سەرەکی » راپۆرت » ئامادەكردنی: دیاری سابیر » جەزائیر پەیوەندییە دیلپۆماسییەكانی لەگەڵ مەغریبدا پچڕاند

جەزائیر پەیوەندییە دیلپۆماسییەكانی لەگەڵ مەغریبدا پچڕاند

دوای چەند دەیەیەك لە گرژیی نێوانیان ‌و تۆمەتباركردنی بەرپرسانی مەغریب بە سیخوڕیكردن بەسەر بەرپرسانی وڵاتەكەیەوە ‌و پشتیوانیی جوداخوازەكان ‌و تێوەگلان لە ئاگری دارستانەكانی ئەم دواییەی جەزائیردا، حكومەتی جەزائیر پەیوەندییە دیپلۆماسییەكانی لەگەڵ حكومەتی ریباتدا پچڕاند. حكومەتی ریباتیش هەموو تۆمەتەكانی جەزائیر رەت دەكاتەوە ‌و سعودیەش داوای ئاساییكردنەوەی دۆخەكە دەكات.

پێداچوونەوە بە پەیوەندییەكانیدا
لە كۆنگرەیەكی رۆژنامەوانیدا، وەزیری دەرەوەی جەزائیر رایگەیاندووە: وڵاتەكەی بڕیاریداوە پەیوەندییە دیپلۆماسییەكانی لەگەڵ مەغریبدا بپچڕێنێت ‌و لە رۆژی سێشەممەی رابردووەوە، بڕیارەكە چۆتە بواری جێبەجێكردنەوە.

روونیشیكردۆتەوە: بەهۆی كارە دوژمنكارییە بەردەوامەكانی بەرپرسانی مەغریب لە دژی وڵاتەكەیان، ئەو بڕیارەیان داوە ‌و جەزائیر بە هەموو شێوەیەك رەتی دەكاتەوە ملكەچی ئەو جۆرە رەفتارانە بێت كە مەغریب پەیڕەویان دەكات ‌و بەتوندی ئیدانەیان دەكات.

وەزیری دەرەوەی جەزائیر باسی لەوەشكردووە: مەغریب پاڵپشتیی ئەو گروپانە دەكات، كە لە ناوچە خێڵەكییەكانی وڵات داوای ئۆتۆنۆمی دەكەن ‌و هەروەها ریبات سیخوڕی بەسەر بەرپرسانی جەزائیرەوە كردووە ‌و ئەوەش لەگەڵ بەڵێننامە ئیمزاكراوەكانی نێوان هەردوو وڵات یەكانگیر نابێت، بەتایبەتی ئەوەی پەیوەندیی بە بیابانی خۆرئاواوە هەیە. وتیشی: مەغریب هاوئاهەنگییەكی زۆری لەگەڵ دوو گروپدا هەیە، كە لە سووتاندنی رووبەرێكی زۆری دارستانەكانی وڵاتدا تێوەگلاون.

رۆژی چوارشەممەی رابردووش، جەزائیر بڕیاریدا پێداچوونەوە بە پەیوەندییەكانی لەگەڵ مەغریبدا بكات، كە تۆمەتباری كرد بە تێوەگلان لە سووتانی رووبەرێكی زۆر لە دارستانەكانی جەزائیردا، بەوەی چەند گروپێك ئەو كارەیان كردووە، كە ریبات پاڵپشتییان دەكات.

مەغریب: تۆمەتەكان بێ پاساون
دوای راگەیاندنی جەزائیر بە پچڕاندنی پەیوەندییە دیپلۆماسییەكانی لەگەڵ مەغریب، حكومەتی ریبات نیگەرانی خۆی دەربڕی ‌و رایگەیاند: بڕیارەكە بێ پاساوە ‌و رەتیكردەوە، لە هەمان كاتدا جەختیكردەوە، كە بەردەوام دەبن لە پێشخستنی پەیوەندیی دروست ‌و بنیاتنەر لەگەڵ وڵاتانی ناوچەكەدا ‌و بڕیارەكەی جەزائیریشی بە تاكلایەنە ناوبرد.

حكومەتی ریبات جەختیشیكردۆتەوە: مەغریب هەمیشە وەكو هاوبەشێكی متمانەپێكراو و دڵسۆزی گەلی جەزائیر دەمێنێتەوە.

سعودیە: رێگەی دیالۆگ ‌و دیپلۆماسی بگیرێتەبەر
لای خۆشیەوە، عەرەبستانی سعودی نیگەرانی خۆی لە دۆخەكە دەربڕی ‌و داوای لە هەردوو وڵات كرد، پەیوەندییەكانیان ئاسایی بكەنەوە.

وەزارەتی دەرەوەی سعودیە رایگەیاند: لەپێناوی چارەسەركردنی كێشە و ناكۆكییەكان ‌و هەڵدانەوەی لاپەڕیەكی نوێ، پێویستە رێگەی دیالۆگ ‌و دیپلۆماسی بگیرێتەبەر ‌و ئومێدیشی خواست كە لە زووترین كاتدا، پەیوەندییە دیپلۆماسییەكانی نێوان جەزائیر ‌و مەغریب بگەڕێتەوە دۆخی پێشووی.

چەند هۆكارێك
پەیوەندییەكانی نێوان جەزائیر ‌و مەغریب لەبەر چەند هۆكارێك چەند دەیەیەكە ئاڵۆزە، لە گرنگترین هۆكارەكانیش، پرسی بیابانی خۆرئاوا ‌و سنووری داخراوی نێوان ئەو دوو وڵاتەیە لە ساڵی 1994 ەوە. هەروەها جەزائیر پاڵپشتی لە بەرەی پۆلیساریۆ دەكات، كە داوای سەربەخۆیی بیابانی خۆرئاوا دەكات، لە كاتێكدا حكومەتی ریبات ئەو ناوچەیە بە بەشێك لە خاكی مەغریب دادەنێت.

ساڵی 1976یش، دوای داننانی جەزائیر بە دروستبوونی كۆماری عەرەبی دیموكراتیی بیابان، مەغریب پەیوەندییەكانی خۆی لەگەڵ جەزائیر پچڕاند، تا ساڵی 1988 بە نێوەندگیریی سعودیە، پەیوەندییەكانیان ئاسایی كردەوە.

سەرچاوە: ئاژانسەكان

 223 جار بینراوە