سەرەکی » وتار » گۆران فه‌تحی » ئاگركەوتنەوەكەی (نەخۆشخانەی حسێن)

ئاگركەوتنەوەكەی (نەخۆشخانەی حسێن)

گۆران فەتحی

ئاگركەوتنەوەی ئەم هەفتەیەی نەخۆشخانەی حسێن لەشاری ناسرییە کە تایبەتە بە كۆرۆنا، بەهەموو پێوەرێك كارەساتباربوو، لەبەر زۆریی ژمارەی قوربانیانی رووداوەكە، كە هیچ گومانی تێدا نییە، كەمتەرخەمی و گەندەڵی بەرپرسانی فەرمانگەی تەندروستی و بەڕێوەبەری نەخۆشخانەكە و بەشێك لە فەرمانگەكانی تر هۆكاری ئەو كارەساتەن، كە نەك لەو پارێزگایە بەڵكو زوو زوو بەرۆكی عیراقییەكان دەگرێت، وەكو ئەوەی لەبنەڕەتدا لەژیانیكی كوڵەمەرگیدا نەژیابن تا ئەو نەهامەتیانەشی بێتەسەر.

ئاگركەوتنەوەی ئەمجارە لە نەخۆشخانەیەكی شاری ناسریەی پارێزگای زیقاری باشووری خۆرهەڵاتی عیراق روویدا، كە تایبەت بوو بە تووشبووانی كۆرۆنا، بە گوێرەی وتەی بەرپرسانی تەندروستی و ئەمنی شارەكەش تەقینی بوتڵی ئۆكسجین بەهۆكاری سەرەكی رووداوەكە دەزانن.

بەڕێوەبەرایەتی تەندروستی زیقار كە پەنجەی تۆمەتیان ئاراستە دەكرێت لەرووی كەمتەرخەمییەوە لەسێكتەری تەندروستی شارەكە، هەرزوو لەبەیاننامەیەكدا رایگەیاند، ژمارەی قوربانیانی ئاگركەوتنەوەكە لە سەنتەری كەرەنتینەی نەخۆشخانەی حسێن گەیشتۆتە 92 كەس، عەممار زاملی وتەبێژی تەندروستی ناسریەش لای خۆیەوە رایگەیاندبوو، گومانی زۆر هەیە كە ئاگركەوتنەوەكەی شەوی دووشەممەی رابردوو، بەهۆی تەقینی بوتڵی ئۆكسجینی ناو یەكەی بوژانەوەی چڕی تووشبووانی كۆرۆنا بووە.

لەبەر گەورەیی كارەساتەكە و ژمارەی قوربانیان، مستەفا كازمی سەرۆك وەزیران، ماتەمینی لەوڵات راگەیاند، و بەیاننامەیەكی نووسینگەكەی ئاشكرایكرد، كازمی دوای رووداوەكە كۆبوونەوەیەكی بەپەلەی كردووە كە ژمارەیەك وەزیر و بەرپرس و فەرماندەی ئەمنی لەخۆگرتووە، بەمەبەستی زانینی هۆكاری ئاگركەوتنەوەكە و هەوڵی چارەسەركردنی دەرهاویشتەكانی.

بەیاننامەكە دوپاتیشیكردۆتەوە، كە دوای كۆبوونەوەكە بڕیاردراوە لێكۆڵینەوە لەسەر ئاستێكی حكومی باڵا بكرێت بۆ گەیشتن بەهۆكاری رووداوەكە و هەروەها ناردنی تیمێكی حكومەت بۆ زیقار بەمەبەستی بەدواداچوون و گرتنەبەری رێوشوێنی توند بەرامبەر بە بەرپرسانی تەندروستی لەو پارێزگایە.

بەپێی بەیاننامەكە، بەڕێوەبەری تەندروستی زیقار و بەڕێوەبەری نەخۆشخانەی حسێن و بەڕێوەبەری بەرگریی شارستانی لەشارەكە دەستگیركراون بە مەبەستی لێكۆڵینەوە لەگەڵیاندا سەبارەت بە كەمتەرخەمییان لە ئاست رووداوەكەدا.

وەكو لەسەرەوە باسمان كرد، هەندێك لەدامودەزگاكانی حكومەتی عیراق، بەهۆی گەندەڵی و كەمتەرخەمییەوە، چەندین جار بوونەتە هۆكاری روودانی كارەسات لە شارەكانی باشوورو ناوەڕاستدا، ئێمە چەندین رووداوی هاوشێوەمان بەرچاوكەوتووە، كە نزیكترینان، حاڵەتی ئاگركەوتنەوەبوو لە نەخۆشخانەیەكی شاری بەغدا، لە مانگی نیسانی رابردوودا، كە لانیكەم 82 كەس گیانیان لەدەستدا، كاتێك ئاگر لە نەخۆشخانەكە كەوتەوە بەهۆی تەقینەوەی بوتڵی ئۆكسجینی یەكێك لە یەكەكانی تایبەت بە نەخۆشانی كۆرۆنا.

لەبەر ئەوە، ئەگەر حكومەت و لەسەرووی هەموانەوە سەرۆك وەزیران، رێوشوێنی تووند نەگرێتەبەر بەرامبەر بە بەرپرسانی کەمتەرخەم لەسێكتەرە جیاوازەكانی وڵات، ئەوا دەبێت چاوەڕوانی كارەساتی تریش بكەین.

 262 جار بینراوە