌دویایه‌وه‌ بویمان و له‌ورۆ بردی بۆ لای حه‌سه‌ن عه‌لی ده‌روێش حوسێن، ئه‌ویش نازانم وه‌ سوتفه‌ بوی یان زانی؟ پاترییه‌كانی ده‌ركردو دووباره‌ خستیه‌وه‌ شوێنی خۆی و ڕادوێ كه‌فته‌وه‌ ئیش. ئۆخه‌یش دڵمان ئیسراحه‌تی كردو ئاوی خواردۆ، جا ئه‌گه‌ر ڕادوێكه‌ سه‌قه‌ت بویایه‌ چیمان بكردایه‌؟ ڕه‌نگه‌ كه‌باوكم له‌به‌غا بگه‌ڕیایه‌تۆ، دایكم پێی بوتایه‌و ئێمه‌ش كوته‌كمان بخواردایه‌! ئیسا ڕادوێكه‌ چاك بویه‌تۆ به‌س دایكم سوێنی خوارد له‌خۆی زیاتر هه‌ركامێكمان ده‌ستی بۆ بوه‌ین، ده‌ستمان داخ ئه‌كا!
گۆرانیه‌ك بوی ئه‌ها ئه‌یوت (یار وه‌ره‌ وه‌ره‌.. هاوسێكه‌ی بان په‌نجه‌ره‌)، ئه‌گه‌ر من له‌شرینی خه‌ویشدا بوایه‌م و ئه‌م گۆرانیه‌ له‌ڕادوێوه‌ لێی بدرایه‌ گه‌رێ هه‌ڵمیان سانایه‌و وایان نه‌كردایه‌و هه‌ڵسیایه‌م و بیانوتایه‌ گۆرانیه‌كه‌ ڕۆی ده‌ستم ئه‌كرد وه‌گیریان و كڕ نه‌ئه‌ویمۆ.
بیرم كه‌فتۆ، دویای ڕادوێكه‌ی ئێمه‌ كه‌م كه‌م ڕادوێوو مسه‌جه‌ل هاوریاوه‌ ئاوایی، به‌س یه‌كه‌م ته‌له‌فزیۆن جه‌باری حاجی حه‌مید شویشه‌ هاوردی و وابزام له‌ شوێنێكی تریش باسمكردو كاره‌با له‌ئاوایی نه‌وی، وه‌پاتری مه‌كینه‌ ئیشیان پێی ئه‌كردو گشتمان له‌ده‌وری كۆ ئه‌ویمانۆ، ڕۆژێك شوكر ره‌حمه‌ كه‌ له‌كفریه‌وه‌ هاتوی بۆ ئاوایی و وه‌ ئه‌سڵ خه‌ڵكی پیره‌مه‌وه‌نی بوی میوانی ماڵ جه‌بار بوی، ئێمه‌یش مناڵه‌كان ئاوایی چویمان بۆ ماڵ جه‌بار بۆ سه‌یر ته‌له‌فزیۆن.
له‌كاتی سه‌یركردنی ته‌له‌فزیۆن له‌ناومانا تاریق خاڵۆ ئه‌حمه‌و غه‌یره‌ هاواری لێهه‌ڵسیاو وتی:
-ئه‌هبرا ئه‌یانه‌ خه‌ڵك كوێن وا چوینه‌ته‌ ناو ته‌له‌فزیۆنه‌كه‌؟ شوكر ره‌حمه‌یش وتی:
-بێقه‌زاوی كاكه‌ تاریق نایانناسی؟
-ناوه‌ڵا خاڵۆ شوكر..
-خه‌ڵكی ده‌ور تویكن و عه‌زیز قادرن..
-ئه‌ی بۆ من نایانناسم؟
-ئاخر ئه‌وانه‌ تازه‌ ماڵیان هاوردوه‌ بۆ ئه‌وره‌..
-ئه‌ها یه‌عنی مه‌ڕو بزنیشیان هه‌یه‌..
-به‌ڵێ به‌ڵێ كاكه‌ تاریق ئه‌ی چوێن..
زه‌لامه‌كان دایانه‌ تریقه‌ی خه‌نینه‌و وتیان:
(ئای له‌كوڕ خاڵۆ ئه‌حمه‌و)..
تاریقیش وتی: ئێ بۆ برا خۆ سوعالێ خراوم نه‌كردوه‌؟
جا بابچێنۆ بۆ لای ڕادیۆكه‌ی ئێمه‌، جار جار مامه‌م مه‌لایاسین ئه‌هات و ئه‌یبرد بۆ ماڵ خۆیان و ئێ نه‌دایكم قسه‌ی ئه‌كردو نه‌باوكیشم له‌ماڵ بوی، تا بێژێ مه‌لای برام مه‌یوه‌و له‌ماڵیش بویایه‌ پێی نه‌ئه‌وت مه‌یوه‌، چوینكه‌ مامه‌می خۆشگه‌ره‌كوی و ئێ مامه‌یشم ئه‌وكاته‌ ته‌نیا خوێنه‌واری ئاوایی بوی و هه‌ر ئه‌ویش له‌گشت ئاوایی باشتر له‌هاڵ و هه‌واڵی عه‌ره‌بی تێئه‌گه‌یی، به‌س كاتێك ڕادوێكه‌ی ئه‌گرته‌ ده‌سۆو ئه‌یورد ئیتر ئێمه‌یش ده‌سمان ئه‌كرده‌ پرینگه‌ پرینگ و مینگه‌ مینگ و ئه‌مانوت: هه‌م هات و بردی..
جا هه‌ر له‌باره‌ی ڕادیۆوه‌ چیرۆكێكی ترم بیركه‌فتۆ، باوكم ئه‌یوت: مناڵ بویم و لێل خاڵۆم حاجی عه‌باس گه‌رمكی چویم بۆ گێره‌ی خه‌رمان، له‌دویرۆ كابرایه‌ك هات و لای دایه‌ لامان و وتی: سه‌ی عه‌باس ڕادوێكه‌مان سێ ڕۆژه‌ ئیش ناكاو خراو بویه‌و به‌شكو بۆم چاك بكه‌ی. ئێ خاڵۆم عه‌باس له‌ئاوایش هه‌ر سه‌ری ده‌رئه‌چوی له‌ چاككردنی ڕادیۆ، وتی باشه‌ بێری بزان چیه‌تی؟ باوكم ئه‌یوت: من گێره‌م ئه‌كردو مناڵ بویم و وه‌ده‌ست گرتنی گوریسی ملی كه‌ره‌كان و لاساریانه‌وه‌ ته‌واو هیلاك بویم و گوێم لێی بوی خاڵۆم وتی: بڕۆ ئه‌و گێره‌ له‌ده‌ست ئه‌و مناڵه‌ وه‌رگره‌و ئه‌ویش هات لێمی وه‌رگرت و منیش هاتم له‌سێوه‌ری چه‌رداخه‌كه‌ لای خاڵۆمۆ دانیشتم و پێمی وت: كوڕ خاڵۆی ڕادیۆكه‌ی هیچی نیه‌و ته‌نیا پاترییه‌كانی سه‌روقوین تێخستوه‌، منیش وتم ئه‌ی خاڵۆ بانگی بكه‌ بابڕوا، وتی نا مه‌كه‌ لاقه‌ی، خوا بۆتۆی نارد، خۆ پاره‌ی لێناسێنم، به‌س مادام نه‌یزانیه‌ پاتری ڕادیۆكه‌ی سه‌روقوینه‌و له‌بنارگلۆ هاوردیه‌تی بۆ ئه‌یره‌ با تاوێ باش گێره‌ بكات و تویش ئیسراحه‌ت بكه‌..
به‌ڵام حه‌یف نازانم ڕادیۆكه‌ی چی وه‌سه‌رهات؟ خۆزگا یه‌ك پارچه‌یشی ئه‌ماو هه‌ڵمان ئه‌گرد؟

66
جه‌باری حاجی حه‌مید شویشه‌ قه‌ت شوانی نه‌كردوی یان من نه‌مدوی شوان بوێ؟ ئه‌وه‌ی بیرم ماوێ، جه‌بار هه‌ر وه‌بان سه‌یاره‌و مه‌كینه‌وه‌ بویه‌و سه‌رێكی شارو سه‌رێكی ئاوایی بوی. ئینجا كه‌باوكیشیان مرد، جه‌بار هه‌م ده‌وری براگه‌وره‌و هه‌میش ده‌وری باوكی بۆ براو خۆیشكه‌كانی ئه‌وینی. جا با پێتانیش بێژم جه‌بار پێش ئه‌وه‌ی ژن بێرێ و دوای ژن هاوردنیش پیاوێكی ناوقه‌و ڕێك، پاك و پرچ و زه‌وق خۆش و ئه‌یانوت په‌یوه‌ندی خۆشه‌ویستی و دڵداری و چشتی وایشی هه‌یه‌و وابزام بیرم تێ، كه‌ڕه‌تێك له‌م باره‌وه‌ تویشی شه‌ڕو ئاژاوه‌یه‌ك بوی له‌گه‌ڵ بڕێ له‌خزم و كه‌س و كاره‌كه‌یدا.
ده‌ی ڕه‌نگه‌ ئیسا بێژن نایوڕیتۆو هه‌ر ئێژێتی، هه‌تا كاته‌كه‌ ته‌واو ئه‌وێ و ئیجا پێمان ئێژی په‌له‌مه‌كه‌ن، خۆ كافرسانی نیه‌و چشتێكتان بۆ باس ئه‌كه‌م و مه‌ئویستان ناكه‌م، ئه‌ها دیتانه‌ خۆ من چه‌ن باشم و وه‌ك ئێوه‌ تویڕه‌ ناوم و خه‌ریكیشه‌ كه‌م كه‌م فێری تاقه‌تگرتن و سه‌بر ئه‌وم، ده‌یباشه‌ فره‌ مه‌یه‌ژه‌و باسی كه‌ بزان وه‌ته‌مای ئه‌ی كه‌ڕه‌ته‌ چیمان بیربخه‌یته‌وه‌؟
جه‌بار توێتاكه‌ی فرۆشت ومه‌كینه‌یه‌كی ده‌مڕه‌شی له‌شه‌ریكه‌ۆ هاوردۆ بۆ ئاوایی، مه‌كینه‌كه‌ی زۆر خۆش گه‌ره‌كوی و تاماوه‌یه‌ك نه‌ك گێره‌ی خه‌رمان، به‌شكو جفتیشی پێ نه‌ئه‌كردو ئه‌یوت عه‌زییه‌ت ئه‌خوا، بیرمه‌ بۆ یه‌كه‌م كه‌ڕه‌ت له‌قومه‌كه‌ كه‌ عه‌رزێكی نه‌رمان بوی خه‌رماشه‌ی لێ به‌ست وجفتی پێكردو مه‌كینه‌كه‌یشی داویه‌ ده‌ست مه‌جیدی برایۆ ئه‌یڕانی یه‌عنی جفتی پێی ئه‌كرد، من وفه‌رحان چویمان بۆلایان وجه‌باریش سه‌ری ئه‌خسته‌ سه‌رمان، سه‌ره‌تا له‌م به‌ر كه‌نێكه‌وه‌ بۆ ئه‌و به‌ر كه‌نه‌كه‌ بڕێ بازبازێنی پێمان كردو ئه‌یوت هه‌ركه‌سێ زیره‌كبێ سواری چاملغی مه‌كینه‌كه‌ی ئه‌كه‌م. دوای ئه‌مه‌ هه‌ردووكمانی داوه‌ زۆراناو ئه‌یوت كێ سێ كه‌ره‌ت ئه‌وه‌ی تر بكوتێته‌ عه‌رزا، ئه‌وه‌ یه‌ك سه‌عات سواری خه‌رماشه‌كه‌ی ئه‌كه‌م وئیتر من و فه‌رحانیش هه‌تا توانیمان له‌ناو ئه‌و خۆڵ و قومه‌دا یه‌كمان ئه‌هاوردو ئه‌خوڵمانۆو گشت كه‌ڕه‌تێكیش وه‌ حجه‌ی ئه‌وه‌ی فێڵمان له‌یه‌ك كردوه‌، جه‌بار زۆرانه‌كه‌ی پێمان دووباره‌ ئه‌كردۆو ئه‌یوت ئه‌م كه‌ڕه‌ته‌ حه‌ساوه‌؟ له‌دوایشا حسابی نه‌كردو وابزانم بۆ چه‌ن ده‌قه‌یه‌ك ئیزنمانی دا، هه‌ردووكمان سواری خه‌رماشه‌كه‌ بویمان و درۆم نه‌كردوێ ئه‌یه‌شی بۆ تاقیكردوه‌ی قوه‌تی مه‌كینه‌كه‌و خه‌رماشه‌كه‌و جفت كردنه‌كه‌ بوی، بۆ ئه‌وه‌ی بزانێ قوه‌تی مه‌كینه‌كه‌ چۆنه‌و خه‌رماشه‌كه‌ باش جفت ئه‌كا؟ یان عه‌رزه‌كه‌یش گه‌رچی نه‌رمانه‌ به‌س گه‌ره‌كوی بزان باش ئاوی خواردوه‌ له‌دوای باران؟ هه‌رچۆنێ بێ و مه‌به‌ستی چی بوێ، ئێمه‌ مه‌منونی بوین به‌س سواری مه‌كینه‌كه‌مان بكات و له‌و بڕوایه‌م بیوتایه‌ بڕێك بده‌نه‌ سه‌روبه‌چكی یه‌كیشا به‌س به‌و مه‌رجه‌ی سواری مه‌كینه‌كه‌مان بكا، ئه‌وه‌یشمان ئه‌كرد.
جا وه‌ك له‌سه‌ره‌تاۆ باسم كرد من قه‌ت نه‌مدیو جه‌بار شوانی بكات، جارێكیان وابزانم پایزبوی، هێشتا ڕان نه‌هاوریایۆ بۆ سه‌رماڵ، مامه‌م مه‌حه‌مه‌د هات بۆ ماڵ و وتی: ئیمشه‌و جه‌بار من و فاتیح ئه‌خاته‌ ماڵ و تویش لێل جه‌بارا بڕۆ بۆ لای ڕان. ئا ڕانیش شه‌وه‌كه‌ژ بوی و چشته‌كانیان پێچاۆو كاتێك چویم بۆ ڵای ماڵ بابام كه‌ره‌ ناو ڕانیه‌كه‌ بێرم، دادام سه‌ی دلبه‌ر وتی: بویمه‌ سیاقه‌ت شه‌و نه‌ترسی و با لایته‌كه‌ دایم و ده‌ره‌م وه‌ ده‌ستۆ بوێ و چاوت له‌دوای ڕانه‌كه‌ش بوێ، مه‌ڕو بزنه‌ لاته‌كان له‌دویاۆ جێ نه‌مێنن.
سوار كه‌ره‌ ناو ڕانیه‌كه‌ بویم و یه‌كه‌م كه‌ڕه‌ته‌ ئه‌چم بۆ لای ڕان وه‌ شه‌وه‌ كه‌ژی، یه‌عنی شه‌و نایه‌ینۆو له‌جه‌وه‌ڵ مازویخ ئه‌مێنینۆ. دوای زانیم هه‌ر ئه‌و شه‌وه‌ش حه‌مه‌ی مامه‌م مسه‌فا، ساڵه‌حی حه‌مه‌ی ڕه‌شید خه‌لیفه‌ی خستویه‌ ماڵ و ئه‌ویش هاتوی بۆ لای ڕان.
ڕانمان وه‌ ڕێی مه‌ویژه‌دا خسته‌ڕێ، جه‌بار سواری كه‌ره‌ ناو ڕانیه‌كه‌ی خۆیان بویه‌و منیش له‌دویای ڕانه‌كه‌ۆو هامه‌ بان كه‌ره‌ ناو ڕانیه‌كه‌ی ماڵ بابامۆ. جه‌بار ده‌نگێكی زوڵاڵی خۆشی بوی، جارێ كه‌گۆرانی یارغه‌زاڵ و قه‌تاری فه‌ڵه‌گ و ئای ئای و گیانه‌ گیانه‌ی ئه‌وت، حه‌زت ئه‌كرد گوێی لێبگری و هه‌متر ئیسا بیر ئه‌كه‌مۆ دیاروی جه‌بار عه‌شقێكی قویل له‌ناخه‌وه‌ ئه‌یهه‌ژان، چوینكه‌ گۆرانیه‌كانی وه‌ سۆزێكی سه‌یره‌وه‌ ئه‌وت و ئه‌چڕی.
خۆر هێواش هێواش داده‌گلێ و به‌ره‌و ئاوان ده‌ڕوا، من ئه‌وسا وامئه‌زانی كاتێك له‌ئاواییه‌كه‌ی ئێمه‌ خۆر ئاوا ئه‌وێ ئیتر له‌گشت جێیه‌ك تاریك داتێ و ڕۆژ نامێنێ. ڕانێكی گه‌وره‌ هی ماڵ جه‌بارو ماڵ بابام و بزنه‌كانی ئێمه‌، گشتیان ئه‌چوینه‌ نزیكه‌ی پێنج سه‌دسه‌ر، له‌ناو په‌لێل كوناقه‌ل دانگڵه‌ی داوه‌و ئه‌له‌وه‌ڕێ و جه‌باریش له‌پێش ڕانه‌كه‌وه‌یه‌و هه‌ر تاو ناتاوێ ده‌س ئه‌كاته‌وه‌ وه‌ گۆرانیه‌كانی و منیش له‌دویای ڕانه‌كه‌وه‌م و گه‌ماڵه‌كانی ماڵ جه‌بار كوڵه‌و بۆره‌، گه‌ماڵه‌كانی ماڵ بابام ده‌م ڕه‌ش و بۆزه‌، وه‌چوار ده‌وری ڕانه‌كه‌دا تێن و ئه‌چن و له‌و ده‌وروبه‌ره‌ش ده‌نگی شوان و باڕه‌ باڕو قاڕه‌ قاڕی ڕان و زه‌نگڵه‌ زه‌ڕو وه‌ڕینی سه‌گ و ده‌نگی شوانه‌كانی ئاوایی تێ و به‌ره‌ به‌ره‌ دنیا تاریك ئه‌وێ و جار ناجارێك جه‌بار بانگم ئه‌كاو ئێژێ: سویره‌ ئاگات لێ وێ مه‌ڕو بزن جێنه‌مێنێ.
له‌ئاسمانا ئه‌ستێره‌كان ده‌ره‌كه‌فن، تا زیاتر تاریك داتێ ده‌نگی شوان و وه‌ڕینی سه‌گ و زه‌نگڵه‌كان و باڕه‌و قاڕه‌ی ڕانه‌كان زیاتر ئه‌ژنه‌فێ و له‌په‌لێل كونا قه‌لۆ ده‌رچویمان و له‌سینگ فه‌قێوه‌ به‌ره‌و چاڵه‌ خه‌ڕنویكه‌ ڕۆیمان و جه‌بار وتی:
-ئه‌زانی ئیمشه‌و له‌كوێ ڕان ئه‌خه‌فێنین؟
-نا وه‌ڵا..
-له‌چاڵه‌ خه‌ڕنویك..
-نزیك بویمانه‌تۆ؟
-زۆرمان نه‌ماوه‌..
-كه‌ی نان ئه‌خۆین؟
-با بگه‌ینه‌ په‌چاكه‌..
زۆرو كه‌م نازانم چه‌نی پێ چوی، گه‌یمانه‌ په‌چای چاڵه‌ خه‌ڕنویك، بیرتانه‌ باسم كرد، ئه‌وسا زانیم حه‌مه‌ی مامه‌م مسه‌فا له‌شوێنی ساڵه‌حی حه‌مه‌ی ره‌شید خه‌لیفه‌ هاتوی بۆلای ڕان و ئه‌وی خستویه‌ ماڵ، له‌ولایشه‌وه‌ عه‌دنانی میم غه‌یره‌ ڕانی گه‌یانه‌ په‌چا. هه‌ریه‌كێ له‌شوێنی خۆی ڕانی خه‌فان و ده‌سیان كرده‌ چای كردن و نان و چای خوریا، جه‌بارو حه‌مه‌ وه‌نۆبه‌ له‌و ده‌شته‌ چۆڵ و هۆڵه‌ كه‌به‌س ڕان و شوان و سه‌گی لێیه‌، گۆرانی ئێژن وجارێ مقام وجارێ به‌سته‌و بیریشم تێ باسی مناڵی خۆیان و وابزانم نه‌خته‌ نه‌خته‌ باسی دڵداریشیان ئه‌كرد.
نازانم سه‌عات چه‌ن بوی پێمیان وت وه‌سڵه‌كه‌م بوه‌م و بڕۆم له‌پاین ڕانه‌كه‌ی خۆمانۆ بخه‌فم، له‌شرینی خه‌ودا بویم و لایه‌ له‌ڕانه‌كه‌ هاته‌ سه‌رما، گوێم لێ بوو جه‌بارو حه‌مه‌و عه‌دنان ده‌یها ده‌یهایان بوی، كاتێ هه‌ڵسیام زانیم گورگ نیشتوه‌ته‌ ناو ڕانه‌كان و مه‌ڕێكی گه‌رحاوو په‌ری مل شكانوه‌.
ئه‌م ڕووداوه‌ جه‌بارو حه‌مه‌و عه‌دنانی عه‌زییه‌تداو وابزانم یه‌كه‌م شه‌و، دواشه‌وم بوو، به‌شه‌وه‌كه‌ژی بچمه‌لای ڕان..

 83 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*