سەرەکی » وتار » چرۆ شه‌هاب » پێگەی گەنج لە كۆمەڵگە بەرەو كوێ؟

فۆكەس پۆینت

پێگەی گەنج لە كۆمەڵگە بەرەو كوێ؟

گەنج ئەو توێژەی كۆمەڵگەن كە بەردەوام لە ناو خێزانەوە تا دەگاتە ناو كۆمەڵگە و لەوێشەوە سیاسییەكان ئومێدیان لەسەر هەڵدەچنن. قۆناغی گەنجیی بە گرنگترین قۆناغە گرنگەكانی ژیان دادەنرێت، ئەویش دەگەڕێتەوە بۆ ئەوەی كە گەنج هێز و توانا و بەخشین و هەوڵی زۆر لەخۆدەگرێت، تاكو بتوانێت هەنگاو بەرەو هەموو ئەو خواست و داواكارییانەی بنێت كە بوونەتە بەشێكی سەرەكی لە خواستەكانی. گەنج حەزی بە دەستەبەركرنی پێداویستییەكانی هەیە و بەردەوام خواستی ئەوەیە بە ئامانجەكانی بگات.
گەنج حەز و ئارەزوو و نوێگەری دەکات و بە خاڵی جەوهەری قۆناغەكانی ژیانی دادەنێت، هەموو هەوڵێكی لە بەدەستهێنانی كۆی ئەو ئامانجانەیە كە پلانی بۆ داناوە. بیرمان نەچێت ئەو وزە و لێهاتوویی و داهێنانەی لە گەنجاندا بەدیدەكرێت، بێوێنەن ئەگەر دەرفەتیان بۆ بڕەخسێنرێت.
هەر كاتێك گەنجێكی خێزانەكەی خۆت لە هەوڵی بەدەستهێنانی ئامانجەكانیدا دەبێت، خێزان یەكەم شوێنە كە پشتیوانی دەكات و هاوكاری دەكات، بەڵام ئەگەر گەنجێك لە دەرەوەی خێزانی خۆت بێت ئەو گرنگییەی پێنادرێت و لە زۆر كاتدا ئەمە بەرچاو و دیارە لە نێو كۆمەڵگەدا، هەر ئەمەش وایكردووە هەندێك جار دەبینین گەنج یاخی دەبێت.
بەپێی سەرچاوە زانستییەكان، قۆناغی تەمەنی گەنجی خۆی لە دوو دینگەی سەرەكیدا دەبینێتەوە، كە ئەوانیش هێز و حیكمەتە. هەر لەبەر ئەوەشە ئەم قۆناغەی تەمەن بە گرنگترین قۆناغەكانی ژیان دادەنرێت بۆ خودی خۆی و كۆمەڵگەكەشی.
لە رووی زانستییەوە چەندین خاڵی گرنگ هەن لە گەنجدا كە جیاواز دەردەكەون، ئەوانیش:
یەكەم: خاوەنی ئیرادەیەكی بەهێزن. لێرەدا دەركەوتووە كە گەنج بەردەوام ئیرادەیەكی بەهێزی هەیە لە پێكانی ئامانجەكانی و بەردەوامە و كۆڵنادات.
دووەم: چالاك و بەهێزە. لە ژیانیدا چالاكە و خاوەنی جوڵەیەكی بەرچاوە لە هەر ئەركێك پێی بسپێردرێت.
سێیەم: لەڕووی جەستەییەوە بەهێزە. ئەو بەهێزییەی وای لێدەكات هەست بە ماندووبوون نەكات.
چوارەم: حەزی بە سەركێشی و تاقیكردنەوە هەیە. بەهۆی سەركێشییە ئەرێنییەكانییەوە توانای نوێگەری و بەدواداگەڕانی هەیە.
پێنجەم: خاوەنی خەونی گەورە و بونیادنانی خودی هەیە، لەبەرئەوەی بەردەوام خەونی گەورەی هەیە لە بونیادنانی خۆیدا، هەر بۆیە سڵ ناكاتەوە لە بەدەستهێنانی خەونەكانی و بێ دوودڵی هەنگاو دەنێت.
لەبەر ئەو خاڵانەی باسمانكرد، بێگومان دەبینین كە گەنج رۆڵی گرنگی هەیە لە كۆمەڵگەدا، یەكێك لەو رۆڵە گرنگانەش گرنگیدانێتی بە بەشداریی سیاسی، وەك بەشداریكردنی لە پڕۆسەكانی هەڵبژاردندا. لە زۆربەی كۆمەڵگەكاندا بەردەوام گەنج براوەی هەڵبژاردنەكانە.
هەروەها گەنج توانای بەهێزە لە دەرخستنی رۆڵی خۆی لە بوارە خۆبەخشییەكان و توانیویەتی جێدەستی دیار بێت، بەمەش متمانەی بەخودی خۆی زیاتر دەبێت.
دەتوانین زۆر رۆڵی دیكەی گەنجان باس بكەین لە بوارەكانی خزمەت بە دەوروبەر و نیشتمان و ئەو كەس و لایەنانەی كە پێویستیان پێیان دەبێت، هەر بۆیە لە هەر كۆمەڵگەیەكدا گرنگی بە گەنجان بدرێت ئەو كۆمەڵگەیە لە رووی سیاسی و ئابووری و كۆمەڵایەتییەوە كۆمەڵگەیەكی سەركەوتووە.
كەواتە ئەگەر سەركەوتنی كۆمەڵگەكان بەستراوەتەوە بە توێژێكی گرنگی وەك گەنجان و پێویست دەكات لە خۆمان بپرسین، بۆ دەبێت كار لەسەر ئەم توێژە نەكەین لە دەرخستنی هێز و توانا و داهێنانەكانیاندا؟
دەبێت بپرسین بۆ دەبێت لە كۆمەڵگەدا پشت ئەستوور نەبین بە تواناكانیان و تەنها لە پڕۆسەی هەڵبژاردنەكاندا روویان لێ بنێین لە بەرامبەر بەدەستهێنانی دەنگیان؟ ئەی بۆ نەپرسین ئەگەر هێندە پشت ئەستوورین بە توێژی گەنجان و داوای دەنگیان لێدەكەین، بۆ گەنج وا تۆی سیاسی ببینێت كە پشتگوێی دەخەیت؟ ئەگەر ئەم پرسیارانە وەڵامی نەبێت بۆ ئەم توێژە گرنگە، بێگومان كۆمەڵگە و لەسەروو هەموو ئەمانەشەوە سیاسییەكان باجی گەورە دەدەن و بێمتمانەیی گەنجان بە دەسەڵاتی سیاسی، كۆمەڵگە بەرەو داڕمانێكی گەورە دەبات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*