سەرەکی » وتار » مسته‌فا ساڵح كه‌ریم‌ » مافی لەبیرچووی كارمەندانی ڕادێو و تەلەفزیۆن

مافی لەبیرچووی كارمەندانی ڕادێو و تەلەفزیۆن

(65)
لە مایسی 2004 دا بۆ یەكەم جار لەمێژووی ڕۆژنامەنووسیی كوردیدا سەندیكای ڕۆژنامەنووسانی كوردستان داوەتنامەی ڕەسمیی بۆ هات بۆ بەشداربوون لە كۆنگرەی بیست و پێنجەمینی ڕۆژنامەنووسانی نێودەوڵەتی لە ئەسینا، ئێمەش بە وەفدێكی چوار كەسی بەشداریمان كردو شەرەفی ئەوەمان پێ‌ بڕا بۆ یەكەمین جار ببینە نوێنەری ڕەسمیی ڕۆژنامەنووسانی كوردستان، ڕۆژێكیان بەپێی ڕێكەوتنێكی لەوەوبەر لەكاتی پشووی كۆنگرەدا سەردانی ڕۆژنامەنووسانی یونانمان كرد، نەقیب و لێپرسراوانی ئەنجومەنەكەیان بەگەرمی پێشوازییان كردین، لەو سەردانەماندا ئارمی سەندیكای ڕۆژنامەنووسانی كوردستانمان پێشكەش كردن و باسی پێكهاتەی سەندیكای خۆمانمان كرد لەگەڵ ئاماژە كردن بە نەهامەتیەكانی گەلی كورد، ئەوانیش تیشكیان خستە سەر زۆر لایەنی سەندیكای ڕۆژنامەنووسانی یۆنان، هەر لە بوونی نەخۆشخانەی تایبەتیەوە تا چەند دەستكەوتێكی تر.
* لەو دیدارەدا بۆمان دەركەوت كە ڕۆژنامەنووسان و ڕاگەیاندنكارانی تەلەفزیۆن و ڕادیۆ هەر لایەكیان بەجیا سەندیكای خۆیان و قەبارەی تایبەتی خۆیان هەیەو هەر دوو ساڵ جارێك كۆنگرە دەگرن و نوێنەرانیان هەڵدەبژێرن، بەڵام هەر سێ‌ نەقابەكە ئەندامن لە (سەندیكای گشتیی ڕۆژنامەنووسانی یۆنان)دا، واتە سەرۆكی ئەو نەقابانە ئەندامن لە ئەنجومەنە گشتیەكەدا كە ئەویش كۆنگرەی خۆی دەگرێ‌ و لە كۆنگرەدا نەقیب و چەند ئەندامێكی تری شارەزاو پسپۆڕ لە بواری ڕاگەیاندن و ڕۆژنامەنووسیدا هەڵدەبژێرن، بەو جۆرە ئەنجومەنی مەركەزیی سەندیكا پێك دێت.
* ئەم جۆرە ڕێكخستنە سەرنجی ڕاكێشاین، بەڵام نازانم بۆچی لەوەودوا خۆمان نەمانتوانی لە كۆنگرەی دوەمدا ئەو بیرۆكەیە بخەینە بەرچاو؟ یان بۆچی لە دانانی یاساكەدا ئەوەمان ڕەچاو نەكرد؟ دەشێ‌ هۆی ئەوە بووبێ‌ كە ئێمە بەڕاستی چاومان هەر ڕۆژنامەنووسی دەبینی و ئەو هەموو كادیرو هەواڵسازو پەیامنێرو كامیرامان و ئەرشیف ڕێكخەرو كارمەندانی تەلەفزیۆنەكان و ڕادیۆكان و سەتەلایتەكانمان فەرامۆش كردبوو. پێم وابێ‌ هێشتا نەچوە بچێ‌، لەو بارەیەوە پێشنیاز دەكەم لە ئێستاوە سێ‌ لیژنەی ئامادەكاریی جیا جیا بۆ ئەو سێ‌ ڕێكخراوە پێك بهێنرێ‌ و دەستەیەكی كارامە خۆیانی بۆ تەرخان بكەن، هەر ڕێكخراوەش پەیڕەوو پڕۆگرامی تایبەت بە خۆی دابنێ‌، پێش كۆنگرە بەهۆی لقەكان و ئەنجومەنەكەی ئێستاوە پێشكەش بە پەرلەمانی كوردستان بكرێ‌، تا ببێ‌ بە یاساو لە كۆنگرەی داهاتووداجێبەجێ‌ بكرێ‌.
دڵنیام كارمەندانی بواری ڕاگەیاندن بەهەموو كەناڵەكانەوە لەم جۆرە سیستمەدا لەجاران سوودمەندتر دەبن و كارە پیشەییەكەشیان زیاتر پێش دەكەوێ‌ و لەهەمان كاتیشدا ئەركی سەرشانی ئەنجومەنە مەركەزیەكەی سەندیكاش سووك دەكات، چونكە لەم حاڵەتەدا ئەو ئەنجومەنە بەتەنیا دەوری سەركردایەتی و ڕێنمایی و تەمسیل كردنی سەندیكاكان دەبینێ‌.

 106 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*