سەرەکی » دۆسێ » واشنتۆن: سزای زیاتر بەسەر ئێراندا دەسەپێنین

پەیوەندی بە موشەكەكانی یەمەنەوە هەیە

واشنتۆن: سزای زیاتر بەسەر ئێراندا دەسەپێنین

واشنتۆن لە ئەنجومەنی ئاسایشەوە خۆی بۆ سەپاندنی سزای زیاتر بەسەر ئێراندا ئامادە دەكات، و وڵاتەكە بە پێشێلكردنی بڕیاری قەدەغەكردنی رەوانەكردنی چەك بۆ یەمەن تۆمەتبار دەكات، لەبەرانبەردا تاران دەڵێت، ئەمریكا بەشوێن سەركێشییەكی نوێدا دەگەڕێت لە ناوچەكە لەڕێی خولقاندنی درۆی شاخدار كە گوایە ئێران دەستی لە رەوانەكردنی موشەكی بالیستیدا هەیە بۆ یەمەن.
لە 19ی كانوونی یەكەمی 2017، نیكی هایلی نوێنەری ئەمریكا لە نەتەوە یەگرتووەكان رایگەیاندبوو، وڵاتەكەی بەشوێن ئەو رێگەچارانەدا دەگەڕێت كە دەكرێت لە ئەنجومەنی ئاسایشەوە لە دژی ئێران بگیرێنەبەر، لەوانە سەپاندنی سزای زیاتر بەسەر تاراندا بەهۆی پێشێلكردنی بڕیاری قەدەغەكردنی رەوانەكردنی چەك بۆ یەمەن.
هایلی لیستێكی ئەو رێوشوێنانە خستبووەڕوو كە دەكرێت لە كۆبوونەوەی ئەنجومەنی ئایشەوە لەدژی ئێران بگیرێنەبەر، بەڵام مۆسكۆ كە پەیوەندییەكی دۆستانەی لەگەڵ تاراندا هەیە، بەشێوەیەكی راستەوخۆ و بەهێز لە دژی وەستایەوە.
لەبەرانبەردا بەهرام قاسمی وتەبێژی وەزارەتی دەرەوەی ئێران رایگەیاندبوو»لەڕێی ئەو گەمارۆیەی سعودیە بەسەر حوسییەكانی یەمەندا سەپاندوویەتی، ئەستەمە هیچ چەكێك بگاتە یەمەن، بۆیە یەمەنییەكان بەشوێن تەكنیكی ناوخۆییدا دەگەڕێن تا لەبەرانبەر ئەو هێرشانەی دەكرێنە سەریان، بەرگریی لەخۆییان بكەن».
ولایەتە یەكگرتووەكان، ئێران بە پڕچەككردنی حوسییەكان لە یەمەن و رەوانەكردنی ئەو موشەكە بالیستیانە تۆمەتبار كە سعودیە دەكەنە ئامانج.
لەم ماوەیەی دواییدا سعودیە موشەكێكی بالیستی لەسەر ئاسمانی ریاز خستەخوارەوە كە لەلایەن حوسییەكانەوە هەڵدرابوو، نوێنەری ئەمریكاش لە نەتەوە یەكگرتووەكان هێرشە موشەكییەكەی بە هەڵگری هەموو نیشانەكانی هێرشەكانی پێشوو وەسفكردبوو كە بە گوتەی ئەو، «چەكی ئێرانیان تێدا بەكارهاتووە».
نیكی هایلی رایگەیاندبوو»هێرشە موشەكییەكی سەر ریاز، دەبێت ببێتە زەنگی ئاگاركردنەوە و دانانی هێڵی سور لە ئەنجومەنی ئاسایش».
هایلی پێشنیازی كردبوو، بڕیارەكەی ساڵی 2015ی ئەنجومەنی ئاسایش كە پشتیوانی لە رێكەوتنە ئەتۆمییەكەی ئێران كردبوو، توند بكرێت و رێوشوێنی نوێ‌ لە دژی ئێران لەبارەی پەرەپێدانی موشەكەوە بگیرێتەبەر.
هایلی دەڵێت»دەتوانین ئەو بوارانە بدۆزینەوە كە لێوەی سزای زیاتر بەسەر ئێراندا دەسەپێنرێت، ئەوەش وەك وەڵامێك بەرانبەر بە پێشێلكردنی بڕیاری قەدەغەكردنی رەوانەكردنی چەك بۆ یەمەن».
بەپێی راپۆرتێك كە لەم ماوەیەی دواییدا لەسەر ئەو موشەكانەی لەلایەن حوسییەكانەوە بەرەو سعودیە هەڵدەدرێن بڵاوكرابۆوە، نەتەوە یەكگرتووەكان رایگەیاندبوو»پاشماوەی ئەو موشەكانە ئاماژە بەوە دەكەن كە رەنگە لە ئێران دروستكرابن، بەڵام ناتوانن ئەو لایەنانە دیاریی بكەن كە لەرێگەیانەوە موشەكەكان رەوانە كراوە، بۆیە لەسەر لێكۆڵینەوەكانیان بەردەوام دەبن»
جیفری فیڵتمان یاریدەری سكرتێری گشتی نەتەوە یەكگرتووەكان بۆ كاروباری سیاسی رایگەیاندبوو»رێكخراوی نەتەوە یەكگرتووەكان لەئێستادا ناتوانێت تەئكید لەسەر ئەوە بكاتەوە كە ئەو موشەكانە موشەكی (قیام-1)ی ئێرانین و وەك پێشێلكردنی بڕیارە نێودەوڵەتییەكان بۆ یەمەن رەوانە كراون».

وەڵامی ئێران بۆ تۆمەتەكانی ئەمریكا
لەبەرانبەر تۆمەتەكانی ئەمریكا، عەلی لاریجانی سەرۆكی پەرلەمانی ئێران رایگەیاندبوو»ولایەتە یەكگرتووەكان بەشوێن سەركێشییەكی نوێدا دەگەڕێت لە ناوچەكە، ئەوەش لەڕێی بڵاوكردنەوەی درۆ و زانیاریی ناڕاست كە گوایە ئێران موشەكی رەوانەی یەمەن كردووە».
ئاژانسی «مهر»ی ئێرانی لە 24ی كانوونی یەكەمی 2017 بڵاویكردبۆوە، لێدوانەكانی ئەنجومەنی شورای ئیسلامی ئێران، وەك وەڵامدانەوەی ئەو بەیاننامەیەی كۆشكی سپییە كە تێیدا پابەندبوونی واشنتۆن بۆ پشتیوانیكردنی سعودیە و وڵاتانی تری كەنداو دووپاتكرابۆوە بەڕووی ئێران و ئەو «پێشێلكارییە ئاشكرایانەی لە یاسا نێودەوڵەتییەكاندا دەكرێن».
هەر لەو بارەیەوە لاریجانی رایگەیاندبوو»یەمەنییەكان لە سەردەمی عەلی عەبدوڵڵا ساڵحەوە خاوەنی موشەكەكانی (سكۆد-B ) و (سكۆد- C) بوون و ئەمریكاییەكانیش بە خستنەڕووی پارچە ئاسنێك، هەوڵ بۆ سەركێشییەكی نوێ‌ دەدەن لە ناوچەكەدا».
پێشتر نیكی هایلی نوێنەری هەمیشەیی ولایەتە یەكگرتووەكان لە نەتەوە یەكگرتووەكان، ئێرانی تۆمەتبار كردبوو بەوەی كە موشەك دەداتە حوسییەكان، تا بۆردومانی سعودیەی پێبكەن.
هایلی پاشماوەی موشەكێكی بالیستی بۆ رۆژنامەوانان خستبووەڕوو كە لە یەمەنەوە بە ئاراستەی سعودیە تەقێنرابوو، پارچەكانیشی لەنزیك فڕۆكەخانەی ریاز لە مانگی رابردوودا كەوتبوونەخوارەوە.
بە گوتەی هایلی «پاشماوەی ئەو موشەكە، رەنگە مۆر و نوسراوی لە ئێران دروستكراوەی لەسەر بوبێت»،جەختیشی لەسەر پێشێلكردنی ئێران بۆ بڕیارەكانی نەتەوە یەكگرتووەكان كردبۆوە.

print

 27 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*