سەرەکی » راپۆرت » سڵاوی پێشمەرگە دێرینەكان بۆ شەهیدانی كوردستان

سڵاوی پێشمەرگە دێرینەكان بۆ شەهیدانی كوردستان

راپۆڕت/ رێزە حسێن

لە رۆژی شەهیدانی یەكێتیی نیشتمانیی كوردستاندا، پێشمەرگە دێرینەكان دروود بۆ گیانی پاكی هاوڕێ و هاوسەنگەرانیان دەنێرن كە لە کایەی خەبات و تێكۆشاندا گیانی خۆیان بەخشی بە كوردستان، هەر وەك ئاماژەیان بەوە دەدا كە ئازادیی ئەمڕۆی كوردستان، بەرهەمی خوێنی شەهیدانە، بۆیە خزمەتكردنی كەسوكاریان، لەسەر حزبەكەیان بە ئەرك وەسفكرد.

سڵاو لە رۆحی شەهیدان
عەمید نەوزاد پێشمەرگەی دێرینی یەكێتیی نیشتمانیی كوردستان لە رۆژی شەهیدانی یەكێتیدا، تایبەت بە كودستانی نوێ وتی: دروود و سڵاو بۆ هەموو شەهیدانی كوردستان، هەروەك شەهیدان، خاوەن رێباز و دڵسۆزیی راستەقینەبوون، بۆیە ئەركە لەسەر یەكێتیی نیشتمانیی كوردستان كەسوكاری شەهیدان وەك بیلبیلەی چاویان بپارێزێن و خزمەتیان پێشكەش بكرێت بە شێوەیەك لە ئاست گەورەیی و پیرۆزیی خوێنی شەهیدەكانیاندا بێت، ئەو پێشمەرگە دێرینە بە هاوڕێ شەهیدەكانی راگەیاند؛ رۆژتان شاد، كاتی خۆی بەڵێن وابوو هەركات دەسەڵاتمان هەبوو، خەبات و شۆڕش كوردی گەیاندە سەر كورسی دەسەڵات، بەباشی خزمەتی جوتیاران و رەنجدەرانی کوردستان بكەین، بەڵام جێگەی داخە، وەك پێویست ئەو بەڵێنییەمان جێبەجێ نەکرد، هاوكات دەڵێم: « ئەوەی تا ئێستا بۆ كەسوكاری شەهیدان كراوە، لە ئاستی گەورەیی و پیرۆزی خوێنی شەهیداندا نەبووە»، چونكە ئەوان لە رۆژێكدا گیانی خۆیان بەختكردووە كە تروسكایی نەبووە، بۆیە دەبێت ئەمڕۆ نەوەكانیان، بەرهەمی خەباتی شەهیدەكانیان بدوورنەوە.

پێشمەرگە دێرینەكان، بۆ هاوڕێیانی رۆژی خەبات و گیانی فیدایی كوردستان، بە كۆی دەنگ بۆچوونیان وابوو كە تا دڵۆپێ خوێن لە گیانیاندا هەبێت، لە خەبات بەردەوام دەبن و درێژە پێدەری رێگەی شۆڕشگێڕیی و بەرخودانی هاوڕێ شەهیدەكانیان دەبن، هەروەك ئەوان بەپاكی رێگەی خەبات دەبڕن تا دوا هەناسەی ژیانیان، هاوكات بە كۆی دەنگ لە رۆژی شەهیدانی یەكێتیدا ئەو سروودەیان دووبارە دەكردەوە كە دەڵێت:

سڵاوی گەرمی دڵی پڕ هومێدی مەت پێشكەش
پڵنگی هەردی وڵات
ئەی هەڤاڵی پێشمەرگە
لە دەوری دەست و تفەنگت گەڕێم
كە رۆژی خەبات
لە ئاستی هەڵمەتی تیژت
چ ناگرێ بەرگە،
ئەوێستە تۆی لە شەوی تار،
مۆمی هەڵگیرساو
لە نێو دڵی شەوە زەنگا،
وەكو گڕێك راساو
كە راتشەكاندووە ئاڵا
بەدەستی خاراوت
دەدەی لە كۆسپ و بواران
بە هەستی پاراوت

داستانی 17 شەهیدەكەی قڕگە
لە بەرامبەر ئاماژە و وتارەكانی حزبی بەعسی رووخاو، لە ژێر ناوی» هیچ پێشمەرگەیەك لە ناو خاكی كوردستان نەماوە، هەموویان خامۆشكراون»، هاوكات وەك بەرپەرچدانەوەیەك، لە ساڵی 1983 دا، پەنجا پیشمەرگەی یەكێتیی نیشتمانیی كوردستان، بە مەبەستی چالاكی و گورز وەشاندن لە حزبی بەعس، دادەبەزنە ناو شاری سلێمانی، بەڵام مەخابن دوای ئەنجامدانی چەندین چالاكی و زەبر گەیاندن بە دامودەزگاكانی حزبی بەعس لەناو شارەكە، لە كاتی گەڕانەوەیاندا یەكێك لە مەفرەزەكانی یەكێتی، دەكەونە بۆسەی هێزەكانی بەعسەوە و 17 پێشمەرگەیان لێ شەهید دەكرێت.

فەریدون قادر، وەك یەكێك لە رزگاربووان و هاوڕێی 17 شەهیدەكەی قڕگە لە شاری سلێمانی لەو بارەیەوە بۆ كوردستانی نوێ وتی: رێچكەم، هەمان رێیە كە هاوڕێ شەهیدەكانم خوێنی خۆیان لە پێناویدا بەختكردووە، سڵاو لە گیانی 17 شەهیدەكە و هەموو شەهیدانی رێگەی رزگاری، راشیگەیاند؛ وەك پێشمەرگەیەكی دێرێن، دەستی كەسوكاری هاوڕێ شەهیدەكانم ماچ دەكەم و هەمیشە سەری رێز و خۆشەویستی و وەفا لە ئاستیان دادەنەوەێنم، ئەو هاوڕێیەی 17 شەهیدەكەی قڕگە لەو بارەیەوە زیاتر دوا و ئاماژەی بەوەكرد كە ئەو تاقانەی ئەو هێزەیە كە بە برینداری رزگاری بووە لەو هێرشەی مەفرەزەكانی بەعس، هەروەك داواكاربوو لە حزبەكەی كە بە هێندەی گەورەیی خوێنی شەهیدان، خزمەتی كەسوكاریان بكرێت، دەبێت ئەوان یەکەم کەس بن لە خێرو بێری ئەم نیشتمانە سوودمەندبن، گلەیشی لەوە هەبوو كە وەك پێویست كار بۆ كەسوكارەكانی شەهیدان نەكراوە، دەبێت یەكێتیی نیشتمانیی كوردستان ئەو لایەنە بە گرنگ وەربگرێت، چونكە هەر شەهیدێك، لە دوای خۆی چەندان نەوەی بەجێهێشتووە كە هەر یەكێكیان دەبنە دەنگ و رەنگی یەكێتیی نیشتمانیی كوردستان.

دەستی كەسوكاریان ماچ دەكەن
عومەر رامبۆ وەك پێشمەرگەیەكی دێرین لە رۆژی شەهیدانی یەكێتیدا، سڵاو و رێزی ئاڕاستەی گشت هاوڕێ شەهیدەكانی دەكات، هەروەك ئاماژەی بەوەشكرد کە شەهیدان گیانی خۆیان بەخشی بۆ ئازادیی كوردستان، شەهیدان رۆحیان شادە، چونكە ئازادیی كوردستان بە خوێنی ئەوان هاتۆتەدی، هاوكات داواشی لە حزبەكەی كرد كە خزمەتی زیاتر بە كەسوكاریان بكات، چونكە ئەوان ئەمانەتی شەهیدانن و دەبێت لە سەرو هەمووانەوە خزمەتیان بكرێت، سوود لە خێر و بێری ئازادیی و سەروەت و سامانی نیشتمان وەربگرن.

یەكێتی نیشتمانی كوردستان، خاوەنی زیاتر لە 20 هەزار شەهیدە، هەروەك لە سەردەمی شاخ و شۆڕشگێڕیدا، لەكاتی چالاكی ناوشار و لەناو زیندانەكان و لەكاتی پڕۆسەی ئازادكردنی كوردستاندا، پێشمەرگە و ئەندامانی رێكسختنی ناو شار لە چالاكی و گیانیفیداكردندا گیانیان بەخشیووە و شەهیدكراوان، درود بۆ گیانی هەموو شەهیدانی رێگەی رزگاری.

كاروان ریشە پێشمەرگەی دێرین دەڵێت: » سڵاو لە رۆحی شەهیدان، ئەوان نەمرن، لە دڵی هەمواندا دەژین، بۆیە ئەركە لەسەر یەكێتیی نیشتمانیی كوردستان، خزمەتی كەسوكاری شەهیدان لە سەروو هەموانەوە بكات» ئەو پێشمەرگە دێرینە ئاماژەی بەوەشكرد كە بە پلەی یەك، كەسوكاری شەهیدان مافیان بەسەر ئەم نیشتمانەوە هەیە، بۆیە دەبێت بەشدارییان پێبکرێت لە خێروسامانی كوردستان بە هاوسەنگی، هاوكات سەری رێزو وەفام دادەنەوێنم و پێیان دەڵێم؛ لە سایەی خوێنی ئێوە، ئەم رۆژە هاتووەتە دی، بۆیە داوكارم لە كاربەدەستان هەرگێز شەهیدانیان بیرنەچێتەوە.

 272 جار بینراوە