سەرەکی » ئەدەب - سێبەر و سایە »  پەیامی من خۆشەویستیی ‌و میهرەبانی ‌و یەكێتی ‌و یەكدڵییە

ئەکتەری سینەمای ئێران فاتیمە موعتەمەد ئاریا:

 پەیامی من خۆشەویستیی ‌و میهرەبانی ‌و یەكێتی ‌و یەكدڵییە

و: كوردەوان محەمەد سەعید

سڵاو و رێز بۆ هەموو دۆستان ‌و ئەزیزان، بۆ هەموو ئەو كەسانەی كە لە شوێنە جیاجیاكانی ئەم وڵاتەوە هاتوون بۆ ئێرە، پێش هەموو شتێ سڵاوم هەیە بۆ هونەرمەندان، ئەوانەی پارچەیەكن لە جەستەمان لە شارە جیاجیاكانی ئێرانەوە هاتوون، ئەوانەی سەربازی ونن، ئەو هونەرمەندە ئەزیزانەی كە هەر یەكەیان رەگ‌و ریشەیان هەیە لەم خاكەدا‌و ئەمڕۆ تەشریفیان هێناوە بۆ ئێرە، منیش یەكەم جارە شەرەفی ئەوەم پێ دەبڕێت لە خزمەتی كۆمەڵێك لە هونەرمەندانی سیستان ‌و بەلوچستان، كوردستان، كرمان، مەشهەد‌و خوزستان و كوهگیلویەدا بم.

دەمەوێ بڵێم بمبوورن لەڕووی ئەدەبییەوە زۆر پێرفێكت نیم تا بە نووسراوەوە بێمە ئێرە، لەڕووی ئەدەبییەوە زۆر پێرفێكت نیم تا بە نووسراوەوە بێمە ئێرە، من هەر وەك ئەوەی كە یەكەم مامۆستای شانۆم، جەنابی قوتبەدینی سادقی كە خۆی لێرەیە، فێری كردووم، خۆڕسكانە فێری نواندن بووم، لەبەر ئەوە لێرەش هەر خۆڕسكانە لەگەڵ ئێوەدا قسە دەكەم، دەمەوێ بڵێم من بە ناوی سینەماكارنی ئێرانەوە قسە دەكەم ‌و دەڵێم ئێمە هیچ داواكارییەكمان لە هیچ كەسێك نییە، ئێمە سیاسەتمەدار نین، سوپاس بۆ ئەم بانگهێشتە كە ئەگەر نانبڕوامان ناكات، گیانیشمان لێ ناسەنێت، ئێمە لێرە كۆبووینەتەوە بۆ ئەوەی بڵێین: ئێمە پێویستمان بە هیچ كەس ‌و لایەنێك نییە لە جیاتی ئێمە بڕیار بدات، ئێمە هونەرمەندانی خاوەن بڕیار‌و خاوەن هەست ‌و تێگەیشتووین، ئێمە مایەی شانازی ئەم وڵاتەین، هەر وابووین ‌و هەر واش دەبین، من رەنگە لە هونەرمەندێك زیاتر لەم وڵاتەدا بێڕێزیم بەرامبەر كرابێ، هێرش كراوەتە سەرم، لێپێچینەوە، لێكۆڵینەوە، یان هەر شتێك كە ئێوە ناوی دەنێن لەگەڵمدا كراوە ‌و هیچ باكیشم نییە، من منم، وەك هونەرمەند، وەك سینەماكارێك، پەیامی من خۆشەویستیی ‌و میهرەبانی ‌و یەكێتی ‌و یەكدڵییە لەگەڵ هەر كەس ‌و هەر شتێكدا، لەم بانگهێشتەدا كە پێش ئەوەی مەزهەبی بێت، لای ئێمە نەریتە، ئەگەر وا نەبوایە جەنابی چێكناوەریان نەدەهاتنە سەر خوانەكەمان، پێویستمان بەوە نییە بۆ هیچ شتێك رامانسپێرن، ئێمە نە پارێزگاری لە دەوڵەت دەكەین ‌و نە دژی دەوەستینەوە، ئێمەی هونەرمەند بەشمان لە سیاسەتدا هەر ئەم ئێوارە خوانەیەیە، خۆزگە هەر لەم سنوورەشدا دەمایەوە، ئێمە هونەرمەندین، لەگەڵ سیاسەت جیاوازین، هەر ئێستا قسەكانم تەواو دەكەم، تەنیا ویستم بڵێم هەموو سینەماكاران لە هەموو جیهاندا پەیامیان ئاشتی ‌و خۆشەویستیی ‌و میهرەبانی ‌و ئارامییە، ئێمە كەسانێكین دەتوانن متمانەمان پێ بكەن كە دەمانەوێ ئاشتی ‌و خۆشەویستیی بۆ ئەم وڵاتە بهێنین، لەگەڵ هیچ كەس ‌و هیچ شتێكدا نە دوژمنایەتیمان هەیە ‌و نە ململانێ، ئێمە پەیامبەرانی ئاشتین متمانەمان پێ بكەن.

ببورن نامەیەك هەیە دەبێ بیگەیەنمە خزمەتتان كە هەموو سینەماكاران ئیمزایان كردووە ‌و بۆ ئەوەیە كە لە مەودوا هیچ سینەماكارێكی دیكە نە لە گەڕانەوە بۆ وڵات بێبەش بكرێت ‌و نە لە كارەكەی، ئێمە بەشی پێویست سنووری كاری خۆمان دەستنیشان دەكەین، ئەگەر سیاسەت ‌و تێڕوانینەكانی پێشوو بخەینە لاوە ئەو كات دەتوانین جەنابی بێهروز وسوقیش بانگهێشت بكەین. ئەم نامەیە بە نوێنەرایەتی هەموو سینەماكاران دەخەمە خزمەتتان.

سەرچاوە: سایتی یوتیوب

Jun 24, 2018

print

 181 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*