سەرەکی » وتار » حاكم قادر حه‌مه‌جان » لە یادی شكۆی نەتەوەیەكدا

لە یادی شكۆی نەتەوەیەكدا

جەژنە پیرۆزە لەخەڵكی كوردستان دەكەم , ڕۆژی هەڵبژاردن , ڕۆژی گشتیە , ڕۆژی جەژنی خەڵكی كوردستانە , هیوادارم هەمووكەسێ‌ بەشداریبكات لەدەنگدان ومافی خۆی لەمەدا بەكاربهێنێت .
ئەم ووتانەی هەڤاڵی كۆچكردوو , جەنابی مام جەلال مامی گەورەی گەلی كورد , لەساتی بەڕێوەچوونی یەكێك لەپرۆسەكانی هەڵبژاردندا بەرلە وەفاتكردنی , ئاڕاستەی گەلی كوردستان و دەنگدەرانی بەگشتی كرد , تیایدا بەخۆشحاڵییەوە وێڕای پیرۆزكردنی ئەو پرسە شارستانییە داوا دەكات خەڵك بەگشتی مافی دیموكراسی خۆی مومارەسەبكات .
ئەمڕۆش لەم ساتەوەختەی كەپێكەوە لەخەمێكی قوڵ و پڕلەناسۆردا یادی تێپەڕبوونی ساڵێك بەسەر كۆچی ناوادەی ئەو كەڵەسیاسی وتاكە كاریزمایەی گەلی كورددا بەشانازییەوە بەرز ڕادەگرین , لیستی یەكێتی نیشتمانی كوردستان لەپرۆسەی هەڵبژاردنی پەرلەمانی كوردستاندا بۆ گۆڕینی لاسەنگی پێگەو پارسەنگی حوكمڕانی لەهەرێمی كوردستان بەتایبەت لەپاش بەرز بوونەوەی كێرڤی یەكێتی و گەڕانەوەی پێگەی سەنگینی ڕووەو ئاستی پێشووتری , سەركەوتنی گەورەی بەدەستهێناوە , لەم ڕۆژە ئاهەنگ ئامێزەدا جۆش وخرۆشی یەكێتی یەكان و دەنگدەرانی سەوز پۆش , خەمی ماڵئاوایی مامجەلالەكەیان لەگەڵ شادی سەركەوتنی یەكێتی یەكەیان ئاوێتەكردو ڕۆحی مام وسەرجەم شەهیدانی یەكێتی وشۆڕشی نوێ یان پێ‌ ئاسودەكرد .
كۆچی شكۆی نەتەوەی گەلی كورد نەك بەتەنها كۆستێكی ئاسایی نەبوو بۆ گەلەكەی , بەڵكو وەك لەدەستچوونی (سەمامی ئەمان)ی گۆڕپانی سیاسی عێراق , گەلی عێراقی بەگشتی خەفەتبارو دڵ غەمگین كرد , ئەمەجگە لەوەی بەهۆی گەیشتن بە دوا وێستگەی قسەخۆش ونوكتە ئامێزەكانی خەندەی لەسەرلێوەانی سەرۆك وسەركردەو میرو پاشاكانی دنیای دەرەوەو دبلۆماتكاران وكەسایەتییە ناودارەكانی جیهان تۆراند .
ئێستاش بەتێپەڕبوونی ساڵێك بەسەر ئەو یادە غەمگین وكۆچە بێ‌ گەڕانەوەیەدا كەزامێكی كولاوەیە بۆ سەركردەیەك كە وەك ڕەمزی خەبات وتێكۆشان , بۆ ئازادی وئاشتی , بۆدیموكراسی و مافی چارەنووس ئاڵایەكی درەوشاوەیە , بۆ یەكڕیزی گەلی كوردستان ڕەمزی یەكتر قبوڵكردن بوو .
لەم بیرەوەرییە پڕ غەمناكەدا .. دەستمان بەسنگەوە بەو بەڵێنەی كە مام خۆی دابوی بۆ سەربەرزی وگەیشتن بەدواپلەی سەركەوتن وبەدەستهێنانی مافەڕەوا سیاسی وكۆمەڵایەتی یەكانی گەلی كوردستان بەگشتی , بەڵێن دووپاتدەكەینەوە درێژەپێدەری ڕێبازەكەی دەبین وبێ ئاوڕدانەوە بۆدوواوە ڕووەو پێش لەسەر شاڕێی ئاواتەكانی كەماویانە بێتەدی بۆ فەراهەكردنی ڕزگاری وخۆشگوزەرانی وئاسودەیی وباشتركردنی حاڵ وگوزەرانی خەڵك بەردەوامدەبین .

*ئەندامی دەستەی كارگێڕی مەكتەبی سیاسی

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*