سەرەکی » ساڵۆنی کوردستانی نوێ » ساڵۆنی کوردستانی نوێ

ساڵۆنی کوردستانی نوێ

لەم دووتوێیە دا

جیاواز لە کۆڕەکانی دیکەی ساڵۆنی کوردستانی نوێ، لەم دوو توێیەدا پوختەی سێ کۆڕی ساڵۆن بڵاودەکەینەوە کە هەریەکەیان لە رۆژێکی جیاوازدا بەڕێوەچووە.
*کۆڕی یەکەم کە لەرۆژی 21/4/2019 بەڕێوەچوو، تایبەتبوو بە خستنەڕووی کتێبێکی وەرگێڕدراوی خوالێخۆشبوو نووسەرو رۆژنامەنووس رەئوف حەسەن کە کتێبەکە لە ساڵی 2009-2010 بە زنجیرە لە رۆژنامەی کوردستانی نوێ-دا بڵاوکرابووەوە لەسەر بواری میدیای تەلەفزیۆنە بەناونیشانی (بۆ وێنە دەدوێین).
*کوڕی دووەمیش بۆ نووسەرو سیاسەتمەداری رۆژئاوای کوردستان عەلی شەمدین بەڕێوەچوو کە تایبەتبوو بە خستنەڕوو و ئیمزاکردنی کتێب بەزمانی عەرەبی سەبارەت بە رۆڵ و خەباتی سەرکردەی بێسەروشوێنکراو عەبدولڕەحمان زەبیحی (عولەما) کە لە رۆژی (16/4/2019) سازکرا.
*کۆڕی سێیەمیش جیاواز لە کۆڕەکانی تری ساڵۆن دوو بڕگەی لە خۆگرتبوو، بڕگەی یەکەمیان تایبەتبوو بە گێڕانەوەی ئەرشیفی رەسەنی کوردستانی نوێ لە ژمارە (0-ی رۆژی 12/1/1992-ەوە تا 31/8/1996) کە لەلایەن نووسەرو رۆژنامەنووس و شاعیر عیسا حسێن-ەوە لەفەوتان رزگارکرابوو و پارێزرابوو و رادەستی کوردستانی نوێی کردەوە.
بڕگەی دووەمی ساڵۆنی کوردستانی نوێ-ش کۆڕێکی شیعر خوێندنەوە بوو بۆ عیسای شاعیر کە گوڵبژێرێک لەو شیعرانەی خۆی خوێندەوە کە لەدوا دیوانیدا بە ناونیشانی
(مەمکە شیعر… بمکە بە نیشتمانی خۆت). ئەم کۆڕەش لە رۆژی 28/4/2019 وەک دوا کۆڕی ئەم وەرزەی ساڵۆنی کوردستانی نوێ بەڕێوەچوو.

ساڵۆنی کوردستانی نوێ

بەهەشتی رەئوف حەسەن بە كتێبی (بۆ وێنە دەدوێین) هاتەوە بۆ ساڵۆنی كوردستانی نوێ

ستران عەبدوڵڵا: كۆڕی ئەمڕۆمان ناساندنی ئەم كتێبەی مامۆستا (رەئوف حەسەن)ە كە بۆ وێنە دەدوێت، ئەم كتێبەی مامۆستا رەئوف حەسەن كە وەریگیڕاوە بەناوی (بۆ وێنە دەدوێین) كە چیرۆكی ئەم كتێبە زۆر بەكورتی بۆتان باس بكەم لەبەرئەوەی رەنگە بەشێكی باشی كتێیەكە روون بكاتەوە.
ئەم كتێبە چەند رۆژێكی تر لەشاری هەڵەبجە كۆڕێكی بۆ سازدەكرێت بەیارمەتی و سپۆنسەریی كاك ئازاد تۆفیق پارێزگاری هەڵەبجە. بەشێكی زۆرتان خوالێخۆشبوو مامۆستا رەئوف-ی دەناسن، وەكو چیرۆكنووسێك و وەك رووناكبیرێكیش، بەڵام یەكێك لە خەسڵەت و ئارەزووە هەرە گەورەكانی كاك رەئوف ئەوە بوو كە لەبواری رۆژنامەگەریدا كاربكات، هەتا ئاستی شەخسی خۆیشی چەند هەوڵێكی هەیە بۆ دەركردنی گۆڤار و رۆژنامە كە ئەم كتێبە لەسەر بواری تەلەفزیۆنە. لەتەلەفزیۆن دەدوێت. لەراستیدا كاتی خۆی ساڵی 2009 و 2010 مامۆستا رەئوف بەشێوەیەكی چڕ هەفتانە هاوكاریی كوردستانی نوێی دەكرد، بابەتی بۆ دەنووسی لەبوارە جیاجیاكاندا، بەڵام بەتایبەتی كە ئەم كتێبە لەسەر بواری تەلەفزیۆنە، كە كاتی خۆی دامان بە مامۆستا بۆ خوێندنەوە، بەڵام هاتەوەو وتی: كتێبێكی زۆر ناوازەیە و حەزەكەم وەری بگێڕم و ئێمەش ئەو تەكلیفەمان لێكرد كە هەر خۆی كاری وەرگێڕانەكەی بۆ بكات و لای خۆمان بە ئەڵقە بڵاومان كردەوە.
دواتر مامۆستا وتی خۆم دەیكەم بە كتێبێك، كتێبەكەمان دایە كە ئیتر چاپی بكات. دیارە كە باسی بازاڕی كتێب دەكەین لەساڵی 2011 و 2012، ئەوكاتە كتێب شتێك نەبوو كە مرۆڤ بتوانیت هەم چاپی بكات و هەم خۆشی نووسەرەكەی بێت، بەتایبەتی رەنگە هۆكارێكی مادیشی تێدابێت، بۆیە ئێمە كتێبەكەمان داوە بەخۆی، بەڵام بەسەریدا ئەم قەیرانە داراییەی كە كوردستانی گرتەوەو بواری میدیاش بەتایبەتی رۆژنامەی كوردستانی نوێشی گرتەوە.
مامۆستا ساڵی 2017 لە كافێی ئەمنەسوورەكە پڕۆژەیەكمان پێشنیازكرد كە پڕۆژەی چاپكردنی كتێب بوو، وەك بەتایبەتی كتێبی بواری رۆژنامەنووسی و ئەو شتانەی كە ئێمە هەستی پێدەكەین لە بواری رۆژنامەنووسی، فەرهەنگی سیاسەت و زۆر كتێبیش لەسەر ئەدەب و هونەر و بوارەكانی دیكە چاپ دەكرێت، هەموو كەرتێك لە كەرتەكان خاوەنی خۆی هەیەو سپۆنسەریی دەكات، بەتایبەتی ئەوەی كە بواری سیاسەت دەگرێتەوە. بەڵام بەداخەوە یەكیێك لەو بوارانەی كە زۆر بە زەحمەت سپۆنسەر دەكرێت و چاپ دەكرێت، كتێبە لەسەر بواری رۆژنامەنووسی، لەگەڵ ئەوەشدا زۆر كەم كتێبی ئەكادیمی و كتێبی ئەزموونی رۆژنامەگەریی هەیە. بۆیە ئێمە كە پێشنیازی ئەم كتێبەمان كرد، نموونەی چەند كتێبێكمان لە كوردستانی نوێ وەرگێڕاوە، هەم ئەزموونی رۆژنامەنووسەكان بووە، هەم ئەزموونی ئەكادیمیستەكان بوون لە بواری نووسین بۆ رۆژنامەنووسی، وردە وردە بەو قەیرانە داراییەش كە هەیە، كار دەكەین و لەهەر شوێنێك پارەیەك هەبێت، دەیخەینە ئەولاوە بۆئەوەی كتێبی پێ چاپ بكەین، كە ئەم بانگەوازەمان بڵاوكردەوە، مامۆستا بۆ بەیانییەكەی كتێبێكی هێنا و وتی كتێبەكەی خۆم دەهێنم كە كاتیی خۆی بە ئەڵقە لە كوردستانی نوێ بڵاوبۆتەوە، ئەگەر سندوقی پشتیوانی كتێبتان كەوتەكار، من پێم خۆشە ئەم كتێبە لێرە چاپ بكەین. بۆیە لێمان وەرگرت و وتمان مامۆستا تەنها ئاراممان لەسەر بگرە، وەكو عادەتی خۆمان هەر كە پارەیەكمان دەست بكەوێت بۆ سندوقەكە، خەڵكانێكی زۆر هاوكاریمان بكەن، ئەوا دەستبەجێ چاپی دەكەین.
ئێمە بۆیە ئەو سندوقەمان ناوناوە تا خەڵك كەمتر هاوكاریی رۆژنامەیەكی حزبی رۆژانە بكات كە پێویستە حزبەكە خۆی بیكات، بەڵام ئێمە ئەم شتەمان لێك جیاكردووەتەوە، ئەمە بۆ چاپی كتێبە، بۆیە وردە وردە كارمان لەسەر ئەوەكرد هاوكاریی بۆ چەند كتێبێك بكەین، بەداخەوە بەسەر ئەو ئامادەكارییەدا مامۆستا رەئوف وەفاتی كرد، لەراستیدا ئەم بەرپرسیارێتییە ئەخلاقییەی كە دەبوایە هەفتەیەك دوای ئەوە بیرمان لێكردەوە كە ئەم ئەركە جێبەجێ‌ بكەین و كتێبەكەی ئەو چاپ بكەین و هەڵمانگرت بۆ یادی چلەكەی، بەڵام لە یادی چلەكەیدا بەداخەوە چاپخانە كەمێك دواكەوت، واتە بۆ رۆژی چلەكەی فریانەكەوت، بۆیە وتمان ئەو بۆنەیەی كە كراوە بۆ چلەكەی، با لەخاوەنەكانی تێكنەدەین، خۆمان رۆژێكی بۆ تەرخان بكەین، ئەم رۆژە كەوتە رۆژی رۆژنامەگەریی كوردییەوە ئەگەر رۆژنامە كاغەزییەكان هێشتا باویان نەمابێت، بێگومان رۆژنامەگەریی بواری تەلەفزیۆن و رادیۆ زۆر زۆری ماوە.
ئەم كتێبەی مامۆستا لەم بوارەدا هاوكارێكی باشی رۆژنامەنووسانی بواری نووسین دەكات، وەك موحەریرەكانی و ژوورەكانی هەواڵ لە تەلەفزیۆنەكانداو وەك بێژەرەكان و پەیامنێرەكان كە چۆن لەو بوارانەدا كاربكەن و بنووسن.
ئێوە بەشێكی زۆرتان مامۆستا رەئوف حەسەن دەناسن، چ وەك چیرۆكنووس و دەشزانن وەكو كەسێك هەم چەپ بوو، هەم بیروبۆچوونی سیاسیی لەگەڵ حیزبەكەی ئێمە جیاواز بوو، پێویست ناكات ئێمە حاشا لەو راستییە بكەین، بەڵام لەگەڵ ئەوەشدا لەگەڵ هەر تیمێك و هەر گروپێكدا دەست و نێوانی خۆش بوو. لەگەڵ مامۆستا رەئوف حەسەن ئەو برادەرەی دەپاراست و دروستی دەكرد.
لەو چەند ساڵەی ڕابردوودا یەكێك بوو لەو هاوكارانەی لەگەڵ كوردستانی نوێ بووەو شانازییە بۆ كوردستانی نوێ هاوكاریی دەكردو نووسینەكانی بۆ بڵاودەكردەوە. هەروەها لە ساڵۆنی كوردستانی نوێش بەردەوام بەشداریی دەكرد. نەك هەر ئەوە، بەڵكو تیمێك لە هاوڕێ ‌و دۆستەكانی خۆشی هان دەدا لە دەرەوەی چاوی حزبایەتی لەگەڵ كوردستانی نوێ و راگەیاندنەكانی یەكێتیی نیشتمانیی كوردستان بەشداریی بكەن.
ئەم بەرهەمە دەتوانین بڵێین بەرهەمێكی هاوكاریی مامۆستایەو بوونی متمانەی مامۆستاش بوو بە كوردستانی نوێ، بەداخەوە چاپكردنەكەی نەبینی، ئێستا وا ئێمە پێشكەشی ئێوەی دەكەین كە لێرە ئامادەن ‌و بەشێكیشی پێشكەش بەو رۆژنامەنووسانە دەكەین كە لەبواری میدیای تەلەفزیۆنیدا كاردەكەن و بێگومان رۆڵی باشی دەبێت و هیواداریشم ئەگەر رۆژێك لەڕۆژان كەسێك یان دەزگایەك ویستی چاپی بكاتەوە، ئێمە وەك كوردستانی نوێ كێشەكان نییە، ئەوەی بۆ ئێمە گرنگە ئەوەیە ئەمجۆرە بەرهەمانە بڵاوببێتەوە، هەم لە ساڵۆنەكەش و هەم لە كوردستانی نوێ ئەركی ئێمە كتێب فرۆشتن نییە، چونكە ئەگەر حزبەكەمان خۆی شۆسیال دیموكرات بێت، دەبێت بەشێك لەو كارانەی كە دەیكات بزووتنەوەی رووناكبیریی بێت و ئەوەندەی منیش شارەزابم، یەكێتیی نیشتمانیی كوردستان لەو بوارەدا كاری زۆری كردووەو كوردستانیش هەر بەو رێچكەیەدا دەڕوات.
كتیبەكە دیاریی بەهەشتی مامۆستا رەئوفە بۆ ئێوەو دیاری كوردستانی نوێشە بۆ رۆژنامەنووسانی هاوپیشەمان كە لەبواری تەلەفزیۆن و رادیۆدا كاردەكەن و بێگومان دیاریشە بۆ رۆژی رۆژنامەگەریی كوردی كە هیوادارم جێگەی خۆی بگرێت و ئەگەر چەند جارێكی دیكەش چاپ بكرێتەوە، ئێمە پێمان خۆشەو حەزیش دەكەین، بەڵام نازانم لایەنی مەردایەتی و كەسوكاری چۆنە، بەڵام ئەوەی لەلامانە وەكو كوردستانی نوێ چاپمان كرد و هیواداریشم كە چاپكراو ئەوەندە زۆر ببێتەوە كە میدیاكاری كورد ئەم كەمیی كتێبە لەبواری فەرهەنگی رۆژنامەنووسدا بۆ پڕبكرێتەوەو بەتایبەتیش فەرهەنگی كتێبی بواری تەلەفزیۆن.
ئێمە كتێبەكە ئیمزا ناكەین، تەنها وەكو دیاریی پێشكەشی دەكەین و هیوادارم لەو بۆنەیەشدا كە لەهەڵەبجە دەكرێت كە بڕیاروایە دوو سێ رۆژی دیكە لەوێش بكرێت و پێشكەش ئامادەبووانی ئەوێ بكرێت، ئەگەر كاك كاروان ئەنوەر سەرۆكی لقی سلێمانی سەندیكای رۆژنامەنووسانی كوردستان قسە بكات دواتر كتێبەكەتان پێشكەش دەكەین.
كاروان ئەنوەر:
مامۆستا رەئوف برادەری هەموومان بوو، بەڵام هاوتەمەنی ئێمە نەبوو، بەڵام هاوڕێ بووین، ئەندامی كارای لقی سلێمانی سەندیكای رۆژنامەنووسانی كوردستان بوو، پێش ئەوەی رۆژنامەنووس بێت، چیرۆك نووسیش بوو، من خۆم یەكێكم لەوانەی كە سەرەتای چیرۆكی كوردی لە كتێبەكانی ئەوەوە فێربووم، واتە لەوەوە فێری تەكنیكی چیرۆك ‌و خوێندنەوەی چیرۆكی كوردی بووم.
مامۆستا كەسێكی زۆر تێكۆشەر بوو، كتێبەكەمان نەخوێندووەتەوە، بۆیە من ناتوانم لەسەر كتێبەكە قسەبكەم، بەڵام ئەوەندەی دەزانم كە بەحوكمی ئەو تێكەڵییەی كە سەردانی ئێمەی دەكرد، كە دەهاتەتە ئێرە، لە زۆربەی كۆڕەكانی ساڵۆنی كوردستانی نوێ بەشداردەبوو، كەسێك بوو لەگەڵ گەنجەكاندا هەڵسوكەتی گەنجانە بوو، لەگەڵ بەتەمەنەكانیش بەتەمەن بوو، قاڵبی سیاسیشی زۆر نەدەخوێندەوە، كەسێك بوو جگە لەكاری نووسین، وەك شۆفێری تەكسی كەسابەتی خۆی دەكرد. ئەمە كەم كەس هەیە بتوانێت ئەو دوو ئیشە پێكەوە كۆبكاتەوەو هەم شیكاریشی دەكردو هەم كاسبیشی دەكرد، هاوكات كەسێك بوو ئێمە چاوەڕێی ئەوەمان لێ نەدەكرد كە ئاوا بەبێدەنگی سەربنێتەوە كە ئەوە بۆ ئێمە زۆر ناخۆشبوو كە هەر هیچ نەبێت میوانێكی ساڵۆنی كوردستانی نوێ لە ئێمە رۆیشت.
مامۆستا یەكێك بوو لەرووناكبیرەكانی هەفتاكانی سەدەی پێشوو، كۆمەلێك دەمووچاو لێرە دەبینم دكتۆر و كاك حەمە سەعیدو ئەوانە، دەتوانم بڵێم هاوتەمەنی ئەو بوون كە ئەگەر زیاتر باس لەكەسایەتی ئەو بكەن، چونكە كتێبەكەمان نەخوێندۆتەوە و خۆشی لێرە نییە تاوەكو مشتومڕی كتێبەكەی لەگەڵدا بكەین. مامۆستا پێش ئەوەی كە رەئوف حەسەن بێت مامۆستا رەئوفی خەڵكی سلێمانی بوو.
ستران عەبدوڵڵا:
كتێبەكە پێشەكییەكی تێدایە هەم لەسەر ژیاننامەی كاك رەئوف و هەمیش وەك پێشەكی لەم نووسینەی كە لەكوردستانی نوێ لەسەر دەیانی وەك كاك رەئوف، وەك كاك كاروان دەڵێت: لەسەر كەسایەتی و لەسەر ڕۆڵی كاك رەئوف شتێكی جوانی تێدایە، پێمان باش بوو وەكو خۆی دایبنێینەوە، رەنگە بەم كتێبەو بەم پێشەكییە كاك رەئوفمان كە شاد كردبێت.

بەبیرهێنانەوەی رۆڵی عولەما، سەربازە گومـناوەكەی كوردایەتی ‌و كوردستانیبوون

بۆچی كتێبی عەبدولڕەحمان زەبیحی (عولەما)؟

عەلی شەمدین:
گومانی تێدانییە كە زۆربەی كوردانی سوریا ‌و بەتایبەتیش نەوەكانی داهاتوو، هیچ لەبارەی ئەو رۆڵە سەرەكییەوە نازانن كە عەبدولڕەحمانی زەبیحی (عولەما) لە ناوەڕاستی پەنجاكانی سەدەی رابردوودا گێڕاوێتی لەبارەی دامەزراندنی یەكەم رێكخستنی سیاسیی كورد لە سوریا، هەروەك چۆن هیچ نازانن لەبارەی یاخیبوونە ئازایانەكەی لە بەرامبەر ئەو تەوژم كۆسمۆپۆلیتییەی كە ناوەندی كۆمۆنیستە كوردەكانی سوریا‌و عیراق بەخۆوەی بینی. ئەوە جگە لە نەزانینییان سەبارەت بە خەباتی نەتەوەیی لەسەر ئاستە جیاجیاكانی سیاسی ‌و كەلتووریی ‌و ئەدەبی.
بۆیە بێگومان ئەوە وای دەخواست كە دەستپێشخەرییەك هەبێت بۆ ناساندنی لە رێگەی گەڕان بەنێو لاپەڕە پرشنگدارەكانی مێژووی ئەم خەباتگێڕە درێرینەی كوردستاندا ‌و وەرگێڕانی ئەو شایەتییانەی كە كەسە نزیكەكانی هاوتەمەن ‌و هاوڕێیانی رێبازە سەختەكەی نووسیویانەتەوە، بۆئەوەی دەرفەت بۆ خوێنەرانی عەرەب بڕەخسێنرێت تا ئەم سەربازە گومناوە بناسن كە جێ پەنجەی خەباتی بە بەشەكانی كوردستانەوە دیارە، كە تائێستاشی لەگەڵدا بێت نازانرێت چۆن شەهیدكرا ‌و كەی پاكتاوكراو تەرمی پیرۆزی لەكوێ نێژراوە.
زەبیحی كەسایەتییەكی مێژوویی و سەرمەشق بوو لەسەر ئاستە جیاجیاكانی سیاسی ‌و كەلتووریی ‌و زمانزانیی ‌و فیكریی ‌و رۆژنامەوانی. هاوڕێ ‌و هاوخەباتی سەركردەو رووناكبیرانی كورد لەسەر رۆڵی ئەو كۆكن لە نموونەی (مام جەلال، عەبدولحەمید دەروێش، نەوشیروان مستەفا، سەڵاحودینی موهتەدی، عیززەدین مستەفا رەسوڵ، ئیبراهیم ئەحمەد، شێخ عیزەدینی حسێنی، عەبدوڵڵای موهتەدی، مەلا قادری مودەڕیسی، ئەمیری حەسەن پوور، عەبدوڵڵا ئیسماعیل، شێخ لەتیف بەرزنجی، محەمەد ئەمین سیراجی، هۆمەری شێخمووس، ستران عەبدوڵلا، عەلی كەریمی و…هتد ) هەمووان گەواهی ئەوەی بۆ دەدەن كە كەسێكی ئازاو دەروێش ‌و یاخی ‌و نەفس بەرز‌و خۆنەویست ‌و بێ فیز ‌و خاوەن رۆشنبیریی فراوان ‌و دووربینی سیاسی و دەست ‌و دەم ‌و داوێن پاك بووە.
ئەو یەكێك لەو پێشڕەوانە بووە كە یەكەمین رێكخراوی سیاسیی لە رۆژهەڵاتی كوردستاندا بەناوی (ژ.ك) دامەزراندووە، كە لە 25/5/1942دا دایمەزراند، هەروەك پێشڕەوایەتی كرد لە دەركردنی یەكەمین ژمارەی رۆژنامەی كوردی بەناوی نیشتمان، ئەوەش لە ئابی 1943دا، هەروەها بەشداربووە لە دروستكردنی یەكەم حزبی كوردیدا لەسوریا لە 14/6/1957‌و رۆڵێكی گرنگیشی هەبوو لە ئامادەكردنی دیكۆمێنت ‌و بەڵگەنامەكانیدا. تەنانەت بە یەكێك لە دامەزرێنەرانی ئەو حزبە هەژمار كراوە.
تەنانەت یەكەم كەسبوو كە دیواری ئەو ئیرهابە فیكرییەی رووخاند كە باڵی بەسەر ناوەندی كۆمۆنیستەكاندا لە هەریەك لە سوریا‌و عیراقدا كێشابوو كە تەنانەت باڵای كەسانی وەك شاعیری گەورەی كورد جگەرخوێن لەبەرامبەریدا دانەویبووەوە. بۆیە بۆ روبەڕوبوونەوەی ئەو تەوژمە توندە یەكەم نامیلكەی بەناوی (الرد علی الكوسموبولیتیە) بڵاوكردەوە. ئەم نامیلكەیەش بەیەكەم هاوار بەڕووی ئەو كوردە كۆمۆنیستانەدا هەژماردەكرێت كە نكوڵیان لە نەتەوەی خۆیان دەكرد ‌و كە دەیانوت ئێمە هەموومان سوریایین، هەموومان براین، تەنانەت ئەوكاتە خوێندنەوەی ئەو نامیلكەیە ببووە ئەركێكی حزبی لە كۆبوونەوەی شانە حزبییەكانی پارتی دیموكراتی كورد لە سوریا، ئەوەش دواجار بووە هۆی هاندانی سەدان گەنجی كورد بۆ بەجێهێشتنی ریزەكانی حزبی شیوعی سوریا و پەیوەست بوون بە ریزەكانی ئەو حزبە كوردییە نوێیەوە، بەو هۆیەشەوە سەركردەكانی حزبی شیوعی سوریا هەوڵی ئەوەیان دەدا تۆڵەی لێبكەنەوە كە ئەوكاتە دەستڕۆیشتوو بوون لە دەسەڵاتی ئەو وڵاتەدا، ئەگەر نێوەندگیریی خوالێخۆشبوو جەمال حەیدەری ‌و بەشداریی ئەو نەبووایە لە خامۆشكردنەوەی ئەو هەڵمەتە چڕەی لەو دەمەدا لەدژی بەرپاكرابوو.
پاشان دەستیكرد بە نووسین ‌و ئامادەكردنی فەرهەنگێكی كوردی كە بەبەراورد بەو فەرهەنگانەی تا ئەوكاتە دەرچووبوون، بە فراوانترین ‌و قووڵترین فەرهەنگ هەژمار دەكرێت كە تەنها دوو بەشی لێ بڵاوكرایەوە.
لە كۆتایی ساڵی 1957یشدا بەشداریی كرد لە یەكەم كۆنگرەی گەلانی ئەفرۆ- ئاسیایی كە لەقاهیرە بەڕێوەچوو، لەوێش چەند دیدارێكی سازكرد لەگەڵ سەركردە باڵاو دیارەكانی میسر لە نموونەی كەمال رەفعەت ‌و ئەنوەر سادات ‌و هی دیكەدا، تێیدا داوایكرد كە رادیۆیەك بەزمانی كوردی دابنرێت، كە ئەو داوایەشی لە ساڵی 1958دا خرایە بواری جێبەجێ كردنەوە.
بەوتەی هاوتەمەن ‌و هاو زەمەنەكانی ئەو لەساڵی 1955دا رووی كردە سوریا‌و تا ساڵی 1958 لەوێ مایەوە. پاشان لەدوای سەركەوتنی شۆڕشی عەبدولكەریم قاسم و گرتنەدەستی دەسەڵات، لە 18/9/1958دا هاتووەتە عیراق و چووتە بەغدا بەمەبەستی پیرۆزبایی لە قاسم بەناوی گەلی كوردی سوریاوە. ئەوەش لە چوارچێوەی وەفدێكی هاوبەشدا لەگەڵ مام جەلالدا كە سەرۆكایەتی وەفدی قوتابیانی كوردستانی دەكرد ‌و هەر لەو دیدارەشدا هەریەكەو وتەیەكیان بەو بۆنەیەوە پێشكەش كردووە، كە هەواڵەكەش لە رۆژنامەی رەسمیی ئەو كاتەدا بڵاوكراوەتەوە.
مامۆستا ئیبراهیم ئەحمەد نازناوی عولەمای پێ بەخشیووە، لەپای كاركردنی لە زۆر بواردا‌و شارەزایی فراوانی لە بوارە جیاجیاكان ‌و بوونی ئارەزووە سەیرەكەی لە زانین ‌و خۆ رۆشنبیركردندا، جگە لەوەش چەند زمانێكی دەزانی وەك كوردی، توركی، ئینگلیزی، فەرەنسی، روسی، ئازەری، فارسی، عەرەبی ‌و كەمێكیش لە زمانی ئەرمەنی.
مامۆستا عولەما بەشدارییەكی زۆری لە بوارەكانی سیاسی ‌و راگەیاندن ‌و رێكخراوەییدا هەبووە، چالاك ‌و كاریگەر بووە لە ریزەكانی بزووتنەوەی كوردایەتیدا لەباشووری كوردستان.
لەدوای رووخانی رژێمی شای ئێران، دەیویست رۆڵێك ببینێت لەو روودانەی كە بەدوای ئەو رووخانەدا هاتن و كە دواتر ئیمام خومەینی دەسەڵاتی گرتەدەست. بەهۆی بڕوا بەخۆبوونییەوە هەوڵەكانی چڕكردەوە بۆ دروستكردنی پەیوەندیی لەگەڵ رژێمی بەعس لەبەغدا، ئەو پێیوابوو كە دەتوانێت ئەو رژێمە هەڵخەڵەتێنێت بەمەبەستی بەدەستهێنانی چەك ‌و پێداویستی بۆ پشتیوانیكردن لە رۆژهەڵات و باشووری كوردستان پێكەوە، بەڵام بەداخەوە گیانی خۆی لە پێناوی ئەو متمانە بەخۆبوونە ناواقعییەدا بەخشی و بەو هۆیەوە بەعس ونی كرد‌و لە سەرەتای ساڵی 1980دا لەناوی برد.
بەگوێرەی ئینسكلۆپیدیای روسیا واپێدەچێت لە نێوان ساڵانی (1911-1916) لە شاری مهابادی رۆژهەڵاتی كوردستان لە خێزانێكی هەژار لەدایكبووبێت، خۆی خۆی پێگەیاندووەو لە ژێر كاریگەریی ئەو دۆخەدا بووە كە لەنێوان هەردوو جەنگی یەكەم ‌و دووەمی جیهاندا هاتووەتە ئاراوە لە رووی سەركەوتنی شۆڕشی ئۆكتۆبەری سۆشیالیستی ‌و بڵاوبوونەوەی بیری ماركسیزم، بەو هۆیەشەوە بیرۆكەو بڕوای ئەوەی لا گەڵاڵە بووە كە رزگاریی نەتەوەیی لەسەر دەستی شێخ ‌و ئاغاو عەشایرەكانەوە سەركەوتن بەدەست ناهێنێت، بەڵكو بە گەنجی ئازاو پڕ بە بیروباوەڕ ‌و فیكر‌و زانیاریی ‌و بڕوابەخۆبوو بەدی دێت. ئەو هەمیشە داواكاربوو كە سەركردایەتی ‌و سەرداریی لە دەستی بەگ ‌و سەرۆك عەشیرەتەكان داماڵرێت ‌و رادەستی گەنجان بكرێت، ئەمەشی كردبووە یەكێك لە مەرجە گرنگن بنچینەییەكانی بوونە ئەندام لە كۆمەڵەی ژێ كاف دا، ئەو دەیوت: «ئاساییە كە شێخ ‌و ئاغاو مەلا‌و سادات ببنە ئەندام لە كۆمەڵەكەدا، بەڵام بەو مەرجەی نەبرێنە سەركردایەتیی كۆمەڵەكەوە».
بەڵام ئەوەی روویدا، وەك ئەوەی مام جەلال دەگێڕێتەوە، ئەوەبوو كە سۆڤێتییەكان رێچكەیەكی هەڵەیان گرتەبەر لە شێوازی مامەڵەكردن لەگەڵ كۆمەڵەكەدا، ئەوەش بووە پاشەكشەیەكی گەورە‌و وەرچەرخانێكی هەڵە، چونكە پێیانوابوو كە كۆمەڵی كوردەواری هێشتا كۆمەڵگەیەكی عەشایرییەو هێشتاش عەشایر هێزی بنچینەییە، بۆیە لە هاوینی 1944دا لە ورمێ دەستگیریان كرد و لەگەڵ دوو هاوڕێی چالاكیدا بەناوەكانی قاسم قادری ‌و دڵشاد رەسوڵی بردیانن لە تاران بۆ ماوەی هەشت مانگ بەندیان كردن، ئەوەش بەهۆی زیادبوونی هەژموونی مەعنەوی لەناو جەماوەر و فراوانبوونی بازنەی كاریزمابوونی بەراورد بە هاوڕێیانی لە دامەزرێنەرانی ئەو كۆمەڵەیەدا. كە بەو هۆیەشەوە كۆمەڵەی ژێ كاف هەڵوەشێنرایەوەو حزبی دیموكراتی كوردستانی ئێران لەجێی دامەزرێنرا‌و كۆمار راگەیەندراو پاشان قازی محەمەد كرایە سەرۆكی كۆمارەكەو پێكهێنانی حكومەت ‌و هێزی سەربازیی ‌و رادەستكردنی سەركردایەتی كۆمارەكەو سوپاو حزبەكە بە كەسانی عەشایر‌و ئاینی.
كاتێكیش زەبیحی لە زیندان هاتە دەرەوەو ئەوهەموو گۆڕانكارییەی بینی كە لە غیابی ئەودا روویداوە، كە بە جۆرێك لە كودەتا بەسەر رێبازەكەیدا هەژماری كرد، هیچی لەبەردەمدا نەمایەوە جگەلەوەی وەك پاڵنەرێكی نەتەوەیی لەگەڵیدا هەڵبكات و هاوكاریی لەگەڵ پێشەوا قازی محەمەددا بكات ‌و بچێتە پاڵی لەو وەرچەرخانە مێژووییە هەستیار‌و مەترسیدارەدا بەجۆرێك بووە دواهەمین كەس كە قازی محەمەد بەجێ بهێڵێت ئەویش بە پێداگریی پێشەوا كە سووربوو لەسەر ئەوەی كە بەتەنها خۆی بمێنێتەوە بۆ رووبەڕووبوونەوەی هەر تۆڵەیەكی رژێمی شای ئێران، ئەوەش سەرەڕای ئەو هەستی بێهیوابوونە قووڵەی لەبەرامبەر ئەو كودەتایەی كە بەسەریدا كرابوو لەوكاتەی كە لە زینداندا بوو، كە لەو سەردەمە هەستیارەدا زەبیحی هەموو رەخنەكانی لە كۆمار‌و حزبیش شاردەوە دوای ئازادبوونی لە زیندان لەپێناوی بەرژەوەندیی نەتەوەییدا، تا دوژمنان بەوە دڵخۆش نەبن، زەبیحی خۆی شایەتی ئازایەتی ‌و لەئەستۆگرتنی بەرپرسیارێتیی دەبێت لەلایەن پێشەوا قازییەوە لە روبەڕوبوونەوەی رژێمی شادا كە تەنانەت لەنرخی ئەوەدا گیانی بەخشی. ئەوەش لەكاتێكدایە كە هەژاری شاعیر تەنانەت خۆی لەناوهێنانی قازی محەمەدیش دەبوێرێت. ئەم هەڵوێستەشی وەك بەپێی ئەوەی د. عیززەدین مستەفا رەسوڵ تەئكیدی لەسەر دەكاتەوە یەكێك بووە لە خاڵی ناكۆكییەكان كە بووە هۆی جیابوونەوەی بارزانی ‌و زەبیحی، سەرەڕای بوونی خاڵی ناكۆكیی دیكە كە پەیوەست بوو بە جیاوازیی تێڕوانینیان سەبارەت بە گرنگیی كاری رێكخراوەیی ‌و هەروەها هەڵوێست لە لەو رێكەوتنەی كە لەنێوان بارزانی ‌و عەبدولسەلام عارفدا ئیمزاكرا.
ئەگەر رژێمی بەعسی عیراق لە بەغدا بەرپرسیاری راستەوخۆ بێت لە ونكردنی ئەم كەسایەتییە كاریزما داهێنەرە‌و لەناوبردنی بەپیلانی پێشوەختەو پێداگرییەوە، ئەوا خەڵكانی دیكەش بەرپرسیاربوون لە پەردەپۆش ‌و شاردنەوەی ئەو رۆڵە زۆرەی كە زەبیحی هەیبووە لە مەسەلەو رووداوە چارەنووسسازەكاندا لەماوەی نزیكەی شەش دەیە و پشتگوێخستنی رۆڵی پێشڕەوانەی تێیدا وەك سەربازێكی گومناو.
هەربۆیە زۆر پێویست بوو كە دەستپێشخەریی بكرێت بۆ رێزلێنان ‌و ناساندنی بە نەوەكانی داهاتوو و داوای لێبووردنی لێبكرێت هەروەك سەڵاحودینی موهتەدی دەڵێت: (دوای ساڵانێكی زۆر لە شەهیدبوونی زەبیحی، دەمەوێت نەك تەنها بەناوی خۆمەوە، بەڵكو بەناوی گەلی كورد‌و شۆڕشی كوردستانەوە داوای لێبووردنی لێیبكەم لەوەی بەڕاستی ئێمە دركمان بە مەزنیی ئەو سیاسی ‌و زمانزان‌و نووسەر‌و رۆژنامەنووسەی چەند نەوەیە نەزانی ‌و بەهای ئەو سەركردە پڕ لە گوڕوتین ‌و شارەزاییەمان نەزانی، بەڵكو كە ئەستەمە بیری لێبكەیتەوە لە زمانیشمان بەرامبەر ئەو سەركردە پێشینەو منەوەرە مەزنانە چەند درێژ بوو و بێبەزەییانە كەوتینە تۆمەتباركردنیان، ئاخ بۆ ئەو سەركردە گەنجە خەباتگێڕانە ‌و بۆ ئەو گەوهەرە بەنرخانە كە بەبەلاش لەدەستمان چوون، بەهۆی خۆپەرستیمان ‌و نەزانیمانەوە، جا ئەگەر ئێمە ئاوا بێ وەفاو پێنەزان بووین بەرامبەر ئەو سەركردانەی پێش خۆمان، ئاخۆ چی لە نەوەكانی داهاتوو چاوەڕێ بین لە رێز‌و پێزانین؟ ).
لەكۆتاییشدا دەڵێم، ئەم كتێبە 214 لاپەڕەیەی نیو فولسكابەو دامەزراوەی جەمال عیرفان رۆژبەیانی لە ساڵی 2019دا بە سپۆنسەری د. تەها رەسوڵ ئەركی چاپكردنی لەئەستۆ گرتووە.
عەلی كەریمی:
سوپاس بۆ كاك عەلی شەمدین كە ئەم ئەركەی گرتووتە ئەستۆ چونكە بەداخەوە كەسایەتییە گەورەكان ئەگەر بۆخۆیان كەسێكیان نەبێت خەمیان لێ بخوات ‌و كارێك لەسەر تۆماری سەروەرییەكانیان نەكات، ئەوا بەدەگمەن خەڵكانی دیكە ئەو كارەیان بۆ دەكەن، كە پێموایە ئەوەی جەنابتان كردووتانە بۆ مامۆستا عولەما، یەكێكە لەو كارە دەگمەنانە. راستە من كارم كردووە لەسەر مامۆستا زەبیحی، بەڵام ئەم هەوڵەی ئێوە چەند قاتی ئەوەی خۆم دەزانم، چونكە سەرباری ئەوەش كە من 11 ساڵ بەو كتێبەوە سەرقاڵ بووم، بەڵام رەنگە خوێنەر هەر پێیوابێت كە مەسەلەكە هۆكاری خزمایەتی لەپشتەوەیە، بەڵام ئەوەی ئێوە جیاوازە، چونكە ئەوەی ئێوە رێزگرتنە لە خەباتی كوردستانیی عولەمای نەمر.
گرنگییەكی دیكەی ئەو هەوڵەی بەڕێزتان ئەوەیە كە بەزمانی عەرەبییە، كە ئەوە ناساندنی رۆڵی واقعبینانەی كوردستانیی زەبیحییە بە خوێنەری عەرەبیش.
حەجی عەفرینی:
من وەك چالاكوانێكی سیاسی رۆژئاوای كوردستان، بۆیەكەمجارە ئەو زانیارییانە لەبارەی رۆڵی مامۆستا زەبیحییەوە لە هەڵایسانی بزووتنەوەی رزگاریخوازیی كوردستان لە رۆژئاوا دەزانم، تەنانەت ئێمە وەك ئەم نەوەیەی ئێستای رۆژئاوای كوردستان ئەو كەسە بەباشی ناناسین كە یەكەم پارتی سیاسیی لەوێ دامەزراندووە، كەسێك نەبووە هەڵوێستە لەسەر ناوەكانیان ‌و رۆڵ ‌و خەباتیان بكات. بۆیە من دەستخۆشیی لێدەكەم ‌و هیوای بەردەوامیی بۆ دەخوازم ‌و داوای لێدەكەم كە ئاماژە بەڕۆڵی كەسایەتییەكانی دیكەی رۆژئاواش بدات ‌و كۆڕیان لەسەر بكات.
سەڵاح سێخ شەرەف:
جیاوازیی زەبیحی لە خەباتی كوردستانی بوون بەراورد بەوانەی دیكە لەوەدایە كە ئەو تەنها نەهاتووە وەك كوردێكی رۆژهەڵات كارو چالاكیی سیاسی بكات، بەڵكو لەباشوور لەئاستی سەركردایەتیكردندا كاریكردووە، لە رۆژئاوای كوردستان رۆڵی هەبووە لە دامەزراندنی یەكەمین پارتی كوردستانی، جگە لەوەش خاڵێكی زۆر گرنگی زەبیحی شێوازی خەباتی نهێنی بوو كە كارێكی كردبوو چالاكیی زۆری هەبوو ، بەڵام نەشیدەهێشت كەس بیناسێت.
سەردار عەبدوڵڵا:
ئاماژە بەوە درا كە لەبارەی رۆڵی ئەم زاتە گەورەیەوە لە رۆژئاوای كوردستان شتێكی ئەوتۆ نازانرێت، بەڵام بەداخەوە لە باشووری كوردستانیش وەك پێویست شت لەبارەیەوە نەزانراوە، بۆیە پێشنیاز دەكەم كە ئەو كتێبە بكرێتە كوردی ‌و بەشێوەیەكی فراوانیش بڵاوبكرێتەوە.
د. بەهرۆز جاف:
من دەستخۆشی دەكەم بەڵام تێبینیم لەسەر شێوە نووسینی ناونیشانی كتێبەكە هەیە كە بەزمانی عەرەبییە‌و ئاراستەی خوێنەری عەرەبی كراوە.
هۆزان عەفرینی:
منیش دەستخۆشی لە مامۆستا عەلی شەمدین دەكەم كە توانیوێتی رۆڵی گرنگی مامۆستا زەبیحی لە خەباتی لە رۆژئاوای كوردستان بخاتەڕوو، هەروەها لایەنە سیاسییەكانی ئەو پارچەیەی كوردستان ‌و بزووتنەوەی كورد لەوێ روونبكاتەوە. هەروەك كارێكی باشتریش دەبێت ئەگەر ئەو كتێبە بۆ شێوەزارەی كرمانجی ژووروو وەربگێڕدرێت.

نازناوی دۆستی بە ئەمەكی كوردستانی نوێی پێ بەخشرا
عیسا حسێن-ی شاعیر ئەرشیفی رەسەنی كوردستانی نوێ دەگەڕێنێتەوە

هاوار مستەفا خان:
كۆڕی ئەمڕۆ تایبەتە چونكە یەكەمجارە كە ساڵۆنی كوردستانی نوێ كۆڕی شیعریی تێدا بكرێت، تایبەتە چ وەك ئەوەی كۆڕەكە بۆ شیعر خوێندنەوەی پێشكەشكردنی دیوانە شیعرییەكەی شاعیر عیسا حسێن-ە كە لەهەولێرەوە هاتووەو لەگەڵ كۆڕەكەشیدا سوپرایزێكی گەورەی پێیە بۆ كوردستانی نوێ ‌و ئامادەبووانی كۆڕەكە و خوێنەران و توێژەران، هەر لێرەشەوە چەند شیعرێكی ناو دیوانەكەی دەخوێنێتەوە.
جێی ئاماژەیە كاك عیسا لە ساڵی 1975 لەشاری كەركوك لەدایكبووە، لەساڵی 1990ەوە دەستیكردووە بە نووسینی شیعر، یەكەم شیعریشی لە دوای راپەڕین لە كوردستانی نوێ-دا بڵاوكردووەتەوە، لەساڵی 1995 كۆلێژی ئادابی زانكۆی سەڵاحەدینی تەواوكردووە‌و بەكالۆریۆسی هەیە لە زمان ‌و ئەدەبی كوردی، لەساڵی 1992ەوە جگە لەنووسینی شیعر، وەك رۆژنامەنووسێكیش بابەتی ئەدەبی ‌و رەخنەی ئەدەبیی بڵاوكردووەتەوە.
لەساڵی 1997ەوە تا ساڵی 2000 مامۆستا بووە، لەساڵی 2010 تا ئێستا سەرپەرشتیاری پەروەردەیی ‌و پسپۆڕی زمانی كوردییە، ئەندامی سەندیكای رۆژنامەنووسانی كوردستان ‌و یەكێتیی نووسەرانی كورد ‌و یەكێتیی مامۆستایانی كوردستانە، هەروەها ئەندامی بنكەی ئەدەبی ‌و رووناكبیریی گەلاوێژە، بەم دیوانە شیعرییەوە، سێ دیوانی لە بەرهەمە شیعرییەكانی بەچاپ گەیاندووە، یەكەمیان 2009 بەناوی سەفەرەكانی حەرفێك، دووەمیان لەساڵی 2010 بەناونیشانی باجی تەمەن، ئەمەی سێیەمیشیان كە چاپكراوی ئەمساڵ 2019یە، بەناونیشانی مەمكە شیعر… بمكە بە نیشتمانی خۆت.
لەتەوەرێكی دیكە كۆڕەكەدا عیسا حسێن كۆپی رەسەنی ئەرشیفی ژمارە سەرەتاییەكانی كوردستانی نوێ تا كارەساتی 31ی ئاب كە لەو كاتەوە بە هەوڵی خۆی پاراستبوونی، پێشكەش بە كوردستانی نوێ كردەوە.
لەوبارەیەشەوە بەمجۆرە چۆنێتیی پاراستنی ئەو ئەرشیفەی لەو رۆژگارانەدا خستەڕوو:
عیسا حسێن:
سوپاس بۆ ئامادەبوونتان، كە ئامادەبوونی ئەم خۆشەویستانە مایەی گەورەییە بۆ من. بێگومان دەمەوێت لەبارەی ئەو ئەرشیفەوە ئەوە باس بكەم كە لەدوای رووداوی 31ی ئابەوە ئەم ئەرشیفە كە لەلایەن كوردستانی نوێ خۆیەوە تەجلیدكرابوو، كەوتبووە لای برادەرێكی نووسەر، كە بەسوپاسەوە توانیی هەموو ئەو موجەلەدانەم بۆ بهێنێت كە ئەو برادەرە لە راگەیاندنی پارتی كاری دەكرد، پێشتر وابڕیاربوو بیدەمەوە، بەڵام دواتر وابزانم لەبەرئەوەی كێشەی بۆ دروست دەبوو، پێی وتم وەرە بیانبە، بۆیە لە ساڵی 1996-ەوە تا 2003 لای خۆم پاراستمن، كە رەنگە بۆ ئەو قۆناغە لەسەر كوردستانی نوێ مرۆڤ تووشی گیران ‌و لێپێچینەوە ببووایە، بەتایبەتی ئەگەر خۆت پێشتر كادری یەكێتی بووبیت یان لەگەڵ رۆژنامەی كوردستانی نوێ-دا سەروبەندت هەبووبێت، ئەوە كارێكی قورس بوو. ئەو ماوەیەش كە لەلای من بووە، كە دیارە پاراستنی كارێكی ئاسان نەبووبێت، بەڵام من هەر بە موڵكی خۆمم نەزانیووە، هەمیشە لە خەیاڵی ئەوەدا بووم كە رۆژێك بێت رادەستی خاوەنە راستەقینەكەی خۆیی بكەمەوە كە ئەرشیفی كوردستانی نوێ-یە.
جگە لەوەی كە لەكاتە نالەبارەكاندا ئەم ماڵەو ماڵم پێ دەكرد، هەندێك لە هاوڕێ نزیكەكانیشم دەیانزانی كە ژمارەكانی كوردستانی نوێ لای من هەیە، بەشوێن بابەتی خۆیاندا دەگەڕان، لەبەرئەوەی وەك ئێستا كۆپی ‌و وێنە لەبەرگرتنەوە بە مۆبایل ‌و ئەوانە ئاسان نەبوو، چەندین بابەتم بە دەستنووس نووسیووەتەوە، یان بەدیار خاوەنەكانیانەوە وەستاوم تا نووسیویانەتەوە ئیتر وتار بووایە یان شیعر، یان هەر بابەتێك بوایە كە هەندێكجار خوێندكار هەبووە بۆ توێژینەوە سوودی لێ بینیووە. بۆیە لە مێژە لە دەرفەتێك دەگەڕام كە ئەم ئەمانەتە رادەستی خاوەنەكانی بكەمەوە، سەرەتا وا بڕیاربوو لە ساڵیادی ئەمساڵی كوردستانی نوێدا ئەو رێوڕەسمە رێك بخەین، بەڵام رێك نەكەوت، بۆیە لەگەڵ كاك ستران رێكەوتین ئەمساڵ لە ساڵیادی رۆژنامەنووسیی كوردیدا رێوڕەسمەكە رێكبخەین. لەبەرئەوەی ئەمە شوێنی راستەقینەی خۆیەتی، چونكە ئەگەر پێشتر كەسێك پێویستی بە بابەتێك بووبێت، تەنها ئەوانە توانیویانە كە من دەناسن، بەڵام ئێستا ئیتر هەمووكەس دەتوانن سوودی لێ ببینن.
دواتر سوپاسەنامەی كوردستانی نوێ پێشكەش بە عیسا حسێن كرا كە ئەمە دەقەكەیەتی:

دواتر چەند پارچە شیعرێكی لە دیوانەكەی بۆ ئامادە بووان خوێندەوە.

سوپاسنامە
بە ناوی كوردستانی نوێ – وە سوپاسی خۆمان ئاراستەی هەڤاڵ عیسا حوسین دەكەین كە دەستپێشخەری نواند ‌و موجەلەدەكانی كوردستانی نوێ (قۆناغی یەكەمی رۆژنامە لە هەولێر- لە سفرەوە تا ئابی 1996) بە دیاری پێشكەشی ئەرشیفی رۆژنامەكە كرد).
ئەرشیفی كودستانی نوێ لە هەولێر كە بەهۆی رووداوە ناخۆشەكانی ئەو ماوەیەی وڵاتەوە، بەتایبەتی 31-ی ئاب، لەگەڵ بارەگای كوردستانی نوێ ‌و مەكتەبی ڕاگەیاندنی یەكێتی دەستی بەسەردا گیرابوو، لەرێی دۆستێكی كوردستانی نوێ ‌و خەمخۆرێكی رۆژنامەگەری كوردییەوە، لە هەلومەرجی دژواری ئەوكاتەدا، درایە دەست هەڤاڵ عیسا كە ئەویش ئەو ئەمانەتەی بۆ كوردستانی نوێ پاراست ‌و ئەمرۆش لەم مەراسیمەدا پێشكەشی رۆژنامەكەی خۆی دەكاتەوە.
بەم بۆنەیەوە وێرای دەستخۆشی ‌و سوپاسی بێ پایانی كوردستانی نوێ نازناوی دۆستی بەئەمەكی رۆژنامەی پێ دەبەخشێ.

كوردستانی نوێ

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شه‌فیق حاجی‌ خدر: كرمی ئاوریشم-ی حسێن حوزنی موكریانی و كه‌مانچه‌ژه‌ن-ی پیره‌مێرد به‌ ده‌ستپێكی وه‌رگێڕان بۆ كوردی‌ داده‌نرێن

لەم دووتوێیەدا له‌ به‌رده‌وامی‌ ئه‌و كۆڕانه‌ی‌ ساڵۆنی‌ كوردستانی‌ نوێ‌ رێكیده‌خات، ...