سەرەکی » ئاراستە » ئه‌و رۆژانه‌ی هه‌میشه‌ له‌ یاد ناچن

ئه‌و رۆژانه‌ی هه‌میشه‌ له‌ یاد ناچن

فه‌رهاد عه‌ونی

سه‌ره‌تای ساڵانی شه‌سته‌كانی سه‌ده‌ی رابردوو بوو كه‌ ته‌مه‌نم له‌نێوان (14-15) ساڵیدا بوو له‌و سه‌روبه‌نده‌دا شۆڕشی 14ی گه‌لاوێژی ساڵی 1958 كه‌ پێش دوو ساڵێك روویدابوو كه‌شوهه‌وایه‌كی دیكه‌ له‌ عیراق و كوردستاندا هاتبووه‌ ئاراوه‌ به‌تایبه‌تیش بۆ كه‌سایه‌تی و ئه‌و خێزانانه‌ی كه‌ پێشووتر كه‌وتبوونه‌ نێو دونیای كاری سیاسی و نیشتمانی دیارده‌كانی ئه‌و سه‌رده‌مه‌ بریتی بوون، له‌ ململانێی نێوان پارتی دیموكراتی كوردستان و حزبی شیوعیی عیراق، زۆربوون و بڵاوبوونه‌وه‌ی گۆڤار و رۆژنامه‌ی كوردی و خوێندنه‌وه‌یان، به‌ربڵاویی كۆڕ و كۆبوونه‌وه‌ی جه‌ماوه‌ری له‌ هۆڵ‌ و شوێنه‌ گشتییه‌كان كه‌ زۆر جار ده‌مه‌قاڵی و قسه‌ی توندی لێ په‌یدا ده‌بوو، سه‌ره‌ڕای خۆپیشاندانه‌ جه‌ماوه‌رییه‌كان به‌بۆنه‌ تازه‌ و كۆنه‌كاندا، له‌و كه‌شوهه‌وا و بارودۆخه‌ خێزانی ئێمه‌ (كه‌ عه‌ونیی باوك) ئه‌ركی لێپرسراوێتیی ژیان و پێگه‌یاندنی ئێمه‌ی له‌ ئه‌ستۆدابوو سه‌ره‌ڕای ئه‌ركه‌كانی رۆژانه‌ی، به‌ڵام هه‌میشه‌ رۆژنامه‌ و گۆڤاره‌كانی لێ نه‌ده‌بڕا كه‌ له‌ سه‌رده‌می فه‌رمانڕه‌وایی پاشاییش دا هه‌ندێ له‌و گۆڤار و رۆژنامه‌ كوردی و عه‌ره‌بییانه‌ی كه‌ ئه‌وكاته‌ ده‌رده‌چوون له‌ كتێبخانه‌كه‌ی باوكم حزووریان هه‌بوو وه‌ك (البلاد، الزمان، التقدم، ژین، هه‌تاو، هیوا) سه‌ره‌ڕای كتێبخانه‌یه‌كی ده‌وڵه‌مه‌ند كه‌ تێیدا دیوانی زۆربه‌ی شاعیرانی كورد كه‌ هه‌ندێكیان به‌ ده‌ستنووس و هه‌ندێكیشیان به‌ چاپكراوی له‌گه‌ڵ‌ سه‌رجه‌م گۆڤاری گه‌لاوێژی هه‌ر 10 ساڵه‌كه‌دا كه‌ تێیدا عه‌ونی له‌ قۆناغێكدا باوه‌ڕپێكراوی ئه‌و گۆڤاره‌ بووه‌ له‌ كۆیه‌ و بابه‌تی تێدا بڵاوكردۆته‌وه‌.
له‌ كه‌شوهه‌وای خێزانێكی خوێنده‌وار بارودۆخی سیاسیی ئه‌و سه‌رده‌مه‌ ماوه‌یه‌ك بوو هه‌ر له‌ پۆلی پێنجه‌می سه‌ره‌تاییه‌وه‌ خولیای خوێندنه‌وه‌م ده‌ستیپێكردبوو چ له‌ ماڵه‌وه‌ به‌هۆی كتێبه‌كانی باوكم و چ له‌ ده‌ره‌وه‌ له‌گه‌ڵ‌ چه‌ند براده‌رێكی هاوته‌مه‌نم سه‌ردانی كتێبخانه‌ی گشتیی كۆیه‌مان ده‌كرد، بۆیه‌ كاتێ قۆناغی سه‌ره‌تاییم بڕی و كه‌شوهه‌وای كوردستان له‌دوای شۆڕشی 14ی گه‌لاوێژه‌وه‌ گۆڕانكاریی گه‌وره‌ی به‌خۆیه‌وه‌ بینی و تینی زیاتری به‌ خوێندن و خوێندنه‌وه‌م دا، چ رۆژنامه‌ و چ گۆڤاره‌ كوردییه‌كان، زۆر شت هه‌یه‌ به‌پێی مێژوو كاریگه‌رێتی له‌مێشكدا ده‌مێنێ و ناسڕێته‌وه‌، خوێندنه‌وه‌ی (حیكایه‌تی زادیج) وه‌كو یه‌كه‌م بابه‌تی درێژ به‌ كوردی و پاشان (مه‌م و زین)ـی محه‌مه‌د سه‌عید ره‌مه‌زان بۆتانی به‌ زمانی عه‌ره‌بی له‌ یاده‌وه‌ره‌كانی به‌ زیندویی ده‌مێننه‌وه‌، له‌ هه‌مان كاتیشیدا چیرۆكی (زڕه‌ی زنجیر و شه‌هیدانی قه‌ڵای دمدم)ـی كاكه‌ مسته‌فا ساڵح كه‌ریم و (چای شیرینی) حسێن عارف و (خانزاد و له‌شكری-ویستم ژن بێنم)ـی محه‌مه‌د تۆفیق وردی و (نامه‌ی سه‌ربازێكی سۆڤێتی بۆ دایكی) كه‌ ئه‌كره‌م عه‌بدولقادر وه‌ریگێڕابوو، ئه‌مانه‌ و هه‌ندێ نووسینی مامۆستایانی دیكه‌ زاده‌ی بیر و خوێندنه‌وه‌ی ئه‌و سه‌رده‌مه‌م بوون، كه‌ هه‌ریه‌ك له‌و ناوانه‌ ئاشنایه‌تیم له‌گه‌ڵدا په‌یدا كردن به‌ جۆرێك كه‌ هه‌ریه‌كه‌ و چیرۆكێكی جیاوازی هه‌یه‌، چ له‌ رووی سیاسی دا و چ له‌ باره‌ی دۆستایه‌تی و كاری هاوبه‌ش كه‌ تێیدا لێك تێگه‌یشتن و به‌رده‌وامیی لێك تێگه‌یشتنمان پاڵپێوه‌نه‌ری ئه‌و دۆستایه‌تییه‌ی به‌رده‌وام هێشتبۆوه‌ كه‌ تێیدا له‌گه‌ڵ‌ برا و هاوڕێی خۆشه‌ویستم (كاك مسته‌فا ساڵح كه‌ریم) نزیك له‌ نیو سه‌ده‌ی له‌ ژیانمان داگیركرد.
له‌ ناوه‌ندی حه‌فتاكانی سه‌ده‌ی رابردوو (دار التاخی) كه‌ هه‌ردوو رۆژنامه‌ی (التاخی به‌ زمانی عه‌ره‌بی و برایه‌تی به‌ زمانی كوردی) تێدا ده‌رده‌چوو هه‌ردووكمانی كۆكرده‌وه‌، ئه‌و وه‌كو لێپرسراوی نووسینگه‌ی ئه‌و دوو رۆژنامه‌یه‌ له‌ سلێمانی و به‌نده‌ش وه‌كو به‌ڕێوبه‌ری ئه‌و ده‌زگایه‌ له‌ به‌غدا كه‌ بووه‌ مایه‌ی زیاتر ناسین و لێك تێگه‌یشتن كه‌ تێیدا هه‌فتانه‌ په‌یوه‌ندیی ته‌له‌فۆنیمان هه‌بوو، بابه‌ته‌كانی كاك مسته‌فا بێ ده‌ستكاری كه‌ تێیدا به‌ تێكه‌ڵاوییه‌كی ئه‌ده‌بی و رامیاری و به‌ زمانێكی پاراوی كوردی و عه‌ره‌بی شوێنی خۆیان بێ ركابه‌ری له‌سه‌ر رووپه‌ڕی هه‌ردوو رۆژنامه‌ بڵاوده‌كرانه‌وه‌، له‌ سه‌ردانێكم دا بۆ سلێمانی ئه‌وكاته‌ كه‌ له‌ مانگی شوبات دا بوو به‌ مه‌به‌ستی ئاماده‌بوون له‌ كۆنگره‌ی مامۆستایان كه‌و وه‌كو له‌ یادم ماوه‌ كۆنگره‌كه‌ له‌ سینه‌مای (دڵشاد) بوو له‌گه‌ڵ‌ كاك مسته‌فا به‌یه‌ك گه‌یشتین و پاش به‌كۆتا هاتنی دانیشتنی ئه‌و رۆژه‌ بۆ نیوه‌ڕۆ له‌ كه‌بابخانه‌كه‌ی (عومه‌ری ئه‌جێ) داوه‌تی كردم، كاتێ دانیشتین پرسیاری بارودۆخی سیاسیی لێ پرسیم كه‌ ئایا له‌ (به‌غدا چ ده‌گوزه‌رێ) منیش له‌ وه‌ڵامدا پێم گوت (وابزانم ده‌بێ خۆمان ئاماده‌ بكه‌ین بۆ چوونه‌ده‌ره‌وه‌). ئه‌وه‌بوو له‌و (ده‌ره‌وه‌)دا كاك مسته‌فا و به‌نده‌ ده‌زگای راگه‌یاندنی شۆڕش جارێكی دیكه‌ كۆیكردینه‌وه‌ كه‌ له‌به‌ر لێهاتویی و زمانزانی و قه‌ڵه‌مه‌ به‌بڕشته‌كه‌ی لێپرسراوێتیی به‌ڕێوه‌به‌رایه‌تیی ئێستگه‌ی پێ سپێردرا كه‌ زۆر جار چ له‌ باره‌گای ئه‌مانه‌تی گشتیی راگه‌یاندن و رۆشنبیری و لاوان له‌ ناوچه‌ی ئازادی چ له‌نێوان شاخ و گرد و ته‌پۆڵكه‌كانی ده‌وروبه‌ری باره‌گای ئێستگه‌ی ده‌نگی كوردستانی تێدا دامه‌زرابوو یه‌كتریمان ده‌گرته‌وه‌، رۆژان هات و رۆیشت، دوا قۆناغی شۆڕشی ئه‌یلول 1974-1975 به‌ شێوه‌یه‌ك كۆتایی هات كه‌ هه‌رهه‌موومانی تاساند، ته‌نانه‌ت لێكیشی ترازاندین، ئاواته‌ رۆمانسییه‌كانمانی به‌با دا، به‌ڵام هه‌رگیزاو هه‌رگیز دۆستانی خۆشه‌ویست و خه‌مخۆری كوردستانی لێك دوورنه‌خسته‌وه‌، له‌ رۆژێكی پایزی ساڵی 1976 بوو كاتێ نامیلكه‌یه‌كی ده‌زگای رۆشنبیریی كوردی قه‌باره‌ مامناوه‌ندم كه‌وته‌ ده‌ست چونكه‌ بارودۆخه‌كه‌ وابوو هه‌میشه‌ به‌دووای بابه‌تێك (رۆژنامه‌) گۆڤار، دیوانه‌ شیعر، چیرۆك، رۆمان)ـدا ده‌گه‌ڕام تاكو تینووی شكستی ناوخۆیی بشكێنێ كه‌ له‌ ئاكامی (نسكۆ) گه‌وره‌كه‌ی شۆڕشی كورد په‌یدا ببوو، به‌رێككه‌وت چاوم به‌ نامیلكه‌ی كۆمه‌ڵه‌ چیرۆكێكی هه‌ڵبژارده‌ كه‌وت كه‌ تێیدا كۆمه‌ڵه‌ ناوێكی دیار هه‌ریه‌كه‌ چیرۆكێكیان تێدا نووسیبوو، كه‌ له‌ناویاندا چیرۆكی (سێ وێنه‌ و رێبوارێكی ماندوو)ی هاوڕێم مسته‌فا ساڵح كه‌ریم بوو، چه‌ند جارێك خوێندمه‌وه‌ له‌ مه‌خزا و ناوه‌ڕۆكه‌كه‌ی گه‌یشتم كه‌ (رمز) نووسرابوو، زانیم كاكه‌ مسته‌فا برینداره‌ له‌ ئاكامی بارودۆخی پاش نسكۆی شۆڕش كه‌ بێگومان مرۆڤی برینداریش ماندوو ده‌بێ، به‌تایبه‌تیش كاتێ مرۆڤ له‌ مه‌ڵبه‌ند و جێگای باوك و باپیرانی دوورده‌خرێته‌وه‌ كه‌ تێیدا كاك مسته‌فا له‌ سلێمانیی شۆخ و شه‌نگه‌وه‌ بۆ پێده‌شتی پارێزگای رومادی دوورخرابۆوه‌، له‌وكاته‌دا دۆستێكی خۆشه‌ویستم له‌ كۆیه‌ (مامۆستا كه‌مال خدر په‌سته‌ك سۆر) كه‌ ئه‌ویش له‌ كۆیه‌وه‌ دوورخرابۆوه‌ بۆ هه‌مان شوێنی كاك مسته‌فا كه‌ هه‌ردووكیشیان مامۆستا بوون دۆستایه‌تییان په‌یداكردبوو، له‌ دانیشتنێكی مامۆستا كه‌مال و به‌نده‌ به‌ كاك كه‌مالم گوت (كاتێ ده‌گه‌ڕێیه‌وه‌ به‌ خێر بۆ رومادی سڵاو و رێزم به‌ كاك مسته‌فا بگه‌یه‌نه‌ و پێی بڵێ چیرۆكی «سێ وێنه‌ و رێبوارێكی ماندوو»ـم خوێنده‌وه‌، حه‌ز ناكه‌م كاك مسته‌فام به‌ ماندویی بێته‌ به‌رچاو، رۆژه‌ ناخۆشه‌كان به‌سه‌رده‌چن، بێگومان جارێكی دیكه‌ ئه‌و و هه‌زارانی وه‌كو ئه‌و له‌ باوه‌ش ده‌گرێته‌وه‌ هیوادارم ئه‌و دێڕی شیعره‌ی نازم حیكمه‌تی بیرنه‌چێت كه‌ هه‌ندێ جار له‌و ساڵه‌ی نێوان شۆڕش دا دووباره‌ی ده‌كرده‌وه‌ كه‌ ده‌ڵێ «إن أجمل اڵ‌یام لم تأتی بعد»)، مامۆستا كه‌مال مامۆستا مسته‌فای دیتبوو و ناوه‌ڕۆكی قسه‌كانی منی بۆ گێڕابۆوه‌ ئه‌ویش له‌ وه‌ڵامدا ئه‌م چه‌ند دێڕه‌ی بۆ نووسیبووم: (هاوڕێی ئازیز بێگومان تۆش ماندووی، هه‌موومان ماندووین، چاوه‌ڕوانی رۆژانی حه‌سانه‌وه‌مان ده‌كه‌م، پاش ساڕێژی برینه‌كان، كه‌ بێگومان دكتۆرێكی شاره‌زا و پسپۆڕی ده‌وێ، هیوادارم دوا دێڕه‌كانی چیرۆكه‌كه‌م جارێكی دیكه‌ بخوێنیته‌وه‌ كه‌ تێیدا گوتوومه‌ «به‌ڵێ بڕیارم داوه‌.. ئه‌ڕۆم به‌دوای پزیشكێكی باشدا ئه‌گه‌ڕێم ده‌رمانی ده‌ردم بكات، ئه‌مه‌وێ پڕ سییه‌كانم هه‌وای پاكی بێگه‌رد هه‌ڵمژم، هه‌وای ژیانه‌وه‌ و سه‌ركه‌وتن، هه‌وای بردنه‌وه‌یه‌كی دووای چه‌ند جارێك دۆڕاندن»).
له‌ كۆتایی حه‌فتاكاندا كاتێ گه‌ڕایه‌وه‌ سلێمانی چه‌ندین جار یه‌كترمان ده‌دیت به‌تایبه‌تی كاتێ ئه‌و بۆ دوو جار سه‌ردانی كۆیه‌ی كرد بۆ دیده‌نیی خوالێخۆشبوو (به‌هجه‌ت بابان) كه‌ ئه‌وكاته‌ دادوه‌ر (حاكم) بوو له‌ كۆیه‌ و دراوسێی ئێمه‌ بوون له‌و خانووه‌ی ته‌نیشت ماڵی باوكم، هه‌ردوو جار (چوار قۆڵی) به‌هجه‌ت بابان، مسته‌فا ساڵح كه‌ریم، عه‌ونی، به‌نده‌، له‌نێو چیمه‌نی ماڵی باوكم كۆده‌بووینه‌وه‌، كه‌ تێیدا به‌ده‌م قسه‌ و گێڕانه‌وه‌ی رۆژانی رابردوو بێزاری له‌و بارودۆخه‌ی ئه‌و سه‌رده‌مه‌ و جموجۆڵی مه‌فره‌زه‌ سه‌ره‌تاییه‌كانی شۆڕش كاته‌ خۆشه‌كانمان به‌سه‌رده‌برد، جارێكیشیان به‌ رێككه‌وت به‌نده‌ سه‌ردانی سلێمانیم كرد به‌خێزانه‌وه‌ زانیم كه‌وا ئێواره‌ كۆڕێك بۆ شاعیری خوالێخۆشبوو (حه‌سیب قه‌ره‌داغی) له‌ باره‌گای لقی سلێمانیی یه‌كێتیی نووسه‌رانی كورد رێكخراوه‌ كه‌ تێیدا شاعیر شیعری (هه‌وری په‌رت) پێشكه‌ش ده‌كا، له‌ كات و ساتی خۆیدا ئاماده‌ی كۆڕه‌كه‌ بووم، به‌ڵام ئه‌وه‌ی تێدا به‌دی ده‌كرا خه‌ڵكانێكی به‌ په‌رۆش و دڵسۆز بۆ بیستنی وشه‌ی بێگه‌ردی كوردی باخچه‌ی باره‌گاكه‌یان داگیركردبوو، شوێن نه‌مابوو لێی دانیشم، به‌ڵام كاتێ كاك مسته‌فا منی به‌دی كرد كه‌ ئه‌و كۆڕه‌كه‌ی به‌ڕێوه‌ ده‌برد، داوای له‌ براده‌رانی پێشه‌وه‌ كرد كه‌ شوێنێكم بۆ بكه‌نه‌وه‌ چونكه‌ وه‌كو ئه‌و گوتی (له‌ كۆیه‌وه‌ هاتووه‌).
سه‌رده‌می دووای راپه‌ڕینی به‌هاری ساڵی 1991 قۆناغێكی دیكه‌ی به‌رده‌وامیی قووڵبوونه‌وی برایه‌تی و دۆستایه‌تیه‌كانمانه‌ كه‌ چه‌ندین لاپه‌ڕه‌ی گه‌ره‌كه‌، كه‌ ئه‌گه‌ر هه‌موو باس بكرێت بێگومان رۆشنایی ده‌خاته‌ سه‌ر جۆری (په‌یوه‌ندی، كاری راگه‌یاندن، كاری سه‌ندیكایی كه‌ ته‌واوكه‌ری یه‌كترین له‌ زۆربه‌ی بۆچوون و هه‌ڵوێسته‌كان شێوازی كاری یه‌ك تیم له‌گه‌ڵ‌ رووداوه‌كان به‌رامبه‌ر بێگانه‌ له‌ كۆنگره‌ و وۆرك شۆپ و كۆڕه‌كانی ده‌ره‌وه‌) كه‌ خۆش به‌ختانه‌ كاك مسته‌فا ساڵح كه‌ریم له‌و گۆشه‌یه‌ی كه‌ له‌ژێر ناوی (گوڵه‌وه‌چنی) نزیكه‌ی 90 ئه‌ڵقه‌ی به‌ زنجیره‌ له‌ رۆژنامه‌ی (كوردستانێ نوێ) بڵاوكرده‌وه‌ كه‌ بێگومان تیشك ده‌خاته‌ سه‌ر زۆر لایه‌نی په‌یوه‌ندییه‌كانمان بێ رتووش، به‌نده‌ش پاش ته‌واوبوونی كاری سه‌ندیكاییم له‌ سه‌ندیكای رۆژنامه‌نووسانی كوردستان له‌ مانگی ته‌مموزی ساڵی 2011 شانم لێ هه‌ڵماڵی و كه‌وتمه‌ نووسینه‌وه‌ی بیره‌وه‌رییه‌كانم و ساڵی 2013 له‌ژێر ناوی (رۆژگارم ئاوا تێپه‌ڕی) له‌ دوو به‌رگ دا چاپ و بڵاوكرایه‌وه‌، زۆر به‌ درێژی باسی ئه‌و رۆژانه‌م كردووه‌ كه‌ له‌گه‌ڵ‌ برای ئازیزم مسته‌فا ساڵح كه‌ریم كه‌ چۆن له‌ سه‌ره‌تادا له‌ (له‌نده‌ن) كاتی به‌ستنی كۆنگره‌ی به‌رهه‌ڵستكارانی عیراقی له‌ مانگی 12ی 2002 دا تاوتوێی هه‌وڵه‌ كۆنه‌كانمان هێنایه‌وه‌ سه‌ر مێزی دانیشتنی ئه‌و رۆژه‌ و بڕیاری رێكخستنی ماڵی رۆژنامه‌نووسانی كوردستانمان دا له‌ رێكخراوه‌یه‌كی سه‌رتاسه‌ری كه‌ له‌ قۆناغه‌كانی دووایی دا به‌ هاوكاری و پاڵپشتی هه‌ردوو ئه‌نجوومه‌نی سه‌ندیكا و یه‌كێتی رۆژنامه‌نووسانی كوردستان ئامانجه‌كه‌ی كاكه‌ مسته‌فا و به‌نده‌ هاته‌ دی كه‌ تا دوا رۆژه‌كانی مانه‌وه‌مان له‌م سه‌ندیكایه‌ به‌نده‌ كه‌ نه‌قیبی سه‌ندیكای رۆژنامه‌نووسان بوو هه‌میشه‌ كاك مسته‌فام به‌پێش خۆم ده‌داو هه‌میشه‌ش حیسابی برا گه‌وره‌م بۆ ده‌كرد و بۆ هه‌موو كار و بۆچوونێكیش را و بۆچوونی ئه‌وم به‌ گرنگییه‌وه‌ وه‌رده‌گرت، باوه‌ڕ ناكه‌م رۆژێك له‌ رۆژان گیروگرفتێك له‌نێوانمانا روویدابێت، قۆناغی دوای كاری سه‌ندیكاییشمان هه‌میشه‌ ئاگاداری ره‌وش و بارودۆخی یه‌كتری بووین، چ له‌ سلێمانی یاخود له‌ هه‌ولێر، یاخود له‌ رێگای مۆبایله‌وه‌، پاش دوا سه‌فه‌ریشی بۆ ئه‌ڵمانیا كه‌ بۆ چاره‌سه‌ری نه‌خۆشی چوبوو هه‌فته‌ی چه‌ند جارێك له‌ ئه‌حواڵ‌ و ته‌ندرووستیم ده‌پرسی، به‌ڵام به‌داخه‌وه‌ نه‌مده‌زانی دوا رۆژانی كۆتایی ژیانیه‌تی، كۆتایی ژیانی مرۆڤێك كه‌ پڕاوپڕ له‌ هه‌ڵوێست به‌ سه‌لیقه‌ی نووسه‌رێك به‌ ویژدان و چیرۆك نووسێكی به‌ ئه‌زموون و سیاسه‌تكارێكی به‌ ره‌وشت مامه‌ڵه‌ له‌گه‌ڵ‌ ده‌وروبه‌ر ده‌كات كه‌ بووه‌ته‌ مایه‌ی ئه‌وه‌ی هه‌رگیزاو هه‌رگیز له‌ بیر و هیزر و یادگارییه‌كانم ده‌رنه‌چێت، وه‌كو به‌هه‌شتی حاجی قادری كۆییش ده‌فه‌رموێ.
مه‌رگ و ژین میسلی سێبه‌ر وتاوه‌
ئه‌وه‌ی باقی بمێنێ هه‌ر ناوه‌

ئەم بابەتە بۆ چله‌ی خوالێخۆشبوو
مسته‌فا ساڵح كه‌ریم نووسرا بوو، کوردستانی نوێ-ی هەفتانە بە باشی زانی بڵاوی بکاتەوە

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

له‌ یادی 40 ساڵه‌ی شه‌هیدبوونی سیروان تاڵه‌بانی و هاوڕێكانیدا

ئاوات كۆكه‌یی شه‌هید سیروان تاڵه‌بانی شه‌هیدی سه‌ركرده‌ فه‌یسه‌ڵ ره‌شید حه‌مید ...