سەرەکی » چاوپێکه‌وتن » ژیانێكی پڕ نه‌هامه‌تی،ژنێك پڕاوپڕ له‌ خه‌بات

گفتوگۆی نه‌رمین عوسمان له‌گه‌ڵ خاتوو فاتمه‌ فه‌تاح

ژیانێكی پڕ نه‌هامه‌تی،ژنێك پڕاوپڕ له‌ خه‌بات

چەند ژنە کەسایەتییەکی ناسراو لە مێژووی کورددا هەن کە لەبواری جیاجیادا کەسانی لێوەشاوەو چالاک بوون، بەڵام هەرگیز ئەو چالاکییانەیان نەکردووەتە بانگەشەو کایەیەک بۆ خۆناساندن، لەوبارەیەوە لە ماوەی رابردوودا خاتوو نەرمین عوسمان کە بۆ خۆشی ژنێکی چالاکی بواری پەروەردەو تێکۆشەرێکی کایەی سیاسیشە زنجیرەیەک سەردان و بەسەرکردنەوەی دەستپێکردووە بۆ گفتوگۆو هەڵدانەوەی لاپەڕە پرشنگدارەکانی ژیان و کارو چالاکیی ئەو خانمانەی کوردستان کە وەک سەربازی ون خزمەتێکی زۆریان بە چەند نەوەیەک کردووە لە بواری جیاجیادا، بەڵام نەوەی نوێ وەک پێویست ئاشنا نییە بە بەخشش و کۆششە مرۆڤدۆستامەکانیان، بۆیە بەسوپاسەوە خاتوو نەرمین پوختەی ئەو گفتوگۆیانە و ئەرشیفی وێنەو بیرەوەرییەکانی ئەو خانمە چالاکوانانە دەنووسێتەوەو بۆ دەربازکرنیشیان لە فەوتان و لەبیرچوونەوە، پێشکەشی کوردستانی نوێ-ی دەکات و کوردستانی نوێش ناوبەناو وێنەکان و چیرۆکی ژیانی پڕ بەخششی ئەو کەسایەتییانە بڵاودەکاتەوە.

گفتوگۆی ئه‌م جاره‌ له‌گه‌ڵ ژنێكدایه‌ كه‌ چاوه‌كانی پڕبوون له‌ ره‌نگی عیشقی وڵاتێك تاڵی پرچه‌ سپییه‌كه‌ی هه‌ڵگری مێژووی نه‌هامه‌تی و قوربانیدانی نه‌ته‌وه‌یه‌ك و شارێك بوو، سه‌رپۆشه‌ سپیه‌كه‌ی نیشانه‌ی مێژووی ژنی كوردی ئاشتیخواز بوو، ژنێك كه‌ چرای تێكۆشانی به‌ده‌سته‌وه‌ گرتبوو و ده‌رگا به‌ده‌رگای ماڵانی لێده‌دا بۆئه‌وه‌ی هاوڕێكانی له‌چوار دیواری قه‌تیس كراو بهێنێته‌ ده‌ره‌وه‌ بۆ داكۆكیكردن له‌ مافی خۆیان و نه‌ته‌وه‌كه‌یان. ژنێك له‌ ده‌نگه‌ زوڵاڵه‌كه‌ی و نیگای چاوه‌كانییه‌وه‌ باوه‌ڕبه‌خۆبوونه‌كه‌ی به‌ئاشكرا به‌دی ده‌كرێت، ئه‌و ژنه‌ش خاتوو فاتمه‌ فه‌تاح عه‌بد محه‌مه‌د-ه‌ كه‌ هاوسه‌ری حه‌مه‌ پایه‌ده‌ره‌. ئه‌و ته‌واره‌ له‌ساڵی 1938 له‌ هه‌ڵه‌بجه‌ له‌دایك و باوكێكی هه‌ڵه‌بجه‌یی له‌دایكبووه‌، خۆی خۆی فێری خوێندنه‌وه‌ كردووه‌و نه‌چووه‌ته‌ قوتابخانه‌.
ئه‌م گفتوگۆیه‌مان له‌ ماڵی كاكه‌ سه‌رخێڵی كوڕی له‌گه‌ڵدا كرد و سه‌ره‌تا لێم پرسی كه‌ چۆن چووته‌ ناو كاری سیاسه‌ته‌وه‌ و هۆكار چی بوو و كارو چالاكیه‌كانیان چی بووه‌؟
خاتوو فاتمه‌ به‌ وردی ده‌ستی به‌ گێڕانه‌وه‌ كرد و ده‌ڵێت:»له‌ساڵی 1958 پاش رووخانی رژێمی پاشایه‌تیی عیراق، ئه‌وكات ئێمه‌ دراوسێی ماڵی كه‌مال خه‌فاف بووین ، ئه‌وكاته‌ش كه‌مال خه‌فاف ئه‌ندامی ناوچه‌ی پارتی دیموكراتی كوردستان بوو، شه‌وێك كاك كه‌مال و عه‌ینه‌ خانی هاوسه‌ری هاتنه‌ ماڵه‌وه‌، داوایان لێكردم بچم ئیشیان له‌گه‌ڵدا بكه‌م و بچمه‌ ناو پارتییه‌وه‌و له‌وێوه‌ كاری سیاسی بكه‌م. هه‌روه‌ها وتی: ئاماده‌یی خۆمم ده‌ڕبڕی. چونكه‌ دڵنیابووم له‌وه‌ی هاوسه‌ره‌كه‌م پیاوێكی رۆشنبیربوو، باوه‌ڕی به‌ ئازادیی ژن هه‌بوو، هه‌رگیز رێگریی لێ نه‌كردووم، به‌ڵكو پاڵپشتیشم بووه‌.

سه‌ره‌تاكانی چالاكیی سیاسی
روونیشیكرده‌وه‌ كه‌ دوای (2-3) رۆژ چوومه‌ سه‌ردانی و كۆكردنه‌وه‌ی ژنان، له‌ رازیكردنی زۆربه‌یاندا سه‌ركه‌وتووبووم ، ئه‌و ژنانه‌ی باسیان ده‌كه‌م هه‌موویان هاتنه‌ رێزه‌كانی پارتییه‌وه‌ و كه‌وتنه‌ چالاكی له‌وانه‌ش: مه‌قبوله‌، كه‌ ژنێكی لێهاتوو بوو، هاوسه‌ره‌كه‌ی كادر بوو، خێزانێكی زۆر كورد په‌روه‌ربوون، یه‌كێك له‌ كوڕه‌كانی مه‌قبوله‌ خان به‌ ناوی (عوسمان) ئه‌و كه‌سه‌ بوو كه‌ فڕۆكه‌یه‌كی له‌ تارانه‌وه‌ به‌ره‌و به‌ریتانیا رفاند، هه‌روه‌ها خاتوو نه‌سرین، هاوسه‌ری ئه‌حمه‌د غوڵام و پاكیزه‌ خانی عه‌لی كاتب، كافیه‌ خانی هاوسه‌ری عومه‌ری خه‌زان، خورشیده‌ بابان، به‌هیه‌ خانی براژنی زۆرابی حه‌مامچی، مه‌حبوبه‌خان ئامۆژنی دكتۆر فوئاد بابان ، ته‌یبه‌خان هاوسه‌ری حه‌مه‌ نوری حاجی ئه‌مین، حه‌پسه‌ خانی هاوسه‌ری جه‌لالی عه‌زه‌و خوشكی ره‌ئووف ره‌حیم، ئه‌خته‌رخانی حاجی ئه‌حمه‌د، ئافتاوخانی كچی حامی به‌گ، روبابه‌ خانی هاوسه‌ری سه‌ڵاح به‌گی حامی به‌گ، ئایشه‌ خانی هاوسه‌ری سه‌ید حه‌سه‌نی به‌رزنجی، سه‌بیحه‌ خانی هاوسه‌ری سه‌ید حه‌سه‌نی مه‌ولانه‌، فاتمه‌خانی خێزانی نوری به‌گ، ئافتاوخانی هاوسه‌ری له‌تیف قادر، مامۆستا دره‌خشان برایم، ناهیده‌خانی كچی داود به‌گی عه‌بابه‌یلێ ، خه‌دیجه‌خانی هاوسه‌ری خالید باقی و …… هتد. ئیتر هه‌ركه‌سێك بمزانیایه‌ باشه‌و ئاماده‌یی تێدایه‌ روومان تێ ده‌كرد.
له‌وه‌ڵامی ئه‌وه‌شدا كه‌ لێم پرسی بۆ زۆربه‌ی ئه‌و ژنانه‌ به‌ناوی هاوسه‌ره‌كانییه‌وه‌ ناویان ده‌به‌ی؟ وتی» ئه‌وسا وا باوبوو به‌وه‌ زیاتر ده‌ناسرانه‌وه‌ و وتیشی: بۆ نه‌ورۆزی ساڵی (1961) سه‌یرانێكمان سازكرد له‌ رێٍگای عه‌بابه‌یڵی كه‌ ئێستا شه‌هیدانه‌، زۆربه‌ی ژنه‌كان ئاماده‌بوون و له‌وێ جلێكی كوردیم وه‌ك ئاڵای كوردستان له‌به‌ردابوو كه‌ خاتوو خه‌دیجه‌ بۆی دووریبووم، ئه‌وه‌ش یه‌كه‌مجار بوو شتێكی له‌وجۆره‌ بكرێت.
هه‌روه‌ها وتی: «ئه‌و خاتوونانه‌ی ناوم هێنان و ئه‌وانه‌ی ناویشم نه‌هێناوه‌، هه‌ندێكیان لایه‌نگرو هه‌ندێكیشیان پاڵێوراو و هه‌ندێكیشیان بوونه‌ ئه‌ندام.
وتیشی: ئه‌و سه‌رده‌مه‌ به‌ ئه‌ندامبوون كارێكی ئاسان نه‌بوو، ده‌بوایه‌ چه‌ند قۆناغێكی زۆر ببڕین، ئه‌وسا ده‌بووینه‌ ئه‌ندام.
روونیشیكرده‌وه‌ كه‌ له‌و ژنانه‌ی به‌رده‌وام پێكه‌وه‌ بوون و چالاكییه‌كان و سه‌ردانه‌كانیان پێكه‌وه‌ كردووه‌، دوو خوشك بوون له‌میعه‌ خان و لوتفی خان كه‌ به‌رده‌وام یه‌كێك له‌ چالاكییه‌كانیان كۆكردنه‌وه‌ی ئابوونه‌بووه‌، هه‌روه‌ها ده‌ڵێت: ئابوونه‌كان زۆربه‌ی له‌ نێوان (30-50)فلسدا بوو، هه‌ندێك ژنیش كه‌ ئابوورییان باش بوو، یه‌ك دیناریان ده‌داینێ، له‌وانه‌ (رووناك خانی) دایكی د.به‌رهه‌م و پاكیزه‌خانی هاوسه‌ری حاكم مسته‌فا، لویزه‌ خانی هاوسه‌ری شێخ غه‌ریب و….هتد.

كۆكردنه‌وه‌ی ئابوونه‌ و جلوبه‌رگ بۆ شۆڕش و پێشمه‌رگه‌
روونیشیكرده‌وه‌ كه‌ رووناك خانی دایكی دكتۆر به‌رهه‌م جلی كوردیی پێشمه‌رگه‌ی ئاماده‌ ده‌كردو ده‌یدا به‌ من، منیش ره‌وانه‌ی ناو پێشمه‌رگه‌م ده‌كردن. ئابوونه‌كانم كۆده‌كرده‌وه‌و ده‌مبرده‌ سلێمانی بۆ ماڵی باجی خانم –ی هاوسه‌ری شێخ محه‌مه‌د كه‌ كاتی خۆی شێخ محه‌مه‌د، زۆر دۆستی مه‌لا مسته‌فا بوو، له‌وێشه‌وه‌ ده‌مبرده‌ ماڵی خاتوو به‌هیه‌ مه‌عروف، ئه‌ویش ده‌ینارد بۆ پێشمه‌رگه‌.
له‌وباره‌یه‌شه‌وه‌ ئاماژه‌ی به‌وه‌ كرد كه‌ ئابوونه‌كانیان ده‌كرد به‌ لیست و هه‌ندێك جاریش داویانه‌ به‌ به‌رپرسه‌كه‌یان كه‌ كاك كه‌مال خه‌فاف بووه‌‌و هه‌ر ئه‌ویش كۆبوونه‌وه‌ی پێكردوون و هه‌ندێ جاریش داویانه‌ به‌ مه‌لا له‌تیف بامۆكی كه‌ په‌ری خانی هاوسه‌ری ئه‌ویش زۆر چالاك بوو.
هه‌روه‌ها ده‌ڵێت: هه‌ندێك لایه‌نگریشمان هه‌بوو وه‌ك ناهیده‌ی سه‌عید خه‌ڵه‌ف ، دایكی شه‌هید سه‌ردار، قومری خانی هاوسه‌ری حه‌مدی فه‌ره‌جی نانه‌وا، شه‌مسه‌خانی كچی مامه‌ ره‌شه‌ ته‌شاری، (داده‌ سوبیه‌ی هاوسه‌ری ره‌شه‌ میرووچه‌كه‌ كه‌ له‌ بامۆك نیشته‌جێ بوون، فاریعه‌ و شه‌مسه‌ی مام مه‌ولود كه‌ ئه‌وانیش له‌ نه‌ورۆڵ بوون.
وتیشی: «ئابوونه‌ی شانه‌كانی لای من له‌ هه‌موویان زیاتر بوو، هه‌روه‌ك گێڕایه‌وه‌ كه‌ جارێكیان لیژنه‌ی ناوچه‌ داوایان لێكردوون كه‌ ئابوونه‌ كۆبكه‌نه‌وه‌و تا ئۆتۆمبێلێكی جۆری جێبی پێ بكڕین به‌ مه‌به‌ستی گواستنه‌وه‌ی بڵاوكراوه‌كان بۆ لای هێزی پێشمه‌رگه‌ و وتیشی: پێشتر به‌پێ له‌ گه‌ڵاله‌وه‌ بۆ (زمناكۆ) و حاجی ئۆمه‌ران ده‌نێردران ، ئیتر پاره‌مان كۆده‌كرده‌وه‌ و به‌پێی توانا پاره‌ی شانه‌كه‌ بوو به‌ حه‌وت دینارو نیو و دام به‌ ناوچه‌. وتیشی: هه‌ر بۆخۆشی بۆت باس ده‌كه‌م: «شه‌مسه‌ی ژن خوشكی حه‌مه‌ی فه‌رج كه‌ مه‌یلی شیوعییه‌تی هه‌بوو، پرسی ئه‌وه‌ تۆ و مه‌قبول خه‌ریكی چین ئه‌و هه‌موو جموجۆڵه‌ ده‌كه‌ن؟ وتمان به‌ ته‌ماین ئۆتۆمبێلێك بكڕین بۆئه‌وه‌ی ژنان كه‌لوپه‌لی پێ بگوێزینه‌وه‌ بۆ سه‌یران و خورماڵ. هه‌موو ساڵێك چاوه‌ڕێ بوو به‌ سه‌یاره‌ بچین، هه‌ر نه‌یبینی، ئیتر دواتر ئاشكرابوو بۆ چیی بووه‌».
له‌میانه‌ی گفتوگۆكه‌مان و وتی: «سێ ساڵ كرام به‌ لێپرسراوی ئافره‌تان له‌ هه‌ڵه‌بجه‌ و شه‌مسه‌ی برا خاس، شه‌وبۆی مه‌لا سووره‌، گه‌لاوێژی میرزا برایم و رووناكی مه‌لا عه‌لی، هه‌موومان كاری رێكخراوی ئافره‌تانمان ده‌كرد».

له‌سه‌رده‌می كۆمارییه‌وه‌
روونیشیكرده‌وه‌ كه‌ له‌ساڵی 1985 ناهیده‌ی شێخ سه‌لام هاته‌ هه‌ڵه‌بجه‌ و حزب جوابی بۆ ناردین تا بچین بۆ به‌ خێرهاتنی و له‌وێوه‌ به‌ لویزه‌خاندا كه‌ ئه‌وسا ده‌ستگیرانی معاون كه‌مال بوو نامه‌یه‌ك بۆ كاك كه‌مال بنیرێت كه‌ پێنجوین راده‌ستی پێشمه‌رگه‌ بكات، چونكه‌ گیرابوو و ته‌سلیمی ناكات، لویزه‌ خانیش نامه‌یه‌كی جوانی بۆ نووسی و دوای ئه‌وه‌ پێنجوینی ته‌سلیم كرد.
هه‌روه‌ها وتی: «ناهیده‌ی شێخ سه‌لام داوایكرد شوێنێك بگرین وه‌ك باره‌گایه‌ك بۆ كۆبوونه‌وه‌، ئێمه‌ش ژوورێكمان له‌ژێرزه‌مینی ماڵێكدا گرت كه‌ له‌نێوان دوكانه‌كانی (باته‌و دیجله‌)دا بوو، هه‌ر كه‌سه‌ له‌ماڵه‌كه‌ی خۆی حه‌سسیر و دۆشه‌كی برد و (ناهیده‌ خان ) هات و كۆبوونه‌وه‌ی پێكردین.
وتیشی: له‌و چالاكییانه‌ی دیكه‌ كه‌ ده‌مان كرد، كۆكردنه‌وه‌ی كۆمه‌ك بوو بۆ پێشمه‌رگه‌. به‌ توره‌كه‌وه‌ به‌سه‌ر ماڵاندا ده‌گه‌ڕاین بۆ كۆكردنه‌وه‌ی زه‌خیره‌ و وشكه‌. له‌ (1960-1961) ئارده‌كانمان ده‌كرد به‌نان و وشكه‌كانیشمان به‌هۆی ئه‌حمه‌دی حه‌مه‌ ساڵحه‌وه‌ ده‌نارده‌ شاخی زمناكۆ، تا ساڵی (1964) به‌و جۆره‌ چالاكییه‌ جیاجیاكانمان به‌رده‌وام بوون.

كه‌ مام جه‌لال هات بۆ هه‌ڵه‌بجه‌
هه‌روه‌ها ده‌ڵێت: «له‌ نێوان (1963- 1964) چووینه‌ ته‌وێڵه‌ و گه‌ڕاینه‌وه‌ بۆ هه‌ڵه‌بجه‌، له‌ ساڵی (1964) مام جه‌لال هاته‌ هه‌ڵه‌بجه‌، له‌ مزگه‌وتی پاشا قسه‌ی بۆ پیاوه‌كان ده‌كرد، ده‌رباره‌ی حوكمی زاتی «ئۆتۆنۆمی»، هه‌ر له‌و كاته‌دا مام جه‌لال داوای له‌ یه‌كێتیی ئافره‌تان كرد كه‌ شوێنێكی بۆ دابین بكه‌ین بۆ چاوپێكه‌وتن و قسه‌كردن بۆ ژنان. ئێمه‌ش قوتابخانه‌ی حه‌مدوونمان ئاماده‌ كرد لای كۆڵانی ته‌نگ.
مام جه‌لال له‌وێ قسه‌ی بۆ كردین، عه‌بدولوه‌هاب ئه‌تروشی، شێخ حه‌مه‌ ئه‌مین، شێخ عه‌وڵا، حه‌مه‌ی فه‌ره‌ج و خه‌ڵكێكی زۆری تری له‌گه‌ڵدا بوو، له‌وێ من و مه‌قبوله‌ خان وێنه‌یه‌كه‌مان له‌گه‌ڵ مام جه‌لالدا گرت و ده‌ستمان له‌ ملی كردبوو، ئه‌و وێنه‌یه‌ بوو به‌ هۆی ئه‌وه‌ی خه‌ڵك زۆر هه‌ست بكه‌ن بووبین به‌ باڵێ مه‌كته‌بی سیاسی، دوای جیابوونه‌وه‌یان له‌ پارتی دیموكراتی كوردستان، ماوه‌یه‌ك وازم له‌ كارو چالاكی هێنا، زۆربه‌ی ژنه‌كان وه‌ك من وازیان هێنا، تا ساڵی (1974) كه‌ شۆڕش به‌رپا بووه‌وه‌، ئێمه‌ش چووین بۆ ئێران و دوای هه‌ره‌سی شۆڕشیش له‌ ساڵی (1975) گه‌ڕاینه‌وه‌ كه‌ له‌ رێگا ده‌مبینی چه‌ك له‌سه‌ر جاده‌كان فڕێدراون و پێشمه‌رگه‌ باوكه‌ڕۆیانه‌ و ده‌گرین، ئه‌و ساته‌ بڕیارمدا ئه‌گه‌ر جووڵه‌یه‌كی بچووكیش هه‌بێ و شۆڕش به‌رپا بكاته‌وه‌، ئاماده‌م كاریان له‌گه‌ڵدا بكه‌م.

له‌پارتییه‌وه‌ بۆ كۆمه‌ڵه‌‌و یه‌كێتی
تازه‌ رێكخستنه‌كانی كۆمه‌ڵه‌ كه‌وتبوونه‌ جموجۆڵ، له‌ساڵی (1976) خه‌ڵكێكی زۆریان گرتبوو له‌ ئه‌منی هه‌ڵه‌بجه‌، زۆریان ئه‌شكه‌نجه‌ ده‌دان، خه‌ڵكی گه‌ڕه‌كه‌كه‌ زۆریان له‌تاو هاواری زیندانییه‌كان گه‌ڕه‌كه‌كه‌یان چۆڵ كردبوو، هه‌ر له‌وكاته‌دا، نیوه‌ڕۆیه‌ك له‌ساڵی (1976) شه‌هید عه‌لی شیعه‌ خۆی كرد به‌ ماڵمانداو چووین به‌پیرییه‌وه‌، پێی وتین: «ده‌بێت له‌گه‌ڵ (مه‌قبوله‌) رێكخستن بۆ كۆمه‌ڵه‌ دروستبكه‌ن»، منیش پرسیم «ئینجا بوێرین ئه‌و كاره‌ بكه‌ین؟» له‌وه‌ڵامدا وتی: خۆ نه‌موتووه‌ بچنه‌ سه‌ربانی سه‌را هاوار بكه‌ن بلێن ئێمه‌ كۆمه‌ڵه‌ین»، به‌ڵام وتی: «ئه‌وه‌ نامه‌ی مام جه‌لاله‌ بۆ دروستكردنه‌وه‌ی شۆڕش»، ئیتر وه‌ك به‌ڵێنێك ده‌ستمان كرد به‌ رێكخستن .
له‌ مانگی (9/1976) من و مه‌قبوله‌ و دره‌خشان و باوكی و براكه‌ی له‌ ئه‌منی هه‌ڵه‌بجه‌ گیراین و كه‌وتینه‌ به‌ر لێكۆڵینه‌وه‌ و پرسیاره‌وه‌، له‌ سه‌ر راپۆرتێكی سیخوڕی بوو كه‌ كه‌سێك بوو به‌ناوی «گ.ك»، هه‌رچه‌نده‌ زۆربه‌ی قسه‌كان هه‌ڵبه‌سترابوون، (20) رۆژ له‌ ژێر لێكۆڵینه‌وه‌دا ماینه‌وه‌، به‌ رۆژ له‌ ئه‌من بووین و شه‌وانیش ژنه‌كانیان ده‌برده‌ ماڵی موختار، كه‌سێك له‌ ئه‌منه‌كان كه‌ نه‌قیب بوو به‌ ناوی (عه‌بدول) زۆر باش بوو بۆمان، خه‌ڵكی هه‌ڵه‌بجه‌ زۆریان پێ ناخۆش بوو، ئه‌وه‌ یه‌كه‌مجار بوو ژن بگیرێت، زۆر كه‌س ده‌هاتن ده‌یانویست ببن به‌ كه‌فیلمان، به‌ڵام هیچمان نه‌دا به‌ ده‌سته‌وه‌و له‌ سه‌رمان نه‌بوو به‌ ماڵ. ئیتر به‌ریانداین، به‌ڵام له‌ ژێر چاودێریی سیخوڕه‌كاندا بووین له‌ ده‌ره‌وه‌ش. به‌ڵام نه‌یانتوانی له‌كارو چالاكیه‌كانمان بمانوه‌ستێنن. له‌ساڵی (1985) هاتینه‌ سلێمانی و له‌ سلێمانیش راسته‌وخۆ له‌گه‌ڵ شه‌هید مه‌عروف كارم ده‌كرد، چونكه‌ پێشتر یه‌كترمان باش ده‌ناسی، به‌نهێنی كارمان ده‌كرد تا راپه‌ڕین.
ئینجا هاته‌ سه‌ر باسی خه‌باتی ئاشكرای دوای راپه‌ڕین ‌و وتی: ئیتر ده‌ستمكرد به‌كار له‌ یه‌كێتی ژنان و به‌ئاشكراو له‌ناو یه‌كێتی ژناندا ئه‌ندام كه‌رتی ژنان بووم.

له‌كاری رێكخراوه‌ییه‌وه‌ بۆ هێزی ژنان
كاتێك هێزی ژنانیش دامه‌زرا، یه‌كه‌م كه‌س بووم كه‌ بووم به‌ پێشمه‌رگه‌، خاتوو (كوێستان محه‌مه‌د) فه‌رمانده‌مان بوو، دوای ئه‌و ناهیده‌ خان بوو به‌ فه‌رمانده‌مان، به‌ڵام به‌هۆی ئه‌وه‌ی نه‌ده‌بووایه‌ منداڵ ببه‌ین له‌گه‌ڵ خۆماندا، به‌ناچاریی له‌به‌ر منداڵه‌كانم وازم له‌ هێزی ژنان هێنا.
له‌وه‌ڵامی پرسیارێكیشدا سه‌باره‌ت به‌وه‌ كه‌ له‌ كاتی كیمیابارانی هه‌ڵه‌بجه‌دا له‌ كوێ بووه‌و چییان به‌سه‌ر هاتووه‌؟ وتی: «له‌ كاتی بۆمبارانی كیمیایی بۆ سه‌ر هه‌ڵه‌بجه‌ ئێمه‌ له‌ سلێمانی بووین، به‌ڵام دایكم و خوشكم و برازام و براژنم بوون به‌ قوربانی له‌و كاره‌ساته‌داو ماڵی شووبراكه‌م شه‌ش سه‌ر خێزانیان له‌ناوچوون و جگه‌ له‌خزمێكی زۆر، ماڵه‌كه‌شمان رووخاو دوای ئه‌وه‌ش تاڵانكراو هیچمان بۆ نه‌مایه‌وه‌، له‌ بری ئه‌وه‌ش هیچیمان وه‌رنه‌گرتووه‌ته‌وه‌.»
له‌كۆتایی گفتۆگۆكه‌ماندا خاتوو فاتمه‌ وتی «ته‌نها دوو ساڵه‌ وازم له‌ چالاكیی هێناوه‌، ئه‌ویش دڵم ئێشاوه‌ به‌ هۆی پشتگوێخستنی رێكخستن بۆ كادره‌كانی، به‌ تایبه‌تی بۆ ئێمه‌ كه‌ له‌ رۆژه‌ ره‌شه‌كاندا له‌پێشی پێشه‌وه‌ بووین و زه‌حمه‌تی زۆرمان بینیووه‌».
وتیشی: «تائێستا (5) پێنج خه‌ڵاتی رێزلێنانمان وه‌رگرتووه‌، له‌وانه‌ خه‌ڵاتی چالاكیی ژنان، ئه‌حمه‌د موختار جاف، مه‌ڵبه‌ندی سلێمانی و هێزی پێشمه‌رگه‌».

سه‌ره‌نجام
ئه‌و خاتوونه‌ ماندوو نه‌ناسه‌ له‌كاتی گێڕانه‌وه‌ی سه‌رگوزشته‌كه‌یدا، وای هه‌ست ده‌كرد كه‌ له‌و ساتانه‌ی ئه‌و سه‌رده‌مه‌دا ده‌ژی و نه‌ده‌وه‌ستا بۆئه‌وه‌ی بیره‌وه‌ریی بیربكه‌وێته‌وه‌، ته‌نها ئه‌گه‌ر هه‌موو ئه‌و ناوانه‌م بنووسیایه‌ (10) لاپه‌ڕه‌یه‌كی ده‌كرد، هه‌ر ئه‌وانه‌ بوون ئه‌م رۆژه‌یان دروستكرد، هیوام وایه‌ ئه‌و جۆره‌ ژنه‌ رچه‌ شكێن و چالاكانه‌ نموونه‌یان زۆرتر بێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ژنێک لە سلێمانی و ناو دڵی رێکخستنەکانەوە بۆ لۆس ئەنجلۆس

چەند ژنە کەسایەتییەکی ناسراو لە مێژووی کورددا هەن کە لەبواری ...