سەرەکی » مانشێت » قوباد تاڵەبانی: بەڵێنی درێژەدان بە رێگای پیرۆزی شەهیدان دووپات دەكەینەوە

لە ساڵیادی شەهیدی فەرماندە لیوا سەڵاح دیلمانی

قوباد تاڵەبانی: بەڵێنی درێژەدان بە رێگای پیرۆزی شەهیدان دووپات دەكەینەوە

لەساڵیادی شەهیدی فەرماندە لیوا سەڵاح دیلمانی، هەڤاڵ قوباد تاڵەبانی پەیامێكی بڵاوكردەوە، ئەمە دەقەكەیەتی:

خێزان و بنەماڵەی شەهیدی فەرماندە لیوا سەڵاح دیلمانی

جارێكیتر برینی دڵمان كولایەوە و لەناخەوە خەم دایگرتین بەهاتنەوەی ساڵیادی شەهیدبوونی پۆلێك پێشمەرگەی جوامێر و ئازا و دڵسۆز، كە فەرماندە لیوا سەڵاح دیلمانی و هاوڕێكانی بوون لەسەر خاكی پیرۆزی كەركوك و لە شەڕی دوژمنی دڵ پڕ لە قینی داعش.

لیوا سەڵاح پێشمەرگە و لەهەمان كاتدا فەرماندەیەكی پارتیزانی رۆژانی سەختی خەباتی یەكێتیی نیشتمانیی كوردستان بوو لە شاخ و چیا سەركەشەكانی كوردستان، لەم كاروانەشدا لێوەشاوەیی و ئازایەتی و قوربانی زۆری پێشكەش كردووە، دڵسۆزی و پەرۆشی بۆ نەتەوە و خاكەكەشی ئەوی لەكوێستانەكانی قەندیلەوە گەیاندە گەرمەسێری عەتشانەی كەركوك و لەوێ تاجی شەهیدبوونی لەسەرنا و چووە دنیای نەمرانەوە.

لەساڵیادی شەهید سەڵاح دیلمانی و هاوڕێكانیدا سەری رێز بۆ گیانی سەرجەم شەهیدانی رێگای رزگاری كوردستان و بۆ كاروانە دورودرێژەكەی شەهیدانی یەكێتی دادەنەوێنین، بەڵێنی درێژەدان بە رێگاكەشیان دووپات دەكەینەوە، چونكە وەك هەمیشە مام جەلالی رابەرمان فەرموویەتی؛ باشترین وەفا بۆ شەهیدان درێژەپێدانی رێبازەكەیانە.

درود بۆ گیانی شەهیدی فەرماندە سەڵاح دیلمانی و هاوڕێكانی و لەسەر هەمان رێچكەی ئەوانیش گفت و بەڵێن دەدەین تا دواوێستگە شەڕی تیرۆر بكەین و بەیارمەتی دۆستان و هاوپەیمانەكانمان، كۆتاییهێنان بەمەترسی داعش پاش تێكشكاندنی سەربازیی ئەو رێكخراوە تیرۆریستە، بكەینە ئەركی لەپێشینەی خۆمان.

رێزی زۆرم قبوڵ بفەرموون

براتان
قوباد تاڵەبانی

print

 577 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*