سەرەکی » وتار » د.ئه‌رسه‌لان بايز‌ » خەون بە شاخەكانەوە دەبینم

کـــۆڵـــەپـشـــــت

خەون بە شاخەكانەوە دەبینم

(36)

# ئەمجارەیان خەون بە شاخ و كێوەكانی كوردستانەوە دەبینم. دەچمەوە گوندەكانی (شێنێ‌، ناوزەنگ، توژەڵە، بەرگەڵوو…هتد) دەچمەوە نێو دۆڵ و لێرەوارو قوتە بەرزەكانی نێو هەورەكان. نێو گوڵە میلاقەو وەنەوشەو چنوری نسارو قەدپاڵی كێوەكان. سەر كانیاوە سازگارەكان، هەورازە سەخت و كوور تولەڕێ باریكەكان. (توزیع) بوونی نێو ماڵە دێهاتیە سادە نشینەكان. خەون بە جلی خاكی و جامانەو ئەدیداس و ڕیزی (تەزبیح)ی یەك بە دوای یەكی پێشمەرگەكانەوە دەبینم. كۆپتەرو فڕۆكە جەنگیەكان بە ئاسمانەوەن، تۆپ بارانی ڕۆژانەی بارەگاكان. هاتنەوەی تەرمی شەهیدێك. خەون بە چاڵاكی پێشمەرگەو ئێزگە شڕو دەنگە زوڵاڵەكەی (فەرهاد سەنگاوی)یەوە دەبینم. چی بكەم جیا لە گەڕانەوەم بۆ سەردەمی ژیانی مناڵی و هەرزەكاری گوندەكەی خۆمان و زیندان و باوەشی دۆڵ و چیاكانەوە خەون بەشتێكی ترەوە نابینم. ئەمانە فیلمی ژێر خانی چل ساڵی ژیان و مەرگی من بوون.
# ئەو ساڵانە ئێمە چیمان هەبوو… بەدوای چیدا وێڵ و عەوداڵ بووین..؟ ڕاكە ڕاكەی ڕێكخستنی نهێنی دوور لە چاوی دەزگاكانی ئەمن . ڕاكە ڕاكەی ئەم شاخ بۆ ئەو شاخ. ئەم گوند بۆ ئەو گوند… چیترمان هەبوو…؟ كەس فلسێكی لە گیرفان نەبوو هەموو سەرمایەكەمان زیادكردنی دوو ئەندامی نوێی حیزب و چاڵاكیەكی پێشمەرگە بوو… سەرمایە خودییەكەشمان جلێكی خاكی، كڵاوو جامانەیەك، یەك جووت پێڵاوی (شەوڕۆ)یان (ئەدیداس) مەتارەیەكی ئاو. كڵاشنكۆفێك و چەند مەخزەنێك. چەكی پێشمەرگە سۆزی ژن و دایك و باوك و جگەر گۆشەكانی پێ ئەبەخشی. پێشمەرگە خەونی بە ڕادیۆیەكی باش، كلاشنكۆفی (مضلی) و چوار مەخزەنی پلاسكۆ یان مەخزەنێكی (75)ییەوە دەبینی.
# كێ‌ ئاگاداری باوك و دایك و ژن و مناڵی خۆی بوو..؟ هەموو لە خەمی چاڵاكی و سەركەوتنی شۆڕش بووین. كێ‌ خەمی ئەوەی بوو، باوك و دایك و ژن و مناڵی لە كام زیندان دەست بەسەرن. كێ‌ خەمی نەداری و كوڵە مەرگی ژن و ماڵ و مناڵی خۆی بوو. كە هەندێ‌ لە ژن و كەس و كاری پێشمەرگە لە گرتووخانەكانی (فضیله، هەولێر، دهۆك، سلێمانی) لە زیندان بوو. كێ‌ خەمی ئەوەی بوو ژنەكەی لە زیندان مناڵی ئەبێ‌… باوك و دایكی لە تەمەنی حەفتا ساڵی و بەسەرەوە لە زیندانن…؟!
# مامۆستا (بەكر مستەفا) گێڕایەوە:
ساڵی (1980) كاتێ‌ بووم بە پێشمەرگە هەندێ‌ پارەی كۆكراوەی ڕاتبەكەی خۆم لەگەڵ خۆم برد بۆ پێشمەرگایەتی، خوا وای ڕێكخست لە مەفرەزەی (ئەنوەر حەسەن) (مامۆستا كاوە) مەخموری بووم بە پێشمەرگە. ڕۆژێك لە ڕۆژان نەم بیست ئەو كادیرە باس لە بوونی خانوو، ئۆتۆمبێل، پارە بكاتەوە. نەم بیست هێندە لە خەمی ژیانی كوڵە مەرگی و ئاوارەیی ژن و مناڵەكانی بێت. پێشمەرگەو كۆمەڵەو شۆڕش و چەكەكەی هەموو ژیانی بوو. ئەوەی لە (مامۆستا كاوە)م بیست لە ژیانی پێشمەرگایەتیدا حەزی لە تاخمێكی (حاجی مەجید) و جلێكی پێشمەرگانەی (ئەفسەر)ی بوو. بۆیە منیش لە سەردانێكی نهێنیم بۆ ناو شاری هەولێر، تاخمەكەی (حاجی مەجید)م بۆ كڕی و كردم بە دیاری بۆی، بڕوا بكەن دە هێندەی ئێستای (مۆنیكا)یەك دڵی پێ خۆش بوو. هەروەها لە بۆنەیەكدا دوو پارچە قوماشی (ئەفسەر)یشم كڕی و لە گوندی (وەرێ)ی خۆشناوەتی بۆ خۆم و خۆی بە دوورینماندا. بەڵام سەد حەیف و مخابن (مامۆستا كاوە) جلە ئەفەسەرییەكەی لەبەر نەكرد. لە شەڕێكی دەستەو یەخە لە گوندی (قەڵا سنج)ی خۆشناوەتی شەهید بوو. پاش چەند هەفتەیەك ڕێمان كەوتەوە گوندی (وەرێ‌)، بەڵام چی، بە گریانەوە چوومەوە لای بەرگدرووەكە.
# ژیان و خەباتی نهێنی و شاخ بەو جۆرە بوو كە (مامۆستا كاوە) و هەزارانی وەك ئەو لە پێناویدا شەهید بوون. ئەمڕۆش هەموومان لە خەمی كۆشك و تەلارو كاروانی مۆنیكاو نەوت فرۆشتنین. لە خەمی هەڵگێڕانەوەی كادیر لە یەكترو (تكتل) و پاشقۆڵ لە یەكتر گرتنین.
جا توخوا ئەوسا لە كوێ‌ و ئەمڕۆ لە كوێ‌…؟! ئەوسا چەند پاك و چەند خۆشەویستی خەڵك بووین…بەڵام ئەمڕۆ…!!!.

هەموو یەكشەممەو چوار شەممەیەك دەینووسێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ببە موسڵمان…!!

(43) ئەو ساڵانەی ئاوارەی سلێمانی بووین. (شیرین)خانی خێزانم لەگەڵ ژنێكی ...