سەرەکی » ئاراستە » گوندی تەكەڵتوو_ ناحیەی تەقتەق لەم چیایە لووتی داگیركەری بەعس شكا

دڵشاد و گوندەکانی وڵات

گوندی تەكەڵتوو_ ناحیەی تەقتەق لەم چیایە لووتی داگیركەری بەعس شكا

وراتی كۆیە رێحانەڕەشەی بەر پشتوێنی باواجی
شاری كۆیە لەسەر چەند گردێك دروست كراوە و خاكەكەی لە گردی بەردینی رمڵی پێكهاتووە و چیاكانی رووتەنن، بەرزیی شاری كۆیە لە ئاستی رووی دەریاوە (625) مەترە و لە بناری چیای (باواجی) كە (1260) مەترە و چیای (هەیبە سوڵتان) ە كە (1092) مەتر لە ئاستی رووی دەریاوە بەرزن و لە ناوچەی بارانی ساڵانە (700ملم)ن، لە رووی شوێنی ئەسترۆنۆمییەوە، كۆیە لە نێوانی هەردوو هێڵی درێژی 44.56 پلە و 44.15 پلە خۆرهەڵاتدایە و هەردوو هێڵی پانی 35.28 پلەو 35.45 پلە باكووردایە، بۆیە ئاو و هەوای كۆیە مام ناوەندییە، مێژووەكەشی بۆ (2500) ساڵ پ.ز دەگەڕێتەوە و دەوروبەری رووباری كۆیە نیشتمانی ناوەندی «گۆتی» بووە كە لە ناوەڕاستی سەدەی (26) پ.ز (ناوچەی ژێردەستی ئەكەدی‌ و سۆمەری بووە) گۆتییەكان دەستیان بەسەرداگرتووە، بۆیە لە سەدەكانی 25 و 24ی پ.ز گۆتییەكان گەڕاونەتەوە بۆ وڵاتی رەسەنی خۆیان لە ناوچەی زێی بچووك‌ و ئەرابخا (كەركوك)، پتر لە دوو هەزار ساڵ پ.ز ئاشوورییەكان لە ناوچەكەدا بوون لە ساڵی 1595 پ.ز، دەكەوێتە بن دەستی كاسییەكان‌ و دواتر كەوتۆتە بن دەستی فەرمانڕەوایی (میتانییەكان) كە سنووری دەوڵەتەكەیان لە باكوورەوە دەریای ناوەڕاست و لە خۆرئاواوە كەركوك و هەولێر لە باشوورەوە، بۆیە مادەكان لەساڵی 612پ.ز ئاشووریەكانیان لەناوبرد و نەینەوای پایتەختیان گرت‌ و دەستیان بەسەر وڵاتی كۆیەدا گرت، تەنوور و ئاگردانی پەرستگاكان (ئاتەشگەكان) لە گردەكانی دەوروبەری كۆیە وەك (ئەسكی كۆیە) پاشماوەی دەوڵەتی مادەكانە، ئەم مێژووانەو مێژووی نوێی كۆیە هەتا حوكمڕانیی ئێستای كورد، كۆیە رێحانە رەشەی بەر پشتوێنی چیای باواجییە و بۆن‌ و بەرامەی دەگاتە زێ‌ و مەزراكانیشی‌ و هەمیشەش بەبۆن خۆشی و جوانی و سەربەرزی دەمێنێتەوە، یەكێك لە ناحیەكانی هەرێمی كۆیە ناحیەی تەقتەقە.

ناحیەی تەقتەق، مرواریی ملی شەپۆلەكانی زێ
23 كیلۆمەتری باشووری كۆیەیە لە كەناری لای راستی (زێی بچووكی كورد) تێكڕای سنووری ناحیەی تەقتەق (276) كیلۆمەتر چوارگۆشەیە، 23 گوند لە سنووری تەقتەقدایە، لە ساڵی 1977 سنووری ناحیەی تەقتەق (1073) كیلۆمەتر چوارگۆشە بووە، حكومەتی داگیركەری بەعس ناحیەی (دێگەڵە_ شۆڕش)ی دامەزراند و هەندێ گوندی چووەسەر دێگەڵە و لەساڵی 1998یش 20 گوندی خۆرهەڵاتی تەقتەق خرانە سەر ناحیەیەكی نوێ (ئاشتی) و یچووك بۆوە بۆ (276 كیلۆمەتر چوارگۆشە. وشەی تەقتەق واتە (زەوی بەردەڵان) لە سەرەتای ساڵی 1600 زاینی تەقتەق ئاوەدانی تیابووە و لە ساڵی 1850 هەتا ساڵی 1900 فەرمانگەی كۆكردنەوەی باجی تێدا دامەزراوە، لە 15/12/1918 كە كۆیە دەبێتە قەزاو (حەمە ئاغای گەورەی غەفوری) دەكەن بە قایمقام و تەقتەقیش دەكەن بە ناحیە و (عەبدوڵڵا ئاغای حەوێزی) دەكرێتە بەڕێوەبەری ناحیەی تەقتەق.

تەقتەق كەرتی كشتوكاڵی ژمارە (1)ە كە رووبەرەكەی (2903) دۆنم زەوییە 339 مەتر لە ئاستی رووی دەریاوە بەرزە، یەكێك لە گوندەكانی ناحیەی تەقتەق كە لە 8 كیلۆمەتری خۆرهەڵاتییەوەیە گوندی تەكەڵتووە.

گوندی تەكەڵتوو، مێژوو، ژیان و ئاوەدانی
هەندێك دەڵێن «توویەكی گەورە»ی لێبووە بە كەڵە توو ناوبراوە، لە كوردیدا زەبەلاح گەورە، بەكاردێ نەك كەڵ، بۆیە ئەم بۆچوونە لاوازە، ئەمما لەسەر چیای (سی تەغار)ەوە تەماشا بكەی، زەوییەكەی لەزینی ئەسپ و مایین دەكات، لەو وڵاتەش بە (زین)ی وڵاغە بەرزە دەڵێن «تەكەڵتوو»، هەر ئەم رایەش پێدەچێت گونجاوتر بێت بۆ ناوی گوندەكە و ناوی چیاكەش، ئەوەی سەرنجی راكێشام لەم گوندە لە مێژوودا ژن دەسەڵاتی دنیاو دینی هەبووە، وەك «دایكە ئەستێ» سەردەمانێ سەرداری هۆزی گەورەی (مەمان) بووە و چاك یان قیسن یان شەخسی (خەجیلە) و پاكی (تاتوك)و چاكی (نەنەپیرۆزە). «ئاراس جەبار خاكی) مێژوونووس‌ و رووناكبیری خەڵكی گوندەکە بە گوندستانی نوێی وت: مێژووی ئەم گوندە بە دوو قۆناغ نووسراوەتەوە و گرنگی زۆری هەیە، قۆناغی یەكەم بۆ ساڵی (410ی زایین) دەگەڕێتەوە لە كاتی بەهێزبوونی دەسەڵاتی ساسانییەكاندا بووە، «كوردی فەیلی» لەم وڵاتە فەرمانڕەوابوون لە چوارچێوەی دەوڵەتی ساسانی مەزندا لە چیاكەی پشتمان «لوتكی فەل» هەیە كە بەرزترین دۆندی چیای شاخی تەكەڵتووە و 810 مەتر لەئاستی رووی دەریاوە بەرزە كە پێدەچێت یەكێك لە سەردارانی فەیلی لەو چیایە كۆشك ‌و تەلاری هەبووبێت ‌و خاوەنی سوپا بووبێت، چونكە لە نزیك گوندەكەمان گۆڕستانی فەیلی هەیە، زەردەشتییەكان لێرەبوون هەتا هاتنی سوپای ئیسلام بۆ كوردستان‌ لە ساڵی 16ی کۆچیدا قۆناغ بەقۆناغ ئیسلام گەشەی كردووە لە كوردستان لە چوارچێوەی خەلافەتەكانی ئەمەوی هەتا دەگاتە عوسمانلی ئەم وڵاتە لەژێر دەستیاندا بووە، بەتایبەتیش شەڕی خوێناوی گەورەی نێوان (سەفەوییەكان)و (عوسمانییە كان) كە وەك داگیركەری كوردستان لە مێژوودا خۆیان نمایش كردووە و لەشەڕی چاڵدێران 1514 كوردستانیان دابەشكرد، ئەم رەوشە نوێیە، ژیانی لە كورد تێكدا، بستێك خاكی نیشتمان نەمابوو كورد تێیدا بحەوێتەوە، بۆیە ئاڵوگۆڕ و بەجێهێشتن ‌و كۆچ‌و ڕەو لەناو هۆزەكانی كورد دەستی پێكرد، بەتایبەتیش ئەو هۆزانەی دژبە داگیركاریی هەمووان رادەوەستان، (هۆزی مەمان) هۆزی ئێمەیە ئامۆزای (هۆزی پیران)ی باكووری كوردستانە، بەهۆی بەشدارییان لە شۆڕشەكانی باكووردا هەمیشە هەڕەشەمان لەسەر بووە، بۆیە هۆزەكەمان لە باكووری كوردستان دەبنە چەند بەشێكەوە هەر بەشێك روو لە مەملەكەتێك دەكات (ئەمانە كاك دڵشاد قۆناغ بەقۆناغ دوای چاڵدێران)، ژمارەیەك بنەماڵەی لەیەك نزیك (مام و پسمام باب‌ و كوڕو ئامۆزاو قەوم) كە دەڵێن بیست خانەوادە دەبن بە كۆچەری روودەكەنە خۆرهەڵاتی كوردستان. بەخۆ و رەشدەوار و چاتۆڵ‌ و مێگەل ‌و ئەسپی رەسەنی كوردی ‌و بە تەكەڵتوو واتە (زینی چنراوی گوڵ گوڵی و زیوو) و لە هەرێمێكی كوردەواری رەشماڵ هەڵدەدەن‌ و بە تێپەڕینی ساڵ‌ و عەیام شارێك دروست دەكەن بەناوی (مەمان ئاباد) ئەوجا بڕەك جیا دەبنەوە و رەودەكەن بۆ باشووری كوردستان بۆ (پشدەر) و (بیتوێن) سەردار و گەورەی ئێڵی مەمان (ئەوانی دێنە باشوور) ژنەكی بەئاوەز و جوامێر و عەگید دەبێ‌ و لەسەر دەستووری هۆزی مەمان هەر بە كرمانجی دواون لەگەڵ هۆزەكانی باشووری كوردستان پەیوەندیی باشیان بەستووە، دوو برا لەم هۆزە لەگەڵ سەرداری هۆز جیادەبنەوە، كوڕ و كیژ و ئامۆزا و پسمام دەڕژێنە دەشتی كۆیە لەنێوانی (كانی رەش)و گوندی (ساتوقەڵا) شوێنێك هەیە پێی دەڵێن (كارێز) ئەوێ ئاوەدان دەكەنەوە و دایكە ئەسێ سەرۆكی هۆزی مەمان لێرە لە باشوور لەوێ كۆچی دوایی دەكات و هەر لەوێش دەینێژن لەساڵی 1700ی زاینی یەك لەو دوو برایە دەچێتە شوێنێ پێیدەڵێن (كەپەنەك) لە وڵاتی كەركوك، مام سڵەمان مەمانی دەچێتە گوندی كۆن ناوی (كەیلان)ە ئەشكەوتێكی لێیە ئاوی سازگاری لێیە و فێنكە و كوێستانە هەوارە، یەكەم رەشدەوار لەوێ هەڵدراوە کە جێگەیەکی عاسی بووە، ئیدی دێنە ئەم گوندە و وەكو زینی ئەسپێ دەبێ، بۆیە پێیدەڵێن «تەكەڵتوو» بە شێوەزاری مەمانی باكوورێ، بەڵام پێشتر چوونەتە ئەشكەوتی (شاڵەبەگی) كن گوندی شیوەجان زۆر شوێنیان كردووە هەتا لێرە نیشتەجێبوون.

تەبارەكانی تەكەڵتو و ناندنەكانی
پێش دروێنەی گەنم و جۆ بە خەلە پێگەشتووە زێڕینە نازدارەكانی مەزراكان دەڵێن «تەبارە»كە دێڕی یەكەمی ئاسایشی خۆراكی كوردە، لە دوورەوە كە تەماشای گوندم كرد تەنوورەكانی تەكەڵتوو كە لەوێ پێیدەڵێن (ناندین) دووكەڵیان لێ هەڵدەسا بەیانی زووبوو، ژنانی ئازای تەكەڵتوو نانیان دەكرد، بۆن‌و بەرامەی ئەستورك‌ و نانی تیری باڵندەكانیشی خستبووە سەرەتاتكێ، (قاسم قادر حەوێز) كە خاوەنی دوو برای شەهیدە (سەباح قادر)و (وەهاب قادر) ئەنجومەنی گوندی تەكەڵتووە، لەپشتی سەری (قەڵانگ)ی هەڵواسیبوو (جۆرێكە لە گۆچان، یان گاڵۆك، یان گۆپاڵ) ئەو بەگوندستانی نوێی گوت: گوندی تەكەڵتوو كەرتی كشتوكاڵی ژمارە (42)ەو (639) مەتر لەئاستی رووی دەریاوە بەرزە، تێكڕای رووبەرو زەویوزار و ئاقاری تەكەڵتوو (1518) دۆنمە لەم ژمارەیە (1245) دۆنمی شیاوی چاندنە و (1900) دۆنمیشی پاوان ‌و لەوەڕگا و شاخەڵانە، بەرلە ئەنفالەکان لەساڵی 1988 ژمارەی مێگەلەكان 12 مێگەل بووە، ئێستا چوار مێگەلی لێیە ئی مام رەزا و كاكە حەمە و مامە تایەر و كوێخا قادرە، ساڵانە جوتیارەكانی ئێمە كە تەكنەلۆژیای نوێی كشتوكاڵ ‌و جوت‌ و كێڵان‌ و تۆوكردن‌ و بژار و هەتا دەگاتە دروێنە بەكار دەهێنین‌ و بەرهەمێكی باشی دانەوێڵە بەرهەمدێنین. هەر لەگەڵ ئەنجومەنی تەكەڵتوو، مامۆستا مەسعود مەولود كە یەكێكە لە ناودارانی بواری پەروەردە و فێركردن هەتا لە(كۆیە)ش خزمەتێكی باشی خوێندنی كردووە، بە گوندستانی نوێی وت: لەناو گوندەكان گەلێ نەریتی جوانی كوردەواری هەن كە ئێمە شانازییان پێوەدەكەین ‌و بەجوانترین دەستوور و رێنمایی كوردەواری دەزانین كە بۆتە سەرمەشقی ژیانی ئێمە، لەوانە(زبارە، دەستەوایی، هەرەوەز) رێزگرتن‌ و خۆشەویستی‌ و پەیوەندی توندوتۆڵی كۆمەڵایەتی، هەتا لەگەڵ گوندەكانی ئاقاری مە، لە شێستەكانی سەدەی رابردوو لێرە 11 كەس بەپێ دەچوونە گوندی «شیوەجان» كە گوندێكی بەڕێزو ئازیزو میواندۆستن، لەوێ خوێندنگا هەبوو دەیانخوێند، ئەمە خۆشەویستی تەكەڵتوو بوو بۆ خوێندن بۆیە گەلێ لە ئەندازیارو پزیشك ‌و خاوەن بڕوانامە و نووسەر و مامۆستاو فەرمانبەری بەڕێزمان لێ هەڵكەوتووە، لە گشت بوارەكاندا خزمەتی میللەتەكەمان دەكەین هەروەك چۆن سەرتۆپی گوندەكەمان لەبەرەی گەل‌ و شۆڕشدا هەمیشە ماڵی پێشمەرگە بووە، بەتایبەت شۆڕشی نوێ، لەساڵی 1978 خوێندنگا لێرە كرایەوە، یەكەم مامۆستاش (فەوزیە محەمەد) بوو خەڵكی هەولێر بوو كیژێكی دەست‌و داوێن خاوێن، بەخزمەت، وڵات دۆست، هەتا ساڵی 1988 خوێندنگاكە لەلایەن بەعسی دوژمنی زانست ‌و پێشكەوتنەوە سووتێنرا، لەدوای راپەڕینیش لێرە قوتابخانە نەبوو، مامۆستا (تەحسین تەها تەكەڵتوویی) خۆبەخشانە چاكی مەردایەتی لێ كرد بەلادا و منداڵانی گوندی لە ماڵەكەی خۆی كۆكردەوە، بەگشت ئاستەكانەوە خوێندنی بەردەوام پێدا چەند ساڵێ ئەمە مەزنترین گەورەیی بۆ خۆی تۆماركرد.

تات بەسێ ژنێك لە رەنج‌ و نانی توێشەبەرەی پێشمەرگە
لە سنووری دەشتی كۆیە بە(باجی) یان (پورێ‌) یان (خانم) دەگوترێ (تات) ‌و لە كاتی بانگكردنیشیان دەوترێ (یا) لەسەر خەرمان یان دروێنە، یان لەسەر جەنجەڕ (یا بەسێ) یان (تات بەسێ) لەساڵی 1951 لەگوندی (كانی رەش)ی كن گوندی ساتوقەڵا لەدایك بووە، بابی نێوی (حەوێز رەسوڵ)بوو دەگەڵ برایەكی بابی بە سەپانی‌ و وەرزێری دەچنە كن ئاغا و لەكێڵگە و مەزراكان رەنجدەریی دەكەن بۆ نانەسكێ، كە بەسكێ تێرو بەدوو برسی بوون، ئەو دەمانە ژیان سادە بوو، بەڵام هەژارو جوتیارو كرێكارانی كورد بە كوڵەمەرگی ژیاون، هەموو رەنجیان بۆ ئاغا بووە، لەكاتی وەرزێری ‌و سەپانی (یا بەسێ) لەدایك دەبێ، هەتا دەگاتە حەفت ساڵان، ئەوی دەمێ لە عیراق گۆڕانكاری لەحوكم‌ و سیاسەتدا بووە، بۆیە جوتیاران چوونەتەوە سەر زەوی خۆیان، یا بەسێ دەچنەوە سەر عەردی خۆیان لە(تەكەڵتوو) ئەو لە منداڵییەوە بیری تیژبوو بەگوندستانی وت: ئاشەك هەبوو لەناو چیا (حەمە سمایل) و (ئەحمەد سمایل) ئاشەوان بوون خەركی گوند ئاشیان لەوێ بەباراش دەكرد، بەبیری من بابم باراشی دەبرد بۆ گوندەكانی (داربەسەر)و (كۆیە) ئاشی ئاوێ هەبوو، هەتا لەدوایە بوو بەئاشی مەكینە، دوو پیاو هەبوون مام عەزیزو مام سدیق (مراك)و (كۆتكی ماستاوان_واتە دەفر یان لەگەنی ماستاو)یان دروست دەكرد، (هەوجاڕ)و (نیر)و كەرەستەی جوتیان دروست دەكرد، دەركەو پەنجەرەشیان دروست دەكرد، هەوجاڕو كەڵەمەش، لەگوندەكانی (باغەجنێر)و (چۆم هەیدەر) و (ناسر ئاغاو) و (كونە گورگ) و (شیوەجان) دەهاتن لێرە كەرەسەی جۆتیان دەكڕی، بەناوبانگ بوو، بەمە نەوەستان (بەلەم) و (كەڵەك)یشیان بۆ خەڵكی سەرزێ دروست دەكرد، لە ساڵی 1961 توتنمان كردبوو لەگوندی (گردخەبەر) بەكەڵەك هاتووچۆمان دەكرد، لێرە باغ‌و باغاتی هەنار، هەنجیر، ترێ، هەروتكە زۆر بوو، مەڕوماڵات لەبن نەدەهات، بواران دەچوینە سەرچیا (تێلەكە، كەنگر، كاردی) داری سۆتاندنمان دەینا، گەنم ‌و جۆو نیسك ‌و نۆكمان دەچاند لەگەڵ (پۆلكە_ لەجیاتی جۆ دەیاندایە وڵاخ) لەساڵی 1965 مێردم كرد بەكوڕە خاڵی خۆم (باوەلە)، بەنەریتی گەورە بە گچكە، لەساڵی 1962 خدری برام لە ئەشكەوتی (دێوالی) ئەشكەوت ڕما بەسەریدا و شەهید بوو حەیف، شوان بوو، جومعەی كوڕم 17 ساڵ بوو لە شیوەسوور پێشمەرگەی یەکێتی بوو رژێمی بەعس شەهیدی كرد، سێ برازام شەهیدی یەکێتین و شەش ئامۆزا و خاڵۆزاشم ئەنفالكراون، هەمیشەش لە شۆڕشدا ماڵەكەم نەزركردبوو بۆ پێشمەرگەكانی مام جەلال.

رێكخستنەكانی تەكەڵتو و داستانی قارەمانێتی پێشمەرگەكانی یەكێتی
محەمەد تاهیر رەشید یەكێكە لەتێكۆشەرو ماندوونەناسەكانی یەكێتیی نیشتمانیی كوردستان ‌و قوتابخانە گەورەكەی مام جەلال، خاوەن دیوەخان ‌و میواندۆست، ئەو لەو بەرگرییەدا بوو كە پێشمەرگەكانی یەكێتی بەگژ ئەژدیهاكەی تەممووزدا چوونەوە، لە ئەنفالی چواردا بەریان بە سوپا گرت، لەو بارەیەوە بەم شێوەیە بۆ گوندستانی نوێ دوا: لەساڵی 1977 كاتێ (نوعمانە گۆج) كە یەكێكە لە دەروێشەكانی یەكێتی، ماندوونەناس، ئازا، تێكۆشەر هاتە گوندەكەمان مژدەی هەڵگیرسانەوەی شۆڕشی نوێی پێداین، گوندەكەی پڕكرد لە هیواو مۆمی ئازادی لە دڵە هەناسە ساردەكانمانا داگیرساند، یەكەم ئەڵقەی شانەی رێكخستن لێرە بەنهێنی دروست بوو (ئەنوەر سەعید، عەبدوڵڵا سەعید، جافر سەعید، ئەسوەد جەلیل) پەیوەندییان بە شەهید نوعمانە گۆجەوە هەبوو، ساڵی 1980 من چوومە شانەی رێكخستنەوە كارمان بۆ یەکێتی دەكرد لە شار و شاخ، دوو برا بوون بە پێشمەرگە عەبدوڵڵا سەعید (پاشان شەهیدكرا) و جەعفەر سەعیدی برای، ئێمە خاوەنی 10 پێشمەرگەی شەهید و 8 ئەنفالكراو و 5 زیندانی سیاسیین، بەعس دەستیكرد بە جێبەجێكردنی بەرنامەی ئەنفالی بەدناو، لە3 ــ 5 ــ 1988 پەلاماری ئەم ناوچەیەی دا لە سێ قۆڵەوە (قۆڵی گوندی كونەگورگ) و (قۆڵی گوندی باغەجنێر) و (قۆڵی گۆرحەمران_ گوندی موخەرەس) تیپی 17ی زمناكۆ بە فەرماندەیی جەمیل هەورامی ‌و هێزەكانی بەرگریی گوندەكانی (تەكەڵتوو، باغەجنێر، موخەڕەس)، پێشمەرگە بەردەمی هێرشە زەبەلاحەكەی سوپای داگیركەری گرت، لەهەموو لاوە، تەقەو تۆپ‌ و بۆمبارانی كۆپتەرو پیادەی عەسكەر بوو، دەستیان لە كەس نەدەبوارد، هەرچیان بهاتایە ڕێ لە(سولاوی ئاو) و (گژوگیای تازە زمان پژاو) و گولیلك‌ و مەل‌ و باڵندە و كەروێشك لێیان دەدا دەیانووت كوردن‌ و لەناویان بەرن، ئەنفال لەناوبردنی گەلێك، نەتەوەیەك نەخشەكێشرابوو، پێشمەرگە و بەرگریی گوندان، ئازایانە، كوردانە، یەكێتییانە، مرۆڤانە بەرپەرچی دوژمنی بەعسییان دایەوە لەسەعات 8ی بەیانی هەتا 11.45ی چێشتەنگاو شەڕبوو، خەڵكی گوندەكان بەتایبەت (تەكەڵتوو) بەشدارییان تێداكرد، ژنان نانیان دەدا بە پێشمەرگەو نزای سەركەوتنیان بۆ دەكردن، كوڕوكاڵی گوند ئاویان بۆ دەبردن، مخابن 9 شەهیدی قارەمانی یەكێتی بەخوێنی خۆیان سوپایان وەستان، لەوانە شەهید (مامە قالەی سلێمانی، سێ مانگ تەرمی شەهیدەكان لەو ناوە بوون، كە چیاكەیان سوتاند شەهیدەكان جارێكی دی بە ئاگری بەعس سووتان ‌و شەهیدبوونەوە لە دۆڵی ((هەوێز كاوڕان)ی چیای تەكەڵتوو، پێشمەرگەیەك هەتا گەیشتە پلەی تاجی شەهادەت لەسەركردن بەرگریكرد، هەر لەوێ شەش فاشیستی بەعسی كوشتبوو، دەیان كەلاكیان لەو ناوە كەوتبوون خەسارەتی زۆر لەسوپا كەوت، هەرچەندە شەڕێكی نابەرامبەر بوو، بەڵام كورد، پێشمەرگە، یەكێتی بە سوپای داگیركەری بەعسی گوت لێرە ناڕۆین، ئێوە دەبێ بڕۆن، بەرگریی لە خاك‌ و گەل‌ و نیشتمان دەكەین، ئێوە خاكی خەڵكی دی داگیردەكەن، داستانی تەكەڵتوو، داستانی شۆڕشی نوێی رەوانشاد مامی گەورەی كوردبوو تاهەتایە لەبیرناچێتەوە.

 323 جار بینراوە