سەرەکی » ئەدەب - سێبەر و سایە » راپۆرتی كوشتنێك

کورتەچیرۆک

راپۆرتی كوشتنێك

مونا عسگریانی

هه‌له‌و، من كه‌سێكم كوشت! به‌ڵێ، به‌ڵێ، مردووه‌. نازانم كه‌ی! به‌ وردی ئاگام له‌ كاته‌كه‌ی نییه‌. چۆن؟! رێگه‌م پێ بده‌، بۆت روون ده‌كه‌مه‌وه‌ كاكه‌! ته‌له‌فۆنم كرد بۆ ئه‌وه‌ی داوای یارمه‌تیت لێبكه‌م. ئاهـ، بیه‌ڵه‌ با هه‌ناسه‌یه‌ك بده‌م. لاشه‌كه‌ی لێره‌ نییه‌، غه‌یب بووه‌. نه‌خێر، نه‌خێر، من بۆ هیچ شوێنێكم نه‌بردووه‌، ته‌نیا كوشتم. هاوكار؟! نه‌خێر، هاوكارم نییه‌. پێم وانییه‌ زیندوو بێت، خۆی وتوێتی مردووه‌! ئه‌وه‌ چ قسه‌یه‌كه‌! من هیچ ماده‌یه‌كی بێهۆشكه‌رم نه‌خواردووه‌، پاكی پاكم. خه‌یاڵت ته‌خت بێت! ئه‌ها، به‌ڵێ، منیش ئه‌وه‌ ده‌زانم، ئاشكرایه‌ كه‌ مردووه‌ قسه‌ ناكات!
ببووره‌، ده‌نگم نووساوه‌. قسه‌كانم روون نییه‌؟! باشه‌، به‌ڵێ، ده‌توانم به‌رده‌وام بم. بۆچی؟! ها، یه‌عنی چی بۆچی؟! ئاخخخ، من زوو شتم له‌ بیرده‌چێته‌وه‌. ده‌بوو لێم بپرسیایه‌! هه‌ر وازی لێبێنه‌، كاكه‌! من حه‌زم له‌م قسه‌ هه‌له‌ق و مه‌له‌قانه‌ نییه‌. گرنگ ئه‌وه‌یه‌ ئێستا مردووه‌. بۆچی مردووه‌؟ ئه‌وه‌ سوودی چییه‌ بۆ من؟
ئای، من زۆر هیلاكم! بوه‌سته‌ با په‌رداخێ ئاو بخۆمه‌وه‌، ئێستا دێمه‌وه‌. تۆ دایمه‌خه‌ره‌وه‌. دڵنیابه‌ منیش دایناخه‌مه‌وه‌. ئه‌ی باوكه‌، وه‌ك ئه‌وه‌ی خۆم ته‌له‌فۆنم بۆ كردبی! باشه‌، تۆش پێداگریت كردبێ ئاوا! ده‌ڵێم گه‌ڕام، جوانیش گه‌ڕام، بست به‌ بستی ئه‌م خانووه‌ ڤێلایه‌ به‌دوای ئه‌و ژنه‌دا گه‌ڕام به‌ڵام هیچم ده‌ستنه‌كه‌وت، نه‌مدۆزییه‌وه‌. ئێستا؟! هیچ؟! به‌بێ هیچ ئه‌نجامێك له‌سه‌ر قه‌نه‌فه‌كه‌ دانیشتم و نیو سه‌عات سه‌یری ته‌له‌فزیۆنم كرد بۆ ئه‌وه‌ی ئارام ببمه‌وه‌ به‌ڵام هیچ، ئێستاش وا قسه‌ له‌گه‌ڵ تۆ ده‌كه‌م.
به‌ڵێ، مردوو قسه‌ ناكات، قسه‌كه‌ی تۆ به‌قوه‌ته‌ به‌ڵام ئه‌میش وه‌كو زۆر له‌ مردووه‌كان نامه‌ی نووسیوه‌. به‌ڵێ، نووسیویه‌تی كه‌ من كوشتوومه‌. ئه‌ی باوكه‌، من چوزانم كه‌ی نووسیویه‌تی؟ بێگومان كاتێ له‌ سه‌ره‌مه‌گدا بووه‌ نووسیویه‌تی ئیتر. له‌وانه‌شه‌، دوای مردنی نووسیبێتی. ئاخر، راستت ده‌وێت، ئه‌و ژنه‌، زۆر سه‌یر و سه‌مه‌ره‌یه‌. جاریوابوو، له‌و دیو ده‌رگا داخراوه‌كانه‌وه‌، له‌به‌ر ئاوێنه‌، له‌به‌رخۆیه‌وه‌ ورته‌ ورتی ده‌كرد و فرمێسكی ده‌ڕشت. وه‌كو مێشووله‌ دایمه‌ گیزه‌ گیزی بوو، … بۆچی؟ باشه‌، قه‌ت لێم نه‌پرسی مه‌سه‌له‌ چییه‌، به‌گشتی خۆم له‌ شت هه‌ڵناقورتێنم. ئه‌سڵه‌ن به‌ من چی؟!
هێی كاكه‌، بزانه‌ چۆن قسه‌ ده‌كه‌ی! خۆشه‌ویستی نێوان من و ئه‌و چ په‌یوه‌ندییه‌كی به‌ تۆوه‌ هه‌یه‌؟! ناونیشانی منت بۆچییه‌؟ من رێز و حورمه‌تم هه‌یه‌ لای ده‌ر و دراوسێ. دیسان به‌ عه‌شقه‌وه‌ گرتت! باشه‌، مه‌یكه‌ به‌هه‌را! خۆشم ده‌ویست یان نا؟! ها، ساڵه‌ها بوو كه‌ پێكه‌وه‌ ده‌ژیاین، له‌ ژێر یه‌ك بنمیچدا، له‌ یه‌ك ماڵدا. پێم وایه‌ ده‌ ساڵ! له‌وانه‌یه‌ دوانزه‌ ساڵیش بووبێت! به‌ رای تۆ ئه‌مه‌ به‌س نییه‌؟!
هیچ هه‌واڵێكی کەسوکاری نازانم. باوكی نه‌بوو، جوانەمەرگیان كردبوو. به‌داخه‌وه‌، حه‌زم له‌ ره‌فتاری دایك و خوشكه‌كه‌ی نه‌بوو. هه‌ر له‌ سه‌ره‌تاوه‌، په‌یوه‌ندیم له‌گه‌ڵ بڕین. هه‌ر خه‌ریكی شه‌ڕ و فه‌رته‌نه‌ و ململانێ بوون. ده‌یانگوت لێگه‌ڕی با ژنه‌كه‌ت بچێته‌ زانكۆ! قسه‌ی قۆڕ، زانكۆ، زانكۆ شوێنی به‌ره‌ڵاییه‌. وه‌ڵڵا، جگه‌له‌وه‌ی چاو و گوێیان ده‌كاته‌وه‌، هیچ خێرێكی پێوه‌ نییه‌. ژنه‌كه‌م؟ چه‌ند رۆژێ، ئاهو ناڵه‌ی كرد و گریا، وه‌كو ئه‌وانی تر، پاشان ملی دا. هه‌ڵبه‌ته‌ ته‌گبیرم لێكرد و رێگه‌م نه‌دا ئیتر دوای قسه‌ی خێزانه‌كه‌ی بكه‌وێت، به‌و شێوه‌یه‌ دۆخه‌كه‌ ئارامتر بۆوه‌. من، به‌گشتی كه‌سێكی به‌ سه‌برم. قسه‌ به‌ له‌ خۆت گه‌وره‌تر مه‌بڕه‌! نه‌خێر! ده‌ست بوه‌شێنم، نا هیچ ناكه‌م، ته‌نیا بێده‌نگ ده‌بم، یه‌عنی تاقه‌تی ئه‌م شێر و رێوییه‌ ژنانه‌یه‌م نییه‌.
ئه‌وه‌نده‌ خێزان، خێزان، مه‌گره‌ به‌ ده‌مته‌وه‌ برا! وسبه‌، بوار بده‌ بیر وخه‌یاڵم كۆبكه‌مه‌وه‌. خوایه‌! نه‌كا تۆ بته‌وێ بڵێی خێزانه‌كه‌ی كوشتیان؟! نازانم! خۆ ئه‌وان زۆر حسابیان بۆ ده‌كرد! چ دنیایه‌ك تێكه‌وتووین! ئای، سه‌رم دنگه‌ی لێوه‌ هات. لێره‌ خه‌ریكه‌ بۆنی دوكه‌ڵ ئازارم ده‌دات! یه‌عنی ئه‌وان ئاگریان تێبه‌رداوه‌؟! ده‌نگه‌ ده‌نگی دراوسێكان مێشكی تێكداوم، بیه‌ڵه‌ با ئه‌و په‌نجه‌ره‌یه‌ داخه‌م. مه‌سه‌له‌ی دوكه‌ڵه‌كه‌؟! هیچ نییه‌، دراوسێ گه‌مژه‌كان بۆ بینینی دوكه‌ڵه‌كه‌، ده‌رپه‌ڕینه‌ ده‌ره‌وه‌.
چی ده‌چرپێنی به‌ گوێی هاوكاره‌كه‌تدا؟ بۆچی شوێن پێی من هه‌ڵبگرن؟ بۆچی من ون بووم؟ ئێوه‌ ده‌بێ بڕۆن ژنه‌كه‌ بدۆزنه‌وه‌. لێره‌ نییه‌. ده‌ڵێم مردووه‌! ده‌شێ مه‌سه‌له‌كه‌ په‌یوه‌ندی به‌ چییه‌وه‌ هه‌بێت؟ چی؟ هه‌رگیز، من ئه‌هلی خیانه‌ت و ئه‌و جۆره‌ شتانه‌ نیم. ئه‌و؟ نازانم. هه‌ڵبه‌ته‌ ئه‌م ژنه‌ به‌و مۆبایله‌ نه‌فره‌تییه‌ی زۆر شتی ده‌كرد. ئاخر، سێ مانگ بوو كه‌ ماسكه‌ كۆنه‌كه‌می ده‌كرده‌ ده‌موچاوی، ده‌بوو به‌ زۆر له‌ ده‌موچاوی داماڵم. ده‌بوو تووڕی بده‌م.
هێی، كاكه‌! ناوی ژنه‌كه‌مت بۆچییه‌؟! تۆ و هاوڕێكانت ده‌بێت ته‌نیا به‌ دوای لاشه‌ی ژنه‌كه‌دا بگه‌ڕێن، هه‌ر ئه‌وه‌نده‌. به‌ڵێ، نامه‌كه‌ له‌به‌رده‌ستایه‌! به‌ڵێ، ئێستا ده‌یخوێنمه‌وه‌. په‌له‌ مه‌كه‌ برا! ئه‌ها، نووسیویه‌تی ئه‌و مرۆڤێكه‌ و مرۆڤ ته‌نیا گۆشت و خوێن نییه‌، رۆحی هه‌یه‌ و رۆحیش خواردنی ته‌نیا برنج و شله‌ نییه‌. وازی لێبێنه‌، ئه‌وه‌ گرنگ نییه‌. ئۆف، كاكه‌ خه‌ریكه‌ كارێ ده‌كه‌ی تاقه‌ت و حه‌وسه‌ڵه‌م نامێنێ. به‌هه‌رحاڵ، نووسیویه‌تی من كوشتوومه‌. نه‌فره‌تی، ئه‌وه‌ چ پرسیارێكه‌ ده‌یكه‌ی؟! دیاره‌ كه‌ ژنه‌كه‌م به‌لامه‌وه‌ گرنگ بوو، گومانی تێدا نییه‌، پێویستم پێی بوو. تێده‌گه‌ی؟! من تاقه‌تی ئیش و كاری ناوماڵم نییه‌. ده‌بێت یه‌كێكم له‌به‌رده‌ستا بێت. دیسان خه‌ریكه‌ چپه‌ چپ ده‌كه‌ی؟! شوێن پێی من هه‌ڵمه‌گرن. شوێن پێی ژنه‌كه‌م هه‌ڵبگرن. لاشه‌كه‌ی بدۆزنه‌وه‌.
مناڵ؟! ئێمه‌ مناڵمان نییه‌. نه‌خێر! له‌سه‌ر مێزه‌كه‌ت دانیشتووی له‌گه‌ڵ من قسه‌ بكه‌ی؟! بابه‌ كارێك بكه‌، شتێك بكه‌! باشه‌، راست و ره‌وان ده‌ڵێم، له‌ڕاستیدا ژنه‌كه‌م مناڵی نه‌ده‌بوو. به‌رده‌وام داوای ده‌كرد بچین بۆ لای دكتۆر. ئاخر، ژنی نه‌زۆك و وه‌جاخ كوێر، بیانوو ده‌گرێت. باشه‌ مناڵی بۆ چیبوو؟ چه‌ند ساڵێك دوای ئه‌وه‌ كه‌ ژنی دووه‌مم هێنا، ئه‌ویش هه‌ر مناڵی نه‌بوو. چی روویدا؟! هیچ! ئه‌ی باوكه‌، تۆ به‌رده‌وام قسه‌م پێده‌بڕیت. نه‌خێر، ئه‌و قه‌ت به‌وه‌ی نه‌زانی كه‌ ژنی دووه‌مم هێناوه‌! یه‌عنی پێم نه‌گوت. پێویستیشی نه‌ده‌كرد بزانێت، تاقه‌تی قڕه‌ قڕم نییه‌. ژنی دووه‌م؟ له‌ یه‌كێ له‌م گوندانه‌ی ده‌وروبه‌ره‌، زۆر مناڵه‌، خۆی ده‌گونجێنێ، ماره‌ییه‌كه‌شی ده‌ تاك بازن بوو كه‌ یه‌كه‌م رۆژ دامێ! نه‌خێر، ناوی له‌ ناسنامه‌كه‌م نه‌نووسراوه‌. یه‌ك دوو مانگ ده‌بێت سه‌رم لێنه‌داوه‌، رێك له‌و كاته‌وه‌ كه‌ كچه‌ پووره‌كه‌یم له‌ گونده‌كه‌ی ته‌نیشتیان ماره‌ كردووه‌. كات وه‌كو ئاڵتوون وایه‌ و منیش هه‌میشه‌ شكست ده‌هێنم. به‌ڵێ، هه‌رئه‌وه‌نده‌. زۆر گرنگ نییه‌.
هه‌راسانم مه‌كه‌ كاكه‌! خوێندمه‌وه‌ ئیتر. هه‌مووی؟! ئه‌ها، لێره‌دا نووسیویه‌تی من كوشتوومه‌ چونكه‌ كه‌ڕ و كوێرم، ئه‌مه‌ بوختانه‌، من ساغ و سه‌لیمم و عه‌یبم نییه‌! نه‌ چاوكزم تا چاویلكه‌ بكه‌مه‌ چاوم و نه‌ گوێم گرانه‌ تا مایكره‌فۆن بكه‌مه‌ گوێم! حه‌ڤده‌ ساڵ له‌و گه‌وره‌ ترم به‌ڵام هیچم پێوه‌ دیار نییه‌! ماشه‌ڵڵا زۆر چوست و چالاكم! باوه‌ڕ بكه‌ زۆر ئه‌كتیڤم، یه‌عنی چی؟! من به‌چاوی نوقاوه‌وه‌ چووم كوشتم، ئه‌و هاواری كردووه‌ و من گوێم لێنه‌بووه‌؟! هێی، تۆ له‌گه‌ڵ هاوڕێكانتا به‌ چپه‌ چپ باسی چی ده‌كه‌ی؟! كێ حۆله‌؟ خۆت حۆلی! جوان قسه‌ بكه‌، رێزی ته‌مه‌نه‌كه‌م بگره‌! بابه‌ته‌كه‌ مه‌گۆڕه‌، یه‌عنی چی؟ تۆ ده‌ڵێی خۆی خۆی كوشتووه‌؟ بێگومان، دواییش وا هاتووه‌ به‌ خه‌یاڵیدا كه‌ من كوشتوومه‌! ها، له‌وانه‌یه‌! من باوه‌ڕم وایه‌ ژن، ده‌بێت ئاگای له‌ ژیان و ماڵ و مێردی خۆی بێت. ئه‌و گوێی نه‌ده‌دایه‌. هه‌میشه‌ گۆڤار و كتێبی به‌ ده‌سته‌وه‌ بوو، به‌ناو ماڵه‌كه‌دا ده‌خولایه‌وه‌. وه‌كو تارماییه‌كی سه‌رگه‌ردان! له‌م دواییانه‌دا قسه‌ی هه‌له‌ق و مه‌له‌قیشی ده‌كرد. به‌ده‌م خه‌وه‌وه‌ قسه‌ی ده‌كرد. هه‌ر خۆی ده‌نواند. وای ده‌زانی بووه‌ به‌ شت. به‌خۆڕایی خه‌یاڵی لێده‌دا! بیری لێبكه‌ره‌وه‌ ئه‌و بێده‌سه‌ڵات و بێتوانا و مرده‌لۆغه‌ په‌نجا شه‌ست كیلۆییه‌ خۆی كوشتبێت! نه‌خێر ناتوانێت، كه‌ری ئه‌و باره‌ نییه‌!
تاكی كانتۆره‌كه‌ی؟ بۆچی سه‌یری بكه‌م؟ به‌تاڵه‌، هیچی تیا نییه‌ برا! نه‌خێر، جله‌كانی تیانییه‌. نه‌ بابه‌! غه‌یب بووه‌؟ یه‌عنی چی؟! له‌ به‌یانی زووه‌وه‌، ته‌نیا چه‌ند ده‌ستێ جلی تیابوو. باقییه‌كه‌ی من ئاگرم تێبه‌ردان. به‌ڵێ، به‌ڵێ خۆم سووتاندمن، نیو سه‌عات پێش ئێستا! ئاخر مردوویه‌ك ئه‌و هه‌موو جلوبه‌رگه‌ی بۆ چییه‌؟ چی لێبكات؟ مه‌كینه‌ی خه‌یاتی و گه‌ندو گووه‌كانی تریشیم سووتاند. بۆچی نه‌ده‌بوو بیانسووتێنم؟! به‌ تۆچی؟! ماڵی خۆمه‌، خۆم بۆم كڕیوه‌، حه‌قی خۆمه‌.
چی؟ به‌ دووری ده‌زانم خێزانه‌كه‌ی ئاگایان له‌ هیچ بێت. ئه‌وان حه‌قیان چییه‌؟! چ شاردنه‌وه‌یه‌ك؟ بۆچی ده‌بێت مردووه‌كه‌ بشارنه‌وه‌؟ من خاوه‌نیم كاكه‌! ژنی منه‌؟ پرسیارم ئه‌وه‌یه‌ لاشه‌كه‌ی له‌ كوێیه‌؟ بیدۆزنه‌وه‌. نه‌خێر، نه‌خێر، خه‌متان نه‌بێت، من ده‌ستكاری هیچ شتێ ناكه‌م. ته‌نیا یارمه‌تیم بده‌ن.
ئه‌و ده‌نگی ویقه‌ ویقه‌ی به‌ر ده‌رگای ماڵه‌كه‌م چییه‌؟! نننا، من ده‌رگا ناكه‌مه‌وه‌. من لای ده‌ر و دراوسێ رێز و حورمه‌تم هه‌یه‌، حه‌یای خۆم نابه‌م. هه‌له‌و! پێیان بڵێ ده‌ست له‌سه‌ر زه‌نگی ده‌رگاكه‌
هه‌ڵگرن. هه‌له‌و، هه‌له‌و، …

له‌ فارسییه‌وه‌: محه‌مه‌د كه‌ریم
سه‌رچاوه‌: nebesht.com

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*