سەرەکی » ئەدەب و هونەر » ره‌یمۆند كارڤه‌ر: پێویسته‌ چیرۆك هه‌ندێ شت روون بكاته‌وه

ره‌یمۆند كارڤه‌ر: پێویسته‌ چیرۆك هه‌ندێ شت روون بكاته‌وه

بۆ نووسینی به‌شی كۆتایی چیرۆكێك، پێویسته‌ نووسه‌ر هه‌ستێكی دراماتیكی هه‌بێت. ناكرێ به‌شێوه‌یه‌كی په‌رجووئاسا كۆتایی پێبهێنیت. كارڤه‌ر، به‌شێوه‌یه‌كی گشتی كاره‌كته‌ره‌كانی له‌ شوێنی كاری ئه‌مریكای ناوه‌ڕاست، ژیانی سۆزدارانه‌یان، یاخود خۆپه‌رستییان و ئه‌و كه‌سایه‌تییانه‌ی رووبه‌ڕووی هه‌ڕه‌شه‌ی هه‌مه‌جۆر بوونه‌ته‌وه‌ هه‌ڵده‌بژێرێت. بۆ هه‌مووشیان ساتێك دێت كه‌ ناچارن به‌ره‌وڕووی حه‌قیقه‌ت ببنه‌وه‌. به‌هیچ شێوه‌یه‌ك هه‌ڵه‌مان نه‌كردووه‌ ئه‌گه‌ر بڵێین: تێگه‌یشتن و روونكردنه‌وه‌ له‌ هه‌ستی ئاشكراكردن، «نه‌خۆشی» ئازارچه‌شتن، سه‌رنجڕاكێشیی له‌ نووسینی بێ كه‌موكوڕی و ناسكی كارڤه‌ر سه‌خته‌، كه‌ هۆكاره‌كانیان ده‌به‌ستێته‌وه‌ به‌ مه‌حاڵ و له‌گه‌ڵ ئه‌وه‌شدا ده‌ره‌نجامه‌كه‌ی زۆر باش پێكاوه‌. رسته‌كان له‌ چیرۆكه‌كانی كارڤه‌ردا روون و راسته‌وخۆن. نووسه‌ر ده‌ڵێت:»پێویسته‌ رسته‌كان له‌ باتی ئه‌وه‌ی له‌سه‌ر رۆڵگێڕه‌كه‌ خه‌یاڵشكان دروست بكات، ده‌بێ هه‌ستێكی پڕ سیحری لا به‌جێبهێڵێت.»

سازدانی: كڵاودی گریماڵ

لە تورکییەوە: فه‌رهاد چۆمانی

* له‌جیاتی رۆمان نووسینی كورته‌ چیرۆكت هه‌ڵبژارد، هۆكاره‌كه‌ی چییه‌؟

زۆرگه‌نج بووم، له‌ ته‌مه‌نی هه‌ژده‌ ساڵیدا بووم ژیانی هاوسه‌ریم پێكهێنا. ژنه‌كه‌م حه‌ڤده‌ ساڵان بوو و دووگیان بوو. نه‌داربووم، ناچار بووم كار بكه‌م و بژێوی ژیانی خێزانم و منداڵه‌كانم دابین بكه‌م. له‌ پاڵ ئه‌مه‌شدا بۆ ئه‌وه‌ی بزانم ده‌بێ چۆن بنووسم پێویست بوو بچمه‌ زانكۆ بخوێنم، بۆیه‌ نه‌مده‌توانی ده‌ست به‌ نووسینێك بكه‌م، كه‌ دوو سێ ساڵم ببات. زۆرم له‌ خۆم ده‌كرد بۆ نووسینی شیعر و كورته‌ چیرۆك. له‌سه‌ر مێز داده‌نیشتم و به‌ یه‌كجار ئه‌وه‌ی ده‌ستمپێده‌كرد ته‌واوم ده‌كرد.

*خۆت وه‌ك شاعیرێكی باش یان چیرۆكنووسێكی باش ده‌بینی؟

به‌ چیرۆكه‌كانم ناودارترم، به‌ڵام شیعرم خۆشترده‌وێ. چی په‌یوه‌ستییان ده‌كاته‌وه‌؟ ره‌نگه‌ كورتبڕی هه‌ردووكیان بێت. هه‌ردووكیان به‌هه‌مان شێوه‌ ده‌نووسم ده‌توانم بڵێم ده‌ره‌نجامه‌كه‌شیان هه‌ر وه‌ك یه‌كه‌. جیاواز له‌ رۆمان، له‌ شیعر و چیرۆكدا تاكه‌ زمانێك و پڕ هه‌ستی هه‌یه‌. وه‌ك هه‌میشه‌ ده‌یڵێمه‌وه‌ له‌ چاوی چیرۆك و رۆمانه‌وه‌، كورته‌چیرۆك و شیعر زۆر له‌ یه‌كترییه‌وه‌ نزیكن.

*له‌باره‌ی دۆزینه‌وه‌ی فیكریش بۆچوونت به‌هه‌مان شێوه‌یه‌؟

ئاه، فیكر، پێموانییه‌ شیعر و چیرۆكه‌كانم له‌سه‌ر فیكرێك بیناكرابن. فیكره‌كان له‌ چیرۆكه‌كان پێكدێن، نه‌ك چیرۆكه‌كان له‌ فیكر پێكهاتبن.

*خۆت له‌ نێو كامه‌ ده‌سته‌ و نه‌ریتی شیعرده‌بینیته‌وه‌؟

با سه‌رنج بده‌ین. حه‌زم به‌ كاره‌كانی واڵاس ستیڤنسه‌. ولیه‌م كارڵۆس ویلیامز و رۆبه‌رت فۆرستم به‌دڵه‌. هه‌ریه‌كه‌ له‌ گاڵوه‌ی كینڵ، و.س. مه‌روین، تێد هیوس، چ. ك. ویلیامز و رۆبه‌رت ئاس له‌نێو لیستی ناوی ئه‌و شاعیرانه‌ن له‌م سه‌رده‌مه‌دا جێی په‌سندی منن. ئێستا له‌ ئه‌مریكا له‌ شیعر و په‌خشاندا، به‌ تایبه‌ت له‌ نێو نووسه‌رانی كورته‌چیرۆكدا شۆڕشێك به‌رپاكراوه‌.

* ئه‌گه‌ر بۆ نموونه‌ش بێت، كام نووسه‌رانه‌؟

ئێستا له‌ ئه‌مریكا زۆر ده‌قی باش بڵاوده‌بنه‌وه‌. سه‌رده‌مێكی زێڕینه‌ بۆ نووسه‌ران. زۆر توانای گه‌نجمان هه‌ن. هه‌ڵبژارده‌یه‌كم له‌ باشترین كورته‌چیرۆكی ئه‌مریكا 1986 ئاماده‌ كردووه‌ و نووسه‌ری وه‌هام كه‌شفكردووه‌، تاوه‌كو ئێستا ناویم نه‌بیستووه‌، به‌ڵام تا بڵێی توانای باشن. له‌ نێو ئه‌و نووسه‌رانه‌ی سه‌رسامم پێیان: ریچارد فۆرد، نووسه‌ری پله‌ یه‌كه‌ تۆبیاس وۆڵف، ژینێ ئان فلیپس، ئان بێتی، باری هانا، گریس په‌یڵی، هارۆڵد برۆدكێی، به‌ چیرۆكه‌ دیاریكراوه‌كانییه‌وه‌ جۆن ئه‌بدایك و جۆیس كارۆل ئۆتس هه‌ن. هه‌روه‌ها نووسه‌ره‌ زۆر گه‌نجه‌كه‌مان كه‌ زۆر چیرۆكه‌كانیانم به‌دڵه‌ ئێمی هێمپڵ و ریچارد یاتیس، كه‌ له‌ ده‌یه‌ی په‌نجاكان (ی سه‌ده‌ی رابردوو) له‌ فه‌ره‌نسا ژیاوه‌.

* بیر له‌وه‌ ده‌كه‌یته‌وه‌ چیرۆك بنووسیت؟

به‌ڵێ، ئێستا ئیتر نه‌ك ته‌نیا چیرۆك، هه‌رچی بخوازم ده‌توانم بنووسم، ده‌توانم رۆمانیش بنووسم، گرێبه‌ستێكم هه‌یه‌ بۆ نووسینی كۆمه‌ڵه‌چیرۆكێكی تر. زۆربه‌یانم نووسیووه‌، دوای ئه‌وه‌ بزانم چی ده‌بێت، دوای نووسینی كۆمه‌ڵه‌چیرۆك هه‌موان داوای نووسینی رۆمانم لێده‌كه‌ن. دواكارییه‌كی زۆر هه‌یه‌. بگره‌ بۆ نووسینی رۆمان پاره‌ی پێشه‌كیشم قبووڵ كرد، به‌ڵام دیسانه‌وه‌ هه‌ر كورته‌چیرۆكم نووسی. نازانم، بیر له‌وه‌ ده‌كه‌مه‌وه‌ چیرۆكێك بنووسم دواتر ببێته‌ رۆمانێك، به‌ڵام هه‌ست به‌ هیچ ناچارییه‌ك ناكه‌م كه‌ بڵێم هه‌ر ده‌بێ رۆمان بنووسم. چیم بوێ ئه‌وه‌ ده‌نووسم. دڵخۆشم به‌ ئازادییه‌كه‌ی ئێستام. شیعر و په‌خشانم نووسین، له‌باره‌ی مامۆستاكه‌م جۆن گاردنه‌ر، هه‌روه‌ها باوكم، وه‌ ساڵی 1977 له‌باره‌ی ده‌ستبه‌رداربوونم له‌ به‌دمه‌ستیمه‌وه‌ نووسیم. ئێستا ده‌زگای چاپه‌كه‌م زۆر لێم رازین. فرۆشی چیرۆكه‌كانم زۆر باشه‌.

*پێتوایه‌ له‌ نێوان یه‌كه‌م كتێب و تازه‌ترین كتێبتدا جیاوازی له‌ شێوازی نووسینتدا هه‌یه‌؟

به‌ڵێ، زۆریش. ئیتر ده‌نووسم بوێرانه‌تر ده‌نووسم. له‌ كتێبی دووه‌ممدا «كاتێك باسی عه‌شق ده‌كه‌ین ده‌خوازین باس له‌چی بكه‌ین» چیرۆكه‌كان كورت، چڕتر و بێ هه‌ستتر بوون. له‌ دوایین كتێبیشمدا كاتێدراڵ چیرۆكه‌كانم درێژتر، پڕتر، به‌هێزتر، پێشكه‌وتووتر و هیوادارترن.

* ئه‌مه‌ شتێكه‌ به‌ مه‌به‌ست وات كردووه‌؟

نه‌خێر، به‌مه‌به‌سته‌وه‌ وام نه‌كردووه‌. هیچ به‌رنامه‌ڕێژییه‌كم بۆی نه‌بووه‌، ته‌نیا هه‌لومه‌رجی ژیانم گۆڕاوه‌. وازم له‌ خواردنه‌وه‌ كهولییه‌كان هێناوه‌ و ره‌نگبێ ئێستا هیوادارتربم. واپیر ده‌بم. ده‌زانم، پێموایه‌ كه‌ گۆڕانی نووسه‌رێك، به‌ره‌وپێشچوونێكی سروشتیانه‌ی زۆر گرنگه‌. به‌ڵام ئه‌مه‌ بڕیارێك نییه‌ بیده‌یت، قۆناغێكه‌ خۆكارانه‌ به‌دیدێت. هه‌ر بۆیه‌ كاتێك كتێبێك ته‌واو ده‌كه‌م، جگه‌ له‌ شیعر و په‌خشان بۆ ماوه‌ی شه‌ش مانگ هیچ شتێكی تر نانووسم.

* كاتێك چیرۆكه‌كانت ده‌نووسیت وه‌ك پێكهێنه‌ری یه‌كانگیرییه‌ك ده‌یاننووسیت، یاخود به‌جیاواز بیریان لێ ده‌كه‌یته‌وه‌ و ده‌یاننووسیت؟

وه‌ك پێكهێنه‌ری یه‌كانگیرییه‌ك ده‌یاننووسم. چیرۆكه‌كان ده‌نووسم، هه‌ر خۆشیان وه‌ك هاوئاهه‌نگییه‌ك شێوه‌ده‌گرن. ده‌ڵێن گفتوگۆكانیش باشن. پێموایه‌ مرۆڤه‌كان وه‌ك چۆن من ده‌نووسم ئاوا قسه‌ ده‌كه‌ن. واته‌ هاوشێوه‌ی هه‌مه‌نگوای.

*په‌سندكراوترین چیرۆكه‌كانت لای خۆت كامانه‌ن؟

«كاتێدراڵ»، «بچووك، شتێكی باش» وای لێ هاتووه‌ زۆر چیرۆك هه‌یه‌ زۆرم خۆشناوێن به‌ڵام نایدركێنم كامانه‌ن. ده‌مه‌وێ بژارده‌یه‌ك له‌ چیرۆكه‌كانم بڵاوبكه‌مه‌وه‌، به‌ڵام به‌ دڵنیاییه‌وه‌ ئه‌وه‌ هه‌موو چیرۆكه‌كانم له‌خۆ ناگرێت.

*ده‌ته‌وێ به‌ زمانی ئاخێوه‌رانی ئه‌مریكا بنووسیت؟

بێگومان. ده‌گوترێ سه‌رباركردنی گفتوگۆكان شتێكی باشه‌. پێموایه‌ مرۆڤه‌كان وه‌ك چۆن من ده‌نووسم ئاوا قسه‌ ده‌كه‌ن. واته‌ هاوشێوه‌ی هه‌مه‌نگوای. ده‌گوترێ ئه‌ویش گوێچكه‌یه‌كی باشی هه‌یه‌، به‌ڵام هه‌رچی نووسیویه‌تی له‌ داهێنانی خۆیه‌تی. هه‌رگیز مرۆڤه‌كان ئاوا قسه‌ ناكه‌ن. ئه‌مه‌ په‌یوه‌سته‌ به‌شێوازه‌وه‌.

* گرنگی زیادكردنی ئاخاوتن و گفتوگۆكان بۆ نێو چیرۆكه‌كانت سوودی چییه‌؟

گرنگه‌، چونكه‌ پێویستی به‌ به‌ره‌وپێشبردنی چنینی رووداو و نیشاندانی كاره‌كته‌ره‌وه‌ هه‌یه‌. حه‌ز به‌ ئاخاوتنی مرۆڤی ناپێویست ناكه‌م، به‌ڵام حه‌ز به‌گفتوگۆی ئه‌و مرۆڤانه‌ ده‌كه‌م كه‌ گوێ له‌یه‌كتری ناگرن.

*ده‌توانیت كه‌مێكیتر باس له‌ تێمای چیرۆكه‌كانت بكه‌یت؟

پێویسته‌ نووسه‌رێك شتی گرنگ له‌و باره‌یه‌وه‌ باس بكات. وه‌ك خۆتان ده‌زانن ماوه‌ی پانزه‌ ساڵ له‌ زانكۆ وانه‌م گوتووه‌ته‌وه‌. له‌وێ سه‌رقاڵی چه‌ند كارێكی تریش بووم، به‌ڵام تاكه‌ یه‌ك چیرۆكیشم له‌باره‌ی ژیانی زانكۆوه‌ نه‌نووسی. چونكه‌ ئه‌زموونێك نه‌بوو ئاسه‌وارێك له‌سه‌ر ژیانی سۆزداریم به‌جێبهێڵێت. من زیاتر ئه‌وه‌ په‌سه‌ند ده‌كه‌م به‌ كاتدا بگه‌ڕێمه‌وه‌ و له‌باره‌ی ئه‌و كه‌سانه‌وه‌ بنووسم له‌ ده‌ورانی گه‌نجیمدا ناسیومن و كاریگه‌رییه‌كی گه‌وره‌یان له‌سه‌رم به‌جێهێشتووه‌.

*چۆن چیرۆكه‌كانت ده‌نووسیت و به‌یه‌كه‌وه‌ (له‌ كتێبێكدا) كۆیانده‌كه‌یته‌وه‌؟

بۆ نووسینی به‌شی كۆتایی چیرۆكێك، پێویسته‌ نووسه‌ر هه‌ستێكی دراماتیكی هه‌بێت. ناكرێ به‌شێوه‌یه‌كی په‌رجووئاسا كۆتایی پێبهێنیت. زۆرجار كاتێك چاو به‌چیرۆكێكدا ده‌خشێنیته‌وه‌ كۆتاییه‌كه‌ی ده‌بینیت. پانزه‌ بیست جار به‌چیرۆكه‌كانمدا ده‌چمه‌وه‌. چاك كاری جیاواز جیاواز له‌ زه‌ینمدا فۆرمه‌ڵه‌ ده‌بن. جاران شتی وام نه‌ده‌كرد. ئێستا به‌هۆی كۆكه‌ره‌وه‌ی كتێبه‌كانه‌وه‌ واده‌كه‌م. حه‌زم به‌وه‌یه‌ نووسین كارێكی فیزیكییه‌. هه‌ڵه‌بڕم نییه‌، به‌ڵام سكرتێرێكم هه‌یه‌ ده‌قی پاك و راستكراوم پێده‌داته‌وه‌. دواتر دووباره‌ پێیاندا ده‌چمه‌وه‌. تۆڵستۆی حه‌وت جار شه‌ڕ و ئاشتی نووسی و تا دوایین ساتی به‌ر له‌ چاپبوونی به‌رده‌وام پێیدا ده‌چووه‌وه‌.

* كه‌وابێ كه‌ریواك په‌سه‌ند ناكه‌ی، كه‌ كتێبی «به‌ڕێگه‌وه‌«ی وا نووسیوه‌ به‌جارێك له‌ پشتی تابیعه‌كه‌وه‌ دانیشتووه‌ به‌بێ ئه‌وه‌ی هیچ پشوو بدات، گوایه‌ به‌ دانیشتنێك له‌سه‌ر به‌سته‌ كاخه‌زێكی درێژ نووسیویه‌تی؟

به‌ڵێ، به‌ڵام زۆر حه‌ز به‌كتێبی به‌ڕێگه‌وه‌ ده‌كه‌م. كتێبه‌كانی تری نا. ناخوێندرێنه‌وه‌. زۆر خراپ فۆرمه‌ڵه‌ بوون.

*ره‌نگبێ كه‌ریواك درۆی كردبێت.

به‌ڵێ، نووسه‌ره‌كان درۆزنی گه‌وره‌ن.

*ئه‌ی ئێوه‌؟

ئای خودایه‌، نه‌خێر، من درۆزن نیم. تاكه‌ ریزپه‌ڕم له‌ نێویاندا. به‌دڵنیاییه‌وه‌ زۆرشت له‌ هه‌مه‌نگوای، به‌ تایبه‌ت یه‌كه‌م كتێبییه‌وه‌ فێربووم. ئه‌گه‌ر به‌و به‌راورد بكرێن شانازی به‌خۆمه‌وه‌ ده‌كه‌م.

* كام نووسه‌ر سه‌رنجت راده‌كێشێت؟

كاتێك وانه‌م ده‌گوته‌وه‌ ئه‌و نووسه‌رانه‌ی حه‌زم له‌ نووسینه‌كانیان بوو و هه‌روه‌ها سوودیان بۆم هه‌بوو، ئه‌وانم هه‌ڵده‌بژاردن. له‌ فلۆبێرت نامه‌ و چیرۆكه‌كانی موپاسان (له‌باره‌ی ئه‌وه‌وه‌ شیعرێكم نووسیوه‌ «Ask Him») چیخۆف، فلانه‌ری ئۆكانه‌ر، ویڵیه‌م گاز رۆمان و نووسینه‌ ره‌خنه‌ییه‌كانیان، یودۆرا وێلتی…

*زۆر له‌گه‌ڵ هه‌مه‌نگوای به‌راورد ده‌كرێن؟

زۆرم هه‌مه‌نگوای خوێندووه‌ته‌وه‌. كاتێك له‌ ته‌مه‌نی 19-20 ساڵاندا بووم هێنده‌یم خوێنده‌وه‌، وای لێ هاتبوو هه‌مه‌نگوای بۆ من بووبووه‌ به‌شێك له‌هه‌ر شتێك. ئه‌و كات فۆكنه‌ریشم ده‌خوێنده‌وه‌، به‌ڵام ئه‌و زیاتر سه‌رنجی راده‌كێشام. بێگومان زۆرشت له‌ هه‌مه‌نگوایه‌وه‌، به‌تایبه‌ت له‌ نووسینه‌ به‌راییه‌كانییه‌وه‌ فێربووم. ئه‌گه‌ر به‌ هه‌منگوای به‌راورد بكرێم، شانازییه‌ بۆ من. پێموایه‌ رسته‌كانی هه‌مه‌نگوای شیعرین. سازان و ئاهه‌نگێكیان تێدایه‌. چه‌ندینجار چیرۆكه‌كانیم خوێندۆته‌وه‌ و هه‌ر جارێك وه‌ك ئه‌وه‌ی یه‌كه‌مجار بێت خوێندبێتمه‌وه‌، ئاوا چێژم لێ وه‌رگرتووه‌. ئێستاش وه‌ك جاران گڕم ده‌دا. نووسه‌رێكی بێ وێنه‌یه‌. هه‌مه‌نگوای ده‌ڵێت: «په‌خشان بیناسازییه‌ و له‌ سه‌رده‌می بارۆك كۆتایی پێهات.» فلۆبێرتیش ده‌ڵێت: «وشه‌كان هاوشێوه‌ی ئه‌و به‌ردانه‌ن كه‌ دیوارێك دروستده‌كه‌ن.» ئه‌م بۆچوونه‌ی فلۆبێرتیش وه‌خته‌ بڵێم هه‌مان شته‌ كه‌ هه‌مه‌نگوای گوتوویه‌تی. من بڕوام به‌وه‌ هه‌یه‌ ئه‌و نووسه‌رانه‌ی وشه‌كانیان هیچ مانایه‌ك نابه‌خشن و به‌ ده‌ست ناگیرێن حه‌ز به‌نووسینه‌كانیان ناكه‌م. پێویسته‌ چیرۆك هه‌ندێ شت روون بكاته‌وه‌، به‌ڵام هه‌موو شتێك نا. پێویسته‌ چیرۆك سیحر و رازێكی هه‌بێت. نه‌خێر، مه‌به‌ستم ئه‌وه‌ نییه‌ خوێنه‌ر تووشی خه‌یاڵشكان ببێت، به‌ڵام ئه‌وه‌ش راستییه‌كه‌، كه‌ چاوه‌ڕوانییه‌كم دروستكردووه‌ و دواتریش ئه‌و چاوه‌ڕوانییه‌ وه‌ك خۆی نه‌یه‌ته‌ دی.

*به‌ڵام تۆ زۆر پڕ راز ده‌نووسی و هه‌رگیز ئه‌وه‌ ده‌رناخه‌ی كه‌ ئه‌وان چین و چیان به‌سه‌ر دێت. ئه‌مه‌ش واده‌كات خوێنه‌ر تووشی خه‌یاڵشكان بێت. با باس له‌ ناپه‌یوه‌ستیی كۆتایی چیرۆكه‌كانت بكه‌ین. خوێنه‌ره‌كانت تووشی خه‌یاڵشكان ده‌كه‌ن.

خۆشم دڵنیانیم له‌وه‌ی داخۆ ده‌زانم چۆن چیرۆكم نووسیون یان نا. ته‌نیا ده‌نووسم. به‌رنامه‌یه‌كم نییه‌. نووسه‌ری وا هه‌ن ده‌زانن ده‌بێ حه‌كایه‌تێك فۆرمه‌ڵه‌ بێت، بگاته‌ ئاستێكی به‌رز، ئه‌وان ئاوا باسی ده‌كه‌ن. به‌ڵام نازانم چی ده‌كه‌م. ته‌نیا هه‌وڵ ده‌ده‌م ئه‌وه‌ی ده‌مه‌وێ به‌باشترین شێوه‌ بنووسم.

*پێت وایه‌ كه‌ له‌ چیرۆكه‌كانتدا گرنگیت به‌چاودێری كردن داوه‌؟ به‌ زۆری ئه‌و كاره‌كته‌رانه‌ هه‌ڵده‌بژێریت كه‌ چاودێری مرۆڤه‌كانی تر ده‌كه‌ن، ئه‌وانه‌ی به‌ ژیانی دراوسێكانیان كاریگه‌رن؟

راست ده‌كه‌ن. ده‌كرێ بڵێین هه‌موو چیرۆكه‌كانم وه‌هان. هه‌ر خۆی نووسین گوتنی ئه‌و شتانه‌یه‌ كه‌ نه‌گوتراون.

* له‌ چیرۆكه‌كانتدا سێكس شتێكی ئاساییه‌، یاخود چێژ و خرۆش له‌وه‌ وه‌رده‌گرێت كه‌ چاودێری ژیانی تایبه‌تی كه‌سانی تر بكات؟

ئه‌وه‌ی راستی بێت زۆر سێكس له‌ چیرۆكه‌كانمدا نییه‌، به‌ڵام راسته‌. له‌و شوێنانه‌ی هه‌یه‌ كه‌وتووه‌ته‌ پشت شانۆی دیمه‌نه‌كانه‌وه‌ و وه‌ك شتێكی میكانیكی نمایشكراوه‌.

سه‌رچاوه: ‌ https://oggito.com/

 209 جار بینراوە