سەرەکی » کەلتوور » نما وەك پڕۆژەیەكی فیكری ‌و ئەدەبی بەردەوامبوونی خۆی رادەگەیەنێت

پەنجایەمین ژمارەی گۆڤاری نما بڵاوكرایەوە

نما وەك پڕۆژەیەكی فیكری ‌و ئەدەبی بەردەوامبوونی خۆی رادەگەیەنێت

گۆڤاری نما بڵاوكراوەیەكی فیكری‌و ئەدەبی وەرزییە، لە هەولێر دەردەچێت‌و لەم هەفتەیەدا پەنجایەمین ژمارەی خۆی بڵاوكردەوە، بەو بۆنەیەشەوە بەبێدەنگی لەگەڵ ئەو ژمارەیەدا بیبیلۆگرافیایەكی بۆ هەر «50» ژمارەكەو پاشكۆكانی دەركرد. نما وەك پڕۆژەیەكی فیكری‌و ئەدەبی كوردی توانیویەتی لە نێوان دوو نەوەی نووسەرانی كورددا ببێت بە سەكۆیەكی هاوسەنگ، بۆ درێژەدان بە كاروانی رۆشنبیریی كوردی و ئاشنابوون بە فیكرو ئەدەبیاتی جیهانی، هەر لەسەرەتاوە هەوڵیداوە دەرفەتی گونجاو بۆ ئەو قەڵەمانە بڕەخسێنێت كە هیچ دامەزراوەیەكیان نەبوو پاڵپشتیان بكات، خەونی تەواوكردنی پڕۆژە كەلتوورییەكانیان بۆ بكات بە راستی. بەو بۆنەیەشەوە نووسەرانی ئێستاو پێشووی ئەو گۆڤارە، باس لە مێژووی دەرچوون‌و كەوتنەسەرپێی ئەو گۆڤارەو وردەكارییەكانی دیكەی ئەو پڕۆژەیە دەكەن:

ئیسماعیل كوردە خاوەنی ئیمتیازی گۆڤاری نما لەمبارەیەوە دەڵێت:
«كاتێك یەكەم ژمارەی گۆڤاری «نما» لە 15-3-2000 دەرچوو، ئەو كات بڵاوبوونەوەی گۆڤارێكی لەو شێوەیە لەشاری هەولێر سەرەتایەكی نوێ بوو بۆ كارێكی رۆشنبیری گرنگ كە تا ئەمرۆش بەردەوامی هەیە.

دەركردنی گۆڤارێك‌و دواتر بوونی بە پڕۆژەیەكی فراوان كە گۆڤارەكانی «شیعرو چیرۆكنماو شیعرنماو كۆمەڵناسی‌و مانگنامەی خوێندنی ئازاد» لەخۆ بگرێت‌و زیاتر لە «170»كتێب بەچاپ بگەیەنێت‌و دەیان كۆڕو كۆبوونەوەو سمینار بگێرێت، بێگومان كارێكی هەروا ئاسان نەبووە».

روونیشیكردەوە كە «جگە لە هەوڵ و شەونخونی‌و ماندووبوونی هەموو ئەو بەرێزانەی كە لەو كاروانی رۆشنبیرییەدا بەشداربوون، پشتیوانی ماددی‌و مەعنەوی هەموو ئەو كەس‌و لایەنانەش گرنگ‌و پڕبایەخ‌و مەزن بوون بۆ پڕۆژەكەو بەردەوامبوونی».

وتیشی «دیارە كارەكە هەورازو نشێوی زۆری بەخۆوە بینیووە، ساڵی واهەبووە «گۆڤاری نما» كە گۆڤارێكی وەرزییە، بەتەواوی دەركراوەو ساڵیش هەبووە وەستاوەو هەندێ ساڵیش هەر ژمارەیەك یان دووان دەركراون.

ئەمەش بەشی هەرە زۆری پەیوەندی بە بارودۆخی هەرێمی كوردستان لە رووی سیاسی‌و ئابوورییەوە هەبووە، كە بێگومان كاریگەری راستەوخۆشی بەسەر گۆڤارەكەی ئێمەوە هەبوو»
ئیسماعیل كوردە لە درێژەی لێدوانەكەیدا دەڵێت»ئەوەی جێگای دڵخۆشیە بۆ هەموو ئەو هاوڕێیانەی لەگەڵماندا بەردەوام بوون‌و ئەوانەشی هیچ نەبێت خۆبەخشانە بەشداری نووسین‌و وەرگێڕان‌و دەرچوونی گۆڤارەكە بوون، ئەوەیە كە ئێستا ئێمە بەدەرچوونی «پەنجایەمین» ژمارەی گۆڤارەكەمان بەردەوامبوون‌و مانەوەی خۆمان رادەگەیەنینەوە. هەر ئەو بەردەوامیەشە بۆتە هۆی سەركەوتنی پڕۆژەكەمان كە تەمەنی گۆڤارەكەی (20) ساڵە». دوپاتیشی كردەوە «مانەوەو دەرچوونی ئەو گۆڤارە لە ئەركە هەرە لەپێشەكانی ئێمە بووەو دەبێت».

نیگەرانی خۆیشی دەربڕی كە «بەو بۆنەیەوە بە هۆی پەتای «كۆرونا-Covid-19»وە نەتوانرا رێوڕەسمێكی شایستەی بۆ بكرێت، تاوەكو سوپاسگوزاری هەموو ئەو رۆشنبیرو نوسەرو روناكبیرانە بن كە لەگەڵیاندا هاوكار بوون». بەڵێنیشیدا كە هەوڵدەدەن «دوای تەواوبوونی ئەو دۆخە ناخۆشەی بەسەر كوردستان‌و جیهاندا هاتووە، قەرەبووی ئەو یادە بەشێوازی دیكە بكەنەوە».

لە كۆتاییشدا وتی «رێزو پێزانینی خۆمان دەربڕین بۆ هەموو ئەو هاوڕێ‌‌و هەڤاڵانەی رۆژگارێك لە رۆژگارەكان هاوكارمان بوون‌و دەستیان دەگوشین. ئەوەی ئێمەش دەیكەین بەردەوامیدانە بە بیری ئازادو لێكۆڵینەوەی عەقلڵانیانە لەبوارەكانی فیكرو فەلسەفە و ئەدەب و رۆشنبیری كوردی و دەمانەوێت ئەو كاروانە بەرز رابگرین. بەرزو پیرۆز بێت یادی دەرچوونی پەنجایەمین ژمارەی «گۆڤاری نما».

« جەمال پیرە» سەرنووسەری پێشووی گۆڤاری نما بەو بۆنەیەوە دەڵێت:
«نما» لە كاتێكی زۆر هەستیاری سیاسی‌و كۆمەڵایەتی‌و ئابووری شڵەژاودا لە هەولێر لەدایكبووە، هەر لەسەرەتاوە بە تەنها گۆڤارێكی ئاسایی نەبووە، لە بنچینەدا پڕۆژەیەكی هۆشیاركردنەوەو پەرەپێدانی رۆشنبیریی بووە، جووڵەیەكی هزریی‌و ئەدەبی بووە بۆ خوێنەران لە كوردستان‌و رەوەندی كوردی لە هەموو جیهاندا».

ئاماژەشیدا بەوەی كە «ئەو پڕۆژەیە لەكاتێكدا هات، سەردەمێكی نوێی ململانێی سیاسی‌و ئابووری نێودەوڵەتی‌و تەوژمێكی گەورەی فەندەمێنتالیزم رووی لە جیهان كردبوو، كۆمەڵگای كوردیش بەدەر نەبوو لەوەی بە ئاسانی بكەوێتە ژێر كاریگەرییەكانی ئەو تەوژمە، هەر لەسەردەمی شەڕی ناوخۆوە بگرە تا دەگاتە رووداوەكانی 11ی سێپتێمبەرو دواتریش رووخانی رژێمی بەعس لە عێراق‌و دەركەوتنی هێزو ئاراستەی جیاجیای دینی سیاسی، كە لە پەنای ئایینەوە خەریكی جێبەجێكردنی ئەجێندای جۆراوجۆر بوون»

وتیشی»لەبەر ئەوەی ئەو گۆڕانكارییانە بە شێوەیەكی وا ئاشكرا هەستی پێدەكرا، ئەو كاتە گەیشتینە ئەو بڕوایەی ئەگەر لەرووی كەلتوورییەوە نەتوانرێت كۆمەڵگاو نەوەی تازە هۆشیار بكرێتەوە، بێگومان دواجار لەوانەیە دۆخەكە لە دەستدەرچێت‌و فریای ئەوە نەكەوین رێگا لەوە بگرین‌و گەنج‌و لاوانمان بە ئاراستەی توندوتیژیی هەنگاوبنێن».

باسی لەوەشكرد كە «فەزای ئەوێ رۆژێی نووسەرانی كوردستان ئەوەی دەخواست، بۆچوون‌و بڵاوكراوەی نوێ هەبێت، سەكۆی جیاوازو پاڵپشتیكاری دیكەی هەبێت، لەژێر كاریگەریی شەڕو ململانێكانی ناوخۆ بێتەدەرەوە. ئەوكاتە بۆنی بارووت هەر مابوو، دەبوو بڵاوكراوەیەك هەبێت رۆشنبیرانی فەرامۆشكراو بەسەربكاتەوە، نائومێدییان بڕەوێنێتەوە، پێویست بوو جووڵەیەك هەبێت رێگای جوانی‌و بیركردنەوەی هێمنانە رۆشنبكاتەوەو ببێت بە ئەڵقەی بەیەكەوە بەستنەوەی نەوەی كۆن‌و نوێ، جیاوازیی ئاستی فیكریی نێوانیان كەمبكاتەوە، تا دیالۆگێكی راستەقینە لە نێوانیاندا دروست بێت».

جەمال پیرە، دوای ئاماژەدان بەو رووداوو گۆڕانكارییانە دەڵێت «ئا لەو كاتەدا (نما) وەك پڕۆژەیەكی كەلتووریی كوردی چەكەرە دەكات‌و دواتر دەبێتە كۆڕبەندو شوێنی بەیەكترشادبوونی نووسەرو رۆشنبیران، دەبێت بە سەكۆیەك بۆ ئاڵوگۆڕكردنی بیروڕاو بۆچوونە هزرییە جیاجیاكان، بوو بە دەزگایەك بۆ چاپكردنی بەرهەمی نووسین‌و وەرگێڕانی نووسەران، هەروەها بووە بە ئیلهامبەخش بۆ ژمارەیەكی زۆری بەهرەمەندو ئەو لاوانەی لەسەرەتای تەمەنی نووسیندا بوون، بە هۆیەوە بە دنیای بەرفراوانی فیكرو فەلسەفە ئاشنا بوون، بوو بە پاڵنەرو سەرەتایەكی باش بۆ زۆربەیان تاوەكو گرنگی بە خوێندنەوەو بەدواداچوونی فیكری‌و ئەدەبی بدەن، هەر لەو رێگەیەشەوە لەگەڵ نووسەران‌و رۆشنبیرانی كورد تێكەڵ بن».

لە كۆتاییشدا وتی «خۆشبەختانە سەرەڕای ئەو دۆخە نا لەبارەی رووی لە كوردستان كردووە، گۆڤارەكە ئێستایش وەك مینبەرێكی دەنگە جیاوازە جیددییەكان ماوەتەوە، بەردەوامە لەهەوڵدان بۆ گەیاندنی پەیامەكەی، كە بریتییە لە گرنگیدان بە چالاكییە رۆشنبیرییەكان، لەپێناو كرانەوەو پێشكەوتنی زیاترو كۆكردنەوەی توانا هزرییەكان‌و گەشەپێدانی تواناو لێهاتووییان».

«مەسعود بابایی»بەرێوەبەری پێشووی نوسینی گۆڤارەكە دەڵێت:
«گۆڤاری(نما) وەك گۆڤارێكی فیكری‌و ئەدەبی، ساڵانێكە بە بەردەوامی، سەرەڕای كەندوكۆسپەكان، بڵاو دەبێتەوە، ئەم گۆڤارە گرنگییەكی تایبەتی بەو قەڵەمانە داوە كە خاوەنی دەروەستبوونی قەڵەمن؛ كەسایەتییە ئەدەبی‌و دەستەبژێرێكی هزریی دیاریكراو كە ئاشنای پرەنسیپەكانی گۆڤارەكە بوون بابەتەكانیان تێیدا بڵاودەكردەوەو لە ئێستاشدا بەو پرەنسیپانە (نما) لە كارەكانیدا بەردەوامە».

«بابایی» دەربارەی ئەزموونی خۆی لەگەڵ ئەو گۆڤارەدا دەلێت «ئەزموونی بەندە لەگەڵ گۆڤاری نما بۆ پێش ساڵی 2000 دەگەڕێتەوە. هەمیشە یەكێك لەو بڵاوكراوانە بووە ئازادیی هزریی خۆمم تێیدا ئەزموون كردووەو هیچكات بەر سانسۆری فیكری نەكەوتووم كە ئەمەش سەرەڕای جیاوازیی هزری‌و سیاسیی بەندە، مایەی شانازیم بووە». هەروەها دەڵێت «(نما) لە ساڵانێكدا ئاوڕی لە بابەتە گرنگە ئەدەبی‌و هزرییەكان داوەتەوە كە تا ئەو كات بەشێكی زۆری بیرۆكەو رێبازە جیاجیاكانی رووناكبیری‌و ئەدەبیات بە لای خوێنەری ئەو سەردەمەوە ئاشنا نەبوون».

باسی لەوەشكرد كە «سەرەتا وەك نووسەرێكی ئاسایی‌و تازەكار هاوكاریی گۆڤارەكەم دەكرد، بەرەبەرە هۆگرییەك لەنێوان من‌و گۆڤارەكە دروست بوو و پێوەندیی هاوڕێیانەی دەستەی نووسەران‌و خاوەنی ئیمتیازو هاوكارانی گۆڤاركە جێی سەرنج بوو؛ هەروەك لەنێو كورددا باوە دوو كەس كە هەموو شتێكیان لەگەڵ یەكدی هاوبەش بێت دیسان پێكەوە ناگونجێن…بەپێچەوانەوە، وێڕای هەموو جیاوازییەكان، بە شێوەیەكی هاوسەنگ بیرۆكەو بۆچوونەكان دەرفەتی رەنگدانەوەو دەربڕینیان لە گۆڤارەكەدا هەبوو ئەمەش جێی سەرنجە».

مەسعود بابایی هێما بۆ ئەوە دەكات كە «(نما) بە كێشەی داراییەوە لە دایك بوو، تا ئەم ساتەش هەر ئەو كێشەیە بەردەوامەو بڵاوكردنەوەشی هەر بەردەوامە!» وتیشی «ئەوە لەكاتێكدایە گەلێ‌ رۆژنامەو گۆڤاری دەوڵەمەند بە بریقوباقەوە هاتن‌و بە ژاكاوی سەریان نایەوە، مەبەستم ئەوەیە كە بڵێم هیچكات وەزارەتی رۆشنبیری‌و لاوان چەڵتووك‌و برنجی لێك جیا نەكردەوە! بەڵام رژدیی دەستەی بەڕێوەبردنی سەنتەرو گۆڤاری نما بەوپەڕی هەستكردن بە بەرپرسیارێتی‌و بە هەموو كەموكووڕییەكانەوە نەیانهێشت دەنگیان كپ ببێ‌و بەندە لەساڵانی سەرەتاو ئەم ساڵانەی دواییشدا هەستم بەم شێڵگیرییە كردووە!»

پێشیوایە «پاش ئەو ساڵە دوورودرێژانە (نما) ئێستەش زۆر شتی ماوە بۆ گوتن‌و لەمەولاش دەتوانێ بەردەوام بێت. لە باسوخواسی قوتابخانەی فرانكفۆرت‌و رەخنە لە جیهانی لیبراڵ‌و لیبراڵیزمی نوێ، قەیرانەكانی ماركسیزم‌و سەرمایەداری‌و بەجیهانیبوون، فەندەمێنتاڵیزمی ئیسلامی‌و باسوخواسی فیمینیزم‌و هەروەها رێبازە ئەدەبییەكان‌و توێژینەوە ئەدەبییەكان‌و گەلێ بابەتی ئەدەبیی دیكە تا دەگاتە رەخنە لە باری سیاسیی كوردو كێشەكانی تاكی كورد … (نما) توانایی خۆی سەلماندووەو كەسانێكی زۆر هەن كە گەواهیدەری ئەم راستییەن».

لە كۆتاییدا وتی «دەتوانم بڵێم لەگەڵ ئەوەی لە رۆژگارێكی ئاڵۆزی وەك ئێستادا ورەی كاركردن لە بوارە رژدو وردەكانی فیكرو ئەدەب دژوارە، پێموایە گۆڤارەكەمان دەتوانێ دەروەستی قۆناخەكە بێت‌و ئەمەش تێدەپەڕێ‌و هەموو هاوڕێیانیش لەسەر پاراستن‌و كاركردن بۆ بەردەوامیی گۆڤارەكە لە ئێستادا پێداگرن، هەرچەند حاشا لە كەموكوورییەكانیش ناكرێ».

« نووری بێخاڵی» كە ماوەیەك ئەندامی دەستەی نوسەرانی گۆڤاری نماو بەرێوەبەری نوسینی گۆڤاری چیرۆكنما بووە، لەو یادەدا دەڵێت:
«گۆڤاری (نما) رۆژگارێك لەدایك بوو، خەڵك لەبەر لۆچەكانی شەڕی نەگریسی ناوخۆ بەسەر یادەوەریی‌و رووخساریان، هێشتا هێندە خەیاڵی لای وشە نەبوو.. كەمترین كەس گوێی بۆ وشە دەگرت‌و زۆرترینی هێشتا زایەڵەی تەققەی خۆكوژیی لە گوێچكەكانیاندا دەنگی دەدایەوە.. بە دەگمەن، دەنا كەس زەینی بەلای فیكرەوە نەبوو».

ئاماژەشیدا بەوەی «(نما) رۆژگارێك وەدەنگ هات، كە سەنگەرەكان تازە خەریك بوو بۆنی بارووتیان تێدا دەڕەویەوەو خوێنیان لێ وشك دەبوو. خوێنی دوژمنان نا، بەڵكو هی كوڕوكاڵی كورد بە دەستی كورد.. رۆژگارێك براكان خەریكی ئاشتبوونەوە بوون، كەچی هێشتا خەڵكێك دڵی بەم هەموو رووباری خوێنەوە تێر ئاوی نەدەخواردەوەو تەنانەت (هودنە)یەك هێڵنجی پێ دەدان.. كۆڵانەكان رەشپۆش‌و گەڕەكەكان ماتەمگێڕو شەقامەكان دووكەڵ بە تەوێڵیانەوە بوو.. هەر مرۆڤەكان نا، ئاوەدانییەكانیش هێشتا مڕو مۆچ بوون».

باسی لەوەشكرد كە «ئێستا كە ژمارە «50»ی گۆڤارەكە دەردەچێت‌و بە بڕینی ئەم هەموو هەورازو لێژییەوە بەردەوامە، بۆ من جێی دڵخۆشییە. چونكە ئەگەر لە یەكەم كەسەكانیش نەبووم، كە وێڵاشەكەیان بڕی، بەڵام لە یەكەم گڕوگاڵ‌و پێڕەوكەكردنییەوە لەگەڵیدا بووم (لە ژمارە 3ی گۆڤارەكە بوومە ئەندامی دەستەی نووسەران‌و دواتر بوومە بەڕێوەبەری نووسینی گۆڤاری چیرۆكنماش)».

وتیشی «(نما) بۆ من وێستگەو ئەزموونێكی نوێی كایەی نووسین بوو، جیا لە ئەزموونی رۆژنامەنووسیی، لەوێدا ناچار بە خۆكۆكردنەوە بووم بۆ لێكۆڵینەوەو قووڵبوونەوەی زیاتر. نووسینگەو تەدارەكمان نەبوو، بەڵام ماڵێكی میهرەبان لە گەڕەكی راپەڕین لە هەولێر هەبوو، تێیدا بەدیار لاپەڕەكانییەوە شەومان بەسەر رۆژدا دەكردەوە. ئێستاش تێنەگەیشتم دایكە خانەدانەكەی (ئیسماعیل كوردە) چۆن لە گەڕانەوە ناوەختەكانماندا بۆ ماڵەكەی بێتاقەت نەبوو؟ ئەو هەموو میهرەبانییەی لە كوێ‌و لە كێ قەرز كردبوو، كە وەك كوڕی ماڵەوە نازی دەكێشاین؟ هەر نەمزانی باوكە نەجیبزادەكەی چۆن رۆژێك لە تەق‌و رەق‌و زۆر بڵێیی ئێمە بێزار نەبوو، كە دەیان‌و ئێوە بڵێن سەدان شەو، بە تەقەی لێدانی دەرگا، شیرین خەوەكەیمان دەزڕاند؟ «
بێخاڵی پێیوایە» «جوانیێكی (نما) لەوەدا بوو، كەسمان لەسەر یەك هێڵی سیاسی نەبووین، بەڵام (نما) مێزی كۆكەرەوەی هەموو جیاوازییەكانمان بوو. نازانم تا ئێستا چەند كەس لە ستافی نووسینەكەی دڵخوازانە چوون‌و هاتن، یان تۆران. بە ویستی خۆیان مانەوەو رۆیشتن، یان دڵیان شكا، وەلێ كەسمان لە (نما) خۆی نەتۆراین!»
لە كۆتاییشدا وتی «ئەوانەی لەو ماوەیەدا من كارم لەگەڵیاندا كرد (ئیسماعیل كوردە، رەوشت رەشید، فەروخ نیعمەتپوور، ئاسۆ جەلال، شوان رەشید، جەمال حوسێن، رێبین رەسووڵ، نیهاد جامی، راسان موختار، دیار عەزیز، محەمەد نووری ئەحمەد و….). خۆش ئەوە بوو كارمان بەیەكەوە دەكردو یەكتریشمان نەدەبینی».

قەڵەمگەلێكی دیار، نووسەرگەلێكی ناسراو لە (نما) دەیاننووسی، كەسیش چاوەڕێی پاداشتی نەدەكرد. دەرگامان بەسەر زۆر تەوەر‌و باسی سیاسی، كۆمەڵایەتی و كولتووریدا كردەوە، كە هێشتا زەمینە سیاسی‌و كۆمەڵایەتییەكە هی ئەوە نەبوون، دەمیان لێ بدەرێ‌. بەتایبەتی قسەكردن لەسەر چییەتی‌و ستراكچەری حزبی كوردی، ئایین و ئایدیۆلۆژیا، ئیسلامی سیاسی‌و تیرۆرو…!

(نما) كە گۆڤارێكی لێكۆڵینەوەی فیكریی‌و ئەدەبی‌و رەخنەیی بوو و وردە وردەش گەنجگەل لە دەوری كۆدەبوونەوە، دەبوو دەروازەیەكی دیكەش بە رووی بوارەكانی تردا بكاتەوە، بۆیە (شیعرنما)و (چیرۆكنما)شمان دەركردن، كە بە گەواهی زۆرێك لە خوێنەرەكانی ئەو رۆژانە، بڵاوكراوەی سەنگین بوون. چاپی كتێبیش بە سەرەی خۆی، كە ناوە ناوە هەنگاومان بۆ هەڵگرت‌و تا ئێستا دەیان كتێب چاپكراون.

زۆر شت هەیە مرۆڤ لەو یادەدا بیڵێت، بەڵام رەنگە هەر دەرفەتی ئەوەندە هەبێت. بۆیە بە بۆنەی دەرچوونی «50»یەمین ژمارەی گۆڤاری (نما)، پیرۆزبایی لە دامەزرێنەران‌و لە خۆم‌و هەموو ئەو هاوڕێ‌‌و هاوكارانەم دەكەم، كە رۆژگارێك، هەر یەكەو بەپێی توانای خۆی، بەردێكی لەسەر بناغەی ئەو پڕۆژە رۆشنبیرییە داناو هیوای بەردەوامیی‌و سەركەوتن بۆ ستافی ئێستاشی دەخوازم.

«رێبین رەسوڵ ئیسماعیل»،سەرنوسەری ئێستای گۆڤاری نماش لەبارەی بیبلۆگرافیای پەنجا ژمارەی گۆڤارەكە دەڵێت:
ئەم بیبلۆگرافیایەی بەردەستمان، بەرهەمی كارێكی زۆرو تاقەتپڕوكێنە، شێوازی ڕێكخستن‌و ئیشكردن تێیدا تایبەت كراوە بەپەنجا ژمارەی گۆڤاری (نما)، ناونیشانی هەموو نووسینێك‌و دەقێك‌و ناوی نووسەرو وەرگێری بابەتەكان باسانەیە كە گۆڤارەكە لەو پەنجا ژمارەیەی خۆیدا كاری لەسەر كردوون‌و بیرهێنانەوەیەكیشە بۆ ئەو نوسەرو وەرگێرو چیرۆكنووس‌و شاعیرو ئەدیبانەی كە بەشداریان تێدا كردووە. لەخۆدەگرێت كە لەم پەنجا ژمارەیەدا بڵاوكراونەتەوە، گێڕانەوەو بیرهێنانەوەی ئەو بابەت‌و تەوەرو بۆیەش بیبلۆگرافیایەكە بەپێی ناوی نوسەرەكان ریزكراوە، تاوەكو هەر كەسێك بەپێی ناوی خۆی بەو بابەت‌و باسانە ئاشنا بێتەوە كە لەگۆڤارەكەدا بڵاویكردوونەتەوە. بەهیوای ئەوەی سوودی بۆ لێكۆڵەرو توێژەرانی بواری فیكرو ئەدەبی كوردی هەبێت.

print

 371 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*