سەرەکی » ئابووری » بودجەی‌ عیراق بەبێ كورد پەسەند كرا

داواكارییەكانی هەرێم جێبەجێكراون

بودجەی‌ عیراق بەبێ كورد پەسەند كرا

ئەنجومەنی نوێنەرانی عیراق بەبێ كورد پڕۆژەیاسای بودجەی 2018ی عیراقی پەسەندكردو نوێنەرێكی كوردیش لە لیژنەی دارایی ئەنجومەنەكە رایدەگەیەنێت: «چاوەڕوانی هەڵوێستی حكومەتی هەرێمی كوردستانین». هاوكات سەرۆكی ئەنجومەنی نوێنەرانی عیراق ئاشكرایكرد: داواكارییەكانی هەرێمی كوردستان لە پرۆژەیاسای بودجە جێبەجێ كراون.

بەرچاو روون نین
عەبدولقادر محەمەد ئەندامی‌ لیژنەی‌ دارایی‌ لە ئەنجومەنی‌ نوێنەرانی‌ عیراق راگەیاند: لەبارەی تێپەڕاندنی پڕۆژەیاسای بودجەی عیراق‌و فەرامۆشكردنی داواكارییەكانی هەرێم، پەیوەندیمان بە سەرجەم لایەنە سیاسییەكانی هەرێمەەوە كردوە، بۆئەوەی‌ هەڵوێستی خۆیان بە روونی رابگەیەنن‌و چاوەڕوانین.
وتیشی‌:»وەكو فراكسیۆنە كوردستانیەكان بایكۆتی‌ دانیشتنەكانی تایبەت بە بودجەمان كرد، تائێستا بەرچاو روون نین سەبارەت بەهەڵوێستی لایەنە سیاسییەكانی هەرێم لەبەرامبەر ئەو هەنگاوەی عیراق‌و چاوەڕوان هەڵوێستی سیاسین».

کۆبوونەوەی لایەنە سیاسییەكانی كوردستان
راشیگەیاند: دەبێت بەپەلە حكومەتی هەرێمی كوردستان لەگەڵ لایەنە سیاسییەكانی كوردستان كۆبێتەوەو ئەو هەڵوێستە یەكلایی بكاتەوە.
دوانیوەڕۆی رۆژی 3ی 3ی 2018، ئەنجومەنی نوێنەرانی عیراق بەبێ كورد تەواوی مادەو بڕگەكانی پڕۆژەیاسای بودجەی 2018ی عیراقی پەسەند كرد، بەبێ چارەسەركردنی داواكاریی فراكسیۆنە كوردستانیەكان.

لابردنی بڕگەی تایبەت بە لێبڕینی 3.8%
هاوكات سەرۆكی ئەنجومەنی نوێنەرانی عیراق، پەسەندكردنی پڕۆژەیاسای بودجەی 2018، بە دەستكەوتێكی گەورە بۆ گەلی عیراق وەسفكردو رایگەیاند: داواكارییەكانی هەرێمی كوردستان لە پڕۆژەیاسای بودجە جێبەجێكراون‌و بەو شێوەیەش پەیوەندی نێوان هەرێم‌و بەغدا زیاتر بەرەو ئاسایی بوونەوە دەبات.
سەلیم جبوری لەمیانەی كۆنفرانسێكی رۆژنامەوانیدا، كە لەدوای پەسەندكردنی پڕۆژەیاسای بودجەی گشتی 2018 ئەنجامیدا، رایگەیاند: پەسەندكردنی پڕۆژەیاسای بودجە، دەستكەوتێكی گەورەیە بۆ گەلی عیراق، چونكە دەبێتە هۆی كەوتنەكاری پڕۆژەكان‌و بوژاندنەوەی بازاڕ.
وتیشی: «لە پڕۆژەیاساكەدا، چەندین خاڵی باشمان پەسەندكردووە، لەوانەش، كەمكردنەوەی باج لەسەر فرۆشیاران، لە 10% بۆ 5%، لابردنی بڕگەی تایبەت بە لێبڕینی 3.8%ی موچەی فەرمانبەران بۆ حەشدی شەعبی، چارەسەركردنی بودجەی پترۆدۆلار بۆ پارێزگا نەوتییەكان‌و قەرەبووكردنەوەی كەسوكاری شەهیدانی شەڕی تیرۆر».

پارەكەیان بۆ خەرج دەكرێت
سەرۆكی ئەنجومەنی نوێنەران ئاشكراشیكرد، پەسەندكردنی پڕۆژەیاسای بودجە، پەیوەندی نێوان هەرێم‌و بەغدا زیاتر بەرەو ئاسایی بوونەوەی زیاتر دەبات، لەبەر ئەوەی داواكارییەكانی برایانی هەرێم لە یاساكەدا جێبەجێكراون.
وتیشی: «لەیاسای بودجەی ئەمساڵ، بڕێك پارە بۆ پەرەپێدانی زانكۆی هەڵەبجە تەرخانكراوە».
لەبارەی قەرزی جوتیارانیشەوە، وتیشی: «لە بودجەی ئەمساڵ، سەرجەم قەرزی پارەی گەنمی جوتیاران جێی كراوەتەوەو پارەكەیان بۆ خەرجدەكرێت».
سەلیم جبوری جەنتی لەوەشكردەوە، دەبێ ئەنجومەنی نوێنەران چاودێری بارودۆخی ئابووریی هەرێمی كوردستان بكات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*