سەرەکی » ئاراستە » سەرهەڵدانی داعش لە عیراق

بیره‌وه‌ریی شه‌ڕی دژی داعش

سەرهەڵدانی داعش لە عیراق

وه‌ستا ره‌سوڵ

ئه‌م زنجیره‌ نووسینه‌ كه‌ له‌ رۆژنامه‌ی كوردستانی نوێ دا بڵاوده‌بێته‌وه‌، له‌ بنه‌ڕه‌تدا پڕۆژه‌ی كتێبێكه‌ تایبه‌ت به‌ بیره‌وه‌رییه‌كانی خۆم له‌ شه‌ڕی دژی داعشدا.

به‌ پێویستی ده‌زانم داوای لێبووردن بكه‌م له‌ ئه‌گه‌ری بیرچوونی رووداوێك، یاخود هه‌رشتێكی تایبه‌ت به‌و باسه‌، بۆیه‌ داواكارم له‌ هه‌ڤاڵان و هه‌موو ئه‌و به‌ڕێزانه‌ی لەم رووه‌وه‌ هه‌ر سه‌رنج و بیرهێنانه‌وه‌و پێشنیازێكیان له‌لا گه‌ڵاڵه‌ بوو، بۆم بنێرن تاكو له‌ كتێبه‌كه‌دا جێگه‌ی بكه‌مه‌وه‌.

 

(26)

21ی ئەیلول لە دیوانی پارێزگای کەرکوک کۆبوونەوەیەکی فراوان لە نێوان فەرماندەکانی هێزی پێشمەرگە و فەرماندەی گشتی حەشدی شەعبی و وەفدێکی هاوڕێی بەسەرپەرشتی دکتۆر نەجمەدین کەریم ئەنجامدرا، لەو کۆبوونەوەیە هەرکەسە و راپۆرتی خۆی لەسەر بەرەکانی شەڕ پێشکەش کرد، پاشان بڕیاردرا لەچەند قۆڵێکەوە هێرش بکرێت بۆ رزگارکردنی قەزای حەویجە.

1 ـ لە سنووری میحوەرەکانی (3، 4، 5، 6، داقوق) هێزی پێشمەرگە سەرپشک بکرێت، تا ئەو جێگایەی بیانەوێت پێشڕەوی بکەن.

2 ـ لە سنوورەکانی حەمرین و فەتحە و زەرگەوە، حەشدی شەعبی و سوپای عێراق و پۆلیسی فیدراڵی و هێزەکانی پێشمەرگە لە کوێ راوەستان رێگا بدەن هێزەکانی عێراق هێرشی نوێ بکەن.

ئەم ڕێكەوتنە بەلای هەموانەوە باش هەڵسەنگێنرا .

24 ئەیلول لەگەڵ هەڤاڵ ئاسۆ مامەند بەشداریمان کرد لە دیبەیتی کۆنگرەی نەتەوەیی کورد (کەنەکە)، کە لە هۆڵی بۆنەکانی شارۆچکەی قەرەهەنجیر بەسترابوو، لەو دیبەیتەدا من تەنها بەشداربووم، بەڵام لەلایەن سەرپەرشتیارانی کۆبوونەوەکەوە بانگ کرام بۆ وتەیەک، لە ووتەکەمدا داوای یەک ریزی ناو ماڵی کوردم کرد و بە روونی رامگەیاند کە پێشمەرگە جارێکی تر شەڕی براکوژی ناکات، ئەم وتەیەم بوو بەهۆی چەپڵەڕێزان و ئامادەبووان زۆریان پێخۆش بوو.

25 ئەیلولی 2016 لە کۆبوونەوەی یەکشەممە لە بارەگای شێخ جەعفەر بە ئامادەبوونی تیمەکانی هاوپەیمانان بەوردی گفتووگۆمان لەسەر چۆنیەتی نەخشەی ڕزگارکردنی حەویجە و دەوروبەری کرد، دوای نیوەڕۆ لەگەڵ حاجی ئیقبال راوێژکاری لیوای (16)ی حەشدی شەعبی کۆبووینەوە، هاودەم ئێوارەکەی هەموومان داواتی تیمی ئەمریکییەکان بووین لە بارەگای خۆیان لە کەیوان.

26 ئەیلولی لە بارەگای میحوەر پێشوازیم کرد لە هەڤاڵان شێخ جەعفەر و رزگار عەلی، کە بەمیوانی هاتبوون بۆ لامان، بۆ نیوەڕۆ چەند ڕاوێژکارێکی سەربازی لە گەڵ حاجی ئیقبال هاتنە لامان، کاتژمێر (2)ی پاش نیوەڕۆ لەگەڵ هەڤاڵان رزگار عەلی و شێرزاد خاڵۆبازیانی سەردانی بەرەکانی جەنگمان کرد.

2ی تشرینی یەکەمی 2016 لە بارەگای میحوەر لەگەڵ شێخ جەعفەر و شێخ جەلال و لیوا مەریوان لەگەڵ تیمی ئەمریکییەکان کۆبووینەوە، دەربارەی بارودۆخی شەڕگەکان و چۆنیەتی پرۆسەی رزگارکردنی شاری موسڵ و قەزای حەویجە قسە و باسی زۆرمان کرد، شێخ جەعفەر ووتی: لە سنووری موسڵ میحوەرێکی شەڕ بەئێمەش دەدرێت و بەشداری دەکەین.

3ی تشرینی یەکەمی 2016 لە بارەگای میحوەرەوە بە هاوڕێیەتی هەڤاڵان شێخ جەعفەر و فەرماندی لیواکان و لیوا مەریوان و شێخ جەلال بەرەو هەولێر بەڕێکەوتین بۆ بەشداریکردن لەمەراسیمی ساڵیادی یەکگرتنەوەی هەردوو ئەڵمانیا، کە تیمێکی ئەڵمانی مەراسیمێکیان لەو بارەیەوە سازکردبوو، فەرماندەی سەربازی ئەڵمانی ووتەیەکی لەسەر چۆنیەتی یەکگرتنەوەی هەردوو ئەڵمانیا پێشکەشکرد و تیشکی خستەسەر ئەوە کە ئەڵمانییەکان بە شۆڕشی مۆم داگیرساندن و گوڵ بارانکردنی یەکتری دیواری بەرلینیان لە ساڵی (1989) ڕوخاند و هەردوو دەوڵەتیش لە ساڵی (1990) یەکیان گرتەوە.

4 ی تشرینی یەکەمی 2016 لە بارەگای تایبەتی هەڤاڵ شێخ جەعفەر لە کەرکوک پێشوازیمان کرد لەقونسوڵی فەرەنسی، نانی بەیانیمان پێکەوە خوارد و بەوردی باسمان لە هاوکارییەکانی وڵاتی فەرنسا کرد بۆ هەرێمی کوردستان.

9 ی تشرینی یەکەمی 2016 گەڕامەوە کەرکوک و بەیانییەکەی لە بارەگای میحوەر پێشوازیم کرد لە کۆمەڵێ فەرماندەی لیوا و میحوەرەکان، پاشان لەگەڵ شێخ جەعفەر لەگەڵ تیمەکانی هاوپەیمانان کۆبووینەوە، پاشان هەموومان چووین بۆ ماڵی مامۆستا غەفور بۆ نان خواردن و دواتر چووینە پرسەی برای حەمە ڕێگر.

هەمان ڕۆژ گوندی قەرتەپە لە خوارووی کەرکوک چۆڵکرا بەهۆی ئەوەی چەندین جار چەک و تەقەمەنی لەناو ئەو گوندە دۆزرایەوە و مەترسی لەسەر سنورەکە دروستکردبوو.

10 ی تشرینی یەکەمی 2016 لەگەڵ دکتۆرەکانی نەخۆشخانەی شۆڕش سەردانی بەرەکانی شەڕمان کرد بەمەبەستی ڕشتنی دەرمانی مشک و مێروو.

11ی تشرینی یەکەم لە مەکتەب خالید بەشداری مەراسیمی پەردەلادان لەسەر وێنەی شەهیدانی فەوجی یەکی لیوای یەک كرد، کە لە شەڕکانی سنوورەکە دژ بەداعش شەهیدبوون، هەندێکیان بەدیل گیران و پاشان شەهیدکران، لەم مەراسیمەدا ووتارێکی پێشمەرگانەم پێشکەشکرد. هەمان ڕۆژ بە بروسکەی ژمارە (6392) لە (6/10/2016) لە ڕێگای وەزارەتی پێشمەرگەوە ئاگادارکراینەوە، کە هێزی سوپای عێراق لە بەغدادەوە بەرە و کەرکوک و سنووری موسڵ جووڵەی پێکراوە، ئامادەکاری دەکرێت بۆ شەڕی ئازادکردنی موسڵ، هێزەکە لەم یەکە سەربازییانە پێکهاتبوون: یه‌ك- ک .م 3 .ف1 . دوو – فرقەی 9 و هەموو یەکەکانی. سێی – فرقەی 16 و هەموو یەکەکانی.

هاتنی حەیدەر عەبادی بۆ کەرکوک و سەنگەرەکانی پێشمەرگە

14ی تشرینی یەکەم له ناو شەڕگەکانی باشووری کەرکوک، لەگەڵ دکتۆر کەمال کەرکوکی و فەرماندەی لیواکان، لەسەر پردی مەکتەب خالید پێشوازیمان لە حەیدەر عەبادی سەرۆک وەزیرانی عیراق و وەفدێکی باڵای سەربازی کرد، کە بە یاوەری دکتۆر نەجمەدین پارێزگاری کەرکوک بەمەبەستی بەسەرکردنەوەی هێزی پێشمەرگە هاتبوونە سنورەکە، لە قسەکانیدا ئەوەی دووپاتکردەوە کە هێزی پێشمەرگە و سوپای عێراق پێکەوە قەزای حەویجە لەدەست تیرۆرستانی داعش رزگاردەکەن، پاشان چووینە گوندی بەشیر و لە ناو قوتابخانەیەک لەگەڵ خەڵکی گوندەکە کۆبوەوە. ئەوە لەو کاتەدا پەیامێکی باش بوو لە رووی مۆراڵیەوە بۆ هێزی پێشمەرگەی کوردستان کە لە ناو سەنگەرەکانی بەرگری بەرامبەر تیرۆرستانی داعش لەشەڕێکی قورسدا بوون، ئەم سەردانە ئەوەی دەگەیاند کە هێزی پێشمەرگەی کوردستان و سوپای عێراق پێکەوە هاوبەشێکی راستەقینەن لە شەڕی دژی داعش.

هەمان رۆژ هێزەکانی پشتیوانی دوو لیوای (16)ی وەزارەتی پێشمەرگە و بەشێک لە هێزەکانی بەرگری و فریاکەوتن و فەوجی یەکی لیوای یەک و لیوای سێی تایبەت، بەرەو میحوەری خازر بەڕێکەوتن بەمەبەستی بەشداریکردن لە رزگارکردنی موسڵ بە فەرماندەیی شێخ جەعفەر شێخ مستەفا.

17ی تشرینی یەکەم کاتژمێر (6:00)ی سپێدە، یەکەم هێرشی پێشمەرگە لە سنووری خازر دەستی پێکرد بەرەو گوندەکانی دەوروبەری ناحیەکانی (ئەلقوش، بەرتەلە) لە نزیک شاری موسڵ، هێزەکانی میحوەری (3، 4)ی باشووری کەرکوک و هێزەکانی بەرگری و فریاکەتن بە پاڵپشتی هێزەکانی پشتیوانی دوو توانیان (10) گوند لەسنووری خازر کۆنترۆڵ بکەن، لەم شەڕەدا(6) شەهید و (14) بریندارمان هەبوو، لەناو بریندارەکان هەڤاڵ شاڵاو کۆسرەت رەسوڵ بە سووکی برینداربوو. یەکەم کلیلی سەرکەوتنی شەڕی رزگارکردنی موسڵ لەسەر دەستی هێزی یەکەکانی (70) بوو.

دوای نیوەڕۆ لەگەڵ هەڤاڵان ئاسۆ مامەند و قوباد تاڵەبانی و خالید شوانی و رەوەند مەلا مەحمود و مامۆستا کاوە، سەردانی هەڤاڵ شاڵاو مان کرد لە هەولێر لە ماڵی هەڤاڵ کاک کۆسرەت، بۆ هەواڵ پرسینی بەهۆی برینداریەوە.

18ی تشرینی یەکەمی 2016 سەردانی بەرەکانی شەڕم کرد لە سنوری تازە و بەشیر، پاشان چووم بۆ دیوانی پارێزگای کەرکوک بەمەبەستی کۆبوونەوە لەگەڵ وەفدێکی باڵای سەربازی و پەرلەمانی عیراق، کە بەمەبەستی هەماهەنگیکردنی نێوان سوپا و هێزی پێشمەرگە لە رزگارکردنی قەزای حەویجە هاتبوون، کۆبوونەوەکە بەسەرپەرشتی دکتۆر نەجمەدین بەڕێوەچوو.

وەفدی ئێمە بریتی بوو لە بەندە فەرماندەی میحوەری باشوری کەرکوک، لیوا محەمەد حاجی قادر فەرماندەی میحوەری داقوق، لیوا حاجی محەمەد رێگر جێگری فەرماندەی میحوەری پێنجی رۆژئاوای کەرکوک، لیوا کاوە لێپرسراوی ئیدارەی میحوەری چوار و عەمید روکن خالید لێپرسراوی هەواڵگری میحوەری چوار.

وەفدی سوپای عیراق بە سەرپەرشتی لیوا روکن عەلی فەرماندەی هێزەکانی ڕۆژهەڵاتی دیجلە بوو، لەسەر ئەم خاڵانەی خوارەوە گفتوگۆ کرا:

1 ـ سێ لیوای عیراق لە سنووری پێشمەرگەوە هێرش بکەن بۆ قەزای حەویجە، لە وەڵامدا وتمان: پرسی سەرکردایەتی هێزی پێشمەرگە دەکەین و وەڵامتان دەدەینەوە.

2 ـ داوایان کرد حەشدی عەشایەری بەشداربێت ووتمان باشە.
بەداخەوە لەو كاتەدا هەواڵێكی دڵتەزێنمان پێگەیشت كه (3) فەرماندە له لیوای (16) لە سنووری خازر بە بۆمب شەهید بوون.

شەڕی تیرۆر لەناو شاری کەرکوک

شەوی 19 لەسەر20ی تشرینی یەکەم، لەماڵی خۆمان مۆڵەت بووم حاجی ئەبو سائیر فەرماندەی لیوای (16)ی حەشدی شەعبی لەگوندی بەشیرەوە بە تەلەفۆن پێی راگەیاندم کە (100) کەس لەنێوان هێزەکانی حەشدی شەعبی و هێزەکانی میحوەری داقوقەوە بەرە و ناو کەرکوک دێن کە لە کامێراکانمانەوە دیارن.

من بە تەلەفۆن بە محەمەدی حاجی قادرم راگەیاند،كە فەرماندەی میحوەری داقوق بوو، بەرپرس بوو لەو سنوورە لەوەڵامدا پێی وتم: ئاگاداری هێزەکانمان دەکەین، بۆ رۆژی دوایی جارێکی تر بە هەڤاڵ محەمەدی حاجی قادرم وت: چیتان کرد؟ لە وەڵامدا ووتی: گومانم هەیە ئەوەی شەو رەوەبەراز بووبێت، بۆ ئەو مەبەستە چەند کەسێکمان ناردووە بۆ ئەوەی ناو چەمی خوار گوندی تەلمەغار و بەدیرە بپشکنن ئەو چەمە پڕ لەدارستان بوو ئاسان نەبوو كەسی تیا بدۆزرێتەوە.

پێشمەرگە و خۆبەخش لە کاتی روبەڕوبوونەوەی داعش لە کەرکوک 2016

 83 جار بینراوە