سەرەکی » ساڵۆنی کوردستانی نوێ » كتێبی ئاوی ئاشی شۆڕش

كتێبی ئاوی ئاشی شۆڕش

شەهیدی سەركردە حەمەغەفور ئاغجەلەری، لـە مەراسیمێكی شایستەدا بڵاوكرایەوە

سەعات 3ی پاشنیوەڕۆی رۆژی 16/12/2019 لە كافێنێتی ئەمنە سوورەكە (سلێمانی)، كوردستانی نوێ‌ و خانەوادەی شەهید مەراسیمی ناساندن و بڵاوكردنەوەی كتێبی
(ئاوی ئاشی شۆرش… شەهیدی سەركردە حەمەغەفور ئاغجەلەری) بەڕێوەچوو.
سەرەتای كۆڕەكە، كە لەلایەن مەریوان مەسعود سكرتێری نووسین-ی كوردستانی نوێوە بەڕێوەدەبرا، كورتەیەكی لەبارەی كتێبەكەو ژیاننامەی شەهید حەمەغەفور ئاغجەلەری خوێندەوە.
پاشان، ستران عەبدوڵڵا سەرنووسەری كوردستانی نوێ‌، بایەخی كتێبەكەو نووسینەكانی ناو كتێبەكەو پێگەی بەرزی شەهیدی سەركردە باسكرد.
دواتریش سەركەوت-ی شەهید حەمەغەفور ئاغجەلەری، وتەی خانەوادەی خوێندەوە، كە بایەخی كتێبەكە بۆ خانەوادەكەیان و خەباتی باوكیان باس كرد، وەكو شەهیدێكی سەركردە و تێكۆشەری رێبازی شەهیدان.

تارق کەمال

مەریوان مەسعود:
بەڕێزان زۆر بەخێربێن بۆ ناساندنی كتێبی ئاوی ئاشی شۆڕش، شەهیدی سەركردە حەمە غەفور ئاغجەلەری، بەڕێزان ئەو كتێبەی ئێستا لەبەر دەستانە، بەهاوبەشی رۆژنامەی كوردستانی نوێ‌و بنەماڵەی شەهیدی سەركردە ئامادەو چاپكراوە، هەم وتارو راپۆرت‌و ئەو وتانەی لەو كتێبەدا هەیە لە رۆژنامەی كوردستانی نوێ بڵاوكراوەتە،كۆمەڵێك لەو كەسانەی بەشداریان كردووە بە نوسین‌و بە بابەت ئێستا لێرەن. بەر لەوەی سەرنووسەری كوردستانی نوێ‌ و سەركەوتی كوڕی شەهیدی سەركردە حەمەغەفور ئاغجەلەری قسە بكەن، كورتەیەك لە ژیاننامەی شەهید حمەغەفور ئاغجەلەریتان بۆ دەخوێنینەوە:
-شەهیدی سەركردە حەمەغەفوور ئاغجەلەری ساڵی 1939 لە شارۆچكەی ئاغجەلەر سەر بە پارێزگای كەركوك لە بنەماڵەیەكی نیشتمان پەروەر لە دایك بووە خاوەن مێژوویەكی پڕسەروەریەی دژ بە داگیركەری عوسمانی‌و پشت‌و پەنای هەژاران بووە، كەسێكی دەست پاك‌و رەوشت بەرزو قسە خۆش بووە لە گفتوگۆكردن‌و هەلسوكەوتیا ئازایەتی ‌و كارامەیی پێوەدیاربووە، لە بوواری خوێندندا زیرەك‌و سەركەوتوو هەمیشە یەكەمی پۆلەكەی بووە.
لەساڵی 1961 پەیوەندی كردووە بە هێزی پێشمەرگەی كوردستانەوە و خۆشەویستی جەماوەر و هێزی پێشمەرگەی كوردستان بووە، زۆر بە زوویی پلەكانی پێشمەرگایەتی بڕیوە و هەموو كات دەستە و لقەكەی لە ریزی پێشەوەی هەڵمەت بردن و بەرگریدا بوون. ژمارەی پێشمەرگەكانی هەموو كات لە لقەكانی دیكە زۆرتر بووە (375) كەس زیاتر بوو لە شەڕی دەربەندی بازیان و راگرتنی هێرشی رژێم بۆ ماوەی سێ مانگی رەبەق كە دەیویست دەست بەسەر چەمچەماڵدا بگرێت دەوری سەرەكی هەبوو.
لە كۆتایی ساڵی 1973 و سەرەتای 1974 بڕیاری شەڕكردنەوە درا لەگەڵ حكومەتی عیراق و حیوار هەڵوەشایەوە. لەگەڵ یەكەم دەستپێكردنەوەی شەڕ شەهید حەمەغەفوور كرا بەسەر لق و بارەگاكەی لە چەمی رێزان دانا و پاشان چووە چەمی (عەلی شاڵی) لقەكەشی زۆر دەست وەشێن و هەڵمەت بەر بوون، لە ساڵی 1974 بۆ ماوەی سێ رۆژ رێگای سلێمانی كەركووكی لە پشت دەربەندی بازیان نزیك گۆپاڵە كۆنترۆڵ كرد و دوژمنی بەهێزێكی زۆری زیاتر لە 53 دەبابە و ناقیلەوە هێرشی كردنە سەر، بەڵام شەڕەكە بە بەردانەوەی تەیارەیەكی حەربی جۆری مێك و بە سەركەوتنی هێزی پێشمەرگە كۆتایی هات، كە ئەمەش بۆ شارەزایی بێ وێنەی شەهید حەمەغەفوور دەگەڕێتەوە لە بوارەكانی سیاسی و سەربازیدا، كە هەمووكات دوژمن حسابی تایبەتی بۆ دەكرد.
لەكاتی هەرەس و لە بەرواری 27/3/1975 شەهید حەمەغەفوور بە خۆیی و 103 سەد و سێ پێشمەرگەوە بەرەو دیووی ئێران چوو، كە لە شەوی 2/4/1957 گەیشتە كرماشان و (سەر اب نیلوفەر) پاش وچانێكی كورت و داڕشتنی بەرنامەیەكی نوێ بۆ سەرلەنوێ هەڵگیرسانەوەی شۆڕش لە 13/6/1957 لەگەڵ شەهیدی سەركردە عەلی عەسكەری و چەند سەركردەیەكی دیكە گەڕانەوە عیراق.
لە سەرەتای ساڵی 1976 شەهید حەمە غەفوور جارێكی دیكە خەباتی شار و شاخی پێكەوە گرێ دایەوە.لێپرسراوێتی سیاسی و عەسكەری مەفرەزە سەرەتاییەكانی سنووری كەركوكی گرتە ئەستۆ و لە ماوەیەكی كورتدا توانی جەماوەرێكی زۆر لە دەوری ئاڵای شۆڕشی نوێ كۆبكاتەوە ئاهێك بێنێتەوە بەبەر كەركوكی كوردان و گڕەكەی بابە گوڕ گوڕ هێندەی تر بەگڕتر بكات و دوژمن بێنێتە لەرزە و زراوە تەریكی بكات.
هەر بۆیە دوژمن بە زوویی كەوتە خۆ و دروستكردنی پیلان گێڕان سەرەتا بە گرتن و دورخستنەوەی دایك و باوك و ماڵ و منداڵەكەی دەستی پێكرد رەوانەی گرتووخانەكانی ناسریەی كردن و لە خوارووی عیراق. ئینجا دروست كردنی خەڵكی بەكرێ گیراو و ئەڵقە لەگوێ لە دژی ئەویش بۆ لەناوبردن یان دوورخستنەوەی لە ناوچەكە بە گوتەی خۆیان حەمە غەفوور ئاوی ئاشی شۆڕشەكەیە لەو ناوچەیەدا بە لەناوبردن یان شەهیدكردنی ئاشی شۆڕش لە سنووری كەركوك رادەگرن، بەڵام هیچ كات نەیاندەتوانی پەی بە وریایی و هێمنی بەرن. مەخابن بە پیلانێكی وردی ئەوسای دام و دەزگای موخابەراتی كۆنەپەرستی شاهنشاهی ئێران و موخابەراتی عیراق لە رێگەی چەند بەكرێ گیراوێكەوە لە بەرەبەیانی 23/7/1977 لەكاتی خەودا خەنجەری ژەهراویان لە پشتەوە وەشاند و لەگەڵ حەوت هاوڕێی دیكەیدا شەهیدیان كردن و یەكسەر هەلیكۆپتەرەكانی رژێم گەیشتە سەر ناوچەكە و خائینان و ئەڵقە لە گوێكانی لە ترسی رقی جەماوەر هەڵگرت و گەیانیانەوە ئەمنی كەركوك. پاشان تەرمەكەی گوازرایەوە ئاغجەلەر و رژێم هەر باوەڕی نەكرد، ترسی شەهید حەمە غەفووری لە دڵا نەڕەویبووە وە، بۆیە بۆ ماوەی زیاتر لە 40 رۆژ زریپۆشی بە دیار گۆڕەكەیەوە دانا، بەمەشزیانێكی گەورە بەر شۆرشی نوێی گەلەكەمان كەوت و كەركوكی كوردانی رەشپۆش كرد.
ئەو پێشمەرگانەی لەگەڵ شەهید حەمە غەفوور شەهید كران: ئەنوەر كەریم‌وئەحمەد محەمەد‌و عەبدوڵڵا تۆفیق‌و حەمید عەزیز‌و رەمەزان سەعید بوون هەزاران هەزار سڵاو لە گیان پاكیان.

ستران عەبدوڵڵا:
بەڕێزان هەموولایەك بەخێربێن لە راستیا ئەم كتێبە هیچ شتێكی كوردستانی نوێی بەسەرەوە نییە تەنها ئەوە نەبێت داوای لۆگۆیەكیان لێكردین ئێمەش وتمان بنەماڵەیەكی شەهیدێك ئەو هەموو خەباتەیان كردووە ئەوە دەهێنێ ئێمە ئەو لۆگۆی كوردستانی نوێیان تەسلیم بكەین، هەرچی غەرجی هەیە لەمەراسیمەكەدا بۆ كتێبەكە بنەماڵەی شەهید خۆیان دابینیان كردووە، رەنگە باشترین تەعریف بۆ شەهیدان بۆ یادی ئەوانی بكەین قسەیەكی جەنابی مام جەلال-ە لە كۆبوونەوەیەكی راگەیاندنی یەكێتیی نیشتمانی كوردستانا پێی وتین، وتی لەمەودوا با نمونەی چینی جێ بەجێ بكەین كە داپیرەكان بیگێڕنەوە، وە باسی لەوەكرد مەبەستی لەوە چییە، لە چین عادەت‌و تەقالیدێكیان هەبوو داپیرەكان بۆ ئەوەی گۆشەگیرنەبن بۆ ئەوەی هەست بكەن دەورێكیان هەیە لەناو بزوتنەوەی رزگاری خوازی گەلی چین، ئەركێكیان پێ سپێردرابوو سەروەرییەكانی شۆڕش بگێڕنەوە، سەروەریەكانی شەهیدان بگێڕنەوە، ئێوەش ئەگەر ئەتانەوی دەوور بگێڕن وە خەڵكی كوردستان لێتان رازی بێت لە بوواری راگەیاندنا پێویستە وەك داپیرەكان بكەن سەروەریەكان بگێڕنەوە، تێبینی ئەوەی دانێ وتی خەڵەت دەكەن یەك لاپەڕەتان بۆ شەهیدان تەرخان كردووە، فراوانتری بكەن هەندێك جار وەك پاشكۆو دووتوێەك كاری لەسەر بكەن، بەشێك لەو نوسینانەی لەو كتێبەدا بڵاو كراوەتەوە كە هەموو هی كوردستانی نوێ نییە، بەڵكو قەڵەم بەدەستەكانی یەكێتیی نیشتمانی كوردستان وتاریان تیا نوسیووە، بەشێك لەوانە لە چوار چێوەی دوو توێەكدا بڵاوكراوەتەوە لە كوردستانی نوێ لەسەر ئەو ئامۆژگاریانە بوو كە جەنابی مام جەلال لە وتەیەكدا لە كۆبوونەوەی راگەیاندنی یەكێتیی نیشتمانی كوردستان پێشكەشی كردین، لەراستیا ئەم بكەینە دەروازەیەك زۆر گرنگە یادی شەهیدەكانمان تێكۆشەرەكانمان لەئاستی ئەوەدا نەبێت لەناوخۆدا بیگێڕینەوە، بەڵكو ئەو پێشكەوتنەی ئەمڕۆ راگەیاندن پێی گەیشتووە لە بوواری دراماو نوسینەوەی بیرەوەرییەكان‌و كتێب دەركردن لەسەر شەهیدەكان، ئێمە پەرەی پێ بدەین‌و كاری لەسەر بكەین ئەمە بەشێك لەواجبی راگەیاندكارانی یەكێتیی‌و دەزاگاكانی راگەیاندنی یەكێتیی نیشتمانی كوردستانە، ئەوەی لە كوردستانی كراوە‌و ئەو وتارانەی لە كوردستانی بڵاوكراوەتەوە ناتوانی هەقی تەواوی شەهیدی سەركردە شەهید حمە غەفور ئاغجەلەری بدات، بەڵام لەبەر ئەوەی زەرووری بوو ئەمەیان وەك‌و كتێب چاپ بكرێت تا رۆژێك لە رۆژان ئەو تێكۆشەرانەی بیرەوەریەیان لەگەڵ شەهیدی سەركردەدا هەیە بگێڕنەوە، شۆڕشی نوێی گەلەكەمان تەنها بەو خەسڵەتە نەناسراوە تەنها سەركردەكانی شەهید بوون، یەكێكیش لەو سەركردانە شەهید حەمە غەفور ئاغجەلەرییە، بەڵكو بەوەش ناسراوەتەوە تەحدای دوو رژێمی گەورەی كرد لەم ناوچەیەدا وە تەحدای دوو جەمسەری دونیای كرد لەم ناوچەیە كە هەردوكیان سەرمایەداری‌و سوشیالیستی بوو كە هەردوكیان دژی كورد بوون، وە هەردوكیان دەیان وت شۆڕشی كورد كۆتایی هاتووە، لە نمونەی ئەمەیا بەس شۆڕشی شێخ عەبدوڵڵای نەهری توانیویەتی ئەوە بكات بەرامبەر دوو دەوڵەتی گەورەی ئیرانی‌و عوسمانی كە هەردووكیان تەنفیر كرد وتی ئەوەی كورد دەیكات ئەوە ئیسلامەتی راستەقینەیە، شۆڕشی نوێی یەكێتی نیشتمانی كوردستان، وتی ئەمەی یەكێتیی نیشتمانی كوردستان دەیكات ئەمە چەپگەرێتییەو ئەمە دیموكراتییە، كوردستان ئەتوانی مەرجەع بێت بۆ بیروباوەڕی رەواو ئیشێكی رەوا كە ئازادی خوازی تێدابێت، سەركردەی ئەو قۆناغە هەر شەهید نەبوون بەڵكو شاهیدن بەسەر مێژووی رزگاری خوازی گەلی كوردستان، هیوادرم لە راگەیاندنا راگەیاندنكاری یەكێتی پێیان سەربەرزی بێت ئەو داستان‌و چیرۆكانەی سەروەرانی یەكێتیی نیشتمانی كوردستان رۆژێك لە رۆژان بگێڕنەوە، وەزیفەی داهاتوش ئێمەش بێت لە داهاتودا ئیشیان لەسەر بكەین، لە راستیا شەهیدەكان پێویستیان بەوە نییە لەسەریان بنوسین‌و پیایانا هەڵ بدەین، ئەوە زیندوەكانن پێویستیان بەوەیە بە بیریان بێتەوە ئەو خەڵكە لە پێناوی ئەواندا شەهید بوون‌و خەباتیان كردووە موستەهەقی یادكردنەوەن بۆ ئەوەی كە بزان ئەوانەی لە ژیاندا ماون موستەهەقن باشتر بژین، زۆر سوپاس بۆ بنەماڵەی شەهیدی سەركردە حەمە غەفور ئاغجەلەری دەكەم ئەو شەرەفەیان بە كوردستانی نوێ‌و بەندە بەخشی كە بتوانم پێشەكی بۆ ئەم كتێبە بنوسم دووبارە بەخێربێن زۆر سوپاس.

سەركەوت شەهید حەمەغەفور:
میوانە بەڕێزەكان.هاوڕێیان و هاوڕێبازانی شەهیدی سەركردە حەمە غەفوور ئاغجەلەری، بەناوی بنەماڵەكەمانەوە بە گەرمی بەخێرهاتنی یەكە بە یەكەتان دەكەین هەروەها سوپاسی ماڵباتی كوردستانی نوێ و هەموو ئەو بەڕێزانە دەكەین كە هاوكار و هەماهەنگ بوون لە ئامادەكردنی كتێبەكە و رێكخستنی ئەم مەراسیمەدا.
بەڕێزان راستە خێزان و كوڕ و كچی شەهیدان باشتر لە معانات و لە نەهامەتیەكانی ژیانی یەكتر تێدەگەن و خاڵی هاوبەشیان زۆرە، بەڵام هەر خێزانێكی شەهیدان تایبەتمەندی و چیرۆكێكی تایبەوت بە خۆیان هەیە و تەنها خۆیان لە جیهانی ژیانی خۆیان تێدەگەن.. بۆیە دەكرێ چیرۆكی ژیانی ئێمە وەكو مناڵانی شەهید حەمە غەفوور ئاغجەلەری لە ماوەی 42 ساڵی رابردوودا وەكو داستانێكی ئەفسانەیی پێناسە بكەین.
ژیانمان لە داستانێكی ئەفسانەیی دەچێت لەبەر ئەوەی42 ساڵە لە یەك كاتدا رق و خۆشەویستیلەناو دڵ و دەروون و ناخماندا ئاوێتەی یەكتر دەبن.
42ساڵە رقمان لە بەرد و لە شاخ و لە ئەشكەوتەكانە، چونكە وا هەست دەكەین باوكمان زیاتر لەگەڵ ئەواندا ژیاوە و باوەشی بۆ ئەوان كردبووە و بە هۆی ئەوانەوە ئێمەی لە سۆز و لە باوەش و لە میهرەبانی خۆی بێبەش كردبوو لە هەمانكاتدا 42 ساڵە خۆشەویستی ئێمە بۆ هەمان شاخ و ئەشكەوتەكان دەگاتە ئاستی پیرۆزی و بە چاوی پیرۆزییەوە سەیریان دەكەین. هەندێ جاریش حەزدەكەین (تێر تێر) باوەشی ئەو بەردو و شاخ و ئەشكەوتانە بكەین. چونكە زۆر جار تەنها ئەو بەرد و شاخانە پشت و پەنای باوكمان بوونە و خۆیان دەكردە بەهێزترین سەنگەر و قەڵغان بەرامبەر بە بۆمب و ناپاڵم و هێرشی دوژمنانی گەلەكەمان و باوكمانی لەو هێرشانە دەپاراست.
42 ساڵە ئەشكەوتەكانمان زۆر خۆش دەوێت، چونكە بۆ باوكمان باشترین پەناگە و خۆشترین كۆشك و تەلار بوون. هەندێ جاریش كە سەردانی ئەو شوێنانە دەكەین لە لایەكەوە ئیرادەی بەهێز و خۆشەویستی نیشتمان بە ئێمە دەبەخشێ لەلایەكی دیكەوە هەست دەكەین بۆنی باوكمان لەو ئەشكەوتانە دێت و دەچینە ناو جیهانێكی خەیاڵ و وا هەست دەكەین ئەشكەوت و تاشە بەردەكان دێنە زمان و بە گەرمی باوەش بۆ ئێمە دەكەنەوە و بە وردی یادگاری و دیرۆكی باوكمان بۆ باس دەكەن.
42 ساڵە رقمان لە چەكە لە هەمان كاتدا چەكمان زۆر خۆش دەوێت، رقمان لە چەكە چونكە عەشقی باوكمان بۆ چەك وایكردبوو كە بە شەو و رۆژ زیاتر باوەش بۆ چەك بكاتەوە نەك بۆ ئێمە…
42 ساڵە رقمان لە چەكە چونكە بەهۆی چەكی خیانەتەوە بۆ هەتا هەتایە ئێمە لە باوەشی میهرەبانی و ئامۆژگاری و لە یاری و لە هەست و سۆزی باوكایەتی بێبەش كراوین.لە هەمان كاتدا 42 ساڵە چەكمان زۆر خۆش دەوێت بە چاوی پیرۆزەوە سەیری چەك دەكەین و حەزدەكەین هەمیشە تێر تێرباوەشی چەك بكەین، چونكە چەك نزیكترین و خۆشەویستترین هاوڕێی باوكمان بووە، چەكمان زۆر خۆش دەوێت چونكە چەك خۆڕاگری و ئازایەتی و نیشتمانپەروەری و ئیرادەی بەهێزی باوكمانی بە میللەتەكەمان ناساند چەكمان زۆر زۆر خۆش دەوێت چونكە بە چەك تۆڵەی شەهیدان كرایەوە.
42ساڵە لە یەك كاتدا(رقمان لە مێژووە و لە هەمان كاتدا مێژوومان زۆر خۆش دەوێت و لبەرمانەوە پیرۆزە42 ساڵە رقمان لە مێژووە، چونكە زۆر جار مێژوو غەدری لە ئێمە كردووە و ساڵانە تەنها یەك رۆژ ئەویش كە ساڵرۆژی شەهیدبوونی باوكمانە مێژوو وەك تارماییەم زۆر بە كەمی و بە خێرایی خۆی پیشانی ئێمە داوە. هەندێ ساڵیش مێژووی زاڵم بەبێ ئەوەی هەست بە ئازاری ناخمان بكات لە ساڵڕۆژی شەهیدبوونی حەمە غەفوور ئاغجەلەری باوكمان زۆر بە نهێنی و بە خشكەیی تێپەڕیوە و خۆی لە ئێمە شاردووەتەوە. رقمان لە مێژووە چونكە، جاری وا هەبووە مێژوو غەدری زۆری لە ئێمە كردووە و خۆی بێدەنگ كردووە بەرامبەر بەو كەسانەی كە مێژوویان شێواندووە.


لە بەرامبەردا 42ساڵە مێژوومان زۆر خۆشدەوێت و بە چاوی پیرۆزیەوە سەیری مێژوو دەكەین،چونكە باوكمان جوانترین مێژوو گەشدارترین مێژوو سەربەرزانەترین مێژوو شەرەفمەندانەترین مێژووی بۆ ئێمە جێهێشتووە، وەكو بەبەهاترین سەرمایە كە بۆ هەتا هەتایە شانازی پێوە بكەین.
42 ساڵە لە یەك كاتدا رقمان لە زیندانە و لە هەمان كاتدا زیندانمان زۆر خۆش دەوێت. رقمان لە زیندانە چونكە زیندان ئێمەی بێبەش كرد لە یاری و خۆشیەكانی مناڵی و بینینی كەس و كارمان، بەڵام زیندانم زۆر خۆش دەوێت چونكە لە زیندانەوە باشتر تێگەیشتین داگیركەر كێیە؟ داگیركاری چییە؟ بۆچی باوكمان ئێمەی بەجێ هێشتووە و روویكردووەتە شاخەكان و عاشقی چەك بووە.
42 ساڵاە بەڵێ 42 ساڵە لە چاوەڕوانی تێر نەبووین بە بەردەوامی چاومان لە رێیە بەڵكو هاوڕێیەكی باوكمان هەڤاڵێكی باوكمان سەردانمان بكات و پەیام و یادگاریەكی باوكمانی پێ بێت و بۆمانی باس بكات. تێر نەبووین، بێزار نەبووین، بێ ئومێد نەبووین لەو چاوەڕوانیە تا ئەمڕۆ خۆمان بە خۆشحاڵ و بەختەوەر بزانین و دوای 42 ساڵ لە چاوەڕوانی هەمووین پێكەوە مێژووی باوكمان، یادگاری و یادەوەریەكانی باوكمان. سەروەریەكانی باوكمان. شانازی و سەربەرزیەكانی باوكمان. خۆڕاگری و دڵسۆزی و رەوشت بەرزی و هەڵوێستەكانی باوكمان. هاوڕێ و هەڤاڵ و هاوڕێبازەكانی باوكمان.نهێنی و بەڵگەنامەكانی باوكمان هەر هەموویان بە یەكەوە هاتنە لامان و لەم هۆڵەدا باوەشمان بۆ دەكەنەوە و قەرەبووی 42 ساڵ چاوەڕوانی و بێنازیمان بۆ دەكەنەوە، روحیانەتی باوكمان لە ئاسمانی نەمراندا شاد دەكەن. بۆیە پڕ بە دڵ سوپاسی ئەو هەڤاڵانە دەكەین كە هاوكار و بەشدارن لەم كتێبەدا سوپاسی هەڤاڵانی كوردستانی نوێ دەكەین قەرزداری هەموو لایەكین سەبارەت بە كتێبەكەش ئێمە هیچ قسەیەكمان نیە لەسەر ناوەڕۆكی كتێبەكە. چونكە ئەوانەی خاوەنی كتێبەكەن. ئەوانەن پەیامی ناو كتێبەكەیان نوسیووە. هاوڕێ و هەڤاڵ و هاوسەنگەری باوكمان بوون. ئەوانەی خەبات و مێژووی باوكمانیان بە چاوی خۆیان بینیوە و باسیان كردووە ئێستا حزوریان لێرە هەیە و پەیامەكە بۆ ئەوان جێدێڵن و گوێیان لێدەگرین.
جارێكی دیكە سوپاسی یەگك بە یەكتان ئەكەین. دروود بۆ گیانی شەهیدانی رێگای رزگاری كورد و كوردستان.لێرە جێی خۆیەتی سوپاس و پێزانینی خۆمان بگەیەنین بە ئەم بەڕێز و دەزگایانە، كە هاوكارمان بوون لە بەچاپ گەیاندنی ئەم پەرتوكە و مەراسیمی ناساندنەكەشی، ئەوانیش:ماڵباتی كوردستانی نوێ بە گشتی و بەڕێزان كاك ستران عەبدوڵڵا و كاک شۆڕش ئەحمەد و كاك هەڵكەوت زەنگەنە و كاك مەریوان مەسعود بە تایبەتی، برایانی دەزگای كرۆیی مام بە تایبەتی كاك فەلاح سەڵاح كاك هاشم عەلی و كاك سامان لەتیف.

print

 75 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*