سەرەکی » وتار » نه‌وزادى موهه‌ندیس‌ » كورد لە نێوان ئەمریكا و ئێراندا، كامیان ؟

كورد لە نێوان ئەمریكا و ئێراندا، كامیان ؟

*لە دوای دەست لەكاركێشانەوەی عادل عبدالمهدی لە 29/11/2019 وە تاكو ئێستا ، نزیكەی 10 كاندید لەلایەن ماڵی شیعەی عیراقەوە پێشكەشكراون بۆ تەكلیفكردنی بۆ پێكهێنانی كابینەی حكومەتی نوێی عیراق، بەڵام ئەوە 4مانگ و نیوە نەتوانراوە كەسێكی شیاو و گونجاو بەهێز و نمایندەی هەموان((كوتلەی گەورەی پەرلەمانی)) پێشكەش بكەن و حكومەت لە تەنگژەی سیاسی و ئابووری و ئەمنی ڕزگار بكرێت، بەڵام ئەوە ماڵی شیعەكانە كە ناتوانن پێكەوە هەڵبكەن و لەبەر ململانێ‌ ناڕەواكانی خۆیان لەلایەك ولەلایەكی تریشەوە دەستوەردانە دەرەكیەكان لە وڵاتانی ناوچەكە و زلهێزەكانیشەوە بونەتە هۆی پەكخستنی پڕۆسەی سیاسی لە عیراقدا، هەر ئەمەش بۆتە هۆی دواكەوتن پاشكەوتنی عیراق لەهەموو رووەكانەوە. بەتابەتیش لە ئێستادا كە گەلێك كێشە و لەناویشیاندا چوار كێشە و گرفتی سەرەكی بەرۆكی عیراقی گرتوە كە بریتین لە: (( گرفتی ناجێگیری سیاسی و پەتای كۆرۆنا و دابەزینی نرخەكانی نەوت و كەمی داهات و خراپی باری ئابووری و سەرهەڵدانەوەی تیرۆریستانی داعشیش)).

لە ئێستادا كە عەدنان زورفی دەستلەكاركێشانەوەی خۆی راگەیاند لە 9/4/2020 (( ڕۆژی ڕزگاركردنی عیراق ڕووخاندنی ڕژێمی صدام و بەعسیەكان لە 9/4/2003))دا. لە پێكهێنانی حكومەت كە هێشتا 9 ڕۆژی ماوە بۆ وادەی 30 ڕۆژە دەستوریەكەی خۆی، كە هەرچەندە بەرنامەی كاری حكومەتەكەشی پێشكەش بە پەڕلەمان كردبوو، بەڵام وەك ڕایگەیاند كە وا نەیتوانیوە تەوافوقی سیاسی لەسەری دروست ببێت و هەر ئەمەش بۆتە هۆی ئەوەی كە نەتوانێت زۆرینەی پەڕلەمانی عیراق مسۆگەر بكات بۆ متمانە پێدانی.

*شیعەكان لە ئێستادا مستەفا كازمی//بەڕێوەبەری هەواڵگری عیراقیان كاندید كردۆتەوە، وەك ڕاگەیەنراش كوردیش لەڕێگەی هەردوو حزبی ((یەكێتی و پارتی))ەوە پێشوازیان لەو بڕیارە كردوە.

بەڵام ئایا كورد،سەركەوتوو دەبێت لە لایەنگری كام لەو كاندیدانەی شیعەكاندا؟ ئایا كام لەو كاندیدانە باشترن بۆ كورد؟ ئایا پەیوەندیەكانی هەرێم و بەغداد بەرەو كوێ‌ ئاڕاستە دەكرێت ؟ كورد ئەركی چیە لەم قۆناغەدا؟
بەئاشكرا و بەنهێنی كورد بەداخەوە دابەشبوونەتە سەر بۆچوون و بەرژەوەندی تایبەتی و جیاوازی خۆیان، هەربۆیەش شیعەكانیش گەمەی سیاسی لەگەڵ هەمواندا دەكەن و توانیویانە درز بخەنە نێو ڕیزی ماڵی كوردەوە كەلە بنچینەشدا زۆر یەك و یەكگرتوو نەبووە. بۆیە كورد هەق نیە خۆی بكاتە بەشێك لەململانێكانی لەلایەك ئەمریكا و ئێران و لەلایەكی تریشەوە ململانێ‌ نێوخۆییەكانی شیعەكان و هەق وایە كە لەجیاتی ئاوها كارێك، بكەونە خۆ بۆ پتەوكردن و بەهێزكردنەوەی نێوماڵی كورد و یەكڕیزی و یەكدەنگی كورد بپارێزن، نەك وەك ئێستا هەریەكە و لەدۆڵێكدایە و بەدوای بەرژەوەندی و دەسكەوتی بچووكی حزبی خۆیانەوەن.

كێشەی نێوماڵی شیعەكان كێشەی كورد نیە بۆیە خۆتێهەڵقورتاندنی كارێكی خراپە،چونكە نابێتە هۆی رازیكردنی هەموو شیعەكان و بەڵكو دابەشدەبن بۆ سەر دووبەرەی ((دژ _ لەگەڵ ))كوردا، بەداخیشەوە كوردیش كاریزمایەكی كاریگەری نەماوە لەسەر رووداو و گۆڕەپانی عیراق و ناوچەكە و لای زلهێزەكانیش كە بتوانێت دەستپێشخەریەكی سیاسی عیراقیانە پێشكەش بكات و هەموان كۆبكاتەوە و لەوناوەشدا كورد سەنگ و قورسایی خۆی بۆ بگەڕێتەوە وەك لە پێشدا هەبوو.

پەشیمانبونەوەی شیعەكان لە عەدنان زورفی، لەلایەك دوو ڕوویی ئەو هێز و سەركردانە پیشان دەدات لەناو خۆیاندا و بێمتمانەیی هەمیشەیشیان تۆخ دەكاتەوە و لەلایەكی تریشەوە هیچیان عیراق و گەلی عیراقیان لا مەبەست نیە هێندەی دەسكەوت و پشك پشكێنەی حیزبایەتی خۆیان. عیراقیان كردۆتە مێرگێكی پڕ بەرەكەت و هەریەكە گەرەكێتی بەشی خۆی لێ بخوات،تەنانەت كار گەیشتۆتە ئەوەی كە سەركردە سیاسیەكان بە قسەی مەرجەعە شیعیە ئاینیەكانیش ناكەن.

عیراق بەم شێوەیە بە ئاڕاستەی تێكدان و كاولبوونی زیاتر هەنگاو دەنێت و كاندیدكردنی كەسێكی ئەمنیش وەك مستەفا كازمی، ئەوا عیراق بە ئاڕاستەیەكی ئەمنی هەنگاو دەنێت و دورنیە ببێتە حكومەتێكی سەربازی و ئەمنی و تەوقی كوشتن و بڕین و هەڕەشە و زوڵم و چەوسانەوەش بكاتە ملی هەموان بەكوردستانیشەوە. هەربۆیە ئایندەی عیراق زۆر ڕوون نیە و بەرەو تاریكی و تەڵخی زیاتریش دەڕوات.هۆكاری سەرەكی هەموو ئەم گێژاو و ناجێگیریە سیاسیەی عیراق تەنها شیعەكانە، نەكورد و نەسونە ڕۆڵیان تیادا نیە و هەموو ئەنجامێكیش دەكەوێتە ئەستۆی شیعەكان خۆیان.بۆیە كورد ئەركێتی تەنها لەچوارچێوەی پاراستنی بەرژەوەندیەكانی هەرێمدا هاوبەشی و هاواكاری لەگەڵ ئەو لایەنانەدا بكات و چاوەڕوان بكات بۆ بینینی كارنامەی مستەفا كازمیش كە تا چ ئاستێك لەگەڵ بەرژەوەندیەكانی هەرێمدا یەك دەگرێتەوە،نەك بەتەنها بەڵێن و بەتەلەفۆنێك كۆتایی بەهەموو كارێك بهێنرێت كە هێشتا لەڕووی یاساییەوە دەنگدان یان متمانەدان بە عەدنان زورفی یەكلا نەبۆتەوە.

پاشەكشەی عدنان زورفی لەپێكهێنانی كابینەی حكومەت لەكاتێكدایە كە پاشەكشەی هێزەكانی ئەمریكاش لەگۆڕێدایە، بۆیە ئێران و حیزبەكانی سەر بەئێران ئەم هەلەیان قۆستەوە بۆ دژایەتی زورفی و پێشكەشكردنی مستەفا كازمی، كەوا دەوترێت سەر بەئێرانە، ئەمەش بۆخۆی لێدانە لە شكۆو بڕیاری ئەمریكا و لەلایەكی تریشەوە لێدانە لە شكۆی سەرۆك كۆمار كە زۆر رەخنەیان لێدەگرت كە پێشێلی دەستوری كردوە و بە قسەی ئەمریكای كردوە. بەداخیشەوە لە كوردستانیش دەمێكە دەیانەوێت ڕۆڵی سەرۆك كۆمار بچووكبكەنەوە.بۆیە پێناچێت ئەوەی كە كورد دەیخوازێت لە مستەفا كازمیش وەدەستی بێنێت و دەستی بكەوێت !.بەم شێوەیەش شانۆگەرییە بێتامەكەی عیراق بەردەوام دەبێت لە خولانەوەی لە بازنەیەكی بۆشدا تا ئەوكاتەی عیراقیەكان نەبنە خاوەن بڕیاری سەربەخۆی خۆیان دوور لە وەسیەتنامە و ئامۆژگاری و هەڕەشەی دەرودراوسێ و زلهێزەكانیش.

print

 55 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*