ئه‌م كونجه‌ش

كوێر

كه‌ منداڵ بووین و له‌ (كۆڵان) یاریمان ده‌كرد – له‌ یاری یه‌كه‌دا ئه‌وه‌ی گورزی به‌ ده‌سته‌وه‌ بوو ده‌یووت:
شه‌لم، كوێرم، ناپارێزم
ئێستا له‌م كوردی یه‌ سه‌یر و سه‌مه‌ره‌یه‌دا كوێریان كردووه‌ به‌ (نابینا) – وه‌كو ووشه‌ی (كوێر) بڤه‌ بێ.
نه‌خێر كورد هه‌ر (كوێر) ی ووتووه‌ و كوردیی ره‌سه‌نه‌. به‌ڵام زۆر كوێری عه‌ره‌ب یا كوردی عه‌ره‌بستان، له‌قه‌بی (به‌سیر – بصیر) یان ناوه‌ به‌ خۆیانه‌وه‌ بۆ ئه‌وه‌ی بڵێن – ئێمه‌ یا من كوێرم به‌ڵام به‌ دڵ بینام.
مامۆستای گه‌وره‌م (محه‌مه‌د مه‌هدی ئه‌لبه‌سیر) كه‌ له‌ خانه‌ی به‌رزی مامۆستایان ده‌رسی پێ ووتووم و یه‌كێك بوو له‌ شاعیرانی شۆڕشی بیست و كۆبوونه‌وه‌كانی مزگه‌وتی (حه‌یده‌رخانه‌) ناوی خۆی نابوو – (البصیر) – ئه‌وه‌ش بڵێم كه‌ خه‌ڵكی حیلله‌ بوو، خاڵی نه‌مر دوكتۆر شاكیر خه‌سباك بوو – كه‌ دۆستێكی شیرینی كورد بوو و كتێبی له‌باره‌ی كورده‌وه‌ هه‌یه‌.
لای خۆمان (دوكتۆر كامیل به‌سیر) (البصیر)ی ره‌حمه‌تی كه‌ (فه‌یلی) و كوردی به‌غدا بوو، (البصیر)ی كردبوو به‌ له‌قه‌بی خۆی.
هاوڕێ ‌و كه‌سی خوا لێ خۆشبووم – مامۆستا عه‌بدوڵڵا میدیا بۆی گێڕامه‌وه‌ ووتی: كه‌ یه‌كه‌م جار دوكتۆر كامیل به‌سیر هاته‌ سلێمانی، به‌ شاردا ده‌مانگێڕا ‌و زۆر شوێنی دیارمان ده‌برد – له‌وانه‌ (من – واته‌ كاك عه‌بدوڵڵا میدیا) بردم بۆ قوتابخانه‌كه‌ی (كه‌شتیی نووح) ی مامۆستا نه‌جمه‌دین مه‌لا – له‌ شه‌قامی سابونكه‌ران، كه‌ پێشكه‌شی مامۆستا نه‌جمه‌دین مه‌لام كرد. مامۆستا رێكو ڕه‌وان ووتی: ئه‌مه‌ (مۆقڕابی داهاتووه‌) (واته‌ – ته‌واو كوێره‌)، ئیتر (البصیری) چی: به‌ڵام بێ ئه‌وه‌ی من (واته‌ – میدیا) هیچ بڵێم – مامۆستا نه‌جمه‌دین مه‌لا خۆی ووتی: نا، ئه‌مه‌ زۆر عاقڵه‌، واته‌ من به‌ دڵ بینام – دیاره‌ مامۆستا ناوی (محمد مهدی البصیر)ی بیستبوو.
كه‌ قسه‌ هاته‌ سه‌ر مامۆستا (نه‌جمه‌دین)، – وا بزانم جاریتر شتێكم له‌ باره‌یه‌وه‌ نووسیبوو: كه‌ وه‌سێتی كردبوو به‌ ده‌هۆڵ ‌و زوڕنا بیبه‌ن له‌ چیای گۆیژه‌ بینێژن – دیاره‌ وه‌سێته‌كه‌ی دره‌نگ به‌جێ هێنرا.
به‌ڵام با ئێستا ئه‌وه‌ بڵێم – كه‌ وا بزانم نه‌منووسیوه‌. ئه‌وه‌بوو – لێ یان ده‌پرسی – خه‌ڵك مه‌لا نه‌جمه‌دینت پێ ده‌ڵێن – به‌ڵام خۆت: ( نه‌جمه‌دین مه‌لا) ده‌نووسیت. وه‌ڵامی ئه‌وه‌بوو كه‌ (من نه‌جمه‌دین) بووم، پێش ئه‌وه‌ی ببم به‌ (مه‌لا) – كه‌واته‌: نه‌جمه‌دین مه‌لام ‌و مه‌لا نه‌جمه‌دین نیم.
سڵاو و نه‌مری بۆ هه‌موو ئه‌وانه‌ی له‌م كونجه‌دا ناویان هاتووه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*