سەرەکی » وتار » دڵشاد ئه‌حمه‌د » گوندی ئاوه‌كه‌ڵه‌ _ بناری‌ شاره‌زوور

دڵشاد و گوندەکانی وڵات

گوندی ئاوه‌كه‌ڵه‌ _ بناری‌ شاره‌زوور

شاره‌زوور له‌كورته‌یه‌كی مێژوودا
ئاشوری یه‌كان به‌شاره‌زووریان گوتووه‌ (زاموا)، له‌هه‌زاره‌ی‌ سێیه‌می پێش زایین شاره‌زوور مه‌ڵبه‌ندی حوكمڕانی (لۆلۆیی یه‌كان)و (گوتی یه‌كان) بووه‌، له‌نوسینه‌ مێخی یه‌كانی ئاشوریه‌كان ناوی‌ شاره‌زوور هاتووه‌، ئه‌م مه‌مله‌كه‌ته‌ به‌شێك بوو له‌ئه‌بره‌شی یه‌»ی – بێت گرمای‌ – كه‌نیسه‌كانی‌ «نستوری‌» له‌ساڵی 554 ی زاینی تۆماركراوه‌، ئیمپراتۆریه‌تی بێزه‌نتینی له‌ساڵی 628 په‌لاماری‌ شاره‌زووری‌ داوه‌ و هه‌موو شارو شارۆچكه‌و ئاوایی یه‌كانی‌ كاول‌و خاپوور كردووه‌.له‌ساڵه‌كانی‌ 400 بۆ 434ی كۆچی ده‌وڵه‌تی حه‌سنه‌وی یه‌كانی‌ كوردحوكمڕانی شاره‌زووریان كردووه‌، له‌ساڵی 656ی كۆچی «هۆلاكۆ» ژماره‌یه‌ك له‌هۆزه‌كانی‌ كورد له‌ده‌شتی شاره‌زووری ڕاگواستووه‌ بۆ «میسر»و «شام» ، شه‌ره‌ف نامه‌ی‌ شه‌ره‌ف خانی‌ به‌دلیسی (1596)ی زاینی تێی دا هاتووه‌ بنه‌ماڵه‌ی‌ «ئه‌رده‌ڵانییه‌كان» له‌ساڵی 1158ی زاینی هه‌تا ساڵی 1284 حوكمڕان بوون له‌شاره‌زوور. له‌ساڵی 1554 شاره‌زور كراوه‌ به‌ ئه‌یاله‌تێك، «كه‌ركوك»ی كوردستان پایته‌ختی شاره‌زوور بووه‌ هه‌تا حوكمڕانی بابانه‌كان، كه‌ركوك و سلێمانی‌ و هه‌ولێرو كفری‌ و قه‌ره‌داغ و موسڵیش له‌سنوری‌ ئه‌م ئه‌یاله‌ته‌دا بوون.
ڕووبه‌ری‌ شاره‌زوور (656) كیلۆمه‌تر چوارگۆشه‌یه‌، به‌چیاكانی‌ (به‌رانان)و (شنروێ)و (باڵامبۆ)و (هه‌ورامان)و (سورێن) ده‌وره‌دراوه‌. هه‌ندێك سه‌رچاوه‌ باس له‌وه‌ده‌كه‌ن كه‌ (زوری‌ كوڕی ئه‌ستیاك «ئه‌ژده‌هاك») وڵاته‌كه‌ی‌ ئاوه‌دان كردۆته‌وه‌و ژیانی تێدا ده‌ركه‌وتووه‌. له‌ئێستادا یه‌كێك له‌ناحیه‌كانی‌ شاره‌زوور ناحیه‌ی‌ «وارماوا»یه‌.

ناحیه‌ی‌ وارماوا و مێژوو
له‌ساڵه‌كانی‌ 1937 به‌دواوه‌ ناحیه‌ی‌ وارماوا له‌لایه‌ن ده‌سه‌ڵاتی‌ عێراقی پاشایه‌تییه‌وه‌ دروستكراوه‌، له‌گوندی‌ «فه‌قێ جنه‌»ی نێوان هه‌ردووو چیای (گوڵان)و (به‌رانان) له‌ناوچه‌ی ده‌ربه‌ندیخان، پاشان ناوه‌ندی ناحیه‌كه‌ ده‌گوازرێته‌وه‌ بۆ گوندی «چه‌مه‌رگه‌» باشوری‌ گوندی «فه‌قێ جنه‌» ژماره‌یه‌ك به‌ڕێوه‌به‌ری‌ ناحیه‌ له‌چه‌مه‌رگه‌ ناحیه‌ی‌ وارماوا ده‌ستبه‌كاربووون، وه‌ك (پاشاشێت _ حوسێن به‌گ _ عارفه‌ فه‌نی _ له‌گه‌ڵ شه‌وكه‌ت به‌گ و عه‌بدولجه‌بار زه‌نگنه‌)
له‌ساڵی 1954 بۆ 1955 ناحیه‌كه‌ له‌لایه‌ن ده‌سه‌ڵاتداری پاشایه‌تی یه‌وه‌ ده‌گوازرێته‌وه‌ بۆ گوندی «قلیجه‌» هه‌تا ساڵی 1958 له‌م ماوه‌یه‌دا (عه‌بدولجه‌بار زه‌نگنه‌ _ به‌ڕێوه‌به‌ری‌ ناحیه‌ بوه‌)، بۆ ماوه‌یه‌كی كه‌میش ده‌گوازرێته‌وه‌ بۆ گوندی «چناره‌»و دواتر ناحیه‌كه‌ ده‌به‌نه‌ ده‌ربه‌ندیخان له‌گه‌ڵ دروستكردنی‌ به‌نداوی‌ ده‌ربه‌ندیخان.
له‌ساڵی 1978 حكومه‌تی‌ داگیركه‌ری‌ به‌عس به‌بیانووی پشتێنه‌ی‌ ئه‌منی كه‌ له‌بنه‌ڕه‌تدا بۆ له‌باربردنی شۆڕشی نوێ و تێك دانی‌ گونده‌كان و زیندانیكردنی‌ جوتیار و گوندنشین له‌ئۆردوگا زۆره‌ ملێ یه‌كان (20) گوندی پشته‌ واته‌ ئه‌و دیو شاخی (خۆیشك)و (به‌مۆ)ڕاده‌گوێزێت بۆ زێڕینه‌ یان «زه‌ڕایه‌ن» و له‌ساڵی 1979 ناحیه‌ی‌ وارماوا له‌زه‌ڕاین داده‌نێ به‌مه‌رسومی كۆماره‌ ژماره‌ (311) له‌ 16/10/1979 .
له‌ئێستادا كۆی‌ زه‌وی وارماوا (114094) دۆنم زه‌وی یه‌ (14978) هه‌زار دۆنم به‌راو و (52277) هه‌زار دۆنم پشتاوه‌ (ده‌یمی)یه‌.
(10860)هه‌زار دۆنم دارستانی‌ سروشتی (خۆڕسك)ه‌، یه‌كێك له‌گونده‌كانی‌ ناحیه‌ی‌ وارماوا له‌ئێستادا گوندی «ئاوه‌كه‌ڵه‌»ی بناری‌ زنجیره‌ چیای «به‌رانانه‌»ه‌.

گوندی ئاوه‌كه‌ڵه‌ _ بناری‌ به‌رانان
ئه‌م گونده‌ 876 مه‌تر له‌ئاستی ڕووی ده‌ریاوه‌ به‌رزه‌ له‌بناری‌ شاخی به‌رانان كه‌ ئه‌میش (1355) مه‌تر له‌ئاستی ڕووی ده‌ریاوه‌ به‌رزه‌، هه‌رسێ دۆندی (هه‌واره‌به‌رزه‌)و (قۆچكه‌)و (تاڵانه‌)ی به‌رانان له‌پشتی گونده‌كه‌وه‌یه‌، سێ ده‌ربه‌ندی چڕو ئاوێژگه‌ی‌ هه‌یه‌ «ده‌ربه‌ندی حه‌وت ده‌روێشان»و «ده‌ربه‌ندی دۆڵه‌بێشك»و «شه‌یتانه‌ڕێ».دره‌ختی خۆڕسكی زۆره‌، «كه‌وت» و «قه‌زوان و بنه‌وشان»و (به‌ڵاڵوك)و (گۆیژ)و داربه‌ڕویه‌كی زۆر. مێژووی‌ ئه‌م گونده‌ ده‌گه‌ڕێته‌وه‌ بۆ سه‌رده‌می زه‌رده‌شتی یه‌كان به‌پێی پاشماوه‌ دێرینه‌كان.ناوه‌كه‌شی له‌وه‌وه‌ هاتووه‌ كه‌ ئاوی خواردنه‌وه‌ی‌ له‌و ده‌ربه‌ندانه‌ زۆر بووه‌ ، ئاژه‌ڵی كێوی نێره‌ (كه‌ڵ) هاتۆته‌سه‌ر ئه‌و چه‌مانه‌ و پێ یان گوتووه‌ ئاوه‌كه‌ڵه‌. زۆربه‌ی‌ دانیشتوانی‌ ئاوه‌كه‌ڵه‌ تیره‌ی‌ (ڕۆغزایی)ین له‌هۆزی گه‌وره‌و به‌ناوبانگی جاف.

مێژووی‌ زانراوی‌ ئاوه‌كه‌ڵه‌
«سه‌لام مه‌حمود مه‌جید» گه‌نجێكی گوندی ئاوه‌كه‌ڵه‌یه‌، ئاماژه‌ی به‌مێژووی‌ ئاوایی یه‌كه‌یان داو به‌گوندستانی‌ گوت : هۆزی جاف به‌پێی هه‌ندێك سه‌رچاوه‌ له‌سه‌رده‌می (ساسانییه‌كان) ده‌ركه‌وتوون، له‌له‌شكری ساسانی سه‌ر له‌شكرو سوپای هێرش به‌ری‌ بووه‌و به‌ئازاو جوامێر ناویان ده‌ركردوووه‌، ناوی‌ جاف له‌(جه‌فایی) یان (جه‌فاكێش)ه‌وه‌ هاتووه‌و ده‌كرێت به‌سێ به‌شه‌وه‌ /جافی جوانڕۆ/ جافی مورایی (مورادی)/ جافی گۆران.
یه‌كێك له‌هۆزه‌كانی‌ جاف كه‌ به‌ناوبانگن «تیره‌ی‌ ڕۆغزایی»یه‌ كه‌ له‌ناوچه‌كانی‌ «سه‌رقڵا»و «دوكان»و «شاره‌زوور»و «قه‌راغ»و «شێروانه‌»و «سه‌نگاو»و «ناوخوان»و «سنه‌و سه‌قزی ڕۆژهه‌ڵاتی‌ كوردستان نیشته‌جێن».
له‌ساڵی 1820ی زاینی تیره‌ی‌ ڕۆغزایی جاف 300 سواره‌و 500 پیاده‌ له‌شكری‌ هه‌بووه‌ سه‌رۆكی ئه‌م تیره‌یه‌ (ڕۆغزاد) بووه‌، به‌فارسی واته‌ (هه‌ڵۆزاده‌)، به‌ره‌بابه‌كانی‌ ئه‌م تیره‌یه‌ / وه‌یس وه‌یس/ شاوێس/ سمایله‌/ سه‌رحه‌یی/ قادروه‌یسی/ حه‌مه‌جانی‌/ كامه‌رانی‌ یه‌. ئه‌وجا (300) ساڵێ به‌ر له‌ئێستا باپیره‌ گه‌وره‌ی‌ ئێمه‌ له‌ڕۆغزایی له‌قه‌ڵای‌ ته‌په‌گه‌ڕوس و ده‌ره‌وار له‌خوار چیای زه‌رده‌وه‌ هاتوون و لێره‌ له‌ئاوه‌كه‌ڵه‌ نیشته‌جێبوون به‌سه‌رۆكایه‌تی (ئه‌لی ڕۆغزا).

ڕه‌ش ده‌واره‌كانی‌ جاف و كاكه‌ خوله‌
كاكه‌ خوله‌، یه‌كێكه‌ له‌خۆشه‌ویسته‌كانی‌ ئاوایی ئاوه‌كه‌ڵه‌، ناوی‌ (مه‌حمودی حاجی مه‌جی)یه‌ و پێ ی یه‌ژن «كاكه‌ خوله‌» له‌ته‌مه‌نی (68) ساڵیدایه‌، ئه‌و ده‌می هه‌ڵهێنایه‌وه‌ به‌ باپیرانی یه‌وه‌ ، كا دڵشاد ئه‌م ئاوایی یه‌ بنه‌ماڵه‌ی قازی كه‌ره‌م شاوێس ی تیایه‌، هه‌ندێك خێزانی‌ گوندی «مۆریاس»ی به‌رزنجه‌ش هاتوون و لێره‌ نیشته‌جێن. سه‌باره‌ت به‌گه‌رمیان و كوێستانی‌ تیره‌كه‌یان به‌گوندستانی‌ وت :كۆچه‌ره‌ ڕێ ی ڕۆغزایی له‌گه‌رمێنه‌وه‌ به‌و پێ ده‌شتانه‌ی‌ باوه‌نور هاتون و له‌كه‌لی په‌یكوڵی له‌نێوان چیای زه‌رده‌ و گوڵان ئامدیوی قه‌راغ بون له‌(پاشاڕێ)ی (چه‌مه‌رگه‌)ه‌وه‌ به‌به‌رانانا سه‌ركه‌وتون و له‌(حه‌وت ده‌روێشان) پشویان داوه‌ ئیمه‌ش له‌ته‌كیان كه‌وتوین «گا»و «ئێستر»و «ماین»مان باركردووه‌ له‌ئاردو ڕه‌ش ده‌وارو (ده‌رخۆنه‌)و (ساوه‌ر)و هۆڕ پڕكراوه‌ له‌ زاو (مه‌به‌ستی ئاردو ساوه‌ره‌). چیخیان چنیوه‌ بۆ ده‌وره‌ی‌ ده‌واره‌كه‌ و هه‌تا سه‌رپه‌ڵه‌ی‌ پایز ده‌مانه‌وه‌ ئه‌وجا خێڵ به‌ره‌و خوار ده‌بۆوه‌، له‌خانوی گڵ لێره‌ هه‌واره‌ زوسانیان بو، كه‌واو سه‌ڵته‌ له‌به‌ر، پێڵاوی كڵاشیان ده‌چنی و ڕوناكیشیان «چراوگی قه‌ره‌قاچ» بوگه‌.
كاك ئه‌حمه‌دی‌ مه‌جید ڕۆغزایی ئه‌و سه‌باره‌ت به‌ گونده‌كه‌یان گوتی له‌ساڵی 1953 به‌دواوه‌ جاف نیشته‌جێ كراون، لێره‌ حوجره‌ی‌ تیابووه‌ (مه‌لا شێخ محه‌مه‌د) ده‌رسی به‌فه‌قێ داوه‌، له‌ساڵی 1956 مامۆستا (حسێن فه‌قێ) قوتابخانه‌ی‌ تیاكرده‌وه‌، جگه‌ له‌(ئاوه‌كه‌ڵه‌) گونده‌كانی‌ (فه‌قیره‌)و (هه‌ردوو گوندی كۆره‌)و (جۆلان)و (سێتلان) ده‌هاتن بۆ خوێندن، له‌ساڵی 1959 حاجی حه‌سه‌نی مامم و باوكم چون بۆ سلێمانی‌ پشكنینی توتن (فه‌حسی توتن)، دوو سنوقی بۆراق و ڕادێویه‌كیان سه‌ندبوو، هێسترمان بۆ ناردن بۆ (قه‌ره‌گۆل) هاتنه‌وه‌ «ڕادیۆی سیڕا»بو، ئه‌و ده‌مانه‌ «مه‌نجه‌ڵی مس» ئاشمان تیاده‌كرد، له‌گه‌نی مس، مه‌سینه‌ی‌ ئاسن، ڕه‌شكه‌، شه‌نی لك، بێژنگ، جه‌نجه‌ڕ، داس، هه‌وجاڕو هه‌سانمان به‌كارده‌هێنا، ئێمه‌ «هه‌نگدۆز»ێكی باش بووین، له‌سه‌ركانی‌ هه‌نگه‌كانمان ده‌دۆزییه‌وه‌ ئه‌وجا دوای‌ ده‌كه‌وتین، له‌كلۆره‌ دارا هه‌میشه‌ هه‌نگوینمان ده‌دیته‌وه‌، ماڵ نه‌بووه‌ ته‌نه‌كه‌یه‌ك و دوانی‌ ڕاعی هه‌نگوینمان نه‌بێ.

ئاوه‌كه‌ڵه‌ و به‌شداری‌ هه‌راكان
ئاوه‌كه‌ڵه‌یی یه‌كان له‌سه‌رجه‌م «هه‌را» واته‌ شۆڕشه‌كاندا به‌شدارییان كردووه‌ و قوربانیشیان داوه‌، «لاله‌ دارای لاله‌ مه‌جی لاله‌ حه‌مید ڕۆغزایی» یه‌كێك له‌پیاوه‌ ئازاكانی‌ ئاوه‌كه‌ڵه‌ سه‌باره‌ت به‌به‌شداریكردنی‌ ئه‌وان له‌شۆڕشه‌كاندا به‌گوندستانی‌ گوت : تیره‌ی‌ ڕۆغزایی به‌شداریان كردووه‌ له‌شه‌ڕی «ئاوباریك»ی بنار گل له‌ 3/ 4/ 1931 به‌شداریان كردووه‌ و خه‌ساره‌تیشیان بووه‌،له‌هه‌رای ساڵی 1961 له‌ده‌ربه‌نی خان كه‌ پێ ی یه‌ژن «هه‌رای كه‌وا شۆڕه‌كان» به‌شداریمان كردووه‌ و «ساڵحی مام حارس» كه‌ خه‌ڵكی كانی‌ هه‌نجیری بناری‌ شاره‌زوور بوو له‌ته‌ك (فه‌تاحی مامه‌ خوله‌)كه‌ خه‌ڵكی «كۆره‌ی‌ گه‌وره‌» بوو له‌وێ له‌وێ شه‌هید بوون، له‌م بناره‌شه‌وه‌، به‌كه‌رو بار ، نان و ئاومان بۆ بردوون. له‌شۆڕشی نوێ به‌ڕابه‌رایه‌تی بیرمه‌ندی گه‌وره‌ و شۆڕشگێڕی مه‌زن (مام جه‌لال) له‌ساڵی 1977ه‌وه‌ ، ئاوه‌كه‌ڵه‌ به‌شداری كردووه‌. جا دڵشاد با بۆت بگێڕمه‌وه‌ : له‌پایزی 1977 (سیروان تاڵه‌بانی) و (حه‌سه‌ن خاوێ) و (حاجی چاوشین) و (گۆران تله‌زه‌یتی) و (مامۆستا ئه‌نوه‌ر) له‌و كه‌ژه‌ ده‌چنه‌ لای‌ شوانێك، «كا خوله‌»ی ئاوه‌كه‌ڵه‌ له‌وێ لای‌ ڕان بوو ده‌یكه‌ن به‌ڕێكخستن، ئیدی «عومه‌ری‌ حاجی حه‌مه‌ومین» و «دارای‌ لاله‌ مه‌جید لاله‌ حه‌مید» په‌یوه‌ندی ده‌كه‌ن به‌ «مامۆستا ئه‌وه‌ر»ه‌وه‌، یه‌كه‌م پێشمه‌رگه‌ كه‌ چه‌كی كرده‌ شانی «به‌هجه‌ت حه‌مه‌فه‌ره‌ج حه‌مه‌ عه‌لی» بو كه‌ هه‌ر ئه‌میش یه‌كه‌م شه‌هیدی شۆڕشی نوێ یه‌ له‌ئاوه‌ كه‌ڵه‌. لێره‌ هێزی پشتگیریمان دروستكرد به‌تفه‌نگی خۆمانه‌وه‌ (11 كه‌س) بوین، من فه‌رمانده‌یان بووم و له‌گه‌لێ شه‌ڕو پێكدادان شان به‌شانی پێشمه‌رگه‌ دژی به‌عسی داگیركه‌ر شه‌ڕمان كردووه‌، له‌ساڵی 1983 گه‌وره‌ترین شه‌ڕ لێره‌ ڕوویدا (مام والی باریكه‌یی) فه‌رمانده‌ی‌ كه‌رتی (دووی‌ شاره‌زوور _ تیپی 55ی قه‌ره‌داغ) فه‌رمانده‌یی شه‌ڕه‌كه‌ی‌ ده‌كرد له‌گه‌ڵ شه‌هید حه‌مه‌ سه‌عید جێگر تیپ بوو. (7كۆپته‌ر) بۆردومانی‌ ده‌كردین به‌یانی زوو هه‌تا خۆركه‌وتن 12 سه‌رباز كوژران و 2 كه‌لاكیان لێ به‌جێما ، (كه‌ریم سیاره‌یی) به‌داخه‌وه‌ شه‌هید بوو. ژنه‌كه‌ی‌ (مامه‌ حه‌سه‌ن) و كوڕه‌زایه‌كی به‌كۆڵییه‌وه‌ ئه‌وانیش شه‌هید بوون، ئێمه‌ خاوه‌نی 7 شه‌هیدو له‌شه‌ڕه‌كانی‌ دژ به‌ جه‌رده‌ و گه‌وجه‌كانی‌ داعشیش به‌ئاڕبیجی و تفه‌نگی خۆمانه‌وه‌ له‌(كۆباشی) و (جه‌له‌ولا) شوێنی تر به‌شداریمان كرد (سالار حه‌سه‌ن حه‌مه‌خان)مان له‌وێ‌ شه‌هید بوو. ئێمه‌ یه‌ك ئه‌نفالكراومان هه‌یه‌ به‌ناوی‌ (تایه‌ری حه‌مه‌شه‌فیق)
به‌هاری‌ 1971داده‌ فه‌یمه‌ حه‌مه‌ومین وه‌سمان له‌به‌ره‌بابی (حه‌مه‌جان)ی ڕۆغزایی یه‌ خه‌ڵكی‌ ئاوایی «كۆره‌ی‌ دووماڵه‌یه‌»، حاجی مه‌جیدی ڕۆغزایی له‌ته‌ك حه‌مه‌ومینی حه‌مه‌جانی‌ ژن وه‌ ژن ده‌كه‌ن بۆ كوڕه‌كانیان، ئه‌و ده‌مه‌ (مه‌حمود)ی حاجی‌ مه‌جی به‌لای‌ ڕانه‌وه‌ بووه‌ له‌و كه‌ژانه‌ كه‌ هاته‌سه‌ر گواستنه‌وه‌ ماینێك له‌ئاوایی كۆره‌ ڕازێندرایه‌وه‌و مه‌وجیان له‌سه‌ر زین دانابوو، گولینكیش، له‌وێوه‌ (فه‌یمه‌) ی بوك كه‌ (پێ خه‌سوو)ه‌كه‌ی‌ پوری بوو، له‌گه‌ڵی هات له‌گه‌ڵ بڕێ له‌سوارو تفه‌نگ له‌شان. لێره‌شه‌وه‌ له‌ (ئاوه‌كه‌ڵه‌) كه‌نیشكه‌كه‌ی‌ حاجی مه‌جی ڕازێندرایه‌وه‌ له‌سه‌ر مایین بۆ بڕێ سوارو (میم توبا) پێ خه‌سووی‌ ئه‌م بوو، هه‌ریه‌كێك له‌م پێخه‌سوانه‌ خورجێكیان پێ بووه‌، پڕ له‌كولیجه‌ و مێوژ، ده‌یاندایه‌ ئه‌و گه‌نجانه‌ی‌ كه‌ ده‌چونه‌سه‌ر ڕێ یان. ماڵه‌ باوك هه‌ر یه‌كه‌یان جیهازی بوكیان ده‌كڕی، لاگیره‌، كڵاوزه‌ڕ، هه‌ردوو بووك له‌شه‌خسه‌كه‌ی‌ كۆكه‌ ڕه‌شه‌ له‌نێوانی‌ هه‌ردوو ئاوایی گۆڕدرانه‌وه‌، بوبه‌ ته‌قه‌ی‌ بڕنه‌و، هه‌شت حه‌یوان له‌ئاوه‌كه‌ڵه‌ سه‌ربڕیابوو، برنجی كوردی ئاوه‌كه‌ڵه‌ بۆن و به‌رامه‌ی‌ ده‌گه‌یشته‌ شوانه‌كانی‌ سه‌ر چیا، شه‌ش حه‌وت ئاوایی بانگهیشتی شایی كرابوون، ئێستا داده‌ فه‌یمه‌ له‌ته‌كمه‌ باسی 48 ساڵ به‌ر له‌ئێستام بۆ ده‌گێڕیته‌وه‌، حه‌یف (ده‌ستێكی‌ شكابوو) به‌ئازار بوو، به‌ڵام ژنێكی‌ به‌ئاوه‌ز و ئازاو زه‌حمه‌تكێش گوتی‌ : یه‌كسه‌ر هاتمه‌سه‌ر ماڵه‌ خه‌زوران، خه‌زورم ده‌وڵه‌مه‌ند بوو، (500) سه‌ر مه‌ڕی بوو، له‌گه‌ڵ خه‌سووما ئه‌مڕۆی‌ له‌هه‌موو ڕۆژێك خۆشتر بێت (به‌ڕه‌) و (گورێس) و (جه‌واڵ) و (مه‌وج) و (خوێ یانه‌)مان دروست ده‌كرد، ده‌ستاڕو هاوه‌ن و دنگی دارمان بوو، هه‌موو شتێك به‌م ده‌ستانه‌ی‌ خۆمان دروستمان ده‌كرد، نان، ڕۆن، شیره‌مه‌نیی، ڕاخه‌ر، فه‌ره‌نجی و په‌سته‌ك و پێڵاو، خۆراكیش وه‌ك كه‌شك و دۆینه‌ و ساوه‌ر ڕسقی ئه‌و هاوینه‌مان ده‌خسته‌ كه‌نوی قوڕ و هۆڕه‌وه‌، ئه‌و زوسانه‌ به‌شی ده‌كردین، قاورمه‌مان ده‌كرد، هیزه‌ پڕ له‌ڕۆن، كه‌شك و خورمامان ده‌كوتا، هه‌موو به‌یانییه‌كیش هه‌ڵده‌ساین نانمان ده‌كردو شوان و وه‌رزێرمان به‌ڕێ ده‌كرد (په‌چه‌)مان ده‌ماڵی.
به‌ڕاستی ژنانی‌ ئه‌وده‌مانه‌ ئازاو جوامێرو به‌رهه‌م هێن بوون، سه‌د حه‌یف بۆ ئێستا

ئاوه‌كه‌ڵه‌
كه‌رتی‌ كشتوكاڵ ژماره‌ (56)ه‌ به‌ناوی‌ (20) جوتیاره‌وه‌یه‌و به‌ر له‌زه‌ڕایین، به‌ناو گوندی دسكه‌ره‌ی‌ (لاله‌سه‌رحه‌دی‌ خه‌لیفه‌ یونس) ناسراوی هۆزی جاف تێ ده‌په‌ڕی و ئه‌وجا گوندی‌ (جولان) و له‌بناریشی ئاوه‌كه‌ڵه‌یه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئاوایی مه‌مله‌حه‌_سه‌نگاو _ ناو زه‌نگنه‌

هۆزی گه‌وره‌ی‌ زه‌نگنه‌ و مێژوو یه‌كێك له‌هۆزه‌ گه‌وره‌و به‌ناوبانگه‌كانی‌ «هه‌رێمی ...