سەرەکی » وتار » لەتیف فاتیح فەرەج‌ » وەڵا نیەسم تاقەتی دوری

خورجە

وەڵا نیەسم تاقەتی دوری

1
ناونیشانی وتارەكە نیوە دێڕی شیعرو گۆرانیەكی هونەرمەند عەباسی كەمەندیە بە نێوی» نەتۆرێ‌ « هەڵبەت لێرەدا من باسی هونەرمەند عەباسی كەمەدنی ناكەم كە دیارە شایانی قسە لەسەر كردنی زۆرەو یەكێك بوو لە هونەرمەندە جوان و دیارەكانی كوردستان، قسەكردنی من لە سەر دوركەوتنەوەمانە لە یەكتر، لەسەر لێكترازانی پەیوەندیەكانمانە، لەو رۆژانە گوێم لە شیعرێكی عەرەبی بوو بەراوردی رابردوو ئێستای دەكرد، كۆی شیعرەكە قسە بوو لە سەر ئەوەی سەرەڕای نەداری و سادەیی ژیان لێ‌ ئەوسا پەیوەندی زۆر بەهێز تر بوو لە ئێستا، لە كوردستان دۆخێكی خراپ بۆ دابڕان و دوركەوتنەوە دروست بووە،ئەم دۆخە گرێدراوی كۆمەڵێك خاڵی نەرێنیە بۆیە ناكرێت هەڵوەستەی لە سەر نەكرێت، ئێمە پێویستمان بە جۆرێك لە پێكەوەیی و پێكەوە بونە بۆ تێپەڕاندنی ئەم بارو دۆخە .

2
كە بیرم لە پێكەوەیی دەكردەوە بیرم لای شیعرێكی بێكەسی شاعیر بوو كە بۆ مناڵانی وتوە بە ناوی هەرەوەز، شیعرەكە باسی مێرولەیەك دەكات كە بە دەست دەنكە گەنمێكەوە گیری خواردووە :
لە دەنكە گەنمێ‌ ئاڵاوە
زۆر بەدەستێوە داماوە
بەڵام مێرولەكە دەڕوات هاوڕێكانی دێنێت و دەنكە گەنمەكە دەگوازنەوە، داراش لەبەر خۆیەوە دەڵێ‌ :
گوتی هەر كارێ‌ گرانە
بە هەرەوەزی ئاسانە
قسە لەسەر ئەوەیە ئێمە خەریكە ئەو گیانی هەرەوەزیەمان تیا نامێنێت، خەریكە هەموو لەیەكتر قەڵس و كویس دەبین، پیاوانی ئاینیمان لە یەكتر دەخوێنن، رۆشنبیرو ڕۆژنامەوانمان، سیاسیمان هەر باس مەكە، شەڕەكەمان گوازتوەتەوە بۆ خواری خوارەوە، كەوتوینەتە ژێر كاریگەری دراماو میدیاو هەست و كەوتی ئەوانی ترەوەو لە خۆمان ناچین .
3
هیچ كاتێك هێندەی ئێستا ڕاگوزەرانە و سەرپێی سەیری شتەكانمان نەكردووە، هەواڵی رۆژانەی كوشتن هەڵوەستەمان پێناكات، زەرەرو زیانی لافاو، مەرگی ئازیزان،ئەو هەموو تەڵاق و جیابوونەوەیە، ئەمانە وەك هەواڵی سادە تەماشا دەكەین و هەڵوەستەلەسەریان ناكەین، لە ڕاستیدا ئەمە جۆرێكە لە نابەر پرسیارەتی یانی بە كورتی و كرمانجی ئێمە لە دۆخێكی مەترسیداری نابەرپرسیارەتیداین، كە نابێت وابین پێویستمان بە دۆخێكە بۆ ئاشتبوونەوەی گشتی، بۆ ساڕێژكردنی ئەو هەموو برینە كۆمەڵایەتی و سیاسیە، پێویستمان بە دۆزینەوەی خۆشەویستیە بۆ یەكتر .
لێبوردەیی و پێكەوە هەڵكردن پرس و راوێژی بابەتیانە بە یەكترو گەڕانەوە بۆ سەر رێگە راستەكەی پێكەوەیی،كوردستان لەو دۆخەی ئێستا رزگار دەكات كە خەریكە دەبێتە نەخۆشخانەیەكی گەورە، هەموو شارو شارۆكەكان لیپن لە نۆڕینگەی پزیشكی و دەرمانخانەو كەسیش بە دوای سەرچاوەی نەخۆشیەكەدا ناگەڕێت، لە سەر ئەو قسەیە خاوەن كۆمپانیاكانی دەرمان غەزەبمان لێنەگرن !!

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئاڵا و رۆم و شتی تر

كابرای تورك، ئەوەی بەزمی ئاڵاكەی كوردستانی نایەوە لە توركیا، دواتریش ...