سەرەکی » وتار » بارزان شێخ عوسمان‌ » یەكێتییەكان هەرگیز لە رەخنە نەترساون، رازیش نەبوون بوختانیان بۆ هەڵبەسترێت

یەكێتییەكان هەرگیز لە رەخنە نەترساون، رازیش نەبوون بوختانیان بۆ هەڵبەسترێت

سەرۆك مام جەلالی مەزن وای فێر كردوین كە نەك هەر لە رەخنە نەترسین بەڵكو فەزای رەخنە بە جۆرێك فراوان بكەین كە ئەو رەخنەیە شەخسی بەڕێزیشیان بگرێتەوە ئەگەر راست بوون ئەوا دەبێت ئەو هەڵە و كەموكورتییانە چاك بكرێن، ئەگەر تانە و پلاریش بوو ئەوە بە هەمان زمان وەڵامی بدرێتەوە و رەتبكرێتەوە. ئەو نەخشە رێگەیەی سەرۆك مام جەلال هەر لە زوەوە لە سەرەتاكانەوە پەیڕەو كراوە هەر بۆیە(ی.ن.ك) لە هەر ناوچەیەك ببێت ئازادیی و سەربەستییش لەوێیە.
ئێستاش لەسەروبەندی بانگەشەی هەڵبژاردنە پەرلەمانییەكەی عراقدا (هەندێك قەوارە لێی تێكچووە بەو نەفەسە دەستی پێكردوە كە هی پەرلەمانی كوردستانە)، زۆربەی لایەن و قەوارەكان لەسەر ئەو تەوەرە كار ئەكەن كە گوژمەكانیان لە یەكێتیی نیشتمانیی كوردستان بخۆنەوە و گوشارەكانیان بۆسەر ئەم حزبەیە و بە چاك و خراپ دایئەگرنەوە. هەریەكەیان بە ئەجیندایەك، هەریەكەیان بە قەوان و ئاوازێك قسە ئەكەن.
دیارە ئامۆژگاریی ئەو حزب و قەوارانە ناكرێت كە چیبڵێن و نەڵێن، بەڵام ئەتوانرێت بە هەڤاڵانی یەكێتییەكەی مامی خۆمان بوترێت ئێوە هەم نەكەن بچنە ئەو ئاستەی كە ئەو لایەنانە گرتویانتە بەر، هەم بە چەكی بیروباوەڕو متمانە بە خۆبوون، بە سیاسەتە دێرینەكەی مامی گەورەمان بە پشت بەستن بە خۆ بەرەنگاری ئەو جەنگە دەروونییە ببنەوە.
زۆر ئاساییە (ی.ن.ك) وەك هەر حزبێكی سیاسیی لەم سەرزەمینەدا هەڵەو كەموكورتیی لێكدانەوەی هەڵەی هەبێت، گۆڕانێكی سیاسیی بە باشی هەڵنەسانگاندبێت و هی تریش، ئەمە ئەبێت پێش هەر كەسێك سەركردایەتیەكەی بە جەماوەرەكەی بڵێت و راشكاوانە بیخاتەڕوو كە لە هەنگاونانی یەك و دووی پەیوەست بە فڵانە بڕیاردا سەركەوتوو نەبوین نەمان پێكا، بەڵام دەرسمان لێوەرگرتوە و دووبارە نابێتەوە، ئەو كاتە ئیترهیچ مونافسێكی تر ناتوانێت بیكاتە درزێك و بیقۆزێتەوە و لە بانگەشەكەیدا خۆی پێ بەهێز بكات و بەکاریبهێنێت بۆ لاوازکردنی ورەی یەکێتییەکان.
رەخنە و بگرە تانە و تەشەرەكان زۆرن كە بەشێکی رەخنەکان راستن، بەشێکیشیان پێویستیان بە روونکردنەوەیە بەڵام تانە تەشەرەکان دوورن لە راستییەوە،(ی.ن.ك) وەك هێزێكی گەورە و حوكمڕان رەنگە لە کەموکورتیی و کەوتنەکاندا پشكی شێری بەر بكەوێت. بۆ نموونە باسی گەندەڵیی و ناعەدالەتیی و دزیی و بەفیڕۆدانی سامانی وڵات زۆر ئەكرێت،(كە وایە و راستە و هەیە)، (ی.ن.ك) ئەبێت بە راشكاوی بڵێت بەڵێ ئێمە لە ئاست ئەوە دۆسیانەدا بەرپرسیاریەتیمان بەردەكەوێت بەڵام ئەمەش بەرنامە و پڕۆگرامەكەمانە بۆ نەهێشتن و قەڵاچۆكردنیان و كۆتایی هێنان بەو حاڵەت و دیاردانە كە خەریكە ئەبێتە باو و نەریت و بەڵێن ئەدەین نەیانهێڵین. ئەمەش بوێریی و ئازایەتییەکی سیاسییە کە خۆت بکەیت بە خاوەنی کەلێن و هەڵە و شکستێک ئەگەر هەموویشی هەر خەتای تۆ نەبێت، نەك وەك هەندێك لایەن و قەوارە و كەسایەتی كە خۆیان بەشدار و ئاگادارو بەرپرسیاریش بن لەو دیاردانەدا كەچی خۆیان ئەكەنە مەحمودی بێ زەواد یاخود فریشتەی بەهەشتی بۆ بەدەستهێنانی دەنگەكان.
ئێستا زۆر لایەن و كەسایەتیی سیاسیی قسە لەسەر ریفراندۆم ئەكەن لە كاتێكدا هیچ حزب و لایەنێك بە رەسمیی دژی نەبووە بە داخەوە (ی.ن.ك) لەبەر هەر ئیعتبارێك لەگەڵیدا بوو دواتریش كە هەموو جیهان كەوتنە رجا و پاڕانەوە گوشاری نەكرد و هەڵوێستێكی توندی نەنواند بۆ خۆپاراستن لە دەرەنجامی سەركێشیی و لاساریی كردنی ئەو بڕیارە دەولییە بۆ بەڕێوەنەچونی پرۆسەكە، بۆیە لە ئاست ئەو رەخنەیەدا پێویستە (ی.ن.ك) زۆر راستگۆیانە رەخنەكە قبوڵ بكات و رێگەنەدات ئەوانی تر هیچ كامیان بیكەنە كارتی بانگەشە و وەك بەرزەكی بانان بۆی دەرچن. بۆ تۆمەتەكانیش (ی.ن.ك) ئەبێت بە چەكە بەهێزەكانی دیموكراسی و سیاسیی بەگژیاندا بچێتەوە كە ئەمڕۆ زۆربەیان مەسەلەی كەركوكیان كردۆتە بنێشتە خۆشەی بن دانیان بۆیە لە ئاست ئەم تۆمەتە گەورەیەدا كە زۆر جار ختوكەی جەماوەرەكەی (ی.ن.ك) یشی پێئەدرێت ئەبێت رازی نەبوون و لێخۆش نەبوون بگیرێتەبەر و راستییەكان بخرێتەڕوو تا هەڤاڵانی (ی.ن.ك) خۆیان نەبنە مایك و سەكۆی ئەو تۆمەت بەشینەوەیە بە یەكێتییەكەیان. روونبكرێتەوە ئەوەی كە ناونراوە هەرزانفرۆش كردن و لەدەستدانی 50% ی خاك و چەندین ناولێنانی تر لە 16ی ئۆكتۆبەردا، هەمووی لە یەك رستەدا كۆئەبێتەوە ئەویش ئەوەیە هێزەكان بە وانەی یەكێتیشەوە لەو ناوچانە بە بێ هەماهەنگیی و ئاگاداری و پرس و را بە حكومەتی فیدراڵیی جێگیر ببون. ئەو سەردەمە بارودۆخێك هاتبووە پێشەوە كە نە سەنتەری بڕیارێکی سیاسیی لە ئارادا بوو، نە حكومەتی فیدراڵیی ئەیپەرژا لەو ناوچانە بپرسێتەوە، كوردیش حەزی نەئەكرد پرس و را بكات بەڵكو بە فرسەتی زانی كە سوود لەو هەلومەرجە وەربگرێت (كە ئەوە حساباتێكی هەڵە بوو) دواتریش كە بارودۆخەكە بە دیوێكی تردا گۆڕا و كوردیش باری لار بوو، حكومەتی فیدراڵی داوای ناوچەكانی خۆی كردەوە كۆمەڵی نێودەوڵەتییش (ئەمریكا) پشتی بەغدای گرت بۆیە ئیتر هیچ دەرەتانێك نەما جگە لە پاشە كشێ، باشترین بڕیارێكیش كە درا بەرەنگاریی نەكردن و خۆپاراستن بوو لە شەڕی خۆتڕێن كە سەرباری شكاندنی كورد رۆڵەی خەڵكیش بە هەزارانیان ئەبونە قوربانیی. كەواتە بەم نەفەس و راستییانەوە ئەو گرێ ئاڵۆزە بكرێتەوە چیتر رێگە نەدرێت هیچ هێز و لایەنێك ئەو مەسەلەی بكاتە مادەیەكی بانگەشەو فریودانی خەڵك و تۆمەتدانەپاڵ(ی.ن.ك) بە ختوخۆڕایی.
راستە حكومەتی فیدراڵیی زیادڕەویی كرد لە وەرگرتنەوەی ناوچەكان و رێكەوتنەكانی پێشوتری پەیوەست بە كەركوكی پێشێل كرد، بەڵام لەوجۆرە روداوانەدا هەندێ مەسەلە ئەبنە قوربانی، ئەبێت ئەوەش هەر (ی.ن.ک) چارەسەری بكات كە ئەمەیان پێویستە هەرچۆنێك بێت چارەسەری بۆ بدۆزرێتەوە ئەگەر بە وەرگرتنی بەڵێن و پەیمانیش بێت بۆ دوای هەڵبژاردنەكان.
كەواتە بەو گیانەوە بچینە ناو شەڕی دیموكراسیی هەڵبژاردنی بێ خۆ سەغڵەت كردن ئەوا هەر فرسەت تەڵەبییەك شكست ئەخوات كە نیاز لێی دەست وەشاندن بێت لە (ی.ن.ك)، بەمەش رەخنەکان ئەخرێنە سەرچاوان و گوێیان لێدەگیرێت، بە توندیش تۆمەت و بوختانەکان رەت و پوچەڵ ئەکرێنەوە .

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*