سەرەکی » وتار » دڵشاد ئه‌حمه‌د » شیوه‌ گوێزان _پێنجوێن

دڵشاد و گوندەکانی وڵات

شیوه‌ گوێزان _پێنجوێن

چیاو كانیاو و گوێز
مێژووی‌ پێنجوێن. كورته‌یه‌ك، ڕاگوزه‌رێك ..!
مێژووی‌ پێكهاته‌ی‌ زه‌وی و خاكی ناوچه‌ی‌ پێنجوێن، دروست بونه‌كه‌ی‌ زۆر زۆر كۆنه‌، ده‌گه‌ڕێته‌وه‌ بۆ چه‌رخی جیۆلۆژی یه‌كه‌م واته‌ (ئه‌ركی) چوار هه‌زار ملیۆن ساڵ به‌ر له‌ئێستا دروست بووه‌، پاشماوه‌ دێرینه‌كانی‌ قه‌ڵاكانی‌ (قه‌ڵای‌ كچێ) و (قه‌ڵای‌ قزڵجه‌) و (وێنه‌) ده‌گه‌ڕێنه‌وه‌ بۆ هه‌زاره‌ی دووه‌می پێش زایین و «لۆلۆ»ییه‌كان لێره‌ فه‌رمانڕوا بوون.
پێنجوێن مێژووی‌ نزیكی (400) چوار سه‌د ساڵ به‌ر له‌ئێستا ئاوه‌دانی‌ تیابووه‌، سه‌ره‌تا گوند بووه‌ سه‌ربه‌ ناحیه‌ی‌ (قزڵجه‌) قه‌زای‌ (گوڵ عه‌نبه‌ر _ واته‌ خورماڵ) دواتر ده‌بێته‌ ناحیه‌ سه‌ربه‌ قه‌زای‌ هه‌ڵه‌بجه‌، هه‌تا ساڵی 1959 ده‌كرێت به‌قه‌زا. ناوی‌ پێنجوێن ڕاو بۆچونی جیاواز هه‌یه‌ له‌سه‌ری‌ (له‌كاتی‌ خۆرهه‌ڵاتن پێنج وێنه‌ی‌ تێدا ده‌بینرێت هه‌تا خۆرئاوا بوون) و (له‌بنه‌ڕه‌ت دا پێنج دێ بووه‌، ئه‌مه‌ له‌ ڕاستی یه‌وه‌ نزیكه‌) و (پێنج جوله‌كه‌ ئاوه‌دانیان كردووه‌ته‌وه‌) و (ئه‌سكه‌نده‌ری‌ مه‌كدۆنی پاش سه‌ركه‌وتنی له‌ شه‌ڕی گۆگامێلا له‌ساڵی‌ 331 پ. ز له‌نزیك هه‌ولێر به‌سه‌ر دارای سێ یه‌می ئه‌خمینی، پێنج سوپای بچوك ده‌نێرێ بۆ ناوچه‌ی‌ میدیا و هه‌مه‌دان، ئه‌و ناوچانه‌ش ده‌خاته‌ ژێر ڕكێفی خۆی‌ هه‌تا ده‌گه‌نه‌ پێنجوێن ده‌ڵێن له‌ (پانج)ی گریكی یان یۆنانی یه‌وه‌ هاتووه‌).
جوگرافیای شاری‌ پێنجوێن له‌(پردی كه‌وڵۆس) ده‌ست پێده‌كات هه‌تا گوندی (میشیاو)ی ناوخوان ده‌كه‌وێته‌سه‌ر هێڵی درێژی‌ 46 پله‌ ڕۆژهه‌ڵات و هێڵی پانی 35،9 پله‌ باكوری‌ هێڵی كه‌مه‌ره‌یی و 1137 مه‌تر له‌ئاستی ڕووی ده‌ریاوه‌ به‌رزه‌، كۆی ڕوبه‌ری‌ پێنجوێن 1129 كیلۆمه‌تر چوارگۆشه‌یه‌.
مه‌ڵبه‌ندی قه‌زای‌ پیچنجوێن 203 كیلۆمه‌تر چوار گۆشه‌یه‌.
ڕوبه‌ری‌ ناحیه‌ی‌ ناڵپارێز 282 كیلۆمه‌تر چوار گۆشه‌یه‌
ڕوبه‌ری‌ گشتی ناحیه‌ی‌ گه‌رمك 642 كیلۆمه‌تر چوار گۆشه‌یه‌
وێرای قه‌زاكه‌ خۆی دوو ناحیه‌ و 173 گوند له‌سنوری‌ پێنجوێن دایه‌ و به‌رزترین لوتكه‌ چیا زنجیره‌ شاخه‌كانی‌ سریستان 2557 مه‌تر و شاخی سوركێو 2564 مه‌تر و ناوچه‌یه‌كی شاخاوی‌ سه‌خت و دژوار و به‌ئاوێژگه‌یه‌، یه‌كێك له‌ ناحیه‌كانی‌ ئه‌م قه‌زایه‌ ناحیه‌ی‌ گه‌رمكه‌.

ناحیه‌ی‌ گه‌رمك
ئه‌م ناحیه‌ به‌ مه‌رسومی ژماره‌ (719) له‌ساڵی 28/12/1960 به‌ئیمزای‌ سه‌رۆك وه‌زیرانی عێراق (عه‌بدولكه‌ریم قاسم) كراوه‌ به‌ ناحیه‌ و 1258 مه‌ترله‌ ئاستی ڕووی ده‌ریاوه‌ به‌رزه‌ و (91) گوند له‌سنوره‌كه‌ی دایه‌ له‌كاتێكا پێنجوێن خۆی 43 گوند له‌سنوره‌كه‌ی دایه‌ و ناحیه‌ی‌ ناڵپارێز 59 گوند.. یه‌كێك له‌گونده‌كانی‌ ناحیه‌ی‌ گه‌رمك له‌بناری‌ شاخی مامه‌شا كه‌ گه‌رمكی له‌ ئامێز گرتووه‌، گوندی‌ (شیو گوێزان)ه‌ له‌ چه‌می‌ شلێر.

گوندی شیوگوێزان _ بناری‌ چیای‌ هه‌ڵاڵه‌ برایمان
چه‌می شلێر له‌ سنوری‌ خاكی پێنجوێنه‌ له‌گه‌ڵ (ناوخوان) هاوسنوره‌ و ناوچه‌یه‌كی گه‌وره‌ و به‌رفراوانه‌، به‌هۆی زۆری گوڵه‌ شلێر، ناویان ناوه‌ چه‌می شلێر.
«مام نامیق حه‌سه‌ن قادر» ته‌مه‌نی‌ 78 ساڵه‌ و یه‌كێكه‌ له‌ ڕیش سپی یه‌كانی‌ ئه‌م گونده‌، ئه‌و سه‌باره‌ت به‌ شیوگوێزان به‌گوندستانی‌ ڕاگه‌یاند : له‌ بناری‌ هه‌ڵاڵه‌ برایمان بۆ خواره‌وه‌، ڕه‌زه‌ گوێز، یان دارستانی‌ گوێزی پێنجوێنی كورده‌واری‌ هه‌یه‌ و له‌ناو شیوێكی به‌ ئاوێژگه‌دایه‌، به‌و ناوه‌وه‌ ناونراوه‌، مێژووه‌كه‌ی‌ ده‌گه‌ڕێته‌وه‌ بۆ سه‌رده‌می میده‌كان، كه‌ پایته‌خته‌كه‌یان «هه‌گباتا» هه‌مه‌دانی‌ ئێستا بووه‌ و باوباپیرانی كوردن، له‌م بناره‌ی‌ لای‌ ئێمه‌ هه‌تا شاخی (گامارۆ) و (سریستان)ی ناوخوان، شارێكی گه‌وره‌و به‌هێز و فراوان بووه‌ كه‌ ماده‌كان حكومڕان بوون، له‌چیاكان قه‌ڵا و شوێنی نیگابان و سه‌ربازگه‌یان بووه‌ له‌قه‌ڵای‌ كچێ، له‌ گوندی قزڵجه‌ی‌ نزیك پێنجوێن، له‌ گوندی وێنه‌ و دارۆخان، لێره‌ له‌ گوندی ئێمه‌ شوێنه‌وارێكی گه‌وره‌یان ماوه‌، گۆڕستانێك پڕ له‌ كوپه‌ی‌ ئیسك و پروسك، كێلی گه‌وره‌ گه‌وره‌ی‌ نه‌خشدار، كه‌ به‌زه‌لام نابزوێ، مێژویه‌كی زۆر دێرینی هه‌یه‌ ئێمه‌ زاره‌وزار بیستومانه‌، خۆزگه‌ مێژوونوسانی كورد ده‌ستیان ده‌كرده‌وه‌ به‌ نوسینه‌وه‌ی‌ مێژووی‌ وڵاتی‌ كورد و نه‌ته‌وه‌ی‌ كورد له‌ باشوری‌ كوردستان. كا (عه‌بدوڵای مام ڕۆسه‌می سه‌عی) ی دانیشتوی شیوگوێزان هه‌ڵی دایه‌ و به‌گوندستانی‌ گوت : 300 سێ سه‌د ساڵێ به‌ر له‌ئێستا ئاوه‌دانی‌ تیا بووه‌، ئێڵ و هۆزه‌كانی‌ كورد، له‌نێوانی‌ ڕۆژهه‌ڵات و باشوری‌ كوردستان هات و چۆیان كردووه‌، سنوری‌ ده‌سكردی‌ داگیركه‌رو بێگانان نه‌بووه‌ له‌ساڵی 1898 حه‌مه‌ڕه‌شی خان قادرخان عه‌وڵا به‌گ بارام به‌گ كوڕی سڵه‌مان به‌گی بانه‌ له‌ شیوگوێزان له‌دایك بووه‌. به‌ر له‌وسه‌رده‌مانه‌، به‌هۆی‌ زوڵم و زۆری نادر شای ئه‌فشار له‌سه‌ده‌ی‌ 17 و 18 ی زاینی و ده‌ربه‌ده‌ركردنی‌ ئێل و خێل و هۆزه‌كانی‌ كوردی پیاده‌ ده‌كرد، بۆیه‌ حه‌وت بنه‌ماڵه‌ له‌ناوچه‌ی‌ هه‌نگه‌ژاڵی‌ شاری‌ بانه‌ی كوردستانی‌ ڕۆژهه‌ڵاته‌وه‌ په‌نا بۆ ئه‌م گونده‌ ده‌هێنن (بنه‌ماڵه‌ی‌ فه‌ره‌جی مه‌حموی‌ فه‌رهاد) و (حه‌سه‌ن قاله‌) و (سه‌عه‌ كۆیك) و (كوێخا كه‌ریم فه‌یزوڵا) و (مارفی ئه‌حمه‌د ڕه‌حمان) و (ساڵحی قووڵه‌ سێرێ) و (فه‌ته‌ سمایل) لێره‌ ئیدی ماونه‌ته‌وه‌ و چه‌ند جارێ‌ جێ گۆڕكێیان كردووه‌ و سه‌رئه‌نجام نیشته‌جێ بوون.
(نامیقی خوا كه‌ره‌می فه‌یزوڵا)ی دانیشتووی شیوگوێزان به‌گوندستانی‌ نوێی گوت : لێره‌ به‌رگدرو دامه‌زرا ناوی‌ وه‌ستا عه‌لی بو كه‌واو پانتۆڵ و ده‌رپێ ی خام و بازه‌ی‌ بۆ ده‌دورین، مام عارفێ بوو چه‌قۆكه‌ی‌ ئێستاش ماوه‌ سه‌رتاشمان بوو، مه‌ولوی‌ جه‌راح پیشه‌وه‌رو ته‌ونكه‌ر بوو و جه‌ڕاحیشی ده‌كرد، مام تۆفیقی حسه‌ینیش دختۆری دان بوو به‌گاز و پلایس دانی ده‌رده‌هێنا، لێره‌ ئاشی ئاو نه‌بوو، پارشێوان «گه‌نم»مان بارده‌كرد بۆ (ئاشه‌ بوجاڕی‌)ی شاری‌ بانه‌ له‌وێ ده‌وه‌ن به‌ئاشمان ده‌كرد و بانگی خه‌وتنان ده‌گه‌ڕاینه‌وه‌.

پور مریه‌م نمونه‌ی‌ ژنی زه‌حمه‌تكێش
له‌هاوینی ساڵی 1975 به‌نه‌ریتی ژن به‌ژن (مرێمی ساڵحی مام ئه‌حمه‌د) ده‌ده‌ن به‌ خه‌لیفه‌ حه‌سه‌ن ڕه‌شی، بوك به‌ سه‌روبه‌ستی كڵاوزه‌ڕو لاگیره‌ و نقێمی جوان و لاره‌ پێچ و جل و به‌رگی ئاڵ و واڵاوه‌ تێته‌ ماڵی‌ خه‌لیفه‌، مه‌نجه‌ڵی گه‌وره‌ی‌ پڕ له‌ «په‌رشه‌» لێنراوه‌، ئیدی پور مرێم خۆی‌ گوته‌نی كه‌ به‌گوندستانی‌ گوت : مامه‌ دڵه‌ به‌خوا ژیانمان هه‌مووی‌ زه‌حمه‌تكێشی و ڕه‌نج بێوه‌ری‌ بوو، له‌لایه‌ك به‌رخه‌وان و كاره‌وان له‌لایه‌ك بچۆ بۆ ئاڵف و دره‌ و، ڕۆژانه‌ یانزه‌ كۆڵم له‌و شاخه‌ ده‌هێنایه‌وه‌ گوند، گه‌ڵامان ده‌كرد، مه‌ڵۆی گه‌ڵام ده‌نایه‌وه‌، گه‌ڵام داده‌هێنا، لۆیه‌ی‌ پوش و گه‌ڵاو دارو چیلكه‌مان ده‌كرد، كێشه‌م ده‌كرد، گێره‌م ده‌كرد، له‌ولاشه‌وه‌ خه‌لیفه‌ زیكر و فیكری‌ ده‌كرد، خه‌لیفه‌ حه‌سه‌ن ڕه‌شی هه‌ڵی دایه‌ و به‌گوندستانی‌ گوت : ڕاست ده‌كات مرێم، له‌گه‌نجیمه‌وه‌ بوم به‌خه‌لیفه‌ و ته‌ریقه‌تی قادریم وه‌رگرتووه‌، (10 ) ساڵ ده‌روێش بووم تاكو بوم به‌ خه‌لیفه‌، له‌ ئاوایی (ته‌یمه‌ز) ئاسنگه‌رێ بوو (حه‌مه‌ ئاشه‌وان) زه‌رگ و شمشێر و خه‌نجه‌ری‌ بۆ دروست ده‌كردین، دوو ده‌ف ژه‌نمان بوو شه‌وانه‌ له‌مزگه‌وت زیكر و فیكرمان ده‌كرد.
شیوگوێزان و ئاوه‌دانی‌ و ڕاگواستن
(فایه‌ق حه‌مه‌مراو) ئه‌نجومه‌نی‌ گونده‌ ئه‌و به‌گوندستانی‌ گوت : كاك دڵشاد به‌خوا ئاوایی (18جووت گا)ی تێدا بوو به‌ (گا) جوتمان ده‌كرد (نیر) و (ئامور) و (مژان) و (ئێره‌قه‌ «واته‌ هه‌وجاڕ») و(ده‌سته‌ دوو)مان بوو، دره‌ومان وه‌گه‌ل ده‌كرد، شیوگوێزان كه‌رتی‌ كشتوكاڵی‌ ژماره‌ (78)ه‌، به‌ناوی‌ «22» جوتیاره‌وه‌یه‌ و هه‌ر جوتیارێك «20» بۆ «22» دۆنم زه‌وی خۆی‌ هه‌یه‌. له‌ساڵی 1996ه‌وه‌ «75» كانیاومان وشكی كردووه‌، بڕوا بكه‌ یه‌ك دڵۆپ ئاوی تێدا نه‌ماوه‌، ئه‌مساڵ (2019) هه‌مووی ژیایه‌وه‌ هه‌تا ئێستا له‌پێنجوێن (1250)ملم باران باریوه‌ «ئه‌مه‌ مه‌به‌ستی هه‌تا كۆتایی مانگی شوباتی 2019»ه‌یه‌، لێره‌ ئه‌شكه‌وتێكمان هه‌یه‌ به‌ (میره‌ پاشا) به‌ناوبانگه‌ به‌ردێكی له‌سه‌ره‌وه‌یه‌ لێی نوسراوه‌، ئی میرو پاشاكانی‌ بابانه‌كانه‌ خه‌له‌و خه‌رمانی‌ باش، نیسك و نۆك و توتنیشمان ده‌كرد، جگه‌ له‌به‌خیوكردنی‌ هه‌نگ و هه‌نگی كێوی و مه‌ڕوماڵات و په‌له‌وه‌ر، ژیانمان زۆر خۆش بوو، به‌داخه‌وه‌ ڕژێمی داگیركه‌ری‌ به‌عسی عه‌ره‌بی شۆڤێنی له‌پایزی 1978 به‌ بیانوی پشتێنه‌ی‌ ئه‌منی ڕای گواستین. (حاجی محه‌مه‌دی حاجی ڕه‌سوڵی ئاوایی ته‌یمه‌زی خوارمان) ئێستا ده‌فته‌ره‌كه‌ ماوه‌ ناوی‌ ئه‌و ماڵانه‌ی‌ نوسیوه‌ له‌ شیوگوێزان كه‌ ڕاگوێزراون و به‌ماڵی ته‌واو حیساب كراون، 54 خێزان ڕاگوێزران بۆ ئۆردوگای‌ زۆره‌ ملێی شانه‌ده‌ری‌، بێ كاری‌، هه‌ناسه‌ ساردی، نه‌خۆشی، غه‌ریبی وه‌ته‌ن، ئه‌مانه‌ هه‌ناسه‌ی‌ له‌به‌ر بڕین، زۆرمان له‌تاو نیشتمان مرد، خانوه‌كانیان سوتاندین، به‌ تی ئێن تی كانیاو و مزگه‌وت به‌قورئانه‌وه‌ ته‌قاندیانه‌وه‌، سه‌ربازه‌كانی‌ ئومه‌ی‌ عه‌ره‌بی ده‌ستیان له‌قورئانیش نه‌پاراست، باڵنده‌ش لێره‌ كۆچیان كرد.

سه‌ره‌تای‌ شۆڕشی نوێ و قوربانییه‌كان
«عه‌لی مه‌ولود ڕه‌سوڵ» به‌داخه‌وه‌، به‌گاڵۆك ڕێ ده‌كا و له‌ منداڵییه‌وه‌ ئیفلیج بووه‌، به‌رگدروی گوند بووه‌ و قسه‌ خۆش و نهێنی پارێز و پشتیوانی‌ سه‌رسه‌ختی شۆڕش و پێشمه‌رگه‌ بوه‌ تا ئێستاش، ئه‌و به‌گوندستانی‌ گوت : ته‌ماشا بكه‌ برام، ئێمه‌ له‌كۆماری‌ كوردستان له‌ مهاباد به‌شداریمان كردووه‌ و سه‌رۆك كۆمارمان قازی محه‌مه‌دی نه‌مر بووه‌، (له‌شۆڕشی نوێ)یش دا له‌پایزی 1976 پاش نیوه‌ڕۆیه‌ك «ئه‌نوه‌ری‌ مه‌جی سوڵتان» گه‌نجه‌ پێشمه‌رگه‌ ئازا و نه‌به‌زه‌كه‌ی‌ شۆڕشی نوێ هات بۆ ماڵی‌ ئێمه‌ و مژده‌ی‌ شۆڕشی نوێی پێ داین، ئێمه‌ش پشتیوانی‌ خۆمان پێ دان.
پاشان شه‌هیدی «گومناو» و شه‌هیده‌ هه‌ناسه‌ سارده‌كه‌ی‌ كوردو كوردستان ماندو نه‌ناسه‌كه‌ی‌ شۆڕشی نوێ (ئه‌حه‌ چه‌قژی) له‌م وڵاته‌ هات و چۆی ده‌كرد، خۆشه‌ویستی جوتیارو گوندنشینان بوو، خه‌ڵكی گوندی چه‌قژی لای‌ تاسۆجه‌ی‌ سلێمانی‌ بوو، ئازاو بوێر، پیاوی شۆڕش و گه‌ل، هاته‌ لامان له‌ 12/4/1977 له‌گه‌ڵ (عوسمان مكڵی)و بڕێ پێشمه‌رگه‌ی‌ قاره‌مان له‌سه‌ر ئاوایی شه‌ڕێكی گه‌وره‌ و ده‌سته‌و یه‌خه‌یان له‌گه‌ڵ داگیركه‌ری‌ عه‌ره‌به‌ به‌عسیه‌كان كرد، ئه‌وان له‌باسكی میره‌پاشا و به‌رنان و قه‌ڵای‌ هه‌نگه‌ژاڵه‌وه‌ هێرشیان هێنا، پێشمه‌رگه‌ خۆ ڕاگر بوو هه‌تا دوای‌ بانگی عه‌سر «60» شه‌ست عه‌سكه‌ری‌ داگیركه‌ری‌ به‌عس كوژران، سێ سه‌رباز مابوو، یابه‌ یابه‌ ده‌گریان، تاكو ڕزگاریان بوو، دوو مانگ دوای‌ ئه‌م نه‌به‌ردیه‌ی‌ پێشمه‌رگه‌ كه‌ به‌سه‌رتاسه‌ری‌ كوردستان بڵاوبۆوه‌ و دوژمن لوتی شكا، ده‌ترسان له‌ناوی‌ پێشمه‌رگه‌، گیا درون بوو، گه‌لی ئاغا بوو، دوو كۆپته‌ر كه‌وتنه‌ ئاسمانه‌كه‌ی‌ سه‌رمان و ده‌ستیان كرد به‌ بۆردومانمان، (6) جوتیار بریندار بوو، ئیدی ڕۆسه‌م به‌گی قلیجه‌ مه‌حموی سه‌ی‌ زایه‌ و تایه‌ری‌ حاجی عه‌زیزی ده‌رمیانه‌ و عه‌به‌ی‌ مه‌لا (هونه‌رمه‌ند و شه‌هید) ده‌هاتن، شه‌هید عه‌لی عه‌سكه‌ری‌ سوپاسالاری‌ (ه . پ . ك ) و د. خالیدو شێخ بابه‌ حسێن، (3) شه‌و لێره‌ مانه‌وه‌، ئه‌وه‌ش ده‌گێڕمه‌وه‌ ئیتر قسه‌ ناكه‌م له‌ساڵی 1979 حه‌سه‌ن قاله‌ و قاله‌ی‌ حه‌مه‌گۆڵێ و عه‌به‌ی‌ كوڕه‌زای‌ هاتبون خه‌له‌یان شاردبۆوه‌، حه‌یف عه‌سكه‌ری‌ عێراق لێ یان هاتنه‌ ده‌ست و حه‌سه‌ن قاله‌یان شه‌هید كرد، ئێمه‌ خاوه‌نی‌ (10) شه‌هید و (6) كه‌م ئه‌ندام و (6) زیندانی‌ سیاسین.

ژیان و سه‌روه‌ری‌ و شیوگوێزان
ده‌ربه‌نی‌ چه‌می ته‌یمه‌ز، هاژه‌ و لرفه‌ی ئاوی سازگار و قاسپه‌ی‌ كه‌و و نه‌غمه‌ی‌ مه‌لی تێكه‌ڵ كردبوو، به‌ ده‌سه‌ڕاست باسكی یاڵه‌ گه‌وره‌ و به‌رده‌ ده‌روازه‌ و هه‌ڵاڵه‌ی‌ برایمان سه‌ربه‌ به‌فر و چه‌می سێفڵ و قاله‌ گرده‌ و میره‌پاشاو به‌رده‌ قنج و جوته‌ قه‌زوان و كه‌لی قه‌ڵای‌ هه‌نگه‌ژاڵ و داری‌ سڵه‌مان به‌گ و دێمی عه‌به‌ی‌ سه‌لیم و به‌رده‌ دێگه‌ڵ ده‌وری‌ شیوگوێزانیانداوه‌، مێژوویه‌ك ده‌ست و په‌لوپۆ ته‌زیوو، وه‌ك دره‌خته‌ ڕوته‌ڵه‌ په‌ل و پۆ ته‌زیوه‌كان، هه‌موویان ده‌یانگوت ڕه‌گمان داكوتاوه‌ و لێره‌ ناڕۆین، ئێره‌ كوردستانه‌. سه‌رزه‌مینی ته‌نها و ته‌نها كورده‌ و كه‌سیتر نا، ده‌گه‌ین ….. به‌ ترۆپكی ئازادی و سه‌رفرازی و مێژوو ده‌گه‌ین. به‌سه‌رچوو ئه‌و ڕۆژه‌ی‌ سه‌ر نه‌وی كردن له‌ ئاستی دوژمن . ئێستا سه‌ربه‌رزكردنه‌ بۆ ژیانی نوێ و كوردستانی‌ نوێ.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئاوایی مه‌مله‌حه‌_سه‌نگاو _ ناو زه‌نگنه‌

هۆزی گه‌وره‌ی‌ زه‌نگنه‌ و مێژوو یه‌كێك له‌هۆزه‌ گه‌وره‌و به‌ناوبانگه‌كانی‌ «هه‌رێمی ...