سەرەکی » ئابووری » چەند پڕۆژەیەك لە كفری

چەند پڕۆژەیەك لە كفری

رەفعەت محەمەد – كفری

بەمەبەستی جوانكاری‌و سەوزكردنی ناوچەكانی دەوروبەری بەنداوی باوەشاسوار لە كفری، شارەوانی كفری‌و بەهاوكاری رێكخراوی هاوكاری ئەڵمانی ماوەی چەند هەفتەیەكە سەرقاڵی جێبەجێكردنی چەند پڕۆژەیەكن.

قادر فاتیح وەیس سەرۆكی شارەوانی كفری، بەكوردستانی نوێی راگەیاند، هەرچەندە بەنداوی (باوەشاسوار) ماوەی چەند ساڵێكە دروستكراوە، بەڵام بەداخەوە تا ئێستا هیچ شوێنێكی ئەوتۆی لێ نییە بۆ ئەوەی خێزانەكان بتوانن سوودی لێ ببینن بۆ حەوانەوەیان لە كاتی سەردانیكردنیان بۆ بەنداوەكە، بۆیە شارەوانی كفری‌و بەهەماهەنگی لەگەڵ رێكخراوی هاوكاری ئەڵمانی‌و شارەوانیەكانی گەرمیان، ئێستا تیمەكانی شارەوانیمان سەرقاڵی تەختكردنی زەوییەكانی خوار بەنداوی باوەشاسوارن، بەمەبەستی دروستكردنی جێگای حەوانەوەو چاندنی نەمام‌و دروستكردنی پردێكی پەڕینەوەی ئۆتۆمبێل بۆ ئەودیوی خوار بەنداوەكە، تا زۆرترین گەشتیار سوود لەم شوێنە وەربگرن.

وتیشی: «بە تەواوبووونی ئەم پڕۆژەیە، رووبەرێكی بەرفراوان لە سەوزایی دروست دەبێت».

بەوتەی سەرۆكی شارەوانی كفری، بەشی دووەمی پڕۆژەكە بریتییە لە دروستكردنی دیواربەندییەك لە سەرەوەی ناوچەی بەنداوەكە بۆ ئەوەی رێگری بكەین لە هاتنی ئۆتۆمبێل‌و ماتۆرسكیل بۆ بەرزاییەكانی ناوچەی بەنداوەكە، بۆ ئەوەی تەنها شوێنی گەشتیاران بێت‌و بەئاسانی بە پیادە هاتووچۆ بكەن لە بەرزایی ناوچەی بەنداوەكە، لەگەڵ سەوزكردنی شوێنەكانی دەوروبەری بە چاندنی دەیان نەمام‌و دانانی سیستمی ئاودێری دڵۆپە.

سەبارەت بە وادەی تەواوبوونی پڕۆژەكە، قادر فاتیح وەیس وتی: «پێدەچێت لە چەند رۆژی داهاتوودا ئەو پڕۆژانە تەواو بكرێت‌و سیمایەكی جوان ببەخشێتە بەنداوی باوەشاسوار».

 

 

فۆتۆ: حەیدەر زەنگەنە

print

 79 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*