سەرەکی » وەرزش » چی لەسەر یارییەكانی خولی نایابی بالەی یانەكانی عیراق دەوترێت؟پەڕە 25

چی لەسەر یارییەكانی خولی نایابی بالەی یانەكانی عیراق دەوترێت؟

بەمدواییە یارییەكانی هەردوو گروپی تیپە بەشدارەكانی خولی نایابی بالەی یانەكانی عیراق كۆتاییانهات و بەم نزیکانەش یارییەکانی قۆناغی دووەمیش دەستپێدەکەن.

یارییەكانی قۆناغی یەكەم لەهەردوو گروپی یەكەم و دوومەمدا بە سیستمی گردبوونەوە لە یەك هۆڵدا ئەنجامدرا، یارییەكانی گروپی یەكەم لەنێوان رۆژانی 20/12 تا 26/12/2021 لە بەسرە ئەنجامدرا، هەرچی یارییەكانی قۆناغی یەكەمی گربوونەوەی گروپی دووەمە لە نێوان رۆژانی 4/1 تا 10/1/2021 لەهۆڵی داخراوی یانەی پێشمەرگەی سلێمانی بوو.

14 تیپی یانەكانی عیراق بە شدارییان كردو بەسەر ئەو دوو گروپەدا دابەشكراون، پاش ئەنجامدانی یاریەیكانی قۆناغی یەكەمی خولەكە، دوا ریزبەندیی لە هەردوو گروپەكەدا بەمشێوەیەی لای خوارەوە بوو:

گروپی یەكەم
1- شورتە (16خاڵ).
2- پێشمەرگەی سلێمانی (15خاڵ).
3- حەبانیە (11خاڵ).
4- سەناعە (9خاڵ).
5- دوكان (5خاڵ).
6- ئەلقاسم (4خاڵ).
7- مەسافی شیمال (3خاڵ).

گروپی دووەم
1- غازی جەنوب (18خاڵ).
2- بەحری (15خاڵ).
3- جەیش (12خاڵ).
4- هەولێر (8خاڵ).
5- حەدیسە (6خاڵ).
6- بەلەد (3خاڵ).
7- دەغارە (1خاڵ).

قۆناغی دووەم
پاش تەواو بوونی یارییەكانی قۆناغی یەكەم لە هەردوو گروپەكەدا، یەكێتیی ناوەندی بالەی عیراق قۆناغی دووەمی یارییەكانیش ئەنجام دەدات و خشتەی یارییەكانی قۆناغی دووەمیش ئاشكرا كراوەو بڕیارە رۆژی شەممەی ئایندە 23/1/2021 یارییەكانی قۆناغی دووەمی هەردوو گروپەكە دەستپێبکەن و رۆژی 29/1/2021 كۆتاییانبێت.

یارییەكانی گروپی یەكەم لەهۆڵی شەعب لەبەغدا و یارییەكانی گروپی دووەم لە هۆڵی كۆڵێجی پەروەردەی وەرزشی لەهەولێر بەڕێوەدەچن و لە هەر گروپێک چوار تیپ بۆ قۆناغی بژاردە سەردەكەون.

ئاستی خولەكە
سایتی (عراق ڤولی-IRAQ VOLLY) لە فەیسبوك بابەتێكی بەو ناو نیشانەی سەرەوە بڵاو كردتەوەو ئێمەش وەك ستادیۆم وەك خۆی بڵاو دەكەینەوە چونكە وەك هەڵسەنگاندێكی هونەری خولەكەیە، لە هەمان كاتیشدا هێندێك لە كۆمێنتی خوێنەرانی بابەتەكەش بڵاو دەكەینەوە كە گوزارشتن لە هۆكارەكانی خراپی ئاستی خولەكە دەکەن.

سەرەتا بابەتەكەی ئەم سایتە دەقەكەی بەمشێوەیەی لای خوارەوەیە:
كاتێك بە وردی سەیری یارییەكانی هەردوو گروپی یانە بەشدارەكانمان كرد ئەوەمان بۆ دەركەوت كە بەگشتی پاشەكشەیەكی زۆر گەورە لە ڕوی ئاستی هونەری تیپە بەشدارەكان و بە تایبەتیش لە ڕوی ئاستی یاریزانەكانەوە بەدی دەكرا.

ئاستی هونەری هێندێک لە یارییەكان(نەك هەموو یارییەكان)مان وەك ئاستی هونەری هەڵبژاردەی پەروەدەكان دەبینی، بەوەی زۆرێك لە تیپەكان لەناو یاریگا هەژار بوون لە ڕوی رێكخستنەوە، یاریزانەكان هەڵەی سەرەتایی زۆر گەورەیان دەكرد، دیمەنە جوانە هونەرییەكانمان لەو یارییانەدا نەدەبینی، بەشێوەیەك واماندەزانی سەیری یارییەكانی خولێکی سەرەتایی دەكەین نەك خولێكی نایاب.

لایەنێكی تری لاوازی خولەكە لەوەدا بوو بەشدارییكردنی هێندێك یانە تەنیا بۆ ئەوەبوو بڵێن بەشداریی كردووە، بێ ئەوەی خۆی ئامادە كردبێت یان ئامادە كاریی بۆ خولەكە كردبێت.

بۆیە لێرەوە داوا دەكەین كە راهێنەرانی تیپەكان سەرەتا پەرە بەخۆیان و تیپەكانیان بدەن، بۆ ئەوەی ئاستی هونەری تیپەكانیان بەرز بكەنەوە تا جۆرێك لە ركابەریی بۆ بەرز كردنەوەی ئاستی هونەری لەنێوان یاریزانەكاندا درووست ببێت، زیاتر لە جاران هەلی یاریكردن بەیاریزانە لاوەكان بدەن.

لەمانەش گرنگتر ئەوەیە یەكێتیی ناوەندی بالەی عیراق مەرجی قورس لەسەر راهێنەرانی یانەكان دابنێت بەتایبەتی راهێنەرانی تیپە نایابەكانی عیراق كە دەبێت بەلایەنی كەمەوە خاوەنی بڕوانامەی راهێنەریی یەكێتی بالەی ئاسیا بن بۆ ئەم یارییە، ئەگەر نا ئەوا ساڵانی ئایندە ئەم یارییە توشی كارەسات دەبێت.

كۆمێنتەكان
یەكێك بەناوی وەقاس سەعد نووسیویەتی: كاتێك زیاد لە جارێك دەبینی یاریزانێك دووجار لە تۆپ دەدات بۆ هەموو تۆپێك بەرگری دەكات و تۆپیش دەدات بە یاریزانی هاوڕێی ئەمە خۆی بۆ خۆی بەڵگەی نزمی ئاست و توانای هونەریی یاریزانەكەیە، لەلایەكی تریشەوە زیادە ڕەویی كردن لە ئاهەنگی خۆشی كاتی گرتنی خاڵێكدا بەتایبەتیش ئەگەر هاتو یاریزانەكە یاریزانێكی هەڵبژاردەی عیراق بێت، ئەوە دەبێتە هۆی ئیسیفزاز كردن و توڕەكردنی یاریزانانی تیپی بەرامبەر، ئەو رەفتارەش لەگەڵ مێژووی یارییكردن و تەمەنی یارییكردنیان ناگونجێت بەتایبتی كە ئەوان پێشەنگ و نموونەن بۆ یاریزانانی لاوی تازەپێگەیشتوو.

یەكێكی تر بەناوی محەمەد مەهدی نووسیویەتی: خراپ بوونی ئاستی تیپی یانە بەشدارەكان بۆ ئەوە دەگەڕێتەوە كە یەكێتیی بالەی عیراق بەرنامەی بۆ پەرەپێدانی یارییەكە نییە، رێكخستنی خول بۆ سەرجەم ئاستی تەمەنە جیاوازەكان زۆر گرنگە و هەروەها زۆربەی تیپەكان ئامادەكاریی باشیان پێوە دیار نەبوووە.

هەروەها ئەوەشی نووسیوەكە جیاوازیی لە ئاستی تیپەكاندا هۆكارەكەی ئەوەیە یاریزانانی هەڵبژاردەی عیراق لە هێندێك تیپدا كۆبووبونەوە و تیپەكانی تر لەو رووەوە هەژار بوون.

وەلید فازیلیش نووسیویەتی؛ بنەمای یارییەكە زۆر لاواز،ە ئاستی خۆ ئامادەكردنی تیپەكان هەرگیز لەگەڵ ناوو ناوبانگی بالەی عیراقدا یەك ناگرێتەوە، چونكە راهێنانەكانی تیپەكان بە شێوەی پسپۆڕی یاریزانەكە نەبووە بەڵكو هەموو پێكەوەو بەشێوازی تیم راهێنانیان كردووە.

عەلی عەنەب-یش كە رۆژنامە نووسێكی وەرزشییە ئەمیش نووسیویەتی: من بۆخۆم 42 یاریی خولەكەم بینیوە و لە یەك یاریی دانەبڕابووم، ئەم وەرزە بۆ یەكەم جار و بە پێچەوانەی سەرجەم وەرزەكانی رابردووەوە ركابەری كەوتۆتە نێوان پێنج تیپەوە، دووەمیش ئەوەیە یاریزانە لاوەكان ئاستێكی هونەری باشیان پیشانداوە، نەبوونی ركابەریش بۆ ماوەی نزیكەی یەك ساڵ بووەتە هۆی ئەوەی ئاستی زۆربەی تیپەكان دابەزێت.

هەروەها نووسیویەتی :خاڵێکی تریش ئەوەیە ئیدارەی ئەو یانانەی لەم خولەدا بەشداربوون خەمی گەورەیان تیپەكانی تۆپی پێیانە نەك تیپی بالەكانیان، كێشەی داراییش لەولاوە بوەستێت كە من ئاگادارم یانە هەیە قەرزی كردووە بۆ بەشدارییكردن لە خولەكەدا.

خاڵی كۆتایی ئەوەیە دەبێت یەكێتیی ناوەندی بالەی عیراق ستراتیجیەتێكی نوێی كاركردن بۆ درووستكردنی یاریزانی نوێ و بنەمایەكی نوێ بۆ یارییەكە دابنێت تا بتوانرێت لەدەرەوەی عیراق بتوانین ركابەریی بكەین.

 106 جار بینراوە