سەرەکی » وتار » بارزان شێخ عوسمان‌ » با وەك ساڵان ئاهەنگی ئاگری نەورۆز و نۆبەرەی یاپرا..

با وەك ساڵان ئاهەنگی ئاگری نەورۆز و نۆبەرەی یاپرا..

با وەك ساڵان ئاهەنگی ئاگری نەورۆز و نۆبەرەی یاپراخی گەڵامێو لە مامە یارەی دێرینی شارە حەیاتەکە بێت؟!

تا ساڵی 1974یش لە نەورۆزدا سەرباری ئەوەی لە گەڕەکەکانی سلێمانی ئاگری بچوک بە تایەو دار ئەکرایەوە،بەڵام خەڵكێکی زۆری شار هەر ئەچوین بۆ گردی مامە یارە و کارێزی وەستا شەریف (چونکە هەمو رۆژێكی نەورۆز باران ئەباری یان رەشەبا رۆحەکە هەڵيئەکرد) لەوێ لە ئاهەنگی جیا جیا و زۆر جار بە شێوەی رێکخراو و بەرنامە بۆ دارێژراو (بە تایبەتی لەسەردەمی وتوێژی نێوان حكومەت و شۆڕشدا)ئاگر کردنەوە و سەیرانە نەورۆز و بەهاری خۆمان بە جلی کوردیی و ئاڵ و واڵەوە ئەکرد، وەك زیندوراگرتنی سونەتێكی ساڵانەی پیرەمێردی نەمر.
ئەو رۆژانە سلێمانی هەر خەڵكەکەی خۆی تیا بوو، واتە هەمویان یەك ماڵ و خانەوادە بوون بیروباوەڕە جیاوازەکان رێگر و لەمپەڕ نەبون لە بەردەم پاراستنی کولتور و ترادیسیۆنەکانی شارەکە. ئای چەند خۆش بوو کە لە گردی مامەیارە نزیك ئەبوینەوە لەگەڵ سرودە بەناوبانگەکەی ئەمڕۆژی ساڵی تازەیە بە ئاوازەکەی مەلاکەریمەوە ئەو بەیتەی ( کە دەڵێن ) ەکەی پیرەمێردیشمان ئەوتەوە کە ئەڵێت «بچۆ سەر گردی یارە بنواڕە ……..» ،رۆژێكی خۆشی خێزانیمان لەگەڵ دەیان خانەوادەی تری دراوسێ و هاوشارییەکانمان بەڕێئەکرد و ئێوارەیەکی درەنگ ئەو خەڵكەیا لە مامە یارەوە بەرەو خەبات و چوارباخ و ئازادیی یاخود بە سابونکەران و ئیبراهیم پاشا،بەرەو ئیسکان و مەڵكەندی و ناو شار و سەنتەری شار شۆڕدەبونەوە بەرەو ماڵەکانیان (کوا ئەو کاتە ئەو هەموو ئۆتۆمبیلە هەبوو،بە خوا خۆش بوو شار بچووك، سەیارە کەم و ژینگەیەکی وەك دڵی خەڵكەکەی

ئەوسای پاکوخاوێن
دواتریش کە شەڕ بوەوە (1974-1975)ئیتر ئەو بارودۆخەش بەو جۆرە نەما،بەڵام هەر بۆ بەربەرەکانێی بەعس لە مامە یارە و سەیوان ئاگری نەورۆز هەر ئەکرایەوە ( دیارە ئاگر کردنەوەی لاوەکیی بە شێوەی پچڕ پچڕ لە شاخی گۆیژەو ئەزمڕيش شێوازێكی تری بەربەرەکانێکردنی رژێم بوو ) لە دوای راپەڕینیشەوە چەند جارێك مەراسیمی نەورۆز لە گردی مامە یارە بەڕێوە چوو، وەك زیندو راگرتنێکی ئەو کلتورەی شارە حەیاتەکەمان.
لە دوای رووخاندنی رژێمی سەدامی عەفلەقییش ئەو سونەتەی خەڵكی شارەکەمان زیندو کرایەوە ئەوەتا چەند ساڵێكە کۆمەڵەی کەلەپوورو فۆلکلۆری کورد و نەورۆزپەروەران لە ڕێکخراوە مەدەنی و کەسایەتی و هونەرمەندانی سلێمانی. بەرێكو پێكیی و بە خەرجییەکی کەم چەندین ساڵە ئاهەنگێكی رەسمیی لە مامە یارەکەی پیرەمێرد بە یەکگرتویی رێك دەخەن وپێشکەشی گیانی پیرەمێرد و مامەیارە و خەڵكی کوردستان و شاری سلێمانی ئەکەن،بەمەش ئاهەنگی نەورۆز سیمایەکی زۆر جوانی هەیە و دوای رێوڕەسمەکە ئاپۆڕەی خەڵك لە مامەیارەوە بەرەو ناوشار شۆڕئەبێتەوە بە سابونکەران و بەردەرکی سەرادا بەرەو باخی گشتیی و شاڕێی سالم لەوێش لە سەهۆڵەکە قەرەباڵەغییەکە لە رۆژانی ئاسایی زیاتر ئەبێت .

حيكایەتی قەرەباڵەغیی شەقامەکانی سلێمانی
من کە مناڵ و مێرد مناڵ بووم قەرەباڵەغیی و کۆبونەوەی عەسر و ئێوارەی خەڵك بەتایبەتیی لە بەهاران و هاویناندا لە شەقامی مەولەوی و شەقامی بێکەس بوو،لە دوای ساڵی 1975یش وردە وردە شەقامی گۆران (ئۆرزدی)،دواتر توی مەلیك بووە شاڕێگەیەک بۆ پیاسە و کۆبونەوەی خەڵك بە تایبەتی جەوانان،ئیدی پانتاییەکیش بۆ کچان رەخسا کە ئەوانیش پیاسە بکەن بەو شەقامەدا، دوای ساڵی 1985یش کە چەند ریستۆرانێك لە شەقامی سالم (سەهۆڵەکە) کرانەوە ئەو ناوچەیە بووە مەڵبەندی کۆبونەوەی خەڵك، لە دوای راپەڕينیش کە سلێمانی خەڵكی زۆری لەملاو لا تێرژا ئیتر شەقامی سالم (سەهۆڵەکە) زیاتر قەرەباڵەغ بوو، ناوبانگی زیاتر
پەیدا کردو بووە شەقامێك کە ئیتر بە زستان و هاوینیش قەرەباڵەغ بێت و جمەی بێت و هەموو رۆژێك وەك ئەوەیە ئاهەنگ و فیستیڤاڵی تیا بکرێت،چەندین تیڤی و ئاژانسیش لە بارەی سەهۆڵەکە راپۆرتیان بڵاو کردۆتەوە.
کەواتە کۆکردنەوە و کۆبونەوەی خەڵك لە سەهۆڵەکە و بەردەرکی سەرا و بەردەم گازینۆی شەعب و شەقامی گۆران و چەند چایخانەیەکی جادەی سابونکەران و ئەسحابە سپی سیمایەکی رۆژانەی شارەکەیە و هیچ پەیوەندیی بە بۆنەیەکی تایبەتەوە نییە ،وەك چۆن رۆژانی هەینی و عەسرانی هاوین قەرەباڵەغیی رێگای ئەزمڕ و سیتەك ئاسا ییە .
کەواتە بمانەوێت و نەمانەوێت ئەبێت سلێمانییە راستەقینەکان و ئەهلی شار بۆ زیندوو راگرتنی کلتور و نەریتە کۆنەکانی شار ئاگر کردنەوە و نۆبەرەی یاپراخی گەڵامێو (کە هی جنوب ئەو کاتە پێگەیشتوە) و نمایشەکانی نەورۆز هەر ببەنە گردی مامە یارەکەی پیرەمێرد ،چونکە ئەو مەڵبەندە شیرینە گوزارشت لە کۆنیی و دێرینیی شاری سلێمانی ئەکات ،نەك سەهۆڵەکە کە تازەیە و رۆژانەش بە ئاسایی خەڵك تیایدا کۆ ئەبنەوە و قەرەباڵغە .

print

 289 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*