سەرەکی » راپۆرت » شێڵتەرێك بۆ سەگە بێخاوەنەکان لە سلێمانی كرایەوە

شێڵتەرێك بۆ سەگە بێخاوەنەکان لە سلێمانی كرایەوە

راپۆرتی/ رێزە حسێن

لەمەودوا سەگە بەرەڵاو بێ خاوەنەکان بێلانە نابن و لە شوێنێکی تایبەت کۆدەکرێنەوە و چاودێری دەکرێن. جێگری سەرۆکی شارەوانی سلێمانیش ئاماژە بەوە دەكات رۆژانە لەلایەن تیمی تایبەتەوە، هەڵمەتی كۆكردنەوەی سەگە بێخاوەنەکان لەناو گەڕەگ و شوێنە گشتییەكان دەستپێدەكەن، دواتر دەگوازرێنەوە بۆ شێڵتەری سەگە بێلانەكان.

بڵاوبوونەوەیان زیانی بۆ هاووڵاتیان هەبوو
رۆژی 10ی كانوونی دووەم، بە ئامادەبوونی لایەنی پەیوەندیدار لە سەرۆكایەتی شارەوانی سلێمانی و بەڕێوەبەرایەتی ڤێتنەری و رێكخراوەكانی ئاژەڵدۆستان و ژمارەیەك هاووڵاتیان و دەزگاكانی راگەیاندن، لەسەر رێگای سلێمانی، عەربەت شێڵتەری سەگە بێخاوەنەکان لە شاری سلێمانی كرایەوە، ئاكۆ عەلی جێگری سەرۆكی شارەوانی سلێمانی لەوبارەیەوە تایبەت بە كوردستانی نوێ رایگەیاند، ماوەی چەند ساڵێكە دیاردەی بڵاوبوونەوەی ژمارەیەكی زۆر ئاژەڵی بەرەڵا، بەتایبەت سەگ لەناو گەڕەك و شوێنە گشتییەكاندا بەدیدەكرێت، هەروەك بەپێی راپۆرتی بەڕێوەبەرایەتی تەندروستی سلێمانی ئاماژەی پێكراوە، چەندین هاووڵاتی گەزراون لەلایەن ئەو سەگانەوە، بۆیە زۆرینەی كات شارەوانی ئاگادار دەكراینەوە تا هەستین بە چارەسەركردنی ئەو دیاردەیە و دوورخستنەوەیان لە شوێنە ئاوەدانەكان.

لەماوەی رابردوودا لیژنەیەك لە بەڕێوەبەرایەتییەكانی (شارەوانی، تەندروستی، ڤێتنەری، پۆلیس، كشتوكاڵ) پێكهێنرا، هاوكات لەلایەن شارەوانییەوە پارچەیەك زەوی دابینكرا بۆ پاركێكی ژینگەیی كە پێنج دۆنمی لێ جیاكراوەتەوە کە سیاج کراوە، دەتوانرێت چوار هەزار سەگی تێدا رابگیرێت، شێڵتەرەكە پێكهاتووە لە چوار حەقلی گەورە و ئۆفیسێك بۆ ئیدارەی شێڵتەرەكە و بەشی خزمەتگوزاری شارەوانی تێدا دەبێت و بەردەوام كارمەندان و پزیشكانی ڤێتنەری چاودێری تەندروستیان دەكەن.

سەگە بێخاوەنەكان ئازار و ئەشكەنجە دەدران
بەپێی زانیاری كوردستانی نوێ، هۆكاری بڵاوبوونەوەی ژمارەیەكی زۆری ئاژەڵی بەرەڵا لە شوێنە ئاوەدانەكاندا، دوای بڵاوبوونەوەی ڤایرۆسی كۆرۆنا دێت بۆ ماوەیەكی زۆر خەڵكی كەرەنتینەكرا و خواردن و خوارنەوەكان لە سەیرانگە و شوێنە گەشتیارییەكاندا نەما، بەو هۆكارە بۆ دەستكەوتنی خواردنی رۆژانەیان، ئاژەڵە بەرەڵاكان لەبەر برسێتی روویان كردە شوێنە ئاوەدانەكان، هەروەها لەلایەن خەڵكانی ئاژەڵدۆستەوە خواردنیان بۆ دابیندەكرا، بۆیە رۆژانە ژمارەیان و بڵاوبوونەوەیان تا دەهات زیاتری دەكرد و دەمانەوە لەو شوێنانەدا.

رووناك محەمەد وەك ئاژەڵدۆستێك بە كوردستانی نوێ وت: ئەم كارە جێگەی دەستخۆشییە، چونكە لەلایەن هەندێك خەڵكەوە، سەگە بێخاوەنەکان ئازار و ئەشكەنجە دەدران، وتیشی: چەند ساڵێكە سەربەخۆ ژمارەیەك سەگ بەخێو دەكەم و هەفتانە خواردن و خوارنەوەم بۆ دەبردن كە ژمارەیان زیاترە لە پانزە بەچکە سەگ و دایكەكەیان، هەروەك ئێستا لەگەڵ كردنەوەی ئەم شێڵتەرە، سەرجەمیانم گواستووەتەوە بۆ ئێرە تا جێگەیان بۆ بگرم.

شێڵتەری سەگە بێلانەكان، سەگی بەرەڵای تێدا بەخێو دەكرێت، تا سەگەكان پارێزراو بن لە سەرماو گەرما و برسێتی و توندوتیژی، هەروەك ئەم شێڵتەرە تەنها سەگە بەرەڵاكانی ناو شاری سلێمانی لەخۆدەگرێت، بە هیچ جۆرێك رێگە نادرێت سەگی قەزا و ناحیەكانی دەوروبەری بۆ بهێنرێت، هاوكات لە رێگەی كۆگاکانی خواردن و كوشتارگەكان و خواردنگەكانەوە، بڕی خۆراكی پێویست دابیندەكرێت بۆیان و لە رێگەی ئۆتۆمبێلی تایبەت و كارمەندانی شارەوانییەوە رۆژانە خۆراكە زیادەكان كۆدەكرێنەوە و دەبرێنە شێڵتەرەكە.

رێكخراوەكان خۆشحاڵن
بەپێی زانیاری شارەوانی سلێمانی، لە رێگەی دابینكردنی تیم و ئۆتۆمبێلی تایبەتەوە، بەپێی بەرنامە سەرجەم سەگە بەرەڵاكانی ناو شاری سلێمانی كۆدەكرێنەوە كە لەناو گەڕەگ و كۆڵانەكاندا بڵاوبوونەتەوە، لەوبارەیەوە ئاكۆ عەلی زانیاری زیاتری خستەڕوو ئاماژەیبەوەكرد، لە پلانیاندایە هەر رۆژەی بچنە گەڕەكێك بۆ كۆكردنەوەی سەگەكان و پاكیدەكەنەوە، هاوكات داوا لە هاووڵاتیان دەكەن لەو لایەنەوە هاوكاریان بن بە زانیاریدان بە بوونی سەگی بەرەڵا لە گەڕەك و شوێنەكان تا راستەوخۆ تیمەكانی شارەوانی بچن بۆ كۆكردنەوەیان و دواتر گواستنەوەیان بۆ شێڵتەری سەگە بێخاوەنەکان.

رێكخراوەكانی ئاژەڵدۆستان دروستكردنی شێڵتەرێكی هاوشێوە بە گرنگ وەسفدەكەن، بۆ پاراستنی ئاژەڵانی سەر شەقامەكان، لاڤین عەبدولوەهاب پزیشکی ڤێتەرنەری لە رێكخراوی پاكۆ لەوبارەیەوە تایبەت بە كوردستانی نوێ وتی، ئەم هەنگاوەی حكومەت و لایەنە پەیوەندیدارەكان بەرز دەنرخێنن، چونكە چارەسەری زۆرینەی كێشەكانی ئاژەڵانی سەرشەقامەكان دەكات، بەتایبەت پارێزراویان دەكات لە هێرش و ئازاردانی هەندێك كەس كە دەیان كوشتن و ژەهرخواردنیان دەكردن.

 109 جار بینراوە