سەرەکی » وتار » پێشمەرگە هـــــــێڵی سوورە

پێشمەرگە هـــــــێڵی سوورە

پێشمەرگەیەكی دێرین

نزیكەی سێ چارەكە سەدەیە كە پێشمەرگە بۆتە رەمزی بەرگریی لە كورد و كوردبوون. چ لای گەلی كورد خۆی و چ لای گەلان و حكومەتانی دنیاش پێشمەرگە و خەباتی پێشمەرگە وەكو مەسەلەیەكی پیرۆز سەیری دەكرێ و حسابی بۆ دەكرێت. بۆیە ئەگەر جار بەجارێكیش كەسێك یان كەناڵێكی میدیایی پەردەی شەرم لە خۆی داماڵی و بیەوێ وەكو زیقاوڵە بە دەنگێكی نەشاز بخوێنێ و بە خەیاڵی خاوی بیەوێ پێشمەرگە و تێكۆشانی پێشمەرگە لەكەدار بكات، ئەوە خۆی لەكەدار دەكات. چونكە كاتێ باسی پێشمەرگە دەكەین تەنیا باسی ئەو پێشمەرگانە ناكەین كە بە رێكەوت لە مەرگ گەڕاونەتەوە و ئێستا لە ژیاندان و وەكو شەهیدی زیندوو ژیان بەسەر دەبەن، كە هەندێكیان كەم ئەندامن و شوێنی گورزی دوژمن بە جەستەیانەوە ماوە یان ئەندامێكی جەستەیان لە دەستداوە، بەڵكو باسی مێژوویەكی قوربانیدان و ئەو هەزاران هەزار شەهیدەش دەكەین كە گیانی خۆیان كردە قوربانی كورد و كوردبوون و ئێستا لە ئامێزی خاكدا بە ئاسوودەیی نووستوون. چونكە رەنجیان بە زایە نەچووە و تەنانەت كەسان و كەناڵی میدیایی زیقاوڵە ئاساش لە سایەی گیانبازیی ئەوان و خەباتی پێشمەرگەدا بە ئازادیی دەژین.
سەرمایەی رەمزیی گەل
بەم پێیە گیانبازیی شەهیدان و خەباتی پێشمەرگە سەرمایەی رەمزیی ئەم گەلەیە و یەكێكە لە پیرۆزییەكانی ئەم گەلە. ئیتر چۆن دەكرێ یەكێك لە پیرۆزییەكانی ئەم گەلە لەكەدار بكرێت و ئەو كەس و لایەنەی ئەم كارەش دەكات وەكو بەرزەكی بانان بۆی دەرچێت و كەس نەبێت رووبەڕووی دادگاو یاسایان بكاتەوە!! دیارە ئەم بابەتە بەرلەوەی ببێتە هۆی ناڕەزایی پێشمەرگە و كەس و كاری شەهیدان و تێكۆشەرە دێرینەكان، ئەركی سەرشانی داواكاری گشتییە لەسەری بێیتە جواب و كەس و لایەنی تۆمەتبار بداتە دادگا بۆ ئەوەی سزای خۆی وەربگرێ و چیتر جورئەت نەكات پیرۆزیی پێشمەرگە و قوربانیدانی پێشمەرگە لەكەدار بكات. بەڵام بە پێی ئاگاداری بەندە هەتا ئێستا داواكاری گشتی لەسەر ئەم مەسەلەیە نەهاتۆتە جواب و هیچی لەسەر ئەم كەیسە نەگوتوە؟؟ كەواتە ئەركی سەرشانی كۆمەڵەی پێشمەرگە دێرینەكانە ئەم كەیسە لە دادگا بجوڵێنێ و كۆڵ نەدات هەتا كەس و لایەنی تۆمەتبار سزای یاسایی خۆیان وەردەگرن، ئەگەر خوانەخواستە دەستبەرداری ئەم كەیسە بێت و بیەڵێ تۆمەتباران وەكو بەرزەكی بانان بۆی دەرچن، بێگومان هەم متمانەی خۆی دەخاتە ژێر پرسیارەوە و هەم رێگا خۆش دەكات لەمەودوا هەركەسێ هەوای لێدوان دای لە كەللەی سووكایەتیی بە پێشمەرگە و قوربانیدانی پێشمەرگە بكات.
سەبارەت بە رابردوو
رەسوڵ حەمزەتۆڤ لە كتێبی داغستانی من-دا دەڵێت: «ئەگەر تفەنگ بە رابردووەوە بنێیت داهاتوو تۆپت پێوە دەنێت!!» ئەوەی جێگای سەرنج و تێڕامانە ئەو بەناو بزووتنەوە و جووڵانەوانەی لەم ساڵانەی دواییدا دروشمی چاكسازییان هەڵگرتووە و مێشكی هەموومانیان بەرداوەتەوە بەوەی دژی گەندەڵین و دەیانەوێ گوایە دنیامان بۆ بكەن بە شامی شەریف و گەورەترین گۆڕانكاریی بكەن و ژیانمان بكەن بە بەهەشت!! هەمیشە بەوە دەستیان پێكردووە كە سووكایەتی بە رابردوو بكەن و وا خۆیان نیشان بدەن گوایە ئەمان كوڕی ئەم رۆژگارەن و رابردوو قێزەونە. ئەو كەسەش كە لە كەناڵی (NRT)یەوە شەكرەكە دەشكێنێ و بە پێشمەرگە دەڵێت: ( بە شەرواڵە شڕەیەك و پاتە دڕاوێكەوە لەو شاخە سواڵیان ئەكرد، دزییان ئەكرد، قەل و قازی خەڵیان ئەخوارد، بە زۆر دەچوونە لادێكان، ئەو لادێیانەی كە ئێستە وێرانیان كردووە، ئەچوون نان و بژێویان لە لادێكانا بوو، قەل و قازی مریشكی خەڵكیان لە كولانەكان پێدەردەهێنان، پێیان سەردەبڕین، چونكە خۆیان خائین بوون، هەتا ساحێب ماڵەكە تۆزێكیان دەرخوارد نەدایە خۆیان نەیاندەخوارد …) ئەو كەسانەی لە پشت ئەم كەناڵەوەن و ئەم جۆرە قسانەش بڵاو دەكەنەوە دەیانەوێ بە سووكایەتی بە رابردوو ئایندە بەهەشتییەكەمان بۆ دروست بكەن. ئاخر چۆن دەكرێ بە سووككردن و كاولكردنی رابردوو ئایندە بنیات بنێی؟ بە چ لۆجێكێك؟ چۆن دەكرێ مرۆڤ ئەوەندە بێویژدان بێت و بەو شێوەیە لە پێشمەرگە و خەباتی پێشمەرگە و گیانبازیی شەهیدان بڕوانێ؟ یان كەناڵێك بەپێی چ ئیتێكێكی رۆژنامەوانیی رێگە بە خۆی دەدات ئەم قسانە بڵاوبكاتەوە؟ دیارە ئەوانەی ئێستا هاتوونەتە سەر حازری و وا دەزانن هەروا جادەكەی پان بووە، ئاگایان لەوە نییە بە سەدان گەنجی ئەم وڵاتە لە زەمانێكدا كە رژێمی بەعس تەنیا زمانی ئاگر و ئاسنی بەكاردەهێنا و بە كەیفی خۆی ئەم وڵاتەی كاول دەكرد و خەڵكەكەی ئەشكەنجە دەدا و بەبێ دادگایی و بە بڕیاری جەماعی هەزاران كەسی لە سێدارە دەدا. چۆن ئازایانە رووبەڕووی ئەو رژێمە دیكتاتۆرە بوونەوە و دەیان گەنجی ئەم كوردستانە هەر بە پارە و جل و بەرگ و چەكی خۆیان دژی پیلانەكانی بەعس وەستانەوە و چەندان جەللادی بەعسیان بە سزای گەل و شۆڕش گەیاند و زۆریش لەوانە شەهیدبوون و ئەوانەیش كە ماون شەهیدی زیندوون و بە رێكەوت ماونەتەوە. ئاخر گیانبازیی شەهیدان و خەباتی كەسانی ئاوا شایانی رێز و ستایشە یان سووكایەتی پێكردن؟؟
سەبارەت بە دیكتاتۆری گۆڕبەگۆڕ
هەتا ئێستاش كە 74 ساڵ بەسەر خۆكوشتنی ئەدۆلف هیتلەردا تێدەپەڕێت هیچ كەناڵێكی تەلەفزیۆنی ئەڵمانی رێگە نادات كەسێك لە كەناڵەكەیەوە ستایشی هیتلەر بكات و رەحمەت بۆ گۆڕەكەی بنێرێت، كەچی پیاوە موحتەرەمەكە لە كەناڵی (NRT)یەوە دەڵێت: (مناڵی ئەوسا لە زەمانی سەداما بە رەحمەت بێت، هەزار رەحمەت لەو گۆڕەی … ) ئاوا وەسفی سەدامی دیكتاتۆری گۆڕبە گۆڕ دەكات؟؟ ئەو دیكتاتۆرەی (4) هەزار گوندی كوردستانی كاول كرد، (182) هەزار كوردی ئەنفال كرد، (5) هەزار كوردی لە هەڵەبجە بە كیمیایی كوشت و هەزاران تاوانی تری بەرامبەر بە كورد كرد. باشە ئەوەی ئەم كەناڵە دەیكات بەرەڵاییە یان ئازادی رۆژنامەگەریی؟ قابیلە ئەم كەناڵە باشتر لە كەناڵەكانی ئەڵمانیا لە ئازادیی رۆژنامەگەریی تێگەیشتبێت؟ ئەی لێرەدا بۆچی داواكاریی گشتی نەهاتە جواب؟ ئەگەرچی كەناڵەكە بۆ دەربازبوون لەو سووكایەتییەی بە پێشمەرگەی كردووە بیانووی گەندەڵی دەهێنێتەوە، گوایە دژی گەندەڵیی و بەرپرسە گەندەڵەكان ئەم بابەتەیان بڵاوكردۆتەوە، بەڵام ئەوە درۆیەكی شاخدارە و هیچ پاساوێك هەڵناگرێت، ئەگەر راست دەكەن و جورئەتیان هەیە كاتێ باسی گەندەڵیی دەكەن با دیاری بكەن و كێ گەندەڵە و ناوی بێنن، نەك بەو بیانووەوە پەلاماری پێشمەرگە بدەن و سووكایەتی بە پێشمەرگە و گیانبازیی شەهیدان بكەن.
رەخنە لە كۆمەڵەی پێشمەرگە دێرینەكان
پێش هەموو شتێك ئەو گردبوونەوەیەی هەینی رابردوو (25/1/2019) كۆمەڵەی پێشمەرگە دێرینەكان و تێكۆشەرە دێرینەكان كردیان جێگای دەستخۆشییە، بەڵام دوای ئەوە نەدەبوو نوێنەری خۆیان بنێرن بۆ هەمان ئەو كەناڵەی سووكایەتی بە پێشمەرگە كردووە بۆ ئەوەی داكۆكی لە پێشمەرگە بكات، چونكە پێشمەرگە تاوانی نەكردووە تا بچێت داكۆكی لە خۆی بكات، بەڵكو ئەوە كەناڵەكەیە كە تۆمەتبارە بەوەی سووكایەتی بە پێشمەرگە كردووە، لەم سۆنگەیەوە بەتوندی رەخنە لەو هەڵویستە هەڵەیەی كۆمەڵەكە دەگرم و هیوادارم دووبارەی نەكەنەوە. لە كۆتاییدا داواكارم كۆمەڵەی پێشمەرگە دێرینەكان سوور بن لەسەر بە سزای یاسایی گەیاندنی كەناڵەكە و ئەو كەسەش كە ئەو قسانەی بە پێشمەرگە وتووە. ئۆباڵی شەهیدان و پێشمەرگە و كەمئەندامانی سەنگەر دەكەوێتە ئەستۆی ئەوان كە كۆڵ نەدەن و دەستبەرداری كەیسەكە نەبن، دەنا دڵسۆزی خۆیان بۆ نوێنەرایەتیكردنی پێشمەرگە دەخەنە ژێرپرسیارەوە، بەڵام بە هەوڵی بە سزای یاسایی گەیاندنی تۆمەتبارەكان دەیسەلمێنن پێشمەرگە هێڵی سوورە.

 113 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*