سەرەکی » وتار » ئاوات كۆكه‌یی » کۆچی دوایی تێكۆشەری دێرین حاجی ئیبراهیم شاڵی پێشمەرگە و كەسایەتیی ناوچەی بادینان

کۆچی دوایی تێكۆشەری دێرین حاجی ئیبراهیم شاڵی پێشمەرگە و كەسایەتیی ناوچەی بادینان

دوای ماوەیەك لە ململانێ لەگەڵ نەخۆشیی كۆرۆنادا، شەوی چوارشەممە رێكەوتی 28/7/2021، حاجی ئیبراهیم شاڵی بەگ كۆچی دوایی كرد.

حاجی ئیبراهیم شاڵی بەگ، پێشمەرگە و تێكۆشەری دێرینی كوردستان، خاوەن هەڵوێستی نیشتمانی و ماندووی رێگەی كوردایەتی، كەسایەتیی عەشیرەتی نێروە و ریشسپیی بنەماڵەی شاڵی بەگ لە دەڤەری بادینان، نەوەی میر شاڵی بەگی گەورەی فەرماندەی لەشكری میرنشینی بادینانە.

ساڵی 1947 لە بنەماڵەیەكی كوردپەروەر و شۆڕشگێڕی خاوەن چەندین شەهیدی رێگەی رزگاریی كوردستان، لە دەڤەری نێروە لەدایكبووە، ساڵی 1963 پەیوەندی كردووە بە رێكخستنەكانی پارتی دیموكراتی كوردستانەوە و دڵسۆز و هاوكارێكی چالاكی شۆڕشی ئەیلول بووە، لە هەمان ساڵدا بووە بە ئەندامێكی چالاك و كاریگەری یەكێتیی قوتابیانی كوردستان.

ساڵی 1966 بووە بە خوێندكاری زانكۆ لە كۆلێژی ئابووری و زانستە سیاسییەكان لە بەغدا، لە كاری سیاسی و حزبایەتی بەردەوامبووە، بۆیە ساڵی 1970 لە بەغدا فەرمانی دەستگیركردن بۆ ئەو و چەند تێكۆشەرێكی دیكە دەرچووە، بەڵام بە ئازایەتی و پلانێكی ژیرانە، لەگەڵ سەركردەی كۆچكردوو عادل موراد، خۆیان دەرباز كردووە ‌و خۆیان گەیاندۆتە گەڵاڵەی ناوچەی چۆمان و حاجی ئۆمەران، لە ناوچەكانی ژێردەستی پێشمەرگە بووە بە مامۆستای شۆڕش.

حاجی بەردەوام بووە لەسەر هەڵوێستە نیشتمانییەكانی و هەر بە دۆستی شۆڕشی كورد ماوەتەوە ‌و لە دوای راپەڕینی 1991یشەوە، لە ریزەكانی یەكێتیی نیشتمانیی كوردستاندا درێژەی بە خەباتی سیاسی داوە ‌و لە چوارچێوەی خەباتیدا لە ریزەكانی یەكێتی، دووچاری دەستگیركردن و نەهامەتی زۆر بۆتەوە، هەر لەو پێناوەدا بە ماڵ و خێزانەوە ئاوارەی شاری سلێمانی بووە.

ساڵی 2005 تا 2014، ئەندامی ئەنجومەنی پارێزگای دهۆك بووە، لەو ماوەیەدا بە شێوەیەكی دڵسۆزانە تێكۆشاوە و لە خزمەتی خەڵكدا بە شێوەیەكی شایستە ئەركەكانی راپەڕاندووە، دوا ئەركیشی سەرۆكی لقی (زیندانیانی سیاسیی ناوخۆ) بووە لە دهۆك.

بە داخەوە، شەوی چوارشەممە 28/7/2021 كۆچی دوایی كرد.

ئاوات كۆكەیی

 141 جار بینراوە