سەرەکی » مانشێت » گەورەیی مام دەرکەوتەوە… ئەو رۆژە شەقامەکانی (شام) تژی بوون بەچڵە زەیتونە سەوزەکان

گەورەیی مام دەرکەوتەوە… ئەو رۆژە شەقامەکانی (شام) تژی بوون بەچڵە زەیتونە سەوزەکان

نازم دڵبەند

ئەو رۆژە زڕەی فنجانی قاوەخانەکەی(طليطلة) هەم بۆن و بەرامە و هەم گەڕی زەمەنێکی نوێی بەخۆیەوە دەبینی و لەگەڵ نوسینەوەی هەر پەرەگرافێکی سەر پەڕە سپیەکەی مژدەی هەڵسانەوە دەوروبەرەکە زیاتر هەستی خۆڕاگرییان بەڕووخسارا پەخشدەبوو و سەرلەنوێ باوەڕبوونێکی عاشقانە نائومێدیەکانیان دەشاردەوە…

ئەوێ سەعاتێ بوو (مام) وەک چۆن ژیانی بەئومێدەوە بەڕێدەکرد ئەو ساتەوەختیش کە لەگەڵ هەڤاڵەکانی پەنجەمۆری کاغەزە بەهادارەکەی(1/6)ی مۆرکرد هەر زوو پەیامی ئەوەشی راگەیاند (عاشقەکان لەشاخ بەیەک دەگەنەوە و سەرلەنوێ ماچی خۆشەویستی دەبەخشنەوە).

یەکەم دەستە کە کۆڵەپشتی مان و نەمانیان هەڵگرت و دەفتەرێکی بچکۆڵانەو کۆلکە قەڵەمێکی داریان خستە بەرباخەڵ و تۆماری بیرەوەرییەکانیان نووسیەوە لەیەکەم پەڕە نووسیان (هاتینەوە لەغوربەتەوە بۆ سەرهەڵدانەوەی خەباتێکی نوێ و گوێگرتن لەسەدای لەرینەوەی گەرووی یەکێتیی نیشتمانی کوردستان بۆ پیاهەڵدانی شۆڕشێکی نوێ).

ئەوێ رۆژێ بوو دەرگاکانی ئومێد لەهەموو دەڤەرەکان کرانەوە، ئەوێ رۆژێ بوو گەورە سیمبوڵێک هەڵکشاو باڵای بڵندبوو تا سێبەری بوو بە نیشتمانێکی ئارام و شنەی هەموو خانووە قوڕەکانی شاروگوندی لەباوەشێ گرت.

لەگەڵ یەکەم پۆلە عاشقەکانا کە سەرلەنوێ نیگای شاخ-یان ماچکردەوە چرای کزی دەوار و ماڵ و دڵە بریندارەکان و رۆح گەشەکان بەدەستی (مام) سەرلەنوێ داگیرسانەوە و سەرلەنوێ تفەنگەکان دەستیان لەملی شاخ کردەوە.

(45) ساڵ سەرباری هەموو هەڵکشان و داکشانەکان ئەوە(یەکێتیی)یەکەی (مام)ە کە هەنوکەشی لەگەڵدابێ هەر ئەو سنۆبەرە باڵا بڵندەیە کە لەترۆپکی (قەندیل) یەکەم لاچکی لێڕواو ئەوەتا دوای (45) ساڵ هەر شنەی دێ و هەمیشە زمانی ڵێکدابڕانی نەزانیوە، لەگەڵ (مام) لەگەڵ باوەڕەکانی مام و لەگەڵ ئەو شەهیدانەی هەموو زەمەنێ لەگەڵ (قەندیل) لە دیدەنی عەشقێکی تازەن.

print

 305 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*