سەرەکی » ئابووری » نرخی خانووبەرە لە كەلار لە ئاستێكی بەرزدایە

نرخی خانووبەرە لە كەلار لە ئاستێكی بەرزدایە

سەرۆكی شارەوانی كەلار ئاشكرای دەكات، دابەشنەكردنی زەوی و كەمی پڕۆژەكانی نیشتەجێبوون، هۆكاری گرانی خانووبەرەن لە سنووری قەزای كەلار، چونكە لەساڵی 2006ەوە تائێستا جگە لە كەسوكاری شەهیدان ‌و ئەنفالكراوان ‌و زیندانیانی سیاسی، زەوی بەسەر هیچ چین‌ و توێژێكی تردا دابەش نەكراوە.

ئەكرەم ساڵح، سەرۆكی شارەوانی كەلار بە کەناڵی ئاسمانیی (گەلی كوردستان)ی راگەیاندووە: كەلار شوێنێكی سنووری ‌و بازرگانییە، بۆیە نرخی زەوی‌ و خانووبەرە تیایدا بەرزە، بەڵام بەو رێژەیەش نییە كە باس دەكرێت.

وتیشی: «پلانمان هەیە شوێنی بازرگانی زیاد بكەین ‌و یەكەی نیشتەجێبوونیش بە نرخێكی گونجاو دروست بكەین، كە ئەمەش كاریگەری لەسەر دابەزینی نرخی خانووبەرە دەبێت».

هاوكات هونەر مەحمود، بەڕێوەبەری وەبەرهێنانی گەرمیان سەبارەت بە گرانی نرخی یەكەكانی نیشتەجێبوون وتی: «یاسای وەبەرهێنان‌ و رێنماییەكانی دیاریكردنی نرخ، هەروەها كەمی پڕۆژەكانی نیشتەجێبوون، هۆكارن بۆ بەرزی نرخی یەكەكانی نیشتەجێبوون لە سنوورەکەدا».

 132 جار بینراوە