سەرەکی » مانشێت » ״یەكێتی، پشتیوانی خەباتی ژنانە و بە كردەوەش چەندین دەستكەوتی بۆ ژنان بەدیهێناوە״

״یەكێتی، پشتیوانی خەباتی ژنانە و بە كردەوەش چەندین دەستكەوتی بۆ ژنان بەدیهێناوە״

پەیامی مەكتەبی سیاسیی یەكێتیی نیشتمانیی كوردستان بۆ (8)ی مارس رۆژی جیهانیی ژنان

(8)ی مارس، بۆنەی جۆشدانەوەی خەباتی ژنانی ئازادیخوازو یەكسانیخوازی كوردستان و جیهانە، لەم رۆژەدا، پیرۆزبایی لە هەموو ژنان ‌و كچانی ئازادیخوازی كوردستان دەكەین.

(8)ی مارس، رۆژی جۆشدانەوەی خەباتی ژنانە بۆ بەدیهێنانی مافەكانیان و چەسپاندنی یەكسانی جێندەری و رزگاربوونە لەو نەریت ‌و بیركردنەوە كۆن ‌و داسەپاوانەی، كە بوونەتە هۆی چەوساندنەوەی ژنان و بێبەشبوونیان لە مافە كۆمەڵایەتی و یاساییەكانیان ‌و بەشداریی كارای ژنانیان لە بوارە گرنگەكانی ژیان و كۆمەڵدا، كۆت‌وبەند كردووە.

ژنانی كوردستان، بەشداریی كاریگەریان لە خەباتی نیشتمانی و نەتەوەیی كردووە بۆ رزگاربوون لە زوڵم و ستەمی داگیركاران و روبەڕوبونەوەی مەترسییەكانی تیرۆر، بۆیە لەم رۆژەدا یادی (8) مارس تەنها وەك بۆنەی خەباتی یەكسانیخوازیی ژنان ناكەینەوە، بەڵكو یادی ژنە شەهید و تێكۆشەرەكانیش دەكەینەوە، كە بوونەتە هێمای ئازایەتیی ژنانی كوردستان و لە سەنگەری بەگژداچوونەوەی دوژمنانی ئازادی و مرۆڤایەتی و گەلەكەماندا و لە جینۆسایدی ئەنفال و كیمیاباران و جینۆسایدی ئێزدییەكان و لە زیندانەكاندا سەربەرزانە گیانیان بەخشی. یادی ئەو ژنانەش دەكەنەوە كە بەهۆی توندوتیژییەوە بوونە قوربانی. هەروەها یادی ئەو ژنانەی لە كوردەواریدا مایەی شانازیین، یادی خۆڕاگریی دایك و هاوسەر و كچی شەهیدان و ئەنفالكراوەكانیش دەكەینەوە و سەری رێز لە ئاستی سەری بەرزیاندا، دادەنەوێنین.

لەدوای راپەڕین، لە خەباتی مەدەنی و دیموكراسیشدا بۆ بەگژداچوونەوەی جیاكاریی رەگەزی و توندوتیژیی بەرامبەر بە ژنان و گۆڕینی یاسا كۆنەكان بە یاسای هاوچەرخ، كە مافی ژنان دەستەبەر بكات، هەنگاوی گەورەیان ناوە، بەڵام هێشتا رێگای تێكۆشانی ژنانی كوردستان بۆ رزگاربوون لە توندوتیژی و جیاوازیی جێندەری و بەجێهێنانی ئەركە نیشتمانی ‌و دیموكراسییەكان، دوورودرێژە.

یەكێتیی نیشتمانیی كوردستان، وەك هەمیشە پشتیوانی خەباتی ژنانە و بەكردەوەش چەندین دەستكەوتی بۆ ژنان بەدیهێناوە، بۆ ئێستا ‌و داهاتووش درێغی ناكات لە پشتیوانی كردنی خەباتی ژنان و رەخساندنی زەمینەی لەبارتر بۆ بەشداریكردنی كارای ژنان لە هەموو بوارەكاندا ‌و چارەسەركردنی كێشە كۆمەڵایەتی ‌و یاساییەكانیان ‌و هێنانەپێشەوەی خوێنی نوێ‌ ‌و وزەی نوێی كچانی ئازادیخواز.

پیرۆزبێت (8)ی مارس، رۆژی جیهانیی ژنان

سەركەوێت خەباتی یەكسانیخوازانەی ژنانی كوردستان

مەكتەبی سیاسیی یەكێتیی نیشتمانیی كوردستان
(8)ی مارسی 2021

 667 جار بینراوە