سەرەکی » راپۆرت » ئامادەکردنی:بورهان ئەمین » لە ئەڵمانیا ململانێی نەوەکان بەرپا بووە

پارتە کلاسیکیيەکان سزادران

لە ئەڵمانیا ململانێی نەوەکان بەرپا بووە

لە ئەنجامی هەڵبژاردنی پەرلەمانی ئەوروپادا ئەوە روونبۆوە کە ئێستا نەک هەر لە ئەڵمانیا، بەڵکو لە سەرتاسەری جیهاندا پارتە کلاسیکییەکان باویان نەماوە و خەڵکی روو لەو ئامانجە روونانە دەکەن کە نەک هەر دروشم بۆ بانگەشە بێ، بەڵکو بتوانرێت لەسەر ئەرزی واقیع پراکتیزە بکرێت. لە ئەڵمانیا هەردوو پارتی دیموکراتی کریستیان و پارتی سۆسیال دیموکرات کە دەیان ساڵە دەسەڵاتیان بە دەستەوەیە و دوو پارتی بەهێزن، وردە وردە رەواجیان کەم دەبێتەوە و نامێنن و پارتی دیکە جێگەیان دەگرنەوە،.پارتی سەوز یەکێکە لەوانەی کە لەسەر ئاستی ئەوروپا بە رێژەی %20 دوو ئەوەندەی هەڵبژاردنی رابردووی ٢٠١٤ دەنگی هێنا و لەسەر ئاستی ئەڵمانیاش لە دوای کریستیان، بووە دووەمین هێزی سەر گۆڕەپانی سیاسی.

خەباتی بێوچانی دەوێت
بەپێی ئەنجامەکان و توێژینەوەیەکی دەزگای (یۆگۆف): %34ی ئەوانەی دەنگیان بە سەوز داوە، لە چینی گەنج و لاوانن و تەمەنیان لە 25 ساڵ کەمترە، بەڵام بە تەمەنەکان دەنگیان بە دوو پارتە گەورەکە داوە.
بەپێی هەڵسەنگاندنی چاودێران:ئەمە ئەوە دەگەیەنێت کە بەرنامەی پارتە کلاسیکی و کۆنەکان ناگاتە گەنجان و ئەو چینە خۆیان لەناو پلانەکانیاندا نادۆزنەوە، جگە لەوەش قۆناغی نوێ پێویستی بە گۆڕینی ئامانج و دروشم و جۆری خەباتکردنەکە هەیە. ئەو پارتانە تا ئێستا خۆیان لەقەرەی داخوازیی گەنجان نەداوە و هیواکانیان نەخستۆتە ناو بەرنامەی خۆیانەوە، بە پێچەوانەی ئەوانەوە پارتی سەوز کە داکۆکی بە هێز لە پاراستنی ژینگە دەکات، کە داخوازیی سەردەمە و توانیویەتی هیوا و ئامانجی زۆرینە بکاتە ئاڕاستەی خەباتی خۆی و ئەو پیسبوونەی لەسەر ئاستی جیهان لەسەر ژینگە هەیە، ئەگەر کاری جددی بۆ نەکرێت، ئەوا مەترسی ئەوەی لێدەکرێت کە لە داهاتوودا کارەساتی جیهانیی لێبکەوێتەوە و هەڕەشە لە مرۆڤایەتیی بکات. ئەو پرسە هاوشانی پرسی شەڕ و چەک و ململانێی جیهانییەکان و گوزەرانی خەڵک بۆتە پرسی رۆژگار و خەباتی بێوچانی دەوێت، لەمەشدا سەوزەکان سەرکەوتووبوون.
بەپێی توێژینەوەکان: هۆکارێکی تریش ئەوەبوو کە پارتە کلاسیکییەکان نەیانتوانیوە سوود لە سۆسیال میدیا وەربگرن و لەو رێیەوە خۆیان بگەیەننە لاوان، بەڵام پارتی سەوز توانیویەتی ئامانجەکانی خۆی بە ئاسانی لەو رێیەوە بخاتە خزمەت و پردێکی پەیوەندیی لەگەڵ ئەو چینە زیندووە دروست بکات.

سەوز و چەپ و ڕاستڕەوەکان دەنگی زۆریان لێدەبەن
لە دوای دەیان ساڵی دەسەڵاتدارێتی و هاوپەیمانێتی ئەو دوو پارتە کۆن و خاوەن مێژووە، ئێستا کۆمەڵگە ماڵئاوایی یەکجارەکییان لێدەکا و ئەو قەیرانە جیهانی و ناوخۆییانە دەخەنە ئەستۆ و بەرپرسیارێتییان و گازندەی ئەوەیان لێدەکەن کە نەیانتوانی بەرگەی کێشەکان بگرن و لە ئاست ئاستەنگە جیهانییەکانی وەک سەرهەڵدانی تیرۆر، توندوتیژی، کوشتوکوشتار، برسێتی و نەبوونیی خەڵک، بێدەرەتانی، نەهامەتییەکانی شەڕ و شۆڕ، دیاردەی کۆچ، رێگرتن لە تەوژمی توندڕەوی و ئاستەنگە ناوخۆییەکانی وەک پەروەردە و کێشەی پەنابەران و کەشوهەوا و خزمەتگوزاری و کێشەکانی تر دۆش داماون و چارەسەری ریشەییان نەدۆزیوەتەوە، نەوەی ئێستا و داهاتووش سزای ئەو پارتە کلاسیکییانە دەدەن کە کەموکورتییەکانی سیاسەتی ئەوان بوو وایکردووە راستڕەو و توندڕەوەکان لە ئیسلامییەکان و نازییە نوێیەکانیش لەناو هەناوی کۆمەڵگەی ئەڵمانیدا سەرهەڵبدەن و ببنە کێشە بۆ خەڵک و دەسەڵات.
بۆیە ئاماژەکان ئەوە دەردەخەن کە لە هەڵبژاردنی پەرلەمانی داهاتوودا 2021، ئەو پارتە کلاسیکییانە دەکەونە ژێر دەست و پێی سەوز و چەپەکان و راستڕەوەکانیش دەنگی زۆریان لێدەبەن، چونکە لە ماوەی رابردوودا لە هەڵبژاردنی ئەنجومەنی شارەوانییەکانیشدا ئەوە دەرکەوتووە کە دوو پارتە سەرەکییەکە خۆیان لەبەر شاڵاوی نوێخوازیدا راناگرن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ململانێی ئەمریکا و ئێران بە کوێ دەگات؟

بارودۆخی گرژی نێوان ویلایەتە یەکگرتووەکانی ئەمریکا و کۆماری ئیسلامی ئێران ...