خورجە

كتێب

1
ئەنواع میلەت خودان كتێبن
كرمانج بتەنێ‌ دبێ‌ حسێبن
كوردو كتێب، تەنها پیتی سەرەتا كۆیان دەكاتەوە، لە دنیادا نوسەرو بیرمەندو رۆشنبیرو ئەدیبان بە چاپی یەك دوو كتێب نانیان دەكەوێتە ڕۆنەوە، ئەوانی ئێمە یان دەبێ‌ قەرزی بۆبكەن، یاخود لە ڕێی خودا كەسێك بۆیان چاپبكات، ناڵێم هەموو بەشێك لە نوسەران هەمیشە لە توێژە زۆر ستەملێكراوەكەی كرمەڵی كوردەوارین، ئەو كۆمەڵی كوردەواریەی زۆر نیە مەلامەحمودی بایەزیدی عادات و رسومەتنامەی لە بارەوە نوسیون، خۆ گەر كورد دەوڵەتیان هەبا ئێستا كتێب و نوسینی كوردی رەواجێكی دیكەی دەبوو، بەڵام ئیدی ئێمە میلەتی بێ‌ كتێب و بێ‌ نووسین بووین،ئەوەش هۆكاری زۆری خۆی هەیە، لانی كەم ئێمە تا هەنوكەش نەتەوە سازی قەبوڵناكەین، ئەوەش عادات و رسومەتنامەی ئەوڕۆی كوردیە لە قاوغی سیاسەتا.
2
ئەها حاجی قادر دەیگوت، « حاجی كەسێكە بێكەس، بۆ ئێوە قوڕ دەپێوێ‌ « قسەلە سەر ئەوەیە بۆچی كورد هێندە خەمی كتێب و خوێندنەوەی نیە، بۆچی نایەوێت لە ماڵەكەیدا كتێبخانە هەبێت، بۆچی لە كۆی زیاتر لە 5 ملیۆن كوردی باشوری كوردستان، كە لانی كەم 3 ملیۆنی بە خوێندنەوە ڕادەگات، تیراژی كتێب لە باشترین دۆخدا لە 2هەزارو سێ‌ هەزار تێناپەڕێت، زۆبەی تیراژیش یان 500 یان 1000 لەوە زیاتر نیە سەیری پێوە نان و ژمارەی قەبە مەكە، لەو سێ‌ ملیۆنەی باسم كرد، ئەگەر كۆیكەینەوە وەزیرو گزیرو پارلەمانتارو مەكتەب سیاسی و سەركردایەتی و بەڕێوەبەری گشتی و هتد، ماشاڵڵایان لێ‌ …. زۆرن كەچی خوێنەواریان زۆر كەمە، گەر وانیە فەرمون خۆیان تاقیبكەنەوە.
3
شاكیر فەتاحی رەوانشاد لە چلەكانی سەدەی رابردوو داوای لە چەمچەماڵیەكان كردووە، هەر ماڵەو با كتێبخانەیەك و ئامێرێكی میوزیكی هەبێت، دیارە كەس گوێی بەو داوایە نەداوە، وای ئەگەر بە قسەیان دەكرد،خۆش ئەوەیە ئێمە جەنگاوەرو فەرماندەو سیاسیەكانمان یاداشتەكانی خۆیان دەنووسنەوە و یان بۆیان دەنووسنەوە، كەچی خۆشیان زۆر كەم دەیخوێننەوە،هەرچەند زۆربەی لاپەڕەی ئەو یاداشتانە خوێنی لێدەچۆڕێت، لەو رۆژانە لە بۆنەیەك كاك جەلیل گادانی گوتی « مێژوی ئێمە هەمووی خوێن و كوشتن و بڕینە « لە گەڵ ئەوەشدا چوار كتێبی باشمان لە سەر كوشت و بڕی 1963 نیە ئەوە بۆیە:
میلەتی بێ‌ كتێب و بێ‌ نووسین
غەیری كوردان نیە لە سەر ڕووی زەمین

 275 جار بینراوە