سەرەکی » ئاراستە » شەهید شۆڕش عوسمان

ونناوەکانی شۆڕش

شەهید شۆڕش عوسمان

ئازاد سه‌راوی

هەر دەڵێی تاپۆی شۆڕش و كوردایەتی دراوە بە هەندێك خێزان، دەڵێی هەندێك بەشیان سەیران و سەفایەو، هەندێكیش هەموو وەرزێكیان لێ بوەتە گەڵا ڕێزان، دەڵێی لە ڕۆژی ئەوەڵ دا لە ناوچەوانی پیاوانەو پڕ شكۆی هەندێك خێزاندا وا نووسراوە، خەبات، بەرخۆدان، تێكۆشان، لە بەختی تەختی هەندێكیش سەرچۆپی دوای ڕاپەڕین و قوربانیدان، سنگ دەرپەڕاندن، خۆبادان، لەسەر خوێنی سووری ڕژاوی شەهیدان.

ڕێكەوت و چارەنووس نییە، مەردایەتی و كوردایەتی، هەڵوێستە، هەڵبژاردنە، سەرو ماڵ بەختكردنە، پیاوی گەورەو ئازای دەوێت، زۆرن ئەوانەی شەرەفی شۆڕش و قوربانی دانیان بە مسقاڵیش بەر ناكەوێ، دەست ناكەوێ‌.

تازە شكۆفەی كردبوو،گوڵی زەردو مۆری دەركردبوو، تازە دەبزوت و دەپشكوت، تازە چرۆی دەر كردبوو هێشتا لەتەمەنی گوڵدابوو كە لەشەقەی باڵی دابوو، ئاسمانی پان و بەرینی تەی كردبوو، خەت و خاڵی دەركردبوو.

سینەی وەك كتێبخانە بوو هەناسەكانی پەرتوك بوون، هەنگاوەكانی گەورە بوون پەیڤەكانی ئێسك سووك بوون، بیری پێشكەوتنخوازانەو سەرچاوەی ئاوێكی ڕوون بوون، چرپەو خەندەو پێكەنینی وەك شەوگارێكی هێمن بوون، لەگەڵ قەڵەم و كتێب دا، هاوڕێیەكی زۆر نزیك بوون لەلای شۆڕش، پەیام و هەنگاوی شۆڕش هەر بەتەنها خامە نەبوو، كتێبی گەورەو چاپخانەو چامە نەبوو، هەر بەتەنها پەیڕەوو بەرنامە نەبوو بانگەوازو نامە نەبوو، تەنها بەیاننامە نەبوو، تەنها كتێبخانە نەبوو، هەر بەتەنها دروشمی ئاگرین نەبوو، خۆشەویستی و ئەوین نەبوو، وتارێكی حەزین نەبوو.

لەلای شۆڕش، قەڵەم دەچووە سەنگەرەوە كتێب دەبووە ڕیزە فیشەكی گڕدارو بەر دەبووە موڵگەی دوژمن، لەلای شۆڕش دەبوو سەنگەرو پێشمەرگە، دەست و پەنجەو پەلە پیتكە، تفەنگ و وتاری ئیزگە، ئاوێتەبن، بتوێنەوە لەناو یەكا، چڕبنەوە لە دێڕێكدا، ئەو پێی وابو ئاوێتە بونی ئەوانە دڵی دوژمنی دەپێكا.

شۆڕش گڕی بابە گوڕگوڕ لە ناخیدا داگیرسابوو، شۆڕشێكی گەورەو مەزن لە دەرونیا هەڵایسا بوو، گڕی كەركوك لە هەناویا تاوی دابوو، شۆڕشیش بەڵێنی دابوو بە خوێنی خۆی ئاگری نەورۆز لە كەركوك داگیرسێنێ‌، ئاگرێك شەوق و ڕووناكی بگاتە وان و قامیشلوو، لە كرماشان گڕ بسێنێ‌، ئاگرێك هێندە بە جۆشبێ‌ هیچ زوحاكێك نەتوانێ‌ دایبمركێنێ‌.

پارتیزان بوو، خۆشەویست بوو، بە هەڵوێست بوو، سەر مەشقی ڕێی تێكۆشان بوو، خۆنەویست بوو، گوڵی سەر تۆپی وڵات و شان و شكۆی نیشتمان بوو، سەنگەرێكی ئاوەدان بوو.

كەركوك بووە دوا چۆڕاوگە و چۆڕەی خوێنت، بووە دوا ژوان بۆ مەچەكی تۆڵە سێنت، كەركوك بووە دوا هەنگاوو دوا هەناسەت، بووە نازناوو پێناسەت، بووە ناڵەو هاڕەی گوللەی ژێر بەلەپیتكەی تفەنگ و ڕەختی شانت، بووە مێژووی پڕ لە شكۆی كۆڵنەدان و تێكۆشانت، بۆ یەكجاری لە كەركوك سەرت نایەوە، ئاگرێك بوویت لە شارباژێڕ كڵپەت سەندو لە كەركوك دامركایەوە.

 121 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*