سەرەکی » ئاراستە » به‌هره‌مه‌ند و به‌رهه‌مدار

به‌هره‌مه‌ند و به‌رهه‌مدار

ئیسماعیل خالید

مامۆستا سه‌ڵاح ره‌نجده‌ر كه‌سایه‌تییه‌كی به‌هره‌مه‌ند و به‌رهه‌مدار بوو، ئه‌وه‌نده‌ی من كارم له‌گه‌ڵ كردووه‌ به‌ تایبه‌ت له‌ بواری ڕوناكبیریدا، ره‌نجده‌ر ده‌ستێكی باڵای هه‌بوو له‌ گه‌شه‌دان به‌ لایه‌نی ڕۆشنبیری هێزه‌كانی پێشمه‌رگه‌ و ئاشناكردنیان به‌ خوێندنه‌وه‌ی كتێب و گۆڤار و نامیلكه‌ و ڕۆژنامه‌كان، ئه‌و شاره‌زا و ده‌ستێكی باڵای هه‌بوو له‌ پێشكه‌شكردنی كۆڕ و سیمینار و كۆبوونه‌وه‌ فراوانه‌كاندا، زۆر تامه‌زرۆیانه‌ گوێیان بۆ راده‌گرت، هه‌میشه‌ كادره‌كانی له‌ ده‌وری خۆی كۆده‌كرده‌وه‌ و دیاریی هه‌میشه‌ی ئه‌و بۆیان، كتێب و گۆڤار و نامیلكه‌ بوو.
ره‌نجده‌ر به‌ ده‌یان كتێب و گۆڤار و نامیلكه‌ی ڕوناكبیری هه‌بوو، هه‌میشه‌ له‌ ڕۆژنامه‌كاندا جێ ده‌ستی دیاربوو، له‌ بواری سه‌ربازی و سیاسیشدا زۆر له‌ كه‌ناڵه‌ كوردییه‌كان و وه‌ك شاره‌زایه‌ك له‌ بواری سه‌ربازیدا ده‌رده‌كه‌وت و چاوپێكه‌وتنیان له‌گه‌ڵ ده‌كرد.
ره‌نجده‌ر زۆربه‌ی كاته‌كانی بۆ نووسین و خوێندن ته‌رخان ده‌كرد، ئه‌گه‌ر كتێبی‌ نوێی به‌رده‌ست بكه‌وتایه‌ بانگی ده‌كردمه‌ ژووره‌كه‌ی خۆی و ده‌یوت وه‌ره‌ با شتێك فێربین، ڕۆژانه‌ ئاوا وانه‌ی فێر ده‌كردین، ئه‌گه‌ر كتێبێكی پێت بدایه‌ به‌ر له‌وه‌ی كژتێبه‌كه‌ بكه‌یته‌وه‌ ئه‌وه‌نده‌ به‌ جوانی پێناسه‌ی كتێبه‌كه‌ی بۆ ده‌كردیت تامه‌زرۆی خوێندنه‌وه‌ی ده‌بووی.
بۆچونی ئه‌و له‌ سه‌ر هه‌موو كتێبێك وا بوو كه‌ هه‌موو كتێبێك به‌ نرخه‌ و پێویسته‌ بایه‌خی پێ بدرێرێت، چونكه‌ لایه‌نی كه‌م خویندنه‌وه‌ت باشتر ده‌بێت به‌ خوێندنه‌وه‌ی كتێبێك، خه‌ونی گه‌وه‌ره‌ی ره‌نجده‌ر سه‌ربه‌خۆیی و رزگاری گه‌ل بوو ئامانجی گه‌وره‌شی گه‌شه‌ دان بوو به‌ لایه‌نی ڕۆشنبیری گه‌له‌كه‌ی.
ئه‌گه‌ر بێینه‌ سه‌ر لایه‌نی كۆمه‌ڵایه‌تی ڕه‌نجده‌ر كه‌سێكی كۆمه‌ڵایه‌تی و مه‌جلیس خۆش بوو، هه‌میشه‌ نموونه‌ی شیعر و په‌ندی پێشینانی ده‌هێنایه‌وه‌ كه‌ بۆ كات و شوێنه‌كه‌ گونجاو بوو.
ڕه‌نجده‌ر كه‌سێكی هێمن و له‌سه‌ر خۆ بوو به‌ ئاسانی توڕه‌ نه‌ ده‌بوو كاتێك كه‌ توڕه‌ ده‌بوو یه‌كسه‌ر هه‌ڵنه‌ده‌چوو و به‌خێرای وه‌ڵامی به‌رامبه‌ری نه‌ ئه‌دایه‌وه‌.
هه‌رچه‌نده‌ بۆ ماوه‌ی بیست ساڵ له‌گه‌ڵ نه‌خۆشییه‌كه‌یدا ململانێی ده‌كرد، به‌ڵام هه‌میشه‌ گه‌شبین بوو، ته‌نانه‌ت مردنیشی به‌ كۆتایی ژیان نه‌ده‌زانی یه‌كێك له‌ بۆچوون و وته‌ جوانه‌كانی ڕه‌نجده‌ر كه‌ له‌سه‌ر مه‌زاری مامۆستا ئه‌مین باڵداره‌ ده‌ڵێت مردن كۆتایی ژیان نییه‌ ئه‌ڵقه‌یه‌كی دیكه‌ی ته‌واوكه‌ری ژیانه‌ ئه‌شێ ئه‌وه‌ی پێی ده‌ڵێن ژیان به‌شه‌ ناخۆشه‌كه‌ی بێت چێژ له‌ سه‌ره‌تایی چونه‌ ده‌ریاوه‌ نییه‌ چێژ له‌ قوڵاییه‌كه‌یدایه‌ له‌وێ هه‌ڵه‌نگوتن نییه‌ ئارامی و ئاسوده‌یی هه‌یه‌.
هه‌رچه‌نده‌ نه‌متوانی هه‌قی ته‌وا به‌ كه‌سایه‌تی ئه‌و بده‌م، مامۆستا سه‌ڵاح ره‌نجده‌ر زۆر له‌وه‌ زیاتر هه‌ڵده‌گرێت كه‌ له‌ سه‌ر به‌ ئه‌مه‌كه‌ی و گه‌وره‌یی بدوێم.
له‌ كۆتایدا ده‌ڵێم ماڵ ئاوا ڕۆحت شاد هاوڕێ و برا و مامۆستام هه‌رگیز بۆ من دووباره‌ بوونه‌وه‌ت نابێت، ده‌خوازم نموونه‌ت زۆر بێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*