کورتەچیرۆک

كوده‌تا

حه‌سه‌ن نازدار

1
ئێمه‌ی رۆژهه‌ڵاتی خوویه‌كی خراپمان هه‌یه‌، به‌یانیان به‌رله‌ ده‌موچاو شۆرین و نان و چاخوارن، له‌ جیاتی وه‌رزش ده‌ست ده‌ده‌ینه‌ كۆنترۆڵی ته‌له‌فزیۆنه‌كه‌ ‌و به‌ تامه‌زرۆییه‌وه‌ چاوه‌ڕوانی نوێترین هه‌واڵ ده‌كه‌ین. نازانم هۆكاری ئه‌و ترسه‌ چییه‌ كه‌وا ده‌زانین شتێكی خراپ رووده‌دات؟، ته‌نانه‌ت ترسمان له‌ ‌زۆر پێكه‌نین و خۆشی و پژمینیش هه‌یه‌، هه‌میشه‌ ده‌ڵێین خوا به‌خێری بگێڕێت، به‌رده‌وام سڵ له‌ ‌زه‌نگی مۆبایل و ته‌قه‌ی ده‌رگا و هه‌ور و به‌فر و بارانیش ده‌كه‌ینه‌وه‌، جاران به‌ر له‌ شه‌پۆلی ته‌كنه‌لۆژیا و پێشكه‌وتن، تا هه‌واڵێك ده‌گه‌شته‌ ‌ئه‌م گونده‌ دووره‌ده‌سته‌ی ئێمه‌، كاتی روودانه‌كه‌ی زۆر به‌سه‌رچووبوو، به‌ڵام یه‌كه‌م به‌ڵای ئه‌م گونده‌ی ئێمه‌ ئه‌و كاته‌ بوو كه‌ ‌بۆ یه‌كه‌م جار رادیۆ هاته‌ گونده‌كه‌، كه‌ ‌بۆ ماوه‌یه‌ك به‌ دوای كابرای هه‌واڵ خوێندا ده‌گه‌ڕاین له‌ پشت رادیۆكه‌وه‌ وامان ده‌زانی له‌ناو رادیۆكه‌دا‌ خۆی حه‌شارداوه‌، دوای ئه‌مه‌ش هاتنی كاره‌با و ته‌له‌فزیۆن ته‌واو ژیانه‌ ساده‌كه‌مانی تێكدا و دنیای له‌ به‌رامبه‌رمان ئاوه‌ژووكرده‌وه‌، ته‌له‌فزیۆن ئه‌و‌ ئامێره‌ ‌چاوڕه‌شه‌ ‌جادووبازه‌، كه‌ ئه‌م به‌یانییه‌ به‌م هه‌واڵه‌ی ژیانی من و گوندكه‌مان و ته‌نانه‌ت وڵاته‌كه‌مانی گۆڕی.
من رووداوه‌كه‌ی ئه‌م به‌یانییه‌م له‌ ‌رێگای ته‌له‌فزیۆنه‌وه‌ ‌بیست، هه‌ركه‌ ‌په‌نجه‌م نا به‌كۆنترۆڵی ته‌له‌فزیۆنه‌كه‌دا ده‌نگی سروودی ‌نیشتمانی و هه‌واڵی به‌‌په‌له‌ی سه‌رشاشه‌كان سه‌رنجیان راكێشام و دانه‌ دانه‌ كه‌ناڵه‌كانم ده‌گۆڕی هه‌ر هه‌مان بابه‌ت بوو، رووداوێك كه‌ له‌ ماوه‌ی خه‌وی من و گوندێك و شار و وڵاتدا روویدابوو، ماوه‌ی خه‌وێك په‌یوه‌ست بوو به‌ چاره‌نووسی وڵاتێكه‌وه‌، كه‌ سه‌رله‌به‌ری ژیانی تاكه‌كانی ده‌گۆڕی ئه‌و تاكانه‌ی كه‌ ‌له‌ نێو خه‌وی بێ ئاگایدابوون و كه‌ ‌له‌وانه‌بوو ژیانیان بكاته‌‌ به‌رانی قوربانی ئه‌م رووداوه‌یان ده‌روازه‌ی به‌هه‌شت و ژیانیان بۆ ئاوه‌ڵا بكات، نازانم بۆ هه‌ر له‌خۆوه‌ له‌ ‌میانی ته‌ماشای هه‌واڵ و گوێگرتن له‌ سرووده‌ ‌نیشتمانیه‌كانه‌وه‌ ‌یه‌كسه‌ر خه‌یاڵم چوو بۆ لای ئه‌و كابرا نامۆ و شێته‌ی گونده‌كه‌مان كه‌ ‌له‌ خۆیه‌وه‌ ‌لێره‌ ‌وه‌ك غه‌واره‌یه‌ك په‌یدابوو، هه‌میشه‌ ‌به‌ڕادیۆیه‌كه‌وه‌ ‌گوێی له‌ هه‌واڵ ده‌گرت و ده‌هات و ‌ده‌چوو.

2
سه‌ره‌تا كه‌ ئه‌و هاته‌ گونده‌كه‌مان وه‌ك كه‌سێكی لێ قه‌وماوبێ لانه‌ ‌و كاره‌ساتبار و بێده‌م و زمان باوه‌شمان بۆ كرده‌وه‌ و وه‌ك نه‌ریتی خۆمان خزمه‌تمان كرد، وامان ده‌زانی رێبو‌ارێكی كاتییه‌ و نان و ئاوی لێبڕاوه‌ ‌و بۆ پشوو لای داوه‌ ‌و پاشان ده‌ڕوات، به‌ڵام دوایی ورده‌ ورده‌ ‌چووه‌ دڵمان و بڕیارماندا كه‌ ‌له‌ گونده‌كه‌مان بمێنێته‌وه‌، چون خۆی كه‌سێكی بێكێشه‌ و بێزیان بوو، گرفتی ئه‌مڕۆی خه‌ڵك زمان و گوێ بوو، ئه‌و وادیاربوو یان واخۆی ده‌رده‌خست كه‌ ‌هه‌ر دووكیانی نه‌بوو، رۆژانه‌ش وه‌ك شێتێك خۆی نیشان ده‌دا، له‌ ‌گیروگرفته‌كانی ئه‌قڵ و بیریشی بێ خه‌م بووین، شێتی و خۆشێت كردن هۆكارێكه‌ ‌بۆ ده‌ربازبوون له‌ ‌ئازاره‌كانی ژیان، هه‌ر چه‌ند ناتوانێت قه‌ره‌بووی زیانه‌كان بكاته‌وه‌، به‌ڵام هه‌ندێ جاربێ خه‌مت ده‌كات له‌ ‌ئازاره‌كانی دنیا.
هه‌ر چه‌ند كه‌ هه‌میشه‌جێگای سۆز و به‌زه‌یی بوو، هه‌ندێ جاریش به‌ڕێزه‌وه‌ ‌ته‌ماشایان ده‌كرد، چون خه‌ڵكی راو بۆچوونی جیاوازیان له‌باره‌وه‌ ‌هه‌بوو، ده‌یانگوت: ئه‌م پیاوه‌یان سه‌ربازێكی هه‌ڵاتووی به‌ره‌كانی شه‌ڕه‌ ‌و دوای كوژرانی هاوڕێكانی له‌ ترسی مه‌رگ ڕووی كردووه‌ته‌ ‌ئێره‌، یاخودعاشقێكی دڵشكاوه‌ و ‌له‌ ‌ده‌ست بێوه‌فایی یاره‌كه‌ی و باری لاری ژیان سه‌ری خۆی هه‌ڵگرتوو، یان سیخوڕێكی وڵاتانه‌ و لێره‌وه‌ ‌هه‌وا‌ڵه‌‌كان ده‌نێرێت، یاخودعارفێكی گه‌وره‌ ‌و خواناسه‌ و بۆ خه‌ڵوه‌ت و خوداپه‌رستی هاتووه‌، پێشیان وابوو خدری زینده‌یه‌ ‌و ده‌بێته‌ مایه‌ی رزق و رۆزی بۆ گونده‌كه‌مان، بۆیه‌ ‌لێگه‌ڕێن با له‌و كه‌لاوه‌یه‌ی خۆی پێی خۆشه‌ بژی.
ئه‌ویش پیاوێكی بێ ده‌نگ و بێزیان بوو، هه‌میشه‌ به‌ ‌رادیۆكه‌ی ده‌ستیه‌وه‌ ‌ده‌هات و ده‌چوو، ده‌شت و دۆڵ و شاخی ده‌بڕی، جارجار ده‌وه‌ستا و پڕ به‌گه‌رووی ده‌گریا، یان قاقا پێده‌كه‌نی، له‌ رێ هه‌ركه‌سی بدیایه‌ كاری بكردایه‌ ‌هاوكاری ده‌كرد، له‌گه‌ڵ منا‌ڵان یاری ده‌كرد، نه‌ ‌ئازاری كه‌سی ده‌دا و نه‌ كه‌س ئازاری ده‌دا، بۆیه‌ ‌جل و به‌رگ و خواردن و دار و پێویستیه‌كانی له‌سه‌ر خه‌ڵك بوو، كه‌ به‌هه‌موو شێوه‌یه‌ك هاوكاریان ده‌كرد، به‌ڵام ئه‌وه‌ی جێی پرسیار بوو لای هه‌مووان كه‌ پیاوێكی كه‌ڕولاڵ چۆن ده‌كرێ گوێ له‌ ‌رادیۆ بگرێت؟، جگه‌ ‌له‌وه‌ش كه‌س نه‌یزانی ناوی چییه‌؟ خه‌ڵكی كوێیه‌؟ خۆشی هه‌رگیز له‌و ماوه‌یه‌ی كه‌ ‌له‌وێ بوو وشه‌یه‌ك له‌زاریه‌وه‌ ده‌رنه‌چوو.
ته‌نها كه‌سێك بۆ یه‌كه‌مجار و دواجار ئازاری دا من بووم، رۆژێك به‌ تاپڕه‌كه‌مه‌وه‌ ‌له‌ ‌شوێنی حه‌شارگه‌كه‌م سه‌رنجم له‌سه‌ر چه‌ند كه‌وێك بوو تا راویان بكه‌م، به‌ڵام به‌رله‌وه‌ی بیته‌قێنم ئه‌و پیاوه‌ له‌وێ ‌ئاماده‌بووه‌، به‌ هاوارێكی ئه‌و كه‌وه‌كان فڕین و راوه‌كه‌ی لێ تێكدام، منیش به‌ده‌م تووڕه‌یی و هه‌ڵچوونه‌وه‌ ‌زله‌یه‌كم لێدا و ئه‌ویش به‌بێ هیچ كارادانه‌ویه‌ك لێیدا و رۆشت ته‌نها شتێك لێم بینی دووفرمێسك بوو كه‌ به‌سه‌ر گۆناكانییه‌وه‌ وه‌ك دووگۆی بلورین هاتنه‌ خواره‌وه‌، ئیتر له‌وه‌ ‌به‌دواوه‌ ‌هه‌رگیز نه‌ ‌ته‌ماشای ده‌كردم و نه‌ هاوكاری لێ وه‌رده‌گرتم، چه‌ند جار ده‌چوومه‌ ‌سه‌ر رێگای ولێ ده‌پاڕامه‌وه‌ ‌لێم ببوورێت، ئه‌و بێ گوێدانه‌ من به‌ ریشه‌درێژ و جله‌ ‌چڵكنه‌كانی به‌رییه‌وه‌ ده‌چوو، دواجاریش بێ ئه‌وه‌ی بزانم كه‌ ‌لێمخۆش بووه‌یان نا بۆ هه‌میشه‌ ‌له‌ گونده‌كه‌مان رۆشت و له‌چاو ونبوو.
3
ته‌له‌فزیۆنه‌كه‌ به‌رده‌وام هه‌واڵی كوده‌تای بڵاوده‌كرده‌وه‌، سروودی نیشتمانی به‌ ‌گوێی جه‌ماوه‌ردا ده‌دا، منیش بیرم له‌م هه‌موو كێشه‌ ‌و شه‌ڕ و هه‌رایه‌ی رۆژهه‌ڵات ده‌كرده‌وه‌، خودایه‌ ‌ده‌بێت كه‌ی كۆتاییان پێ بێت؟ ئه‌گه‌ر كفر نه‌بێت ره‌نگه‌ ‌خوداش له‌ ‌ده‌ستی ئێمه‌ی رۆژهه‌ڵاتی بێتاقه‌ت بووبێت، له‌ ده‌ست خه‌ڵكی شوێنێك كه‌ سه‌د و چل و چوار هه‌زار په‌یامبه‌ری بۆ ناردن كه‌چی هه‌رگیزباش نه‌بوون، بگره‌ ‌هه‌موو په‌یامبه‌ره‌كانی دووچاری ده‌رد و ئازار و مشار و خاچ و كوشتن و به‌رده‌باران و ئاواره‌یی بوونه‌وه‌، ئیدی خوداش هه‌رگیز په‌یامبه‌ری بۆ نه‌ناردنه‌وه‌.
له‌سه‌ر شاسه‌ی ته‌له‌فزیۆنه‌كه‌ ‌هه‌واڵێكی به‌‌په‌له‌ی تر به‌ ‌ره‌نگی سوور بڵاوكرایه‌وه‌ ‌و به‌رله‌وه‌ی من هه‌واڵه‌كه‌ ‌بخوێنمه‌وه‌، بێژه‌رێكی تووڕه‌ ‌و چاوسور به‌ ‌ده‌نگێكی گڕ و حه‌ماسیه‌وه‌ ‌هاته‌ ‌سه‌ر شاشه‌ و هه‌واڵی وتارێكی مێژوویی له‌ لایه‌ن سه‌رۆكی كوده‌تاوه‌، ‌پاش چه‌ند خوله‌كێكی تر راگه‌یاند، منیش به‌ تامه‌زرۆییه‌وه‌ ‌به‌ ‌دیار شاشه‌كه‌وه‌ ‌چاوه‌ڕێی وتاره‌كه‌ ‌و سه‌رۆكه‌ نوێیه‌كه‌م ده‌كرد، له‌ ‌دڵی خۆمدا ده‌مگوت: خودایه‌ تۆبڵێی ئه‌م پیاوه‌ ‌ئازا و چاو نه‌ترسه‌ كێ بێت كه‌ ئه‌م كاره‌ مه‌ترسیداره‌ی كردووه‌؟ پیاوێكی سه‌ربازییه‌؟ یاخود ئاسایی؟ كه‌سێكی ناسراوه‌یان گومناو؟ هه‌رچۆن بێت ده‌بێت چاوه‌ڕوانی ده‌ركه‌وتنی بكه‌ین، بزانین چ جۆره‌ كه‌سێكه‌.
په‌یتا په‌یتا هه‌واڵی به‌په‌له‌ ‌له‌سه‌ رشاشه‌كه‌ ده‌بینرا و پیاوه‌ ‌ده‌نگ گڕه‌كه‌ش په‌یدا ده‌بوو، هه‌واڵی وتاره‌كه‌ی سه‌رۆكی كوده‌تاچییه‌كانی پاش كه‌مێكی تر بڵاو ده‌كرده‌وه‌، من دڵنیابووم كه‌ ئێستا ملیۆنان كه‌س وه‌ك من چاوی له‌ سه‌ر شاشه‌كانه‌، به‌ڵام له‌ ‌ناخه‌وه‌ ده‌نگێك پێی ده‌گوتم، چاوه‌ڕێكه‌ ره‌نگه‌ لایه‌كی ئه‌م كوده‌تایه‌ ‌په‌یوه‌ندی به‌ تۆوه‌ ‌هه‌بێت، به‌ڵام نه‌مده‌زانی چییه‌ و من و كوده‌تاش كوجامه‌رحه‌با، هه‌ر چۆن بوو چاوه‌ڕوان بووم، به‌ڵام نه‌مزانی چه‌ندی پێ چوو، له‌پڕ پیاوێكی سه‌ربازی باڵا به‌رز و ریش تاشراو له‌سه‌ر شاشه‌ ‌ده‌ركه‌وت كه‌ ‌چه‌ندان ئه‌ستێره‌ی به‌سه‌رشانه‌وه‌بوو، چه‌ندان نیشانه‌ی ئازایه‌تی به‌ملاولای سنگیه‌وه‌بوو، چه‌ندین ئاڵای وڵات له‌ پشتیه‌وه‌ ده‌‌بینرا، ده‌ستێكی دا له‌ ‌مایكه‌كه‌ی به‌رده‌می و به‌ ‌ده‌نگێكی پڕ له‌ ویقاره‌وه‌ ‌به‌م شێوه‌یه‌ وتاره‌كه‌ی خوێنده‌وه‌:
به‌ناوی خوای گه‌وره‌، به‌ناوی نیشتمان و گه‌له‌وه‌.
هاووڵاتیانی خۆشه‌ویست. له‌پاش بڵاوبوونه‌وه‌ی گه‌نده‌ڵی و شه‌ڕوبێ یاسایی ئێمه‌ش له‌پێناو گه‌ل و وڵاتدا به‌ ئه‌ركی سه‌رشانی خۆمان هه‌ڵساین و كۆتاییمان به‌ نادادی و نایه‌كسانی و گه‌نده‌ڵی و چه‌وساندنه‌وه‌ ‌هێنا، له‌مه‌ودوا ئاشتی و ئازادی و ئاوه‌دانی و یه‌كسانی و كار بۆ هه‌موان فه‌راهه‌مه‌، دڵنیابن كه‌ هه‌موو تاوانباران به‌سزای سه‌ختی خۆیان ده‌گه‌ن، ئێوه‌ش ئاهه‌نگی سه‌ركه‌وتن بگێڕن، خوداپشت و په‌نای هه‌موولایه‌ك بێت.
له‌ ماوه‌ی ‌وتاره‌كه‌ی سه‌رۆكدا، هه‌رچه‌ند لێی ورد ده‌بوومه‌وه‌ واهه‌ستم ده‌كرد كه‌ له‌ ‌شوێنێك ئه‌م سه‌رۆكه‌ كوده‌تاچییه‌م بینووه‌، به‌ڵام نه‌مده‌زانی كوێیه‌، له‌ ‌پاش چه‌ندجار گوێگرتنه‌وه‌ له‌ وتاره‌كه‌ كه‌ ته‌له‌فزیۆنه‌كه‌ ‌دووباره‌ی ده‌كرده‌وه‌، له‌پڕ چاوم چووه‌ سه‌ر خاڵه‌ ‌سێگۆشه‌یه‌كه‌ی لاچاوی سه‌رۆكه‌ تازه‌كه‌، له‌ پاشكه‌مێك ورده‌بوونه‌وه‌، له‌ناكاو وه‌ك ئه‌وه‌ی پیكێك بكێشن به‌ ‌ناوچاومداتاسام، هه‌ستم كرد هه‌ناسه‌م بۆنادرێ، خه‌ریكبوو گیانم ده‌رده‌چوو، به‌ڵێ خۆیبوو، ناسیمه‌وه‌، هه‌مان كه‌س بوو، تۆبڵێی منیش نه‌خاته‌لیستی تاوانبارانه‌وه‌؟ دادگایم ده‌كات یان ده‌ستبه‌جێ له‌ ‌سێداره‌م ده‌دا؟ به‌یاسای سه‌ربازی دادگایم ده‌كات یان مه‌ده‌نی؟ تۆبڵێی له‌پایته‌خته‌وه‌ هێشتا هه‌ر منی له‌م‌ گونده‌ دووره‌ ده‌سته‌وه‌ ‌بیر مابێت؟ یان له‌ به‌ختی ره‌شتی من بووبێته‌ ‌داخی سه‌ردڵی؟ هه‌رچه‌ند ته‌له‌فزیۆنه‌كه‌ وتاره‌كه‌ی دووباره‌ ده‌كاته‌وه‌ من زیاتر له‌په‌لوپۆ ده‌كه‌وم و ترس گیانم داگیر داكات؟ وا هه‌ست ده‌‌كه‌‌م ئه‌م كوده‌تایه‌ی بۆتۆڵه‌ له‌ من كردووه‌، به‌ڵێ ئێستا به‌ ته‌واوی دڵنیام خۆیه‌تی، هه‌مان كابرای غه‌واره‌ و شێتی گونده‌كه‌مان، به‌ڵام نازانم منی به‌خشیوه‌ یاخود نا؟ ئاخر من زلله‌یه‌كم له‌ جه‌نابی سه‌رۆك داوه‌‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*