ئەڵبەتە گرنگی هەر جۆرە نووسینێك بۆ هەر مەبەستێك بێت، لەوەدایە خوێنەر چێژی لێوەربگری‌و سەرنجی بەلای خۆیدا رابكێشێ، لە هونەری بیرۆكە‌و داڕشتن‌و شێوازەكەی بێتاقەت نەبێ. لێرەدا دەگەڕێینەوە بۆ بەرهەمی كەسە بەسەلیقەكان، ئەگەر غەدر لە ویژدان نەكەین‌و ئاسوودەیی بە دەروونی گەرمی خۆمان بدەین وا چاكە تارادەیەك ئاوردانەوە‌و خوێندنەوەی پوختە لەسەر ئەو قەڵەمە بە هیمەت‌و بلیمەت‌و بە هەڵوێست‌و خەمخۆرانەی وشەی كوردی بكەین. ئەوانەی بە چەپكە گوڵی بۆنخۆش نووسینە بایەخدار‌و هاوچەرخانەیان، كەلێن لە دوای كەلێن لە كتێبخانەی كوردی پڕ دەكەنەوە. دیارە ئەوانەی كە جوان دەنووسن چاوەڕوانی پاداشت‌و پیاهەڵدان نین، ئامانجیان خزمەتكردنە. بەڵكو لەناخەوە چاوەڕوانی ئەوە دەكەن ئەو كەسەی خولیای نووسینی هەیە چی لە توانایدا ببێت، درێغی لێنەكات چاكی مەردانە لێهەڵماڵێ بەشێك لە رووداو‌و یادەوەری‌و پەند‌و ژیاننامەی كەڵەمێرد‌و شێرەژن‌و گەشمردە‌و سەربازە گومناوەكانی ئەم وڵاتە ونجڕونجڕ كراوەی تازە گیان بەبەرداهاتوەدا بەسەر بكەنەوە. لەو كەرەستانە نامیلكە‌و كتێب پێشكەش بە خوێنەر‌و مێژووی ئەدەیب‌و هونەر‌و زانیاری‌و كەلەپووری گەلەكەیان بكەن. ئەمە پێی دەوترێ رەنجی رەوا‌و خەونی سەوزی بەدیهاتوو. كاكەو رەهبەری سەید برایم لەو خانەوادە بەڕێزەیە كە چرای روناكبیری‌و كوردایەتی‌و تەبایی‌و هاوكاریان بەدەستەوەیە. تاك بە تاك ئەو پرشنگە رادەستی ئەویتر دەكەن. ئەمە مایەی شانازییە. كاكە رەهبەری پێشمەرگە‌و ماندووی هەناسە گەرم‌و پیرۆزەكانی سەنگەری شەرەف‌و ئاشتەوایی‌و گوڵاوپرژێنی ناو كۆڕ‌و دانیشتن‌و جیهانی رەخنەی دروست‌و لێكۆڵینەوەی هەڵسەنگاندن لە شاخ‌و لە شارە، ئا بەو عەشق‌و خولیایەوە پەلەقاژێی كردووە، تاكۆ پلە‌و دەقی ناسك‌و گونجاو پێشكەش بكات. كەسێك بە وتەی شیرین‌و بە كردەوەی سەنگین لە خەباتی چەكداری سیاسی‌و ئەركی پڕ لە زەحمەتی كۆمەڵایەتی راژەی بەربڵاو بە نیشتمان‌و نەتەوەكەی بكات، شایانی ئەوەیە دەستی بۆ بگیرێ بە سنگەوە. رێز لە شانەی هەنگوینی وتە‌و بۆچوونە پەلهاوێژ‌و گزنگ ئاساییەكانی بگرین. پێشمەرگەیەك بە هەموو مانای وشە لەگەڵ كتێب‌و قەڵەم دا ژیابێت. سەرقاڵی داهێنان بێت. لەو رۆژگارانەوە تا ئەمڕۆیش، ئەوەی دەینووسێ‌و دەیڵێت تازەگەری‌و رەوانبێژی‌و زمانپاراوای‌و راستگۆییان وەك نەرمە باران لێ ببارێت، چۆن مرۆڤ خۆی دەگرێ بێدەنگ بێت. مەرحەبایەكی وشەباشی لێنەكات. دەستخۆشی لە هۆنینەوەی ملوانكەی رەنگینی هەڵبژاردە‌و بڕگە‌و دەق تێكڕای نووسین‌و شیعر‌و لێكدانەوە‌و لێكۆڵینەوە‌و بەسەركردنەوە‌و تریفەی یادەوەری‌و هەڵدانەوەی لاپەڕە دێرین‌و نوێیە تۆماركراوەكانی دەكەین.ئەم قەڵەمە ئەرشیفی‌و رۆژنامەوان‌و نەسرەوتە خاوەنی خوویەكی پەسەندی كۆمەڵایەتی یە، لەوە دەچێت هەر لە دایبابەوە بۆی مابێتەوە، ئەو كەسێكە لە پلەی بەرزدایە، كەچی وا هەست دەكەی ئەمەندە خاكی‌و رۆح سوك‌و ئاساییە. وات پێباشە هەر لێیەوە نزیك بیت، چونكە تێر لە خۆشەویستی‌و ناسین‌و ئاخاوتنە تێر‌و تەسەلەكانی ناخۆیت. ئافەرین شاری كۆیە بۆ خۆت‌و بۆ رۆڵەت. ئەم مرۆڤە خوا بە كوردی داوە لەلای خۆیەوە ئەوەندەی پێكرا بێت بۆتە مایەی بوژانەوە‌و ژیانەوەی چەندان بابەتی هەمەرەنگ‌و بەكەڵك‌و كاریگەر لەهەمان كاتدا بەرپرسیاری داوە لە چوونە ناو ئەو چەپكە پیاهەڵدان‌و یادكردنەوەی ئەو كەسە لە دەستچوانە‌و ئەو بابەتانەی كە شیاوی ئەوەن لاپەڕەكانی تەمەن پرشنگدار بكەن. قەڵەمێك لەرووی نووسین‌و بەدواداچوون‌و ((گەڕان) ەوە، رۆژبەرۆژ دەوڵەمەندتر‌و بەرگەگرتوو بێت،سەروەریی‌و نەمری لە ژیاندا بۆ خۆی نەوەی دروست دەكات. ناتوانم خۆیشم لەم سیفاتانەی ببوێرم لە دووربینی‌و بیرتیژی‌و رووخۆشی‌و گورج‌وگۆڵی ‌و بەپەرۆشی. پەرۆشییەكەی تەنینەوەی بەدواوەیە. هەر تەقالایەكی كە دەیدات گەشبینی یەكی بەلاوەیە. بەراستی قەڵەمەكەی من هەرگیز ئەو دەرفەت‌و تیزەی نیە كە بتوانێ لە قۆڵایی، یا لە نووكەوە قەرزی بەرزی ئەدەبیاتی ئەم بەهرەمەندە بداتەوە. بریا پەییم پێببردایە. هونەر لەوەدایە كاك رەهبەری سەید برایم جگە لە كاری سیاسی ‌و رۆژنامەوانی‌و گەران بەدوای زانیاری‌و بەڵگەنامە‌و دیكۆمێنت، لە گۆرەپانی ئەدەبدا ئەم كتێبانەی بۆ بەچاپ گەیاندووین:1-كردار 2006، 2)پەیڤین لەگەڵ رۆح 2007، 3) سایەی هەیبەت سوڵتان 2008، 4)مەشخەڵان 2009، 5)رۆژنامەوانی لە كورەدا 2009، 6)بەدبەختی حاجی 2010، 7)رزگاری- دەنگی یەكێتی شۆڕشگێرانی كوردستان2011، 8)شنەی شاخ 2013، 9) شیشۆڤ 2014، 10)پرشنگەكانی كەكۆن2014، 11)پرچی ئایشێ‌و فاتما2017….

 دوابەرهەمی واتا پرچی ئایشێ‌و فاتمان، بەرگ تێگیراوێكی قەشەنگ‌و قەبارە گەورە‌و رەنگینە 200 لاپەڕەیە. بە سوپاسنامە‌و پێش دەستییەوە 32 بایەتی نایابی لە خۆگرتووە، تینوێتی خوێنەر دەشكێنێ. شایانی وتنە تێكرای بەرهەمە لە چاپدراوەكانی نووسەر بە خۆڕایی دابەشكراوە وەك سەرچاوە سوودیان لێبینراوە. لەم رووە خوازیارین ئەم ئەدیب‌و شاعیر‌و پێشمەرگە دێرینە هەر تەندروست‌و تەمەن درێژ بێت. تا برەو بە مەڵۆ بە مەڵۆی بەرهەم‌و وتار‌و كارە رۆژنامەوانییەكانی بدات لە پێناوی بوون بە خەرمان‌و خەرمانەكەیشی بەرەكەت دارتر دەبێت.

 سەرنووسەری گۆڤاری سلێمانی*