سەرەکی » چاوپێکه‌وتن » له‌یلا خان: مام جه‌لال له‌ 1989 پێشبینی داگیركردنی كوێتی كرد

خاكی ره‌ش

له‌یلا خان: مام جه‌لال له‌ 1989 پێشبینی داگیركردنی كوێتی كرد

سه‌رتیپ جه‌وهه‌ر 

به‌شی حه‌وته‌م

ئێواره‌ (دارا به‌ره‌كات)ی هاوڕێم هات به‌دوامدا، تا پێكه‌وه‌ سه‌ردانی ماڵی مامۆستا حه‌مید ده‌روێش بكه‌ین. له‌یلا خان-ی خێزانی مامۆستا حه‌مید به‌ گه‌رمیی پێشوازیی لێكردین. ژنێكی خانه‌دانی دونیا دیته‌ی تێگه‌یشتووه‌، له‌به‌رئه‌وه‌ی باس و بابه‌تی ناوماڵیان هه‌ر سیاسه‌ت بووه‌، ئه‌ویش به‌ باشی سه‌ر له‌ سیاسه‌ت ده‌رده‌كا.

ئه‌و ژنه‌ په‌یوه‌ندییه‌كی له‌مێژینه‌ی خێزانیی له‌گه‌ڵ به‌شێك له‌ سه‌ركردایه‌تی كورد هه‌یه‌، به‌تایبه‌ت له‌ یه‌كێتیی نیشتمانیی كوردستان و پارتی دیموكراتی كوردستان.

له‌ میواندارییه‌كه‌ماندا قاوه‌ و چایی كورده‌واریی، دانیشتنه‌كه‌ی گه‌رمتر كردین. له‌یلاخان به‌ گێڕانه‌وه‌ی یاده‌وه‌رییه‌كانی مامۆستا حه‌مید و چه‌ند به‌سه‌رهات و یاده‌ورییه‌ك له‌گه‌ڵ سه‌رۆك مام جه‌لال له‌ دیمه‌شق و قامیشلۆ، دانیشتنه‌كه‌ی به‌چێژتر كرد. داخ و په‌ژاره‌ی خۆی بۆ له‌ده‌ستدانی خۆشه‌ویستان ده‌ربڕی.

له‌یلاخان بۆخۆی لێپرسراو یان سه‌ركردایه‌تی پارتی دیموكراتی پێشڤه‌ڕۆ نییه‌، به‌ڵام رۆڵ و كاریگه‌ریی گه‌وره‌ی هه‌بووه‌ له‌ مێژووی ئه‌و حزبه‌ و یه‌كێك بووه‌ له‌ پشتیوانه‌ سه‌ره‌كییه‌كانی ره‌وانشاد حه‌مید ده‌روێش. له‌ قۆناغه‌ جیاوازه‌كانی سیاسه‌ت و ئاسته‌نگیی پشتی هاوسه‌ره‌كه‌ی گرتووه‌ و كاریگه‌ریی له‌سه‌ر بڕیاره‌كانیشی هه‌بووه‌.

ره‌وانشاد حه‌مید ده‌روێش گرنگی زۆری به‌ خێزانه‌كه‌ی ده‌دا، له‌سه‌ردان و دیدار و بۆنه‌ ره‌سمییه‌كاندا له‌گه‌ڵ خۆیدا ده‌یبرد، هه‌روه‌ك رۆڵی هه‌بووه‌ له‌ هاوسه‌نگی ناو حزبه‌كه‌یان له‌ماوه‌ی رابردوودا.

له‌دوای كۆچی دوایی هاوسه‌ره‌كه‌ی كه‌ سكرتێری حزبه‌كه‌ بوو، به‌دڵنیاییه‌وه‌ كاریگه‌ریی گه‌وره‌ی ده‌بێت له‌سه‌ر چاره‌نووس و نه‌خشه‌ڕێی دوای كۆچی دوایی كاریزمای حزبه‌كه‌یان.

یه‌كێك له‌و یاده‌وه‌رییانه‌ی له‌یلاخان بۆی باسكردم، پێشبینییه‌كی مام جه‌لال بوو له‌ ساڵی 1989. كاتێك له‌گه‌ڵ هاوسه‌ری كۆچكردووی ره‌وانشاد (حه‌مید ده‌روێش) له‌ دیمه‌شق له‌ماڵی مام جه‌لال ده‌بن، مام له‌گه‌ڵ ژماره‌یه‌ك رۆژنامه‌نووسی فه‌ره‌نسی كۆده‌بێته‌وه‌ و قسه‌یان بۆ ده‌كات، دوای دانیشتنه‌كه‌یان مام جه‌لال دێته‌ ده‌ره‌وه‌ و به‌ گه‌شبینیه‌وه‌ باسی داهاتووی كوردستان ده‌كات و ده‌ڵێت به‌ رۆژنامه‌نووسه‌كانم وتوه‌ سه‌دام له‌م ماوه‌یه‌دا كه‌تنێك ده‌كات و ئه‌گه‌ری به‌هێز ئه‌وه‌یه‌ په‌لاماری كوێت بدات و خۆی تووشی داوێك بكات. كۆمه‌ڵگای نێوده‌وڵه‌تیش گورزی لێ ده‌وه‌شێنن و لێی قبووڵ ناكه‌ن.

له‌یلاخان زۆر به‌شه‌وقه‌وه‌ ئه‌و یاده‌وه‌رییه‌ی ده‌گێڕایه‌وه‌ و زوو زوو ده‌یگوت هه‌زار ره‌حمه‌تی لێبێت و یادی به‌خێر. وتیشی: من به‌مام جه‌لالم وت جا ئه‌وه‌ چۆن رووده‌دات، سه‌دام ئێستا له‌وپه‌ڕی به‌هێزیدایه‌! تۆ دڵی خۆت خۆش ده‌كه‌یت ئه‌گه‌رنا پێموانییه‌ سه‌دام ئه‌و كاره‌ بكات. له‌وه‌ڵامدا مام جه‌لال پێی وتبوو له‌یلا ئه‌وه‌ من 7 به‌رخ ده‌كه‌مه‌ خێر و قوربانی بۆ هه‌ژارانی گه‌ڕه‌ك (مه‌به‌ستی مام جه‌لال گه‌ڕه‌كی ماڵه‌كه‌ی خۆی بووه‌ له‌ گه‌ڕه‌كی مه‌زرعه‌ له‌ دیمه‌شق)، ئه‌گه‌ر سه‌دام ئه‌و كه‌تنه‌ی كرد 7ی دیكه‌ ده‌كه‌مه‌ قوربانیی.

منیش به‌ مام جه‌لالم وت: ئه‌گه‌ر تۆ 14 بكه‌یته‌ خێر و قوربانی، ئه‌وا من 25 دانه‌ ده‌كه‌مه‌ قوربانیی و خێر. مام جه‌لال له‌وڵامدا ده‌ڵێت كه‌وایه‌ ئێمه‌ گره‌ومان كرد و با ببینین بزانین چی ده‌بێت.

له‌یلا خان وتیشی: رۆژ هات و رۆژ رۆیشت من بیرم نه‌مابوو ئه‌و گره‌وه‌. مام جه‌لال له‌ 1991 له‌گه‌ڵ وه‌فدێكی ئۆپۆزسیۆنی عیراق هاته‌ قامیشلۆ، به‌دوایدا ناردین و بینیمان، مام جه‌لال پێی وتم: ها له‌یلاخان له‌سه‌ر وه‌عده‌كه‌ی خۆت ماوی 25 به‌رخه‌كه‌ بكه‌یته‌ خێر و قوربانیی؟

منیش وتم: مام جه‌لال له‌سه‌ر وه‌عدی خۆمم خۆش مژده‌بیت، ئیتر مام جه‌لال كردیه‌ گاڵته‌ و پێكه‌نین.
ماوه‌یه‌كی درێژ دانیشتین و له‌گه‌ڵ قاوه‌ و چایی، شیرینی كورده‌واریمان خوارد، میواندارییه‌كی پڕ وه‌فا و رێز بوو. به‌ له‌یلاخان-م وت من وه‌ك وه‌فایه‌ك بۆ مامۆستا حه‌مید كه‌ جوامێرێكی دیاری رێی خه‌باتی كوردایه‌تی بوو، په‌یوه‌ندییه‌كی تایبه‌تیمان له‌گه‌ڵیدا هه‌بوو، هه‌روه‌ك نه‌مانتوانی له‌ پرسه‌كه‌ی ئاماده‌بین، ئه‌وا هاتووم وه‌فاو سۆزی خۆم بگه‌ینم.

دوای مه‌ره‌خه‌س بوون له‌ماڵی مامۆستا حه‌مید، حه‌زم كرد سه‌رێكی باره‌گای سه‌ره‌كیی پارتی دیموكراتی پێشكه‌وتنخوازی كورد له‌ سوریا بده‌م. پێشتر مه‌وعیدی سه‌ردانیكردنم رێكخستبوو، هه‌ر به‌پێ به‌ره‌و باره‌گاكه‌ رۆیشتین.

بارانێكی زۆر باری بوو، سه‌رما كورژی كردبووینه‌وه‌، له‌گه‌ڵ ئه‌و هاوڕێیه‌م به‌ كۆڵانه‌ ته‌نگ و تاریكه‌كانی قامیشلۆدا رێمان ده‌كرد. پێشتر باره‌گای پارتی دیموكراتی پێشكه‌وتنخوازم بینیبوو، له‌ ژێرزه‌مینی باڵه‌خانه‌یه‌كه‌ و باره‌گایه‌كی كۆنه‌ و ناسراوه‌، من هیچ تابلۆیه‌كم نه‌بینی ئاماژه‌بێت بۆ باره‌گا، جگه‌ له‌ باره‌گای په‌یه‌ده‌، باره‌گای هه‌موو حزبه‌كانی دیكه‌ به‌شێوه‌یه‌كی گشتیی له‌ شوققه‌ یان شوێنێكی بچووكی دیاریكراودان، وه‌ك باشووری كوردستان نییه‌ رێگا و كۆڵانی باره‌گا به‌ كۆنكرێت بگیرێت و پاسه‌وان له‌به‌ر ده‌رگا بێت یان لێپرسراوی باره‌گا به‌خۆی و پاسه‌وانه‌وه‌ هاتوچۆ بكات. ته‌نانه‌ت لێپرسراوانی په‌یه‌ده‌ش كه‌ هێزی سه‌رده‌ستی رۆژئاوای كوردستانن، به‌ قافڵه‌و پاسه‌وانی ئاشكراوه‌ ناسوڕێنه‌وه‌.

هه‌موو ئه‌وانه‌ی بینیمن خۆیان و كه‌سێك یان شۆفێرێك ده‌سوڕێنه‌وه‌ و كه‌سیان له‌گه‌ڵ نییه‌، كه‌لتووری قافڵه‌ی پاسه‌وان و هۆڕن و فوول لایت لێدان له‌وێ نییه‌، بگره‌ له‌زۆربه‌ی كاتدا هاتن و چوونیان داخراوه‌ و بازنه‌یه‌كی ته‌سكی ده‌وروبه‌ریان نه‌بێت نازانرێت له‌كوێن و چی ده‌كه‌ن و بۆكوێ ده‌چن.

گه‌یشتینه‌ باره‌گاكه‌ و كاك ئه‌حمه‌د به‌ره‌كات و حه‌سه‌ن جه‌نگۆ ئه‌ندامانی مه‌كته‌ب سیاسی به‌گه‌رمی پێشوازییان لێكردم. بۆ هه‌واڵپرسین و قسه‌كردن له‌باره‌ی پێشكه‌وتنه‌كانی رۆژئاوای كوردستانه‌وه‌ و حه‌زمكرد به‌شێك له‌ هه‌ڤاڵانی پارتی دیموكراتی پێشكه‌وتنخواز ببینم.

ئه‌حمه‌د به‌ره‌كات بۆخۆی ده‌مێكه‌ له‌نێو حزبایه‌تیدا قاڵبۆته‌وه‌، پیاوێكی بێده‌نگه‌ و رۆڵی دیاری هه‌یه‌ له‌ حزبه‌كه‌یدا، به‌یه‌كێك له‌ كه‌سه‌ دیاره‌كانی حزبه‌كه‌ی داده‌نرێت. دوای به‌خێرهێنان و هه‌واڵپرسین به‌ قاوه‌ی كورده‌واریی باسی حزبایه‌تی و رووداوه‌كانی ئه‌و دواییه‌ و قۆناغی دوای مامۆستا حه‌مید دانیشتنه‌كه‌ی گه‌رم كردین. ئه‌وان له‌گه‌ڵ ورده‌ گله‌ییه‌كانیان له‌ یه‌كێتی له‌خه‌می یه‌كێتیی نیشتمانیی كوردستاندا بوون كه‌ كۆنگره‌ بكرێت و ئه‌و حزبه‌ نوێ ببێته‌وه‌، منیش وتم هیوادارم ئێوه‌ش كۆنگره‌ بكه‌ن و قۆناغێكی نوێ له‌دوای مامۆستا حه‌مید ده‌ستپێبكه‌ن.

ئه‌وه‌ی جێی سه‌رنج بوو بۆمن، له‌و ژووره‌ی لێی دانیشتبووین وێنه‌یه‌كی مامۆستا حه‌مید ده‌روێش گه‌وره‌ كرابوو له‌ چوارچێوه‌یه‌كی جوان له‌سه‌ر ئه‌و كورسییه‌ دانرابوو كه‌ ئه‌و هه‌مووجار لێی داده‌نیشت، ئه‌مه‌ش وه‌ك رێز و ئادگارێكی له‌بیرنه‌كراوی مامۆستا حه‌مید.

دانانی ئه‌و وێنه‌یه‌ جگه‌ له‌و لێكدانه‌وه‌یه‌ی باسمكرد، هه‌ندێك پێیانوابوو قۆناغی دوای كاریزمای حزبه‌كه‌یان (حه‌مید ده‌روێش) بۆ ئه‌و سه‌ركردایه‌تییه‌ی ئێستایان سه‌خته‌، جارێ نایانه‌وێت باسی كۆنگره‌ بكه‌ن به‌هۆی نه‌بوونی زه‌مینه‌ی دووباره‌ مشتوماڵكردنه‌وه‌ی حزبه‌كه‌، بۆیه‌ ئه‌و وێنه‌یه‌یان داناوه‌ به‌و مانایه‌ی هێشتا كۆستی سه‌رۆكی حزبه‌كه‌یان كه‌ كاریزمای ئه‌وان بوو، پیاوێكی ناسراو بوو له‌سه‌ر ئاستی رۆژئاوای كوردستان و بگره‌ باشووری كوردستانیش، له‌بیرنه‌كراوه‌.

له‌گه‌ڵ باسی كۆنگره‌گرتنی یه‌كێتی، منیش وتم هیوادارم ئێوه‌ش به‌م زوانه‌ قۆڵی لێ هه‌ڵماڵن، ئه‌حمه‌د به‌ره‌كات زوو له‌من تێگه‌یشت، وتی: كێشه‌مان نییه‌ و له‌مێژ نییه‌ كۆنگره‌مان كردووه‌، بۆیه‌ جاری َ ره‌نگه‌ پێویست نه‌بێت ئه‌گینا كێشه‌مان نییه‌.
تا دره‌نگانێك گفتوگۆمان كرد و دواتر ئیزنمان خواست و هیوامان خواست دیداری ئه‌مجاره‌مان له‌ ژیانێكی باشتری رۆژئاواو باشووری كوردستاندا بێت.

به‌یانیی رۆژی دواتر، دره‌نگانێك به‌خه‌به‌ر هاتین مه‌وعیدمان له‌گه‌ڵ عه‌بدوجه‌باری هاوڕێم هه‌بوو كه‌ له‌گه‌ڵ هاوڕێیه‌كم یه‌كتر ببینین، پێكه‌وه‌ چووین و خۆره‌تاوێكی خۆش بوو، ئاسمان هه‌ورانی ده‌هێناو ده‌بردو جارجار رووی رۆژی داده‌پۆشی.

من مه‌وعیده‌كانم دوای نیوه‌ڕۆ بوو، بۆیه‌ ده‌مویست به‌یانییه‌كه‌ی چه‌ند شوێنێك ببینم، حه‌زیشم ده‌كرد به‌پێ هه‌ندێك بجووڵێم.
به‌پیاسه‌ سه‌ردانی چه‌ند شوێنێكی ناو قامیشلۆم كرد، مه‌به‌ستم بوو هه‌ندێك شوێن هه‌یه‌ بیانبینم به‌تایبه‌تی ئه‌وه‌ی پێی ده‌ڵێن (مربع الامنی) هه‌روه‌ك بازاڕێكی میللی له‌قامیشلۆ هه‌یه‌ كه‌ پێی ده‌ڵێن بازاڕی عه‌ره‌بان. ئه‌و بازاڕه‌ میللییه‌ و هه‌موو شتێكی لێ ده‌ستده‌كه‌وێت و له‌ بازاڕی شێخه‌ڵڵای هه‌ولێر و ئه‌و بازاڕه‌ی نزیك مزگه‌وتی گه‌وره‌ی سلێمانی ده‌چێت. زۆر قه‌ره‌باڵغه‌ و زۆربه‌ی خه‌ڵكی قامیشلۆش رووی تێده‌كه‌ن.

له‌رێی گه‌ڕانه‌وه‌ماندا باخێكی بچووك له‌ناو گه‌ڕه‌كێك بینیم ژماره‌یه‌ك په‌یكه‌ری تێدابوو به‌ناوی باخی (خوێنه‌ران) له‌ناو باخه‌كه‌دا كتێبخانه‌یه‌كی بچووكی تێدابوو كه‌ ژماره‌یه‌كی كه‌م كتێبی لێبوو، زۆربه‌یان كتێبی سیاسی بوون و به‌شێكی كه‌میان كوردی بوون و به‌پیتی لاتینی چاپكرابوون.

په‌یكه‌ره‌كانیش په‌یكه‌ری ئه‌دیب و شاعیرو هۆزانڤانی ناسراوی كوردستان بوون له‌وانه‌ (موسا عه‌نته‌ر، ئۆسمان سه‌بری، شێركۆ بێكه‌س، جگه‌ر خوێن) . ئه‌وه‌ی سه‌رنجی راكێشام له‌سه‌ر په‌یكه‌ره‌كه‌ی شێركۆ بێكه‌س نووسرابوو شێرگۆ بێكه‌س واته‌ پیتی (ك) كرابوو به‌ (گ). من وامده‌زانی ته‌نها له‌ ده‌ربڕین پیتی (ك) ده‌كه‌ن به‌ (گ) چونكه‌ له‌زماندا ئه‌و تێبینییه‌ هه‌یه‌ كه‌ به‌هۆی دراوسێیه‌تی ده‌نگ دروست ده‌بێت، به‌ڵام دیاربوو ئه‌وان له‌نووسینیشدا ئه‌و هه‌ڵه‌یه‌ ده‌كه‌ن. بۆنموونه‌ له‌سه‌ر گۆڕی شه‌هیدێك له‌ گۆڕستانی شه‌هیدانی كۆبانی هه‌مان هه‌ڵه‌م بینی.

له‌زماندا به‌هۆی دراوسێیه‌تی ده‌نگ ئه‌و گرفته‌ دروست ده‌بێت، بۆ نموونه‌ له‌ نووسیندا ده‌نووسرێت (پێشمه‌رگه‌) به‌ڵام به‌خوێندنه‌وه‌ ده‌وترێت (پێژمه‌رگه‌)، ئه‌م گرفته‌ له‌هه‌موو زمانێكدا هه‌یه‌، له‌ عه‌ره‌بیش (عه‌نبه‌ر) ده‌كرێته‌ (عه‌مبه‌ر)..تد.له‌گه‌ڵ عه‌بدوجه‌بار پیاسه‌یه‌كی باشم كرد. ئه‌و هاوڕێیه‌م تا بڵێی قسه‌ خۆش و بێوه‌یه‌، ده‌روون و دڵپاكه‌، هیچ له‌ دڵی خۆی ناگرێت. خوانه‌كات به‌یه‌كێكه‌وه‌ بیگرێت، به‌ نوكته‌ و به‌زم ماندووی ده‌كات. له‌و چه‌ند رۆژه‌ی له‌وێ بووم، چه‌ند رۆژێك پێكه‌وه‌ بووین بۆیه‌ نه‌م ده‌وێرا زۆر خۆمی لێبده‌م، هه‌میشه‌ هه‌وڵم ده‌دا له‌به‌ره‌ی ئه‌ودابم نه‌ك دژی بم، چونكه‌ ده‌ره‌قه‌تی نه‌ده‌هاتم له‌ قسه‌كردن و نوكته‌. مرۆڤی ئاوها كه‌من ئه‌وه‌نده‌ دڵساف، هه‌ولێری وته‌نی سافیلكه‌، زۆر حازر به‌ده‌ستبوو له‌ قسه‌كردن، ده‌یزانی له‌كوێوه‌ ده‌ستی خۆی بووه‌شێنێت.

له‌گه‌ڵ هاوڕێیه‌كمان (وائیل وه‌رده‌) ئاشورییه‌ و پیاوێكی ئاشوریی خه‌ڵكی ته‌ل ته‌مر-ه‌ له‌ رۆژئاوای كوردستان، هه‌میشه‌ قسه‌یان له‌سه‌ر یه‌كتر ده‌كرد. وائیل زۆر په‌سندیی ته‌لته‌مری ده‌دا و مه‌دحی ده‌كرد، عه‌بدوجه‌باریش بۆ ئه‌وه‌ی تووڕه‌ی بكات، ده‌یوت: ئه‌وه‌ ته‌لته‌مریش رۆیشت و توركیا داگیری كرد، ئیدی هیچ نامێنێت باسی بكه‌ی! وائیل ده‌یگوت: له‌وه‌ته‌ی تۆم ناسیووه‌ هه‌موو شتمان له‌ده‌ستداوه‌، به‌و مانایه‌ی دمۆریی و باسی هه‌رچی بكه‌یت ده‌ڕوا! ئه‌ویش ده‌یوت: تۆ چوویته‌ عێن عیسا، ئه‌ویشمان له‌ده‌ستدا (عێن عیسا به‌ر له‌په‌لاماری توركیا سه‌نته‌ری كۆبوونه‌وه‌ گرنگه‌كانی رۆژئاوای كوردستان بوو نوێنه‌رایه‌تییه‌ بیانییه‌كان له‌وێ بوون).
ئاشورییه‌كانی رۆژئاوای كوردستان ته‌لته‌مر به‌ پایته‌ختی خۆیان ده‌زانن. ته‌لته‌مر شارۆچكه‌یه‌كی بچووكی سه‌ربه‌ پارێزگای حه‌سه‌كه‌یه‌ و ده‌كه‌وێته‌ باكووری خۆرئاوای ئه‌و پارێزگایه‌، به‌پێی زانیارییه‌كان ژماره‌ی دانیشتووانه‌كه‌ی له‌ 2010 دا گه‌یشتۆته‌ 10 هه‌زار كه‌سێك. ناوی شارۆچكه‌كه‌ كوردییه‌ و به‌ناوی میر ته‌مر پاشای ملان كراوه‌. ئاشورییه‌كان له‌ سه‌ره‌تای سییه‌كانی سه‌ده‌ی رابردوو 1933 له‌لایه‌ن حكومه‌تی عیراقی ئه‌وكاته‌وه‌ له‌ شارۆچكه‌ی سیمێل كه‌ ده‌كه‌وێته‌ نزیك زاخۆ له‌ باشووری كوردستان عیراق روبه‌رووی ره‌شه‌كوژییه‌كی گه‌وره‌ بوونه‌وه‌ و سه‌دانیان لێ كوشتن و هه‌زاران خێزانیان لێ ئاواره‌ی سوریا بوو. ئه‌و رۆژه‌ له‌لایه‌ن ئاشورییه‌كانه‌وه‌ به‌ رۆژی شه‌هیدی ئاشوریی ناوده‌برێت كه‌ ده‌كاته‌ 7ی ئاب ئه‌وكاته‌ فه‌ره‌نسییه‌كان له‌ ته‌لته‌مر نیشته‌جێی كردن و مانه‌وه‌ و تێكه‌ڵ به‌ كۆمه‌ڵگه‌ی كورده‌واریی بوون، به‌ڵام له‌به‌رئه‌وه‌ی ژماره‌یان زۆر بوو، بوون به‌ زۆرینه‌ و شارۆچكه‌كه‌ به‌ شارۆچكه‌یه‌كی ئاشورییه‌كان ناسرا.

به‌رله‌ هێرشی تیرۆرستانی داعش بۆسه‌ر ئه‌و شارۆچكه‌یه‌ له‌ 2015، ژماره‌ی ئاشورییه‌كان له‌ ته‌لته‌مر و ده‌وروبه‌ری ده‌گه‌یشته‌ 20 هه‌زار كه‌سێك، به‌ڵام دواتر زۆربه‌یان به‌هۆی په‌لاماری تیرۆرستانه‌وه‌ ده‌ربه‌ده‌ربوون.

ئێستا ئه‌و شارۆچكه‌یه‌ به‌ده‌ست هێزه‌كانی سوریای دیموكراته‌وه‌یه‌ و ناوچه‌یه‌كه‌ جارجار گروپه‌ تیرۆریسته‌كانی نزیك توركیا له‌ باكووره‌وه‌ په‌لاماری ده‌ده‌ن، به‌ڵام زۆربه‌ی دانیشتوانه‌كه‌ی گه‌ڕاونه‌ته‌وه‌ سه‌ر ماڵ و حاڵی خۆیان.

 

print

 249 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*