سەرەکی » راپۆرت » راپۆرتی، ته‌ها عه‌بدوڵلا‌ » مەسیحییەكانی هەولێر: عەنکاوە وەک خۆی نەماوە

بەبێ خواستی ئەوان زەوی نیشتەجێبوون دابەشکراوە

مەسیحییەكانی هەولێر: عەنکاوە وەک خۆی نەماوە

عەنكاوە ناحیەیەكە لەناو شاری هەولێر و بەشارۆچكەیەكی مەسیحی-نشین ناسراوە، ئێستا ژمارەی دانیشتوانی نزیكەی 63 هەزار كەسە، راستە عەنكاوە وەك ناحیە ماوەتەوە، بەڵام لە هەندێک گەڕەكی تازەی هەولێر لە سەنتەری شار نزیكترە.

بۆ زیاتر ئاشنابوون بە بارودۆخی ئێستای ئەو شارۆچكەیە و رەوشی پێكهاتەی مەسیحی، هەروەها كۆكردنەوەی زانیاریەكان لە چوارچێوەی راپۆرتێكی رۆژنامەنووسیدا، بەشێك لە ناحیەكەمان بەسەركردەوە، هەرچەندە ئەوكاتەی بەوێدا تێپەڕین، بەیانی و رۆژی دەوامی رەسمی بوو، خەڵكێكی كەم لە دەرەوە بوون، بەڵام توانیمان چەند هاووڵاتییەک و كەسایەتی و لێپرسراوی عەنكاوە بدوێنین. لەو گەشتەماندا بەناو شارۆچكەی عەنكاوە، بۆم دەركەوت، لە نێوان ئێستا و رابردوودا پێشەكەوتنی زۆر روویداوە و ئەو پێشكەوتنانەش، بەردەوام بە گوڵ پێشوازی لێ ناكرێت، چونكە لە دابونەریتی پێشتر دەرچووە و كاریگەری لە دیمۆگرافیای شار كردووە، زیاتر شاری ئەوان نەماوە و شاری هەمووانە .

عەنکاوە گۆڕاوە
سالم تۆما پەرلەمانتاری خولەكانی پێشوو و كەسایەتی ناسراوی مەسیحی لە شارۆچكەی عەنكاوە لەوە نیگەرانبوو، كە ئەو گۆڕانكارییەی لە ناحیەكەیان روویداوە، هۆكارەكەی بۆ بارودۆخی عیراق و گۆڕانكاری لە دۆخی ئابووری گەڕاندەوە، كە خەڵكی رەسەنی عەنكاوە كۆچ بۆ هەندەران بكەن و خەڵكی دەرەوە شوێنیان بگرنەوە، لەگەڵ ئەوەش سوور بوو لەسەر ئەوەی پێویستە عەنكاوە تایبەتمەندی ئایینی و نەتەوەیی بپارێزێت، بەو پێیەی خەڵكەی مەسیحین و بەنەتەوە كلدو ئاشورین، كە دابونەریت ‌و رێورسمی ئایینی و مێژوویی تایبەت بە خۆیان هەیە. ئێمە وەك مەسیحییەكان لەگەڵ ئەوەنین خۆمان گۆشەگیر بكەین ‌و تێكەڵ بەكەلتور و دابوونەریتی پێكهاتەكانی دیكە نەبین، دروشمی پێكەوە ژیان، دروشمی ئێمەیە، بەڵام دەبێت تایبەتمەندی عەنكاوە بە هەموو لایەك بپارێزین.

فرەنسیس شەمعون مامۆستا و كەسایەتیەكی تری مەسیحیە لە عەنكاوە زانیاری ئەوە دەخاتە روو، كە عەنكاوە لە پەنجاكانی سەدەی رابردوو بۆتە ناحیە، پێشتر خەڵكەكەی وەك زۆربەی دانیشتوانی كوردستان، زیاتر بە كشتوكاڵ و ئاژەڵداری خەریكبوون، بەڵام بەهۆی كەمبوونەوەی زەوی كشتوكاڵی، وازیان لەو پیشە دێرینەیان هێنا و بەتایبەتیش دوای دابەشكردنی زەوی نیشتەجێبوون بەبێ خواستی دانیشتوانەكەی و دروستكردنی فرۆكەخانەی هەولێر لەسەر خاكی ئەوان، زەویەكی زۆری كشتوكاڵی مەسیحیەكان بەر ئەو پڕۆژەیە كەوت، تاوەكو ئێستاش قەرەبوو نەكراونەتەوە.

ئەو باسی لە وەشكرد ئێستا لە عەنكاوە زیاتر لە چل میوانخانە و سەد چێشتخانەی هەیە، شەوانە ژمارەی دانیشتوانیان زۆر زیاتر دەبێت، ئەویش بەهۆی بوونی چەندین یانە و كافتریای تایبەت كە رەنگە لە شوێنی دیكە بەو جۆرە رێگاپێدراو نەبێت. هەروەها بەهۆی زۆری ژمارەی كونسوڵخانە و نوێنەرایەتی وڵاتان لەو ناحیەیەدا نرخی خانوو و زەوی تاڕادەیەكی زۆر بەراورد بە ناوچەكانی دیكەی هەولێر بەرز بۆتەوە. لەبەر ئەوەی خەڵكی مەسیحی لە عەنكاوە زۆربەیان فەرمانبەرن، هاوشێوەی مووچەخۆرانی دیكە بارودۆخی داراییان باش نیە ئەمەش وایکردووە بەشێكی زۆری خەڵكە رەسەنەكەی كۆچی بۆ دەرەوەی وڵات بكەن.

پێگەیەکی گرنگی هەیە
لە رووی بازرگانیی و پیشەكانی تریشەوە زۆربەی ئارایشتگا و سەرتاشخانە و سەنتەری جوانكاریی و بریكاری براندە جیهانییە ناسراوەكان لە عەنكاوەن، ئەوەش بەسەرچاوەیەكی گرنگی داهات و ئابووری بۆ خەڵكی ناحیەكە دادەنرێ.

لە رووی سیاسییشەوە ژمارەیەك حزب و لایەن لە شارۆچكەكە هەن لە كاتی هەڵبژاردنەكان كاندیدیان دەبێت، عامر حوزەیران یەكێكە لە ئەندامانی مەكتەبی سیاسی حزبی دیموكراتی (بێت نەهرێن)، كە حزبێكی مەسیحیە و لە چوارچێوەی هاوپەیمانی یەكێتی نەتەوەیی سێ ئەندامیان لە پەرلەمانی كوردستاندا هەیە، پێمان دەڵێ: عەنكاوەش هاوشێوەی ناوچەكانی تری عیراق بە گۆڕانكارییەكان بەستراوتەوە و بەتایبەتی دوای رووداوەكانی ساڵی 2014 بەشێكی زۆر خەڵكی مەسیحی ناوچەكانی تری عیراق بۆ ئێرە هاتوون.

چەندین کەنیسەی لێیە
شارۆچكەی عەنكاوە جگە لەلایەنە كۆمەڵایەتی و سیاسییەكەی، لە رووی ئاینییەوە بە گەورەترین شار دادەنرێ‌ و زیاتر لە دوازدە كەنیسەی لێیە. (مام قەشە وەحید تۆما) روونیكردەوە: هەر مەزهەبێك كەنیسەی تایبەت بەخۆی هەیە و لەكاتی هاتنی خەڵكی ناوچەكانی دیكەی عیراق بۆ عەنكاوە، ژمارەی كەنیسەكان زیاتربووە، كە لە هەموویان رێورەسمی ئاینیی دەکرێت. مام قەشە وەحید، كە لە خانوویەكی گەورە لە نزیك كەنیسەیەك بەتەنیا دەژی و كتێبخانەیەكی گەورەی لە ژووركەیدا هەیە، خۆی بە هاوڕێیەكی نزیكی سەرۆك مام جەلال دەزانێت، بەو پێیەی پێشتر لە بەغدا چەندینجار سەردانی سەرۆكایەتی كۆماری عیراقی كردووە، هەروەها خۆی وەك راوێژكاری سەرۆک مام جەلال بۆ كاروباری مەسیحی ئەو كاتە دەزانێت.

داواکارییان زۆرە
بەهۆی فراوانبوونی شارۆچكەی عەنكاوە‌ و زۆربوونی كێشە و گرفتەكانی هاوشێوەی زۆربەی شار و شارۆچكەكانی كوردستان، كە بەهۆی قەیرانی دارایی و گیروگرفتە ئابورییەكان نەتوانراوە وەكو پێویست خزمەت بكرێت، خەڵكی عەنكاوە داواكاریی و گلەیی زۆریان هەیە، لەسەرووی هەموویانەوە پاراستنی شارۆچكەكە بەو تایبەتمەندیەی هەیەتی، هەروەها كێشەی بێكاری و كردنەوەی ئەو رێگا سەرەكیانەی بەهۆی رێوشوێنی ئەمنی كونسوڵخانەكان گیراوە.

 

 254 جار بینراوە