سەرەکی » چاوپێکه‌وتن » تەوارێك لە گەرمیانەوە بە قەندیلدا هەڵگەڕا

گفتوگۆی نەرمین عوسمان لەگەڵ تابانی شێخ عەبدوڵڵا

تەوارێك لە گەرمیانەوە بە قەندیلدا هەڵگەڕا

چەند ژنە کەسایەتییەکی ناسراو لە مێژووی کورددا هەن کە لەبواری جیاجیادا کەسانی لێوەشاوەو چالاک بوون، بەڵام هەرگیز ئەو چالاکییانەیان نەکردووەتە بانگەشەو کایەیەک بۆ خۆناساندن، لەوبارەیەوە لە ماوەی رابردوودا خاتوو نەرمین عوسمان کە بۆ خۆشی ژنێکی چالاکی بواری پەروەردەو تێکۆشەرێکی کایەی سیاسیشە زنجیرەیەک سەردان و بەسەرکردنەوەی دەستپێکردووە بۆ گفتوگۆو هەڵدانەوەی لاپەڕە پرشنگدارەکانی ژیان و کارو چالاکیی ئەو خانمانەی کوردستان کە وەک سەربازی ون خزمەتێکی زۆریان بە چەند نەوەیەک کردووە لە بواری جیاجیادا، بەڵام نەوەی نوێ وەک پێویست ئاشنا نییە بە بەخشش و کۆششە مرۆڤدۆستامەکانیان، بۆیە بەسوپاسەوە خاتوو نەرمین پوختەی ئەو گفتوگۆیانە و ئەرشیفی وێنەو بیرەوەرییەکانی ئەو خانمە چالاکوانانە دەنووسێتەوەو بۆ دەربازکرنیشیان لە فەوتان و لەبیرچوونەوە، پێشکەشی کوردستانی نوێ-ی دەکات و کوردستانی نوێش ناوبەناو وێنەکان و چیرۆکی ژیانی پڕ بەخششی ئەو کەسایەتییانە بڵاودەکاتەوە.

ژیانی رۆژانەی منداڵێك وەك هەموو منداڵەكانی گەرمیان بە هێمنی و بەختەوەری و لەباوەشی دایكێكی میهرەبان و نێوان خوشك و براكانی و منداڵانی دەڤەرەكەی بەڕێ دەكرد، بەڵام قەدەر و رۆژگاری سەخت لەخەوێكی قوڵی منداڵی بەئاگای دەهێنێ و سەیر دەكات تەمەنی لاوێتیشی بەسەرچووە و بەهەگبەیەك خەمی قورسەوە و پشتی چەماوەتەوە، كاتێ پاڵەوانی ئەم داستانە سەرگوزشتەی ژیانی بۆ دەگێڕامەوە، فرمێسكەكانی بەڕێژنە دەكەوتنە خوارەوە، دەمویست رێگا لە فرمێسكەكانی بگرم، بەڵام نەمدەتوانی، دەتوت لەو ساتە وەختانەی رووداوەكانی كارەساتی جینۆسایدی ئەنفال و لە دەستدانی (7) خوشك و برای تەمەن پەپولەیی، رۆح فریشتەییدا رێدەكات.
ئەو خاتوونە خاتوو (تابان عەبدوڵڵا تەیب — گەرمیانی)ە، لە (27 / 6 / 1972) لە ( ناحیەی قورەتو ) ی سەربە شاری خانەقین چاوی بەدونیا هەڵهێناوە، لەساڵی (1975) دوای ئاشبەتاڵ ئاوارە دەبن و دەگوێزرێنەوە بۆ باشووری عیراق بۆ ناحیەی (فەجر)، بەهۆی باپیرییەوە كە شەهیدی شۆڕشی ئەیلول بووە.
لەساڵی (1979) دەگەڕێنەوە بۆ كوردستان و لە كەلار نیشتەجێ دەبن.
لەساڵی (1982)دا دەچێتەوە بەر خوێندن لە شاری كەلار لە قوتابخانەی ئەڵوەند. لەساڵی (1983) كاتێك باوكی دەبێتە پێشمەرگە، دوای ماوەیەك بەدوو جێبی سەربازیی دەچنە سەر قوتابخانەكەی و خۆی و پەخشانی خوشكی (كە دووانە بوون) و لە دوو دەوامی جیاوازدا خوێندوویانە، هەردووكیان دەبەنە (ئەمن)ی كەلار، دەبینن دایكیشیان لەوێ دەبێ، دایكی دووگیان دەبێ و ئەمنەكە لەدایكی دەپرسێت: كوا هاوسەرەكەت؟ ئەویش دەڵێت: نازانم ، ئەمنەكە دەڵێت: « ئەی خۆ ئەو سكەت لە من نییە؟!»، دواتر بەڵێننامەیەك بە دایكی پڕ دەكەنەوە كە بچێت باوكی بهێنێتەوە وەك باسی كرد: «هەر ئەو شەوە شارمان بەجێهێشت و چوینە شاخ لە گوندی وڕێڵەی سەربە ناحیەی پێباز كە سنوری تیپی (53) ی شێروانە بوو و لەژێر دەسەڵاتی شۆڕش بوو ماینەوە».
لەوێ جارێكی تر دەچێتەوە بەر خوێندن لە خوێندنگەی شۆڕش، تا ساڵی (1988) لەهەمان شوێندا ماونەتەوە، ئیتر شاڵاوەكانی ئەنفالی بەدناو دەستی پێكردووە و ناوچەكەیان دەكەوێتە بەر شاڵاوەكە، كە سنووری جوگرافی ناوچەكەیان دەكەوێتە نێوان جەیش و جاش، هەروەها دوا خاڵی كشانەوەی پێشمەرگە بووە.
خاتوو تابان بەدەم گریانێكی پڕ زامەوە وتی: «من خوشكێكی جمكم هەبوو، بەزۆر بە منداڵی بەشوویانداو منداڵێكی بچووكی هەبوو، مێردەكەشی پێشمەرگە بوو بە یەحیای جیهاز ناسراوە، باوكم و دایكم بڕیاریاندا بۆ سەلامەتیان و رزگار بوونیان لە كوشتن و زەحمەتی، ئەو خوشكەم و (4) خوشكی ترو دوو برام بگەڕێنەوە بۆ كەلار، خۆشم و دوو خوشكی بچووكیشم ماینەوە، دایكم چل رۆژ بوو منداڵی ببوو، من مامەوە بۆ هاوكاریی دایكم.
خاتوو تابان بەردەوام بوو لە گێڕانەوەی ئازارەكانی و وتی: «لادێكەمان چۆڵ كرابوو، بەرۆژ دەڕۆیشتین بەهۆی تۆپبارانەوەو بە شەویش دەگەڕاینەوە. ئێمە بۆ ئەو خوشك و برایانەمان دەگریاین، ئەوانیش بۆ ئێمە، نەشمان دەزانی چارەنووسیان چی بەسەر هاتووە، كەس نەبوو هەواڵێكمان پێ بڵێت»، هەروەها وتی: «جارێك جاشێك بەناوی (س.د) هات بۆ لامان، كە لە ژێرەوە پەیوەندیی بە شۆڕشەوە هەبوو، نامەیەك و هەندێ چەك و تەقەمەنیی هێنابوو بۆ (سەڵاح تاڵەبانی) كە ئامۆزای باوكم بوو، بەرپرسی ناوچەی شۆڕشگێراِن بوو، كاك سەڵاح لەوێ نەبوو، ئیتر ئەو پیاوە چەك و تەقەمەنییەكانی بەجێهێشت و نامەكەی بردەوە، لە دواییدا زانیمان كە ئەو نامەیە هەواڵی منداڵەكانی ئێمەی تێدا بووە».
خاتوو تابان ئەوەشی گێڕایەوە:»وەك گێڕاویانەتەوە بۆمان ، خوشك و براكانم بە تراكتۆر گەڕابوونەوە، كاتێك دەگەنە گوندی عیسایی نێوان تازەدێ و ناحیەی باوەنوور، هەلیكۆپتەرێك دەچێتە سەر تراكتۆرەكەیان و ناهێڵێ دابەزن، هەركاتێ ویستبێتیشیان بێنە خوارەوە تەقەی لێكردوون تا دەگەنە ناو رەبییەیەكی نزیك گوندی عیسایی، دوا خێزان دەبێ چاوەڕێی زیلی سەربازی دەبن بیانگوێزنەوە. شەو لەو ناوچەیە دەمێننەوەو داوا دەكەن بچنە ماڵی موختار، برای ژنی موختاریش لەلایەن پێشمەرگەوە كوژرابوو، سەرەڕای ئەوەش هەوڵیان دابوو یارمەتیی خوشك و براكانم بدەن، تەنها توانیبوویان خوشكێكم بگێڕنەوە بە بیانووی نەخۆشیی دەروونی، ئەوانی تر لە ماڵی موختارەكە هەڵدەگرن و دەیانبەنە سەربازگەی لیوای كەلار.
هەر ئەو بەیانییەش شەڕی عیراق و ئێران كۆتایی دێت و دوا بۆردومانی فڕۆكەی ئێرانی بۆ ئەو سەربازگەیە دەكرێ و وا دەزانن سەربازن و نازانن هەمووی گیراوەكانن و خزم و كەسەكانم لەوكاتەدا سەردانی خوشك و براكانم دەكەن، كوڕی ئامۆزایەكم بەر بۆردومانەكە دەكەوێت، ئیتر خزمان سەرقاڵی تەرمەكەی ئەو دەبن، بۆ بەیانی جارێكی تر نەنكم و خاڵم دەچنەوە لایان بە هەزار پاڕانەوە نەشیان هێشتووە دەستیشیان بەر دەستیان بكەوێت.
نەنكم پاڕاوەتەوە داوای باوەشێكی كردووە، پۆلیسەكان بواریان نەداوە، پەخشانی خوشكم داوای میوە و شیرو پیڵاوی لاستیك دەكات، دوای سەعاتێك كەمتر داواكارییەكانیان بۆ دەبەن.
دیارە ئەو رووداوانەیان بۆ گێڕاونەتەوەو ئەوانیش خۆیان ئاگایان لە هیچ نەبووە و وایان زانیووە كە سەلامەتن ‌و چونەتە جێگەی باشتر لەوان».
خاتوو تابان هەروەها دەگێڕێتەوە كە «مەلا شكور كە ئەویش پێشمەرگە بوو، تەواوی خێزانەكەی لەگەڵ خێزانی ئەواندا دەكەونە هەمان شوێن و پێكەوە دەگیرێن و دەبرێن، و دەڵێت: «دوای سێ ڕۆژ هەواڵەكەمان بۆ هات و پێمان زانی، ئەوەی راستی بێت بەمنیان وت، منیش نەمتوانی راستەوخۆ بە دایكم بڵێم، دایكم تازە زەیستان بوو، چل رۆژ بوو منداڵی ببوو، باوكیشم لامان نەبوو لەناو پێشمەرگە بوو، بۆیە هەر بەتەنها ئەو خەمە گەورەیەم هەڵگرتووە، دوای چوار رۆژ بەهۆی كشانەوەی پێشمەرگە و تۆپبارانی بەردەوام بەرەو قەندیل پاشەكشەمان كرد.
(باوكم پارتیزان بوو، بە پارتیزانیش لای شەهید حەمەڕەش مایەوە)، بەهەمووان نزیكەی (500) پێنج سەد خێزان دەبووین، لە رانیەوە بەرەو قەندیل رۆیشتین.
دایكم تەندروستی زۆر خراپ بوو، تووشی خوێنڕیزی بوو بوو، هەرچۆنێك بێت بەنهێنی من و دایكمیان گەیاندە ماڵێكی خزمان لە تاسڵوجە و لەوێ ماینەوە، دایكم دوای چارەسەر چوو بۆ لای ئەو خوشكەم كە پاش ماوەی ئەنفال بوو، ئەوان لەوێ یەكیان گرتەوە، منیش لە تاسڵوجە لەو ماڵەی خزممان مامەوە بە نهێنی، هەردوولامان ئاگامان لە باوكم نەبوو، دوای دوو مانگی پڕ ئازار و نەهامەتی، لەرێگای رێكخستنی ناو شارەوە لەگەڵ دایكم ئاگامان لەیەك بوو، هەوڵمان دەدا یەك بگرینەوە لەگەڵ باوكمدا، ئەوەبوو ماوەیەی لە تاسڵوجە مامەوە، زۆرم ناِرەحەتی بینی، دەبوایە بە رۆژ لەژێر زەمیندا خۆم بشارمەوە، ماڵەكەیان كراوە بوو و كچیان نەبوو، لە دراوسێوە دەبینراین و دوو دراوسێشیان جاش بوون. تەنانەت چوونم بۆ دەستشۆر‌و سەرشۆریی ئەستەم بوو، تەنها بە شەوان تۆزێ هەوای ئازادیم هەڵدەمژی. دوو مانگی تەواوم لەوێ پڕ بوو لە بەدبەختی و تەنهایی، لەمانگی (7)ی ساڵی (1988) مانگی رەمەزانیش بوو، رێكخستنی ناوشار هاتن و بەوشەی نهێنی نێوانمان، وتیان» خۆتان ئامادە بكەن دەتان بەینەوە بۆ قەندیل و شوكر باوكتان ماوە لەناو پێشمەرگەیە».
دوای چەند رۆژێك لە بناری قەندیل لە سوورە دێ لەگەڵ باوكم یەكمان گرتەوە، ماوەی یەك مانگ لەو شوێنە ماینەوە، ئیتر بەهۆی بۆردومانی زۆری رژێمەوە بۆسەر ناوچەكەو ترسی هێرش بۆسەرمان، شۆڕش بڕیاریدا بەسەر شاخی قەندیلدا سەربكەوین و لەوێوە ئاودیووبین بۆ دیوی ئێران و پێشیان وتین:» هەر خێزانە دەتوانێ نانی (15) رۆژ لەگەڵ خۆیدا بهێنێ، هەروەها سێ مەتر نایلۆن و راخەرێك»، چونكە بە كۆڵێ وڵاخەوە دەگوێزرایەوە، وڵاخیش كەم بوو».
خاتوو تابان بەردەوام بوو لە گێڕانەوەی ئەو ساتە تاڵانە و دەڵێت: من بەجوتێك پێڵاوی ئەدیداس و شەڕواڵەوە بەرەو سەفەرێكی تری نادیار بەڕێ كەوتین، قەندیل بۆ ئێمە زۆر نامۆ بوو، لەو كەشە سەرمایەی شاخی قەندیل رانەهاتبووین و زۆر لامان زەحمەت بوو، ئیتر ئێمە و چەند ماڵێكی تر سەركەوتن و دابەزینمان لە قەندیل یەك مانگی خایاند، بەشەو بەڕێ دەكەوتین و بەرۆژ لەژێر نایلۆنەكە لەسەرما و لەترساندا خۆمان دەشاردەوە، ئەو یەك مانگە ئاو بەر لەشمان نەكەوتبوو، جگە لە تەڕی بەفر نەبێت، بەو چلەی هاوینە ئەو شاخە بەفری پێوە بوو.
هەروەها ئاماژەی بەوەدا كە ئەو دوو پرچی درێژی هەبووە و پڕبووبوون لەڕشك و ئەسپێ و وتی: «دایكم هەردووكیانی بۆ قرتانم و بڕی، دەموچاومان بەهۆی سەرمای بەفرەوە سووتابوو، توێخێكی پێستی هەڵدابوو، یەك مانگ ئەو پێڵاوەی لەپێمدا بوو دام نەكەندبوو، تەڕ دەبوو و وشك دەبۆوە هەر لەپێما بوو. هەندێك جار لەتاو ئازاری قاچم دەگریام، دایكیشم زوو زوو دەیلاواندەوە بۆ منداڵەكانی و دەیوت» هەنگاو بەهەنگاو لێیان دوور دەكەومەوە» هێشتا بەتەواوی نەیدەزانی چارەنووسیان چی لێهاتووە، دوای مانگێك لەسەركەوتن و دابەزین، گەیشتینە ئەڵوەتان، كاتێ پێڵاوەكەم داكەند، هەر دە نینۆكەكەی قاچم لەگەڵ پێڵاوەكەدا هاتنە دەرەوەو منیان بردە نەخۆشخانەی حزبی دیموكراتی كوردستانی ئێران بۆ چارەسەركردنی برینەكانی قاچم و تائێستاش شوێنەكانی دیارە، لەو ماڵەی لایاندا دابەزین، داوای ئاوێنەیەكم كرد بۆئەوەی بزانم چیم بەسەر هاتووە، دایكم سوێندی دان كە نەمدەنێ، چونكە دەیزانی چەند شێوەم گۆڕاوە، لە ئەڵوەتان چوینە ماڵی پێشمەرگەیەك كە پێش ئێمە گەیشتبوون و شوێنی خۆیان گرتبوو و خەڵكی كەلار بوون، زۆر خزمەتیان كردین، دوای ئەوان چوینە ماڵی كاك دڵشاد تاڵەبانی (باوكی خاتوو بێگەرد)، هەم خزمایەتی لەگەڵ باوكمدا هەبوو، هەمیش بەیەكەوە پێشمەرگە بوون و لە (كەوپەڕ) دەژیان، یەك دوو رۆژ لایان ماینەوە و ئیتر لەگەڵ (500) پێنج سەد خێزانی تری گەرمیانی لە دێی (تركەش) نزیك (پیرانشار) ئێمەیان خستە كۆمەڵگەیەكی چادرگەیی ئاوارەكانەوە، چوار مانگ لەوێ ماینەوە و لە چادردا ژیانمان بەسەر دەبرد. ئێران رێگەی پێنەدەداین بچینە ناو شارەكانیان،
دوای چوار مانگ بەرگەیەكیان بۆ كردین و گواستیشینیانەوە بۆ كۆمەڵگەیەكی ئاوارەی تر لە نزیك شاری پاوە بوو، لەوێش هەر لەچادردا دەژیاین، ناوی ئۆردوگای سەریاسی بوو، بە كۆی گشتی یەك ساڵ ماینەوە، دایكم لەو ماوەیەدا دووگیان بوو، هەر لەناو ئەو ئۆردوگایەدا منداڵی بوو، لەتروسكایەكی چادرەكەوە بینیم دایكم كوڕی بوو، باوكیشم ئەوكات لامان نەبوو لە قاسمە ڕەش بوو، لەوێ مەشقیان بە پێشمەرگە دەكرد.
ئەو كوڕە دڵخۆشكەرە بوو بۆ هەموومان، خزم و كەسوكار ئەوەندەیان بە مێشكی ئێمەدا خوێندبوو كە باوكم بەو هەموو دەوڵەتەوە وەجاغ كوێر بێ، لەو چركەساتە هەموو ئەو یادەوەرییانەم كەوتەوە یاد، براكەشم بە نەخۆشی لەدایك بوو، بەپەلە و بەتەنها لەگەڵ خوشكە بچووكەكەم بردمان بۆ نەخۆشخانەی پاوە بۆ لای دكتۆر تاهیر، بێ باوك و بێ دایك رۆیشتم، دایكم بەردەوام بە ئومێدی ئەوە بوو هەواڵێكی خۆشی خوشك و برا ئەنفال كراوەكانم ببیستێ كە ناوو تەمەنیان بەم جۆرە بوو (پەخشان (16) ساڵان، ژیان (13) ساڵ ، مەهاباد (12) ساڵ ، ئازاد (11) ساڵ و دڵشاد (10) ساڵ و شنۆ (5) ساڵ بوون ، خوشكەزاكەشم (40) رۆژ بوو ).
لەو كاتانەشی لەساڵی (1989) كە لەئۆردوگا بووین، لەگەڵ دامەزراندنی یەكێتیی ژنان پەیوەندیم پێیانەوە كرد، چالاكییەكانی ئەوكاتانە سەردانی ماڵە شەهیدەكان بوو و نامیلكەیەكمان دەركرد بەناوی تەوار، ئەو رێكخراوە زیاتر بۆ چەند مەبەستێك كاری دەكرد، یەكێكیان كۆكردنەوەی ژنان بوو كە زۆربەی پیاوەكانیان یا پێشمەرگە بوون یا شەهید بوو بوون، هەروەها وەك هێزێكی بەرگریی پاڵپشتی هێزی پێشمەرگە بوو، پەیوەندیشم بە خاتوو وەسفیە (رەوان شاد)ەوە بوو، كە سەرپەرشتی ژنانی خانەقین و گەرمیانی دەكرد».
هەروەها گێڕایەوەو وتی: «لە ئۆردووگا جارێكی تر چوومەوە بەر خوێندن و تا پۆلی سێی ناوەندیم خوێند، لەگەڵیشیدا كاری دەستیم دەكرد و خۆشم فێری زمانی فارسی دەكرد.
ئیتر بەو شێوەیە تا ساڵی (1991) لە ئێران بووین ‌و دوای راپەڕین گەڕاینەوە بۆ كوردستان و لە شاری كەلار نیشتەجێ بووینەوە.
هەروەها بۆی گێڕامەوەو وتی : وەك یەكەم منداڵی گەورە (نۆبەرە) رۆڵی كچی گەورەی دایك و رۆڵی كوڕم بۆ باوكم دەبینی، نەمدەهێشت باوكم خەمی دیوەخانی بەتاڵ و كەم دەرامەتی بخوات و هەوڵیشم دەدا كە هەندێ لە بۆشایی خوشك و براكانمی بۆ پڕ بكەمەوە، لەپاڵیشیدا وازم لە كاری سیاسی و رێكخراوەیی و میدیایی نەدەهێنا، ژیانی خۆشم ئەوەندە پڕكردبوو، خەریك بوو لێی دەچوو».
لەساڵی (1992) دەبێتە ئەندام كەرتی كۆمیتەی رێكخستنی كەلاری یەكێتیی نیشتمانیی كوردستان، دواتر لەساڵی (1996) دەبێتە كارگێڕی كۆمیتەی كەلار.
ئەو ژنە خۆڕاگرە توانیی بكەوێتە چالاكی خۆی و خۆی بگرێ بەرامبەر ئەو هەموو نەهامەتییە و كۆڵی پێنەدا، هەرچەندە وەك هەستم پێدەكرد لەگەڵ گێڕانەوەی هەر قۆناغێك قرچە لە هەناوی دەهات.
بە هەڵبژاردن دەبێتە ئەندامی كۆنگرەی دووی یەكێتیی نیشتمانیی كوردستان لەساڵی (2001)، بە هەڵبژاردنیش دەبێتە ئەندامی كۆنگرەی سێی یەكێتیی نیشتمانیی لەساڵی (2010) و لەوێش بە ئەندامی ئەنجومەنی ناوەند هەڵدەبژێردرێت و لەپاڵیدا لەساڵی (2014) دەبێتە ئەندام ئەنجومەن لە مەكتەبی شەهیدان. شانبەشانی كاری حزبی و رێكخراوەیی و كاری راگەیاندن و نووسین دەكات، سەدان وتاری لە رۆژنامە كوردییەكاندا بڵاوكردووەتەوە لەسەر سیاسەت و پرسی جێندەری و جینۆساید و ئەنفال.
كتێبێكی نووسیوە بەناونیشانی دەستكەوتەكانی ژنانی باشووری كوردستان لەنێوان ساڵانی (1992- 2004) و لەساڵی (2015) بەچاپی گەیاندووە و (3) سێ كتێبیشی ئامادەن بۆ چاپكردن كە بریتین لە (كۆمەڵە وتار، رۆژمێری ژنی كورد، (100) ژنی رێچكە شكێنی كورد).
لەكاری رێكخراوەییدا بەردەوام دەبێ لەناو یەكێتی ژنان و لە كۆنگرەی دووەمی یەكێتی ژناندا هەڵدەبژێردرێت و دەبێتە لێپرسراوی لقی گەرمیانی یەكێتی ژنان.
لەساڵی (2004) دەبێتە ئەندامی سكرتاریەتی یەكێتی ژنان و بەرپرسی بەشی ئاماری سكرتاریەت تا ساڵی (2010).
لە نێوان (2002- 2003) دەبێتە سەرپەرشتیاری لقی یەكێتی ژنانی خانەقین و خورماتوو، یەكەم ژنیش بووە لەگەڵ پێشمەرگە بەخۆی و كامێراكەیەوە دەچێتە خانەقین و جەلەولا و سەعدیە لەكاتی پرۆسەی ئازادیی عیراق. دوای ئەمە لەلایەن سەرۆك مام جەلالەوە خەڵات دەكرێت.
خاتوو تابان لەدرێژەی قسەكانیدا گێڕایەوە و وتی: «لە خانەقین چەند جارێك بە دیداری مام گەیشتووم، پاڵپشتی و هاندانی ئەو وایكرد بەردەوام بم لە چالاكی، بەمەرجێك ئەوكاتە ئەو ناوچانە مەترسیدار بوون و بەتایبەت تاكە ژنیش بووم لە نێوانیاندا دوای ئەوە ژنی تریش هاتن».
تابان خان ئەندامە لە سەندیكای رۆژنامەنووسانی كوردستان لقی كەركوك – گەرمیان و دەستەی نووسەرانی رۆژنامەی (زەنگ) بووە لە كفری لە ساڵی (2003) و هەر لەهەمان ساڵیشدا بەڕێوەبەری یەكەم رادیۆی ژنان بووە كە رادیۆكە بە سەرپەرشتی یەكێتی ژنان بووە و تاكە رادیۆیی ژنان بووە لەسەر ئاستی كوردستان و عیراقیش.
هەروەها دەڵێت: «كارو چالاكی جۆراوجۆری ترم ئەنجامداوە یان بەشداریم تێدا كردووە، وەك خولی پێگەیاندنی هۆشیاریی سیاسی و كۆڕو كۆبونەوەی جیاواز لەسەر بابەتی جۆراو جۆر، دەیان خەڵات و رێزلێنانم لەسەر ئاستی كوردستان و عیراق و دەرەوە وەرگرتووە».
لە كۆتاییدا دەمەوێت بڵێم تەمەنی بیرەوەرییە تاڵەكانی خاتوو تابان (31) ساڵە، پێش ئەوە سەدان هیوا و ئاوات و خەونی گەورەی هەبووە، دڕندەكانی بەعس ویستیان خەونەكانی ئەنفال بكەن و لەگەڵ خوشك و براكانی لە عەرعەردا زیندە بەچاڵیان بكەن، بەڵام ئەو لە دوژمن و رۆژگارە تاڵەكان بەهێزتر و ئازاتر بوو، توانیی خەونی دوژمن لەچاڵ بنێ و زاڵبێ بەسەریدا، خاتوو تابان نموونەیەكی تری جوانی ژنە ئازاكانی گەرمیانە و نەیهێشت ژیانی لێ بهێننەوە یەك، بەڵكو پێچەوانەی ویستی ئەوان، ئەوەندە فراوانی كرد ئێستا دەتوانێت وەك تەوارێك لە فەزای ژیاندا سەما بكات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ژنێك لەجوانی و خانمە شۆڕشگێڕێكی بوێر

چەند ژنە کەسایەتییەکی ناسراو لە مێژووی کورددا هەن کە لەبواری ...