سەرەکی » ئاراستە » لە یادی دوو ساڵەی كۆچی دوایی شێخ بایز تاڵەبانی دا

وەزیری سەردەمی فەرحانی و خۆشگوزەرانیی خەڵك

لە یادی دوو ساڵەی كۆچی دوایی شێخ بایز تاڵەبانی دا

ئاوات كۆكەیی

ئەمڕۆ دوو ساڵ بەسەر كۆچی دوایی شێخ بایز تاڵەبانی وەزیرو كادری بەتوانای یەكێتیی نیشتمانیی كوردستان لە بورای ئیدارە و داراییدا، تێدەپەڕێت.

كاك بایز جگە لەوەی پیاوێكی لێزان و شارەزای بوارەكانی ئیدارەو دارایی بوو، لە رووی كۆمەڵایەتی و وەك كەس پیاوێكی روخۆش و مەجلیس خۆش بوو، هەمیشە بزەی دەخستە سەر لێوی دەورووبەری، قسەزان و خۆشكەلام بوو.

شێخ بایزی نەمر لە بیرەوەریی خەڵكی كوردستاندا بە وەزیری سەردەمی خۆشگوزەرانی و سەردەمی (كاسەی پڕو ئاشتی ماڵ) بە نەمری ماوەتەوەو دەمێنتەوە.

بایز سەعید محەمەد عەبدولغەنی تاڵەبانی ناسراو بە بایز تاڵەبانی، ساڵی 1944 لە گوندی (باداوا)ی سەر بەناحیەی لەیلانی پارێزگای كەركوك لەدایك بووە و هەر لەوێ خراوەتە بەر خوێندن، ساڵی 1956 لە كەركوك درێژەی بەخوێندن داوە و لەوێ قۆناغەكانی سەرەتایی و ناوەندی و دواناوەندیی تەواوكردووە.
ساڵی 1958 كاتێك كە خوێندكاری ناوەندی موسەڵڵابووە لەكەركوك، چۆتە ریزی یەكێتی قوتابیانی كوردستان و لە ساڵی 1965دا پەیوەندی بە پارتی دیموكراتی كوردستانەوە كردووە.

ساڵی 1968 بەكارمەند لە شارەوانی كەركوك دامەزراوە و ساڵی 1970 گواستراوتەوە بۆ بەڕێوەبەرایەتیی ئەشغالی هەولێر و هەر ئەوساڵە بۆتە لێپرسراوی لقی كەركوكی یەكێتی لاوانی دیموكراتی كوردستان، ساڵی 1972 گوێزراوەتەوە بۆ بەڕێوەبەرایەتی ئەشغالی كەركوك.

ساڵی 1973 بۆتە لێپرسراوی لقی بەغدای یەكێتیی لاوانی دیموكراتی كوردستان و ئەندامی سكرتاریەت، هەر ئەوساڵە لەگەڵ هەریەك لە دارۆ شێخ نوری، عەبدولڕەزاق عەزیز میرزا و ئەنوەر قەرەداغی و جەمال حەكیم ئاغا بەشداربووە لە فیستیڤاڵی جیهانیی لاوان لە ئەڵمانیای رۆژهەڵات.

ساڵی 1974 لە هەڵگیرسانەوەی شەڕی نێوان حكومەتی عیراق و شۆڕشی كورددا، پەیوەندی بە شۆڕشەوە كردو بووە پێشمەرگە.

دوای هەرەسی شۆڕش لە 1975دا، گەڕایەوە بۆ كەركوك و دوور خرایەوە بۆ بەڕێوەبەرایەتی رێگەوبانی رومادی لە پارێزگای ئەنبار، لە كۆتایی هەمان ساڵ گوازرایەوە بۆ بەڕێوەبەرایەتی ئەشغالی گشتی، ساڵی 1990 گواسترایەوە بۆ ناسریە.

ساڵی 1991 گەڕاوەتەوە بۆ كوردستان و پەیوەندی بە یەكێتیی نیشتمانیی كوردستانەوە كردووەو ساڵی 1994 بۆتە ئەندام كۆمیتەی 5ی فەرمانبەران.

ساڵی 1995 بۆتە ئەندامی مەكتەبی پەیوەندییەكانی دەرەوە، ساڵی 1996 بە هەمان پلە بۆ مەكتەبی دارایی گواستراوەتەوەو هەمان ساڵ بۆتە بەڕێوەبەری ژمێریاری لە بەڕێوەبەرایەتی ئەشغالی سلێمانی.

لە ساڵی 1997 و دواتر رۆڵی گرنگ و بنچینەیی بینی لە دامەزراندنی چەند دەزگایەكی داراییدا، لەو ساڵەدا دەزگای چاودێری دارایی ئیدارەی سلێمانی حكومەتی هەرێمی كوردستانی دامەزراندو تێیدا بە پلەی سەرۆكی دیوانی دەزگاكە كاری كردووە.

ساڵی 2001 دەزگای چاودێری دارایی بۆ یەكێتیی نیشتمانیی كوردستان دامەزراندووە و دواتر هەر خۆشی لێپرسراوێتی گرتۆتە ئەستۆ.

ساڵی 2002 بۆتە وەزیری دارایی و ئابووری لە ئیدارەی سلێمانیی حكومەتی هەرێمی كوردستان، هەروەها لە كابینەكانی پێنجەم و شەشەم و حەوتەمی حكومەتی هەرێمی كوردستاندا وەزیری دارایی بووە.

ساڵی 2014 بە پلەی وەزیر خانە نشین كراوە.

بەداخەوە، رۆژی 21/6/2018 كۆچی دوایی كرد.

print

 327 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*