سەرەکی » ئەدەب - سێبەر و سایە » داهات و ژوورێكی تایبه‌ت بۆ نووسه‌ری ژن

دیدارێكی بڵاونه‌كراوه‌ی ڤێرجینیا وۆڵف

داهات و ژوورێكی تایبه‌ت بۆ نووسه‌ری ژن

ئه‌وه‌ی لێره‌دا ده‌یخوێنینه‌وه‌ به‌شی دووه‌می دیدارێكه‌ له‌گه‌ڵ ڤێرجینیا وۆڵفدا كه‌ لە گۆڤاری (كه‌مبات-Combat) له‌ ساڵی (1930) و پاشانیش له‌ كتێبی (ژوورێكی تایبه‌ت به‌ خۆت)دا بڵاوبۆته‌وه‌.

نازنین عرب

لە فارسییەوە: محەمەد کەریم

2-2

كه‌مبات: تۆ رێك دوو مه‌رجی نا مادی دیاری ده‌كه‌یت: ترادسیۆن و ره‌وایه‌تی ئه‌خلاقی. (به‌م پێیه‌) ده‌توانم تۆ به‌ ماركسی له‌ قه‌ڵه‌م بده‌م.
ڤێرجینیا: هه‌ر چۆنێكت پێخۆشه‌ ئاوا لێكی بده‌ره‌وه‌! (پێده‌كه‌نێ)، ته‌نیا پاره‌ و جێگای تایبه‌ت به‌س نییه‌. وای بێنه‌ به‌رچاوی خۆت شكسپیر خوشكێكی هه‌بوایه‌ هێنده‌ی خۆی به‌ توانا و خوێنده‌وار بوایه‌ (ئه‌گه‌ر وابوایه‌) به‌ موعجیزه‌ی سه‌ده‌ی شانزه‌ حساب ده‌كرا؟ وای بێنه‌ به‌رچاوی خۆت (خوشكه‌كه‌ی شكسپیر) ده‌چووه‌ شار بۆ ئه‌وه‌ی وه‌كو ئه‌كته‌ر یان شانۆنامه‌نووس ده‌ستبه‌كاربێت. سه‌ره‌ڕای ئه‌و به‌دبه‌ختی و بێمتمانه‌ییه‌ی كه‌ هونه‌رمه‌ندانی گومناو به‌ ده‌ستییه‌وه‌ ده‌ناڵێنن، به‌ڕێوه‌به‌ری هیچ شانۆیه‌ك هه‌رگیز قبووڵی نه‌ده‌كرد و هاوكاری نه‌ده‌كرد. ژنێك پێگه‌یه‌كی گه‌وره‌ی نییه‌ له‌ هونه‌ردا! ئه‌و خوشكه‌ی شكسپیر هه‌رگیز نه‌یده‌توانی (به‌رهه‌می وه‌كو) «ئه‌نتۆنی و كلیۆپاترا و هاملێت» بنووسێت، قه‌ده‌ری كچێكی ئینگلیز ئه‌وه‌یه‌ كه‌ شوو بكات و به‌رپرسیارێتی خێزانێكی گه‌وره‌ له‌ ئه‌ستۆ بگرێت. ته‌نانه‌ت ئه‌مڕۆش ژنان هان نادرێن بۆ نووسین و گۆرانی گوتن و وێنه‌كێشان. من له‌ قسه‌كانی (ئۆسكار برۆونینگ) یه‌ك رسته‌ ده‌هێنمه‌وه‌: «باشترین ژن له‌ رووی زیهنییه‌وه‌ له‌ خوار خراپترین پیاوه‌وه‌یه‌». ئه‌مه‌ ته‌نیا نموونه‌یه‌كه‌ له‌وه‌ی له‌سه‌رده‌می شكسپیردا هه‌بووه‌! به‌ دڵنیاییه‌وه‌ خوشكه‌كه‌ی شكسپیر هیچ رێگایه‌كی له‌به‌رده‌مدا نه‌بوو جگه‌له‌وه‌ی ببێت به‌ له‌شفرۆش.

كه‌مبات: هه‌ڵبه‌ته‌ من ئه‌و ده‌ربڕینه‌ وا ده‌بینم كه‌ جێگای باوه‌ڕه‌ و مرۆڤ قه‌ناعه‌تی پێده‌كات.
ڤێرجینیا: هه‌تا سه‌ده‌ی هه‌ژده‌، ئه‌و ژنانه‌ی خۆیان بۆ شیعر ته‌رخان ده‌كه‌ن و ژماره‌شیان زۆر نییه‌ به‌ شێت له‌ قه‌ڵه‌م ده‌درێن. سه‌رزه‌نشت ده‌كرێن و نه‌فره‌تیان لێده‌كرێت، دواجار له‌وپه‌ڕی سه‌ختی و ئازاردا به‌رده‌وام ده‌بن له‌ شیعر نووسین، بۆ نموونه‌ چه‌ند به‌یتێك له‌ شیعری شاعیرێكه‌ به‌ ناوی (وینچیلسا) ده‌خوێنمه‌وه‌:
(هه‌ر كاتێ كه‌سێك له‌ ئێمه‌ له‌ سه‌روو كه‌سانی تره‌وه‌ بوه‌ستێ،
له‌ خه‌یاڵێكی ئه‌كتیڤه‌وه‌ گۆڕابێ به‌ رابه‌ری هێزی هه‌لپه‌رستی،
به‌ره‌ی به‌رامبه‌ر هه‌میشه‌ به‌هێزتر ده‌بێت،
هیوا به‌ سه‌ركه‌وتن هه‌رگیز به‌سه‌ر ترسدا زاڵ نابێت.)
ئه‌مه‌ ته‌نیا ده‌ردی (دۆلۆریزم) تیۆری یان مه‌یلێكه‌ كه‌ به‌ها بۆ ئازارچه‌شتن داده‌نێت، شانۆیه‌ك نییه‌! ئه‌مه‌ ته‌نیا هه‌ستی ماندووێتی و تووڕه‌یی ئه‌و ژنه‌یه‌ له‌ به‌رامبه‌ر سووكایه‌تی پێكردنی پیاواندا كه‌ له‌ نووسینه‌كانیاندا هه‌ستی پێده‌كرێت، خاسیه‌تی دیاری به‌رهه‌مه‌كانی ئه‌وان ده‌گۆڕێت بۆ ناخی واقیع و سووكایه‌تی. به‌م پێیه‌ نووسه‌رانی ژن پێیان باشه‌ به‌شێوه‌یه‌ك ئیش بكه‌ن، وه‌كو نه‌ناسراو یان شته‌كانیان بنێرن و خۆیان ده‌رنه‌كه‌ون، رێك وه‌كو (دۆرۆسی ئۆسبۆرن) و ئاوا كۆمه‌ڵێ گۆرانی و مۆسیقا ده‌خوڵقێنرێن.

ژووری ئیشكردنی ڤێرجینیا وۆڵف

كه‌مبات: من پێم وایه‌ پیاوان شه‌یدای ژنانن، هه‌م له‌ رووی مه‌یله‌وه‌ هه‌م له‌ رووی ترسه‌وه‌. كاره‌كته‌ری (چیرۆكێكی) تۆ ده‌بینێت نووسه‌رانی پیاو ده‌رباره‌ی ژن چه‌نده‌ رای جیاوازیان هه‌یه‌. ئه‌و كاره‌كته‌ره‌ له‌ قه‌باره‌ی گه‌وره‌ی ئه‌وه‌ی پیاوان ده‌توانن سه‌باره‌ت به‌ ره‌گه‌زێكی دیكه‌ بینووسن سه‌رسام ده‌بێت و پارادۆكسێكی سه‌یر فۆرمه‌ڵه‌ ده‌بێت، له‌گه‌ڵ ئه‌وه‌شدا كه‌ ژنان ته‌قریبه‌ن له‌ دنیای ئه‌ده‌بدا ئاماده‌گییان هه‌یه‌. وه‌كو (بیرێنس) و (ئیما بۆڤاری) یان (كامیلی). جگه‌له‌ چه‌ند زانیارییه‌كی كه‌م هیچ شتێكی تۆماركراو له‌ باره‌یانه‌وه‌ نه‌ماوه‌ته‌وه‌.
ڤێرجینیا: به‌ڵێ. ئه‌وه‌ زۆر سه‌یره‌!

كه‌مبات: تۆ پێت وایه‌ ئه‌و هه‌سته‌ی كه‌ پیاوان خۆیان له‌ ژنان به‌ گه‌وره‌تر ده‌زانن، فاكته‌ری ئه‌م فه‌رامۆشكردنه‌ بێت؟
ڤێرجینیا: من پێم وایه‌ چه‌ندین سه‌ده‌ ژنان وه‌كو ئاوێنه‌یه‌كی گه‌وره‌كردن خزمه‌تی پیاوانیان كردووه‌، پیاو مه‌زنی خۆی له‌ بچووكیی ژنه‌كه‌یدا ده‌بینی. به‌ سه‌رنجدانێكی رۆژگاری سه‌ده‌ی بیست ده‌بینین پیاوان تا چ راده‌یه‌ك هێشتا له‌ كۆمه‌ڵگه‌دا رۆڵێكی دیاریان هه‌یه‌، سه‌ره‌ڕای ئه‌و توانایه‌ی ژن بۆ رۆڵبینین له‌ كۆمه‌ڵگه‌دا هه‌یبوو، ئه‌وه‌ پیاوه‌ كه‌ ده‌توانێ به‌ڵێن بدات، لاف لێدانه‌كه‌ی قبووڵ ده‌كرێت ئه‌وه‌ كه‌ ده‌توانێت بڕیار بدات ژنێك به‌كاربهێنێ یان نا. پیاو هه‌روا له‌و باوه‌ڕه‌دایه‌ كه‌ له‌ ژن باڵاده‌ستتره‌. وادێته‌ به‌رچاو كه‌ پیاو جۆرێك تووڕه‌یی شاراوه‌ و ئاڵۆز ئه‌زموون ده‌كات، تووڕه‌ییه‌ك كه‌ ره‌گ و ریشه‌ی ده‌گه‌ڕێته‌وه‌ بۆ ئه‌ودیوی وێنه‌كانی مناڵیی… به‌ڵام له‌و قۆناغه‌شدا سه‌ره‌ڕای قه‌ده‌غه‌كراوه‌كان و سه‌ختییه‌كانی سه‌رده‌می ڤیكتۆریایی بارودۆخه‌كه‌ (به‌نیسبه‌ت پێش ئه‌وه‌وه‌) زۆر باش بووه‌. له‌ كۆتاییه‌كانی سه‌ده‌ی پێشوودا كۆلیجه‌كانی كچان كرایه‌وه‌، دنیای پیشه‌، ژنانی زیاتری به‌خۆیه‌وه‌ بینی و له‌ ساڵی (1919)دا ئێمه‌ مافی ده‌نگدانمان به‌ ده‌ستهێنا.

كه‌مبات: به‌و حاڵه‌وه‌ تۆ له‌ جێگایه‌كدا ده‌نووسیت: «له‌م دوو شته‌، ده‌نگدان و پاره‌، دان به‌وه‌دا دێنم، به‌ڕای من پاره‌ گرنگترینه‌.»
ڤێرجینیا: به‌ڵێ من جه‌خت له‌وه‌ ده‌كه‌مه‌وه‌ (پێده‌كه‌نێ) به‌ هیچ جۆرێ مه‌به‌ستم نییه‌ ساڵانی ئه‌و خه‌باته‌ی كه‌ بووه‌ هۆكاری وه‌رگرتنی مافی ده‌نگدان به‌ ژنان به‌ كه‌م به‌ها نیشان بده‌م، به‌ڕای من پاره‌ بۆ ئازادی فیكری پێداویستییه‌كه‌. له‌لایه‌كی دیكه‌وه‌، وا دێته‌به‌رچاو كه‌ ئه‌و خه‌باته‌ چ لای پیاوان و چ لای ژنان مه‌یلێكی بێداركردۆته‌وه‌ و ئه‌و مه‌یله‌ ئاشكراكردنی ره‌گه‌زی خود بوو (له‌ ئه‌ده‌بدا) و ئه‌مه‌ش به‌ زیانی چۆنایه‌تیی به‌رهه‌می ئه‌ده‌بی ته‌واو بوو.

كه‌مبات: تۆ وای لێك ده‌ده‌یته‌وه‌ «ئه‌وه‌ به‌ زیانی نووسه‌ره‌ كه‌ له‌ كاتی نووسیندا بیر له‌ ره‌گه‌زی خۆی بكاته‌وه‌». تۆ پێت وایه‌ ناكۆكی كۆمه‌ڵایه‌تی له‌ نێوان ژنان و پیاواندا، بۆ ماوه‌یه‌كی دوور و درێژ، چۆنایه‌تیی ئه‌ده‌بی (هه‌ردوو گروپ)ی خستۆته‌ ژێر فشاره‌وه‌ و ته‌نانه‌ت ئه‌مڕۆش كاریگه‌ریی راسته‌وخۆی هه‌یه‌ له‌سه‌ر به‌رهه‌می فیمینیسته‌كان؟
ڤێرجینیا: ئه‌وه‌ بۆ پیاوانیش راسته‌! من چێژێكی كه‌متر له‌ خوێندنه‌وه‌ی هاوچه‌رخه‌كانم ده‌بینم، ئه‌و ئاره‌زووی ده‌رخستنی ره‌گه‌زه‌، به‌شێك له‌ ژنێتی، كه‌ له‌ وجودی هه‌ر پیاوێكدا هه‌یه‌ و به‌شێك له‌ پیاوێتی كه‌ له‌ وجودی هه‌ر ژنێكدا هه‌یه‌ له‌ناو ده‌بات. ئه‌م پێكدادانه‌، متمانه‌ و به‌رده‌وامیی و راستگۆیی هه‌ر ئیشێك ده‌خاته‌ ژێر پرسیاره‌وه‌! له‌گه‌ڵ ئه‌وه‌شدا، هیوادارم خوێنه‌ر به‌ هه‌ڵه‌ له‌ مه‌به‌ستم تێنه‌گه‌یشتبێت: من باوه‌ڕم وایه‌ شێوازی ژنانه‌ و شێوازی پیاوانه‌ هه‌ر یه‌كه‌یان له‌گه‌ڵ خاسیه‌تی تایبه‌تی خۆیاندا پێكه‌وه‌ ده‌ژین، زیهنی باڵاتر (ئۆندرۆجینی-Ondrogyne)ن. به‌ڵام نووسه‌رانی پیاو ئه‌وانه‌ن كه‌ له‌ (وجودیاندا) پیاوێتی زیاتر له‌ ژنێتی ئاشكرایه‌ و نووسه‌رانی ژن ئه‌و ژنانه‌ن كه‌ ژنێتییان له‌ پیاوێتییان زیاتره‌. من مه‌به‌ستم ئه‌وه‌ نییه‌ بانگه‌شه‌ی ئه‌وه‌ بكه‌م با ره‌گه‌زه‌كان تێكه‌ڵ بكه‌ین! له‌ روانگه‌ی منه‌وه‌ ئه‌مه‌ گه‌ڕانه‌وه‌یه‌كی ترسناكه‌ بۆ دواوه‌: ئه‌م شێوازه‌ تایبه‌تییه‌ له‌لای نووسه‌رانی ژن له‌ ترادسیۆنێكی دوور و درێژی سه‌خته‌وه‌ سه‌ریهه‌ڵداوه‌، كه‌ به‌هایه‌كی زۆریشی له‌سه‌ر دراوه‌.

كه‌مبات: به‌پێی قسه‌كانی تۆ ده‌بوو سه‌بریان بكردایه‌ تا رۆماننووسانی سه‌ده‌ی نۆزده‌ ده‌ركه‌ون بۆ ئه‌وه‌ی ئێمه‌ شایه‌تی پێشكه‌وتنێك بین.
ڤێرجینیا: ژنان ناتوانن وه‌كو پیاوان بنووسن…

كه‌مبات: به‌ڵێ، تۆ نموونه‌ی وه‌كو به‌لزاك ده‌هێنیته‌وه‌.
ڤێرجینیا: به‌ڵێ، بۆ نموونه‌، ژنان ناتوانن سه‌رله‌نوێ رسته‌كانی به‌لزاك بخوڵقێننه‌وه‌: (ئه‌گه‌ر وایان بكردایه‌) ئه‌نجامه‌كه‌ی بێهووده‌ و پێكه‌نیناوی ده‌بوو. بۆچی، چونكه‌ نه‌ هه‌مان به‌هایان (له‌ زیهنی خۆیان)دا هه‌یه‌ و نه‌ تایبه‌تمه‌ندی فیزیكی و ده‌روونی وه‌كو پیاوانیان هه‌یه‌. جین ئۆستن و خوشكانی برۆنتێ و جۆرج ئیلیۆت ئه‌و كه‌سانه‌ن كه‌ یه‌كسه‌ر روانینی ژنانه‌ قبووڵ ده‌كه‌ن و به‌هاكانی خۆیان به‌ ره‌خنه‌گرانی پیاو ده‌ناسێنن. ئه‌گه‌رچی ئێمه‌ له‌ رۆمانه‌كانیاندا ئه‌و شتانه‌ نابینین، به‌ڵام ده‌بێ وه‌كو شانازییه‌ك یادیان بكه‌ینه‌وه‌ و مۆمیان بۆ دابگیرسێنین. ئه‌وه‌نده‌ به‌سه‌ سه‌رنجێكی سه‌ركه‌وتنه‌كانی سه‌ره‌تای ئه‌ده‌بیاتی ژنانی به‌ریتانیا بده‌ین، وه‌كو هه‌ردوو رۆمانی (شانازیی و ده‌مارگیریی) و (به‌رزاییه‌كانی وێزرینگ).
(ماری كارمایكڵ)، نووسه‌رێكی ژنه‌ كه‌ كه‌م ناسراوه‌، ئه‌مه‌ ناسنامه‌كه‌ ته‌واو ده‌كات: ئه‌و ره‌گه‌زی خۆی له‌بیر ده‌كات، ئیتر له‌ پیاوان ناترسێت و ته‌نیا ته‌ركیز له‌سه‌ر ورده‌كارییه‌كانی ژیان ده‌كات. خۆی له‌ ده‌روونناسی سه‌رده‌می خۆی رزگار ده‌كات و هه‌وڵده‌دات واقیع كه‌شف بكات و رووكه‌شی هه‌موو شتێك ره‌سم بكات، ته‌نانه‌ت فه‌رامۆشكراوترینیان، پێناسه‌ی هاوره‌گه‌زبازیی ده‌كات! ده‌توانی وێنای ریسوابوونی ئه‌م ژنه‌ بكه‌یت!

كه‌مبات: به‌ رای تۆ ئه‌م (ماری كارمایڵ)ه‌ واقیعییه‌ یان ته‌واو نموونه‌ییه‌؟
ڤێرجینیا: خۆت رات چییه‌؟ (پێده‌كه‌نێ).

كه‌مبات: من ناچارم تۆ نائومێد بكه‌م: تۆ هیچ كاتێ (له‌ راده‌ربڕینه‌كانتا) ورد نیت.
ڤێرجینیا: زۆر باشه‌. من ده‌رفه‌تت ده‌ده‌مێ له‌ كاتی گونجاودا مه‌چه‌كم بگریت (پێده‌كه‌نێ)، به‌ڵام به‌هه‌رحاڵ ئه‌مه‌ بابه‌تێكه‌ كه‌ پێویستی به‌ لێكۆڵینه‌وه‌ی تایبه‌تی خۆی هه‌یه‌!

كه‌مبات: له‌ نیوه‌ی كۆتایی سه‌ده‌ی حه‌ڤده‌دا، لایه‌نگرانی شێوازی (پرسیۆزیتێ-Preciosite) كه‌ شێوازێكی ئه‌ده‌بی و هونه‌رییه‌ له‌ ساڵانی (1650) تا (1660) له‌ ناوجه‌رگه‌ی ئه‌رستۆكراسی فه‌ره‌نسادا له‌ناو ژناندا فۆرمه‌ڵه‌ بوو، شێوازێكی ئه‌ده‌بی به‌ڕاستی ژنانه‌یان بنیاتنا، كه‌ له‌ ناوه‌ كه‌لتوورییه‌كانی ئه‌و سه‌رده‌مه‌دا بوو به‌ (جینۆكراسی-Gynocrtie) واته‌ ئه‌و ده‌سه‌ڵاته‌ سیاسییه‌ی تیایدا ژن ده‌سه‌ڵاتدار و باڵاده‌سته‌، ئه‌مه‌ش بووه‌ هۆی به‌ ره‌سمی ناسینی ژنان و له‌ هه‌مانكاتدا بوو به‌جۆرێك له‌ ترس، ترس له‌ سپاردنی پێگه‌ و متمانه‌ی گشتیی و ته‌نانه‌ت كورسییه‌ ئه‌كادیمییه‌كان به‌ ژنان. (ریچیلۆ، لابروێر، مۆلێر، كۆرنی) ژنانی رامبۆیی یان پێشڕه‌و هه‌تا ئه‌و شوێنه‌ پێداده‌گرن كه‌ جورئه‌ت ده‌كه‌ن گاڵته‌ به‌ (پۆلیكوت-شانۆگه‌رییه‌كی پیر كۆرنییه‌) بكه‌ن، هه‌ڵبه‌ته‌ له‌ روانگه‌ی منه‌وه‌ ئه‌مه‌ له‌ بێسه‌لیقه‌یی ئه‌وان نیشان ده‌دات.
ڤێرجینیا: رێگه‌ت پێناده‌م (ئاوا له‌ باره‌ی ئه‌وانه‌وه‌ قسه‌ بكه‌ی)! (پێده‌كه‌نێ) پرسیۆزیتێكان گرنگ و به‌هادارن.

كه‌مبات: بێگومان وایه‌، به‌ڵام دواجار ئه‌وانیش چه‌ند سه‌رده‌سته‌یه‌كیان هه‌بوو! پرسیۆزیتێكان شێوازی تایبه‌تی خۆیان گه‌شه‌ پێدا، كه‌ خاسیه‌تی دیاریان ده‌ركه‌وتن و عه‌شقی پاك بوو، بۆ خۆشی له‌ لقی شێوازه‌ ئه‌ده‌بییه‌كانی دیكه‌ جیابۆوه‌ وه‌كو (مه‌ته‌ڵۆكه‌ یان پۆلیسی) یان (فۆرمی شاعیرانه‌) زمانێكی زاره‌كی تایبه‌تیان هه‌بوو كه‌ مۆلێر له‌ شانۆگه‌ریی (پرسیۆزیتێ قه‌شمه‌ره‌كان)دا گاڵته‌یان پێده‌كات و ده‌ڵێت: «ئای خوایه‌! عه‌زیزم ده‌ڵێی باوكت زیندوو بۆته‌وه‌، گوایه‌ ئه‌وه‌نده‌ بلیمه‌ت و زیره‌كه‌ سێبه‌ری بۆ رۆحی كردووه‌!» (مه‌دام دو لا فایت)، (ماركیز دو ساڤینی)، (مادلین دو سكوردی) ئه‌مانه‌ له‌و ناوانه‌ن نه‌ناسراون نین و به‌ پێچه‌وانه‌ی (لویس لابێ)وه‌ ناتوانین ئه‌مانه‌ به‌ ته‌زویر تۆمه‌تبار بكه‌یت، ئه‌م قۆناغه‌ قۆناغێكی زۆر كورته‌. له‌ڕاستیدا من سوود له‌و خاڵه‌ ده‌بینم بۆ ئه‌وه‌ی دژی پێشبینییه‌كه‌ی تۆ بوه‌ستمه‌وه‌، له‌ وێدا كه‌ ده‌ڵێیت ژن ته‌نیا و ته‌نیا ده‌یه‌وێت سه‌ربه‌خۆ بێت و بێگومان وه‌زعی ژنان به‌مه‌ به‌ره‌و باشتر ده‌چێت. من له‌م بۆچوونه‌ پێشكه‌وتنخوازانه‌یه‌دا شه‌ریكت نیم!
ڤێرجینیا: من خۆم زۆر باوه‌ڕم به‌و پێشبینییه‌ نییه‌، ئه‌گه‌رچی وه‌زعی ژنان له‌ ژیانی هاوبه‌شدا ره‌وتێكی گه‌شه‌كردو نیشانده‌دات، وه‌كو مافی خاوه‌ندارێتی و بۆ ژن یان مافی ته‌ڵاق، ژنانی به‌ریتانیا ئه‌مڕۆ زیاتر له‌ رابردوو له‌ بواری ئه‌ده‌بدا ئاماده‌گییان هه‌یه‌، ته‌قریبه‌ن له‌ هه‌موو شێوازه‌ ئه‌ده‌بییه‌كانیشدا، ژنان ده‌بینم و ئیتر ئاماده‌گییان تایبه‌ت نییه‌ به‌ رۆماننووسین. من له‌ زیاده‌ڕه‌ویی فیمینیزم ده‌ترسم و هه‌روه‌ها بۆ هاوتا پیاوه‌ فیمینسته‌كان، من یه‌كه‌م كه‌سم كه‌ نووسینێكدا ترسی خۆم له‌ ده‌ركه‌وتنی فاشیزم له‌ ئیتالیا ده‌ربڕیوه‌.

كه‌مبات: به‌م پێیه‌ له‌مباره‌یه‌وه‌ هاوڕاین!
ڤێرجینیا: روون و ئاشكرایه‌! (پێده‌كه‌نێ).

كه‌مبات: به‌ دوو پرسیاریتر ئه‌م دیداره‌ كۆتایی پێده‌هێنین: ئایا له‌ دنیای ئه‌مڕۆدا ژنێك هه‌یه‌ بتوانێت وه‌كو شكسپیر بنووسێت؟
ڤێرجینیا: گومانم هه‌یه‌! ته‌نانه‌ت پیاوێكیش ئیتر ناتوانێت وه‌كو شكسپیر بنووسێت.

كه‌مبات: تۆ توانایه‌كی ده‌روونناسی سه‌یرت هه‌یه‌! له‌ ده‌زگای چاپه‌مه‌نییه‌كه‌ی خۆتدا كتێبه‌كانی سه‌ره‌تای ده‌روونناسیت بڵاوكرده‌وه‌ و خستته‌ به‌رده‌ستی به‌ریتانییه‌كان. ئه‌گه‌ر بمه‌وێ ئاماژه‌یه‌كی ورد به‌ یه‌كه‌م وتاری تۆ بكه‌م ده‌رباره‌ی فرۆید. ئایا فرۆید به‌ جۆرێك به‌لای تۆوه‌ وه‌كو مه‌رجه‌ع وایه‌؟
ڤێرجینیا: گومانت نه‌بێت! رێك ئامانجه‌كه‌ت پێكاوه‌! (پێده‌كه‌نێ).

كه‌مبات: سوپاس بۆ ئه‌و كاته‌ی پێت به‌خشین و سوپاس بۆ دیداره‌كه‌ كه‌ زۆر پڕ به‌رهه‌م بوو.
ڤێرجینیا: بێگوما چێژێكی هاوبه‌ش بوو.

سه‌رنج:
-1له‌به‌شی یه‌كه‌می ئه‌م دیداره‌دا ناوی (وۆڵف)م به‌هه‌ڵه‌ نووسیوه‌ (ۆۆڵف) راسته‌كه‌ی (وۆڵف-ه‌/Woolf).
-2هه‌ندێ جار ئه‌و كه‌سه‌ی دیداره‌كه‌ی كردووه‌ پرسیاره‌كانی زۆر درێژ كردۆته‌وه‌، هه‌ندێ پرسیارم كورت كردۆته‌وه‌، چونكه‌ پێویست نه‌بوو.

سه‌رچاوه‌: tasskhir.blog.ir

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

چیرۆكی عیراقی داڕوخاو

مه‌حمود نه‌جمه‌دین له‌نێوه‌ندی ئه‌ده‌بی عیراقی دوای پرۆسه‌ی ئازادی و سه‌ره‌تای ...