سەرەکی » مانشێت » تۆ بڵێی‌ عیراق له‌ تونێله‌ ره‌شه‌كه‌ رزگاری‌ بێت؟

تۆ بڵێی‌ عیراق له‌ تونێله‌ ره‌شه‌كه‌ رزگاری‌ بێت؟

د. جه‌واد به‌شاره‌

دوای‌ ئه‌و هه‌موو نوشوست‌و تێكشكان‌و نسكۆیه‌ی‌ تووشی‌ عیراق بوو به‌هۆیانه‌وه‌ سه‌رجه‌م جومگه‌‌و به‌شه‌كانی‌ كۆمه‌ڵگه‌كه‌ی‌‌و هه‌موو كه‌رته‌ ئابوورییه‌كان‌و خزمه‌تگوزارییه‌كانی‌ بواری‌ سیاسی‌‌و كۆمه‌ڵایه‌تی‌ بێئاكام بوون‌و له‌ كار كه‌وتوون، له‌ كاتی‌ رووخانی‌ رژێمی‌ به‌عسه‌وه‌ كه‌ ساڵی‌ 2003 بوو تا ئه‌مڕۆش بۆ یه‌كه‌م جار مژده‌یه‌كی‌ خشمان بیست كه‌ تروسكه‌یه‌كی‌ هیوای‌ تێدا بێت، ئه‌ویش هه‌ڵبژاردنی‌ عادل عه‌بدولمه‌هدی‌ بوو بۆ پۆستی‌ سه‌رۆكی‌ حكومه‌ت‌و د. به‌رهه‌م ساڵح بوو بۆ پۆستی‌ سه‌رۆك كۆمار، كه‌ ده‌ڵێین مژده‌ی‌ خۆش له‌به‌ر ئه‌وه‌یه‌ ئه‌و دوو كه‌سێتییه‌‌و لێهاتوویی‌و ئه‌زموونیان ده‌زانین‌و ده‌ناسین، به‌ تایبه‌تیش عه‌بدولمه‌هدی‌ كه‌ له‌ نزیكه‌وه‌ ده‌یناسین‌و ئاگادارین به‌ درێژایی ده‌یان ساڵ خه‌باتی‌ كردووه‌ دژی‌ رژێمی‌ دیكتاتۆریی.
ده‌وڵه‌تی‌ عیراق به‌ سه‌رجه‌م جومگه‌‌و پێكهاته‌كانییه‌وه‌ توشی‌ نه‌خۆشی‌ شێرپه‌نجه‌ بووه‌، شێرپه‌نجه‌ی‌ گه‌نده‌ڵی‌، به‌ واتایه‌كی‌ دیكه‌ شێرپه‌نجه‌ی‌ گه‌نده‌ڵی‌ سه‌رجه‌م دامه‌زراوه‌كان‌و سوچ‌و قوژبن‌و كه‌لێنێكی‌ ده‌وڵه‌تی‌ عیراقی‌ ته‌نیوه‌، سه‌رۆك وه‌زیری‌ نوێی‌ عیراق ئه‌م راستییه‌ تاڵه‌ زۆر باش ده‌زانێت‌و هه‌ر خۆیشی‌ له‌ وتاره‌كه‌یدا له‌به‌رده‌م په‌رله‌مان باسی‌ كردووه‌ دانی‌ پێدا ناوه‌، ته‌نانه‌ت به‌ سوپاسه‌وه‌ باسی‌ دامه‌زراندنی‌ ئه‌نجومه‌نی‌ باڵای‌ به‌ره‌نگاربوونه‌وه‌ی‌ گه‌نده‌ڵی‌ كرد‌و به‌ڵێنی‌ دا له‌ ریزبه‌ندی‌ گرنگیپێداندا پله‌ یه‌ك بێت.
ئه‌م قسه‌‌و باسانه‌ تروسكه‌یه‌كی‌ هیوا ده‌به‌خشێت به‌ هاووڵاتیان عیراق، كه‌ ره‌نگه‌ له‌ داهاتوودا كار بۆ له‌ ناوبردنی‌ گه‌نده‌ڵی‌ یان هیچ نه‌بێت كه‌مكردنه‌وه‌ی‌ ئه‌و دیارده‌یه‌ بكرێت، به‌ڵام ئه‌و ئه‌نجومه‌نه‌ تازه‌یه‌، واته‌ ئه‌نجومه‌نی‌ باڵای‌ به‌ره‌نگاربوونه‌وه‌ی‌ گه‌نده‌ڵی‌ چی‌ پێده‌كرێت؟ به‌ تیابه‌ت كه‌ ئه‌مراز‌و كه‌ره‌سه‌ی‌ پێویستی‌ بۆ به‌ره‌نگاربوونه‌وه‌كه‌ی‌ پێ نییه‌. ده‌بێ له‌ خۆمان بپرسین ئه‌و ئه‌نجومه‌نه‌ ده‌زگای‌ رێگریی گونجا‌و‌و سیستمی‌ سزای‌ یاسایی ئه‌وتۆی‌ له‌به‌رده‌ستدایه‌ توانای‌ ئه‌و كاره‌ی‌ هه‌بێت؟ یاخود له‌ توانایدا هه‌یه‌ به‌ره‌نگاری‌ نهه‌نگه‌ گه‌وره‌كانی‌ گه‌نده‌ڵی‌ بێته‌وه‌ كه‌ له‌ پشت ده‌سته‌‌و ده‌زگا حزبییه‌كانه‌وه‌ خۆیان حه‌شار داوه‌، ئه‌و حزبانه‌ی‌ ده‌ستیان تێكه‌ڵ كردووه‌‌و هاوپه‌یمانییان پێكهێناوه‌‌و به‌ هاوبه‌شی‌ ده‌سه‌ڵات به‌ڕێوه‌ ده‌به‌ن‌و به‌ قوڵایی سه‌رجه‌م وه‌زاره‌ته‌كان‌و ده‌زگا حكومی‌‌و ناحكومییه‌كاندا رۆچوون؟ یان ده‌كرێ بپرسین به‌ڕێز سه‌رۆك وه‌زیره‌ تازه‌كه‌‌و ئه‌نجومه‌نه‌ گرنگه‌كه‌ی‌ له‌ توانایاندا هه‌یه‌ سه‌ره‌وه‌ت‌و سامانی‌ دزراوی‌ ئه‌م وڵاته‌ بگێڕنه‌وه‌‌و له‌ گیرفان‌و ئه‌كاونتی‌ گه‌نده‌ڵه‌كانی‌ ده‌ربهێننه‌وه‌؟ هه‌ڵبه‌ت گه‌نده‌ڵه‌كان به‌ هه‌موو ناوو نازناوه‌كانیانه‌وه‌، كه‌ خۆیشی‌ ده‌زانێ كێن‌و ناوییان چییه‌، ئه‌دی‌ ئه‌حمه‌د چه‌له‌بی‌ سه‌رجه‌م دۆسێكانی‌ راده‌ستی‌ ئه‌و نه‌كرد، ئه‌و دۆسێیانه‌ زۆر زۆر بوون‌و پڕ بوون له‌ ناوی‌ گه‌نده‌ڵكاران، هه‌ر ئه‌وه‌ش بوو سه‌ری‌ خوارد‌و بووه‌ هۆی‌ تیرۆر كردنی‌؟ تۆ بڵێی‌ سه‌رۆك وه‌زیری‌ نوێ له‌ توانایدا هه‌بێت‌و ده‌روه‌ستی‌ ئه‌و هه‌موو دێوه‌ زه‌بلاحه‌ی‌ حزب‌و میلیشیا چه‌كداره‌كان بێته‌وه‌ كه‌ به‌ سه‌رجه‌م پێكهاته‌كانی‌ كۆمه‌ڵگه‌دا بڵاو بوونه‌ته‌وه‌؟ ئه‌و دێوانه‌ی‌ هێز‌و توانایان ئه‌وه‌نده‌ زۆر له‌ هێزو توانای‌ هێزی‌ چه‌كداری‌ حكومی‌ به‌ سوپا‌و پۆلیسه‌وه‌ زیاتره‌، ئه‌وه‌ش له‌ مه‌یدانی‌ واقیعیشی‌ عیراقدا به‌ رووی‌ ده‌رده‌كه‌وێ‌و له‌سه‌ر شه‌قام خاوه‌نی‌ ده‌سه‌ڵاتن‌و به‌ ئاشكرا هه‌ڕه‌شه‌ی‌ كوشتن له‌ خه‌ڵك ده‌كه‌ن‌و له‌سه‌ر شاشه‌ی‌ ته‌له‌ڤزیۆنه‌كان‌و له‌ ماڵپه‌ڕ‌و سایته‌ كۆمه‌ڵایه‌تییه‌كاندا بێ سڵكردنه‌وه‌ هه‌ڕه‌شه‌ی‌ خۆیان ده‌كه‌ن، نموونه‌ی‌ زه‌ق‌و روون‌و ئاشكراش واسیق به‌تاته‌.
ئه‌گه‌ر باس له‌ توانای‌ ئه‌و ئه‌نجومه‌نه‌ تازه‌یه‌ بكه‌ین به‌رامبه‌ر به‌و هه‌موو میلیشیا‌و دێوه‌ زه‌به‌لاحانه‌، ده‌بێ پێش هه‌موو شت ئه‌نجومه‌نی‌ باڵای‌ به‌ره‌نگاربوونه‌وه‌ی‌ گه‌نده‌ڵی‌ پشتبه‌ستوو بێت به‌ یاسا‌و شه‌رع‌و ده‌ستوور‌و یاسای‌ ئه‌وتۆی‌ له‌به‌رده‌ستدا بێت كه‌ ده‌سه‌ڵاتی‌ بداتێ بۆ لێپێچینه‌وه‌‌و سزادانی‌ هه‌ر كه‌سێك كه‌ تۆمه‌تی‌ گه‌نده‌ڵی‌ به‌سه‌ریدا ساغ بێته‌وه‌، ئه‌وجا ئه‌و كه‌سه‌ هه‌ر ناوێك بێت‌و له‌ هه‌ر پله‌‌و پایه‌یه‌كدا بێت. نابێ ئه‌نجومه‌نی‌ باڵای‌ به‌ره‌نگاربوونه‌وه‌ی‌ گه‌نده‌ڵی‌ ته‌نیا ببێته‌ ناوێكی‌ ریكلامی‌‌و له‌ ناوه‌رۆكیشدا پوچ‌و بێكه‌ڵك‌و بێپێز بێت. هیوادارین سه‌رۆك وه‌زیری‌ نوێ ئه‌م هه‌نگاوه‌ی‌ ته‌واو بكات‌و به‌ جۆرێك بێت، ئه‌و وه‌رچه‌رخانه‌ مێژووییه‌ بێنێته‌ ئاراوه‌ كه‌ گه‌لی‌ عیراق به‌ هه‌موو پێكهاته‌كانییه‌وه‌ چاوه‌ڕێی‌ ده‌كه‌ن، گه‌لی‌ ده‌بێته‌ پشتیوان‌و كۆڵه‌كه‌ بۆی‌ ئه‌گه‌ر هه‌ست بكه‌ن هه‌وڵه‌كانی‌ به‌رهه‌م‌و ئه‌نجامی‌ ده‌بێت له‌ بواری‌ به‌ره‌نگاربوونه‌وه‌ی‌ گه‌نده‌ڵی‌‌و دواتریش له‌ناوبردنی‌ ئه‌و دیارده‌یه‌ به‌ ته‌واوی‌.
ئه‌گه‌ر بتوانێ ئه‌و ئه‌ركه‌ جێبه‌جێ بكات‌و بتوانێ سنوورێك بۆ گروپ‌و میلیشیا چه‌كداره‌ له‌ یاساده‌رچووه‌كان دابنێ‌و كارێكی‌ وا بكات یاسا له‌ سه‌رو هه‌موو كه‌سێكه‌وه‌ بێت‌و چه‌ك ته‌نیا به‌ده‌ست هێزی‌ یاسایی‌و شه‌رعییه‌وه‌ بێت، هه‌روه‌ها بتوانێ پێكهێنانی‌ حكومه‌ت ته‌واو بكات‌و وه‌زیری‌ به‌رگری‌‌و وه‌زیری‌ ناوخۆ هه‌ر خۆی‌ هه‌ڵیان بژێرێت‌و نه‌كه‌وێته‌ ژێر كاریگه‌ریی فشاری‌ حزبه‌كان‌و رێگه‌ به‌ ده‌ستێوه‌ردانی‌ حزبه‌كان نه‌دات له‌ بڕیاره‌كانی‌ ئه‌نجومه‌نی‌ وه‌زیران‌و سه‌رۆكی‌ ئه‌نجومه‌نه‌كه‌‌و ئه‌نجومه‌نی‌ باڵای‌ به‌ره‌نگاربوونه‌وه‌ی‌ گه‌نده‌ڵی‌، كه‌ به‌ داخه‌وه‌ تا ئێستاش ئه‌و ده‌ستێوه‌ردان‌و كاریگه‌رییه‌ی‌ حزبه‌كان به‌سه‌ر هه‌موو ئه‌و لایه‌نانه‌وه‌ دیاره‌‌و به‌رده‌وامه‌.
به‌ڕێز عادل عه‌بدولمه‌هدی‌ وه‌ك من له‌ رابردوودا ناسیومه‌ كه‌سێكی‌ تێكۆشه‌ر‌و ئازا‌و پته‌وو بوێره‌‌و له‌ خه‌باتی‌ رابردووشیدا دژی‌ دیكتاتۆر ئه‌و سیفه‌تانه‌ دیار بووه‌، جگه‌ له‌وه‌ش له‌ رووی‌ رۆشنبیرییه‌وه‌ پله‌ یه‌كه‌‌و لێهاتووییه‌كی‌ زۆر به‌رزی‌ هه‌یه‌ كه‌ دوژمن‌و نه‌یاره‌كانی‌ به‌ر له‌ دۆسته‌كانی‌ دانی‌ پێدا ده‌نێن، به‌ڵام چوارده‌وری‌ گیراوه‌ به‌ كه‌سانی‌ ماستاوچی‌‌و دووڕوو دووزمان‌و ده‌مڕه‌نگین‌و دووفاق، كه‌ پله‌‌و پایه‌ی‌ هه‌ستیاریان هه‌یه‌ له‌ ده‌وڵه‌تدا‌و ده‌سه‌ڵات‌و هه‌ژموونی‌ فراوانیشیان هه‌یه‌، به‌و پێیه‌ش ره‌فتاری‌ ئه‌و جۆره‌ كه‌سانه‌ ره‌نگدانه‌وه‌‌و كاریگه‌ری‌ ده‌بێت له‌سه‌ر سه‌رۆك وه‌زیر‌و ره‌نگه‌ فریای‌ ئه‌وه‌ش نه‌كه‌وێت ده‌ستنیشانیان بكات‌و دووریان بخاته‌وه‌، له‌به‌ر ئه‌وه‌ی‌ ئه‌وان وه‌ك هه‌شتپێ به‌ناو ده‌وڵه‌تدا بڵاوبوونه‌ته‌وه‌.
ئه‌و جۆره‌ كه‌سانه‌ی‌ باس كران، له‌سه‌ر بنه‌مای‌ خزمخزمێنه‌‌و به‌رژه‌وه‌ندی‌ تایبه‌ت‌و تاكه‌كه‌سی‌‌و فه‌رموفه‌رمووی‌ قه‌وم خێش كار ده‌كه‌ن‌و له‌گه‌ڵ هاوشێوه‌كانیاندا ده‌سكه‌وت له‌ نێوان خۆیاندا دابه‌ش ده‌كه‌ن، واته‌ ئاڵوگۆڕی‌ ده‌ستكه‌وت‌و به‌رژه‌وه‌ندی‌ له‌گه‌ڵ ئه‌و كه‌سانه‌ی‌ توانیویانه‌ ویژدانی‌ زۆربه‌ی‌ سه‌ركرده‌كانی‌ چینی‌ سیاسییه‌ ده‌سه‌ڵاتداره‌كان بكڕن، ئه‌و جۆره‌ كه‌سانه‌ ساڵانێكی‌ زۆر جێپێی‌ خۆیان قایم كردووه‌‌و باش ده‌زانن چی‌ ده‌كه‌ن‌و چۆنی‌ ده‌خۆن، به‌ڵام له‌گه‌ڵ ئه‌وه‌شدا پێویسته‌ ده‌رفه‌ت‌و كاتی‌ پێویستی‌ بدرێتێ تا بۆ عیراقییه‌كانی‌ بسه‌لمێنێت كه‌ راستگۆیه‌‌و نیازی‌ پاكه‌‌و ئه‌و به‌رنامه‌یه‌ی‌ به‌ نیازیشه‌ جێبه‌جێی‌ بكات، كارایه‌‌و به‌ كه‌ڵكی‌ ئه‌وه‌ دێت كه‌ عیراقی‌ پێ له‌و قوڕاوه‌ ده‌ربهێنرێت كه‌ تێی‌ كه‌وتووه‌.
پێویسته‌ ئه‌و ده‌رفه‌ته‌ی‌ بدرێتێ، به‌ڵام دیسانه‌وه‌ پرسیار دروست ده‌بێت، داخۆ له‌ توانایدا هه‌یه‌ ئه‌و تۆڕی‌ جاڵجاڵۆكه‌یه‌ی‌ به‌ درێژایی 16 ساڵی‌ رابردوو به‌سه‌ر شان‌و ملی‌ عیراقییه‌كاندا دراوه‌‌و به‌رده‌وام به‌ربه‌سته‌‌و هه‌وڵ ده‌دات رێگریی له‌ هه‌ر جۆره‌ به‌رنامیه‌كی‌ چاكسازی‌ بكات كه‌ به‌رپرسی‌ یه‌كه‌می‌ ده‌سه‌ڵاتی‌ جێبه‌جێكار واته‌ حكومه‌ت بیه‌وێ جێبه‌جێی‌ بكات؟ هه‌ر به‌رنامه‌یه‌كی‌ چاكسازی‌ كه‌ هیوایه‌كی‌ تێدا بێت بۆ گه‌لی‌ عیراق‌و كار بكات بۆ ئه‌وه‌ی‌ هاووڵاتیانی‌ عیراق ژیانێكی‌ شكۆمه‌ندانه‌یان هه‌بێت له‌ رووی‌ ئابووری‌‌و كۆمه‌ڵایه‌تی‌‌و سیاسییه‌وه‌، له‌ سه‌رو هه‌مووشییه‌وه‌ به‌رنامه‌یه‌كی‌ كارای‌ ئه‌وتۆ بێت خزمه‌تگوزاری‌ پێویست بۆ عیراقییه‌كان دابین بكات‌و هه‌یبه‌ت‌و شكۆ بۆ یاسا‌و ده‌وڵه‌ت بگه‌ڕێنێته‌وه‌‌و یاسا جێبه‌جێ بكات‌و رێگر بێت له‌به‌رده‌م گه‌نده‌ڵكاران‌و تێكده‌ران‌و به‌رده‌وام بێت له‌ به‌ره‌نگاربوونه‌وه‌ی‌ تیرۆر‌و دابین كردنی‌ ئاسایش‌و ئارامی‌ بۆ هاووڵاتیان؟
سه‌رۆك وه‌زیری‌ نوێی‌ عیراق ئه‌گه‌ر بیه‌وێ كارێكی‌ وا بكات به‌ر له‌ هه‌موو شت پێویسته‌ پشت به‌ كه‌سانێك ببه‌ستێ كه‌ لێهاتوویی راسته‌قینه‌یان هه‌بێت، له‌وانه‌ی‌ كه‌ خۆی‌ زۆریان ده‌ناسێ‌و سوود له‌و كه‌سانه‌ وه‌ربگرێت كه‌ پسپۆڕن له‌ بواره‌ جیاجیاكاندا‌و كارامه‌یی‌و لێهاتوویی تایبه‌تیان هه‌یه‌، بۆ ئه‌وه‌ی‌ حكومه‌ته‌كه‌ی‌ حكومه‌تێكی‌ كارا‌و به‌به‌رهه‌م‌و بێت‌و دوور بێت له‌ په‌یڕه‌و كردنی‌ سیاسه‌تی‌ به‌شبه‌شێنه‌‌و هه‌وڵدان بۆ رازی‌ كردنی‌ هه‌موو لایه‌ك، چونكه‌ ئه‌وه‌یان ناكرێ‌و ئه‌سته‌مه‌. پێویسته‌ دادگایه‌ك هه‌بێت بێگه‌رد‌و بێخه‌وش كه‌ بێ ده‌ستێوه‌ردان‌و سه‌ربه‌خۆ كار بكات، پێویسته‌ هێزێكی‌ دڵسۆز‌و بێلایه‌ن هه‌بێت توانای‌ سزادان‌و جێبه‌جێ كردنی‌ یاسای‌ هه‌بێت، هێزێك به‌ ستراتیژێكی‌ تۆكمه‌‌و پلان‌و به‌رنامه‌ی‌ پێشوه‌ختی‌ هه‌بێت بۆ سه‌كه‌وتن‌و له‌ هه‌مان كاتیشدا ئامرازێكی‌ كاریگه‌ر‌و به‌هێز بێت بۆ لێدان‌و رێگری‌ كردن له‌ هه‌ر كه‌سێك كه‌ پڕكێشی‌ ئه‌وه‌ بكات سه‌رپێچی‌ له‌ یاسا‌و ده‌وڵه‌ت بكات، تا كه‌س نه‌توانێ دزه‌ بكات‌و ده‌ست وه‌ربدات له‌ كاروبای‌ حكومه‌ته‌كه‌ی‌‌و ئه‌نجومه‌نی‌ باڵای‌ به‌ره‌نگاربوونه‌وه‌ی‌ گه‌نده‌ڵی‌ له‌ رێگه‌ی‌ كه‌سانی‌ گوماناوی‌‌و ئه‌وانه‌ی‌ بۆنی‌ گه‌نده‌ڵییان لێدێت‌و یان به‌رتیل خۆره‌كان‌و ئه‌و كۆمسیۆنانه‌ی‌ به‌رده‌وام خه‌ریكی‌ مامه‌ڵه‌‌و گرێبه‌ستی‌ گوماناوین.
پێویسته‌ ده‌زگایه‌كی‌ تایبه‌ت دابمه‌زرێت بۆ چاودێری‌ كردنی‌ به‌ نهێنی‌ ئه‌و كه‌سه‌ بێخه‌وشانه‌ش كه‌ خاوه‌نی‌ لێهاتووین‌و به‌ كه‌سی‌ باش ناسراون‌و ره‌وشتی‌ به‌رزی‌ نیشتمانییان هه‌یه‌‌و نهێنیپارێزن‌و جێگه‌ی‌ متمانه‌ن‌و پیشه‌‌و ئه‌ركی‌ خۆیان به‌كار ناهێنن بۆ گیرفان پڕكردن‌و سوكایه‌تی‌ كردن به‌ خه‌ڵك، چونكه‌ ئه‌وانه‌ ئه‌ركی‌ ده‌ستنیشان كردنی‌ برینه‌كه‌یان هه‌یه‌‌و میكانیزمی‌ گه‌نده‌ڵی‌ ده‌دۆزنه‌وه‌‌و پوچه‌ڵی‌ ده‌كه‌نه‌وه‌‌و ده‌بێ شێوازی‌ كاركردنیان‌و داڕشتنی‌ راپۆرته‌كانیان پرۆفیشناڵانه‌‌و بێگه‌رد‌و بێلایه‌ن بێت.
له‌ كۆتاییدا ئه‌وه‌ی‌ كه‌ زۆر پێویسته‌ كۆتاییهێنانه‌ به‌ دۆسێی‌ میلیشیا چه‌كداره‌كان‌و حیمایه‌‌و ده‌سته‌ی‌ پاراستنی‌ زه‌به‌لاح‌و ده‌ستكه‌وتی‌ به‌رپرسان كه‌ ئه‌وه‌نده‌ زۆره‌ زیاده‌رۆیی تێدا كراوه‌، به‌ تایبه‌تیش په‌رله‌مانتاره‌كان‌و ئه‌نجومه‌نی‌ پارێزگاكان. هه‌روه‌ها پێویسته‌ عیراق خۆی‌ به‌ دوور بگرێت له‌ ململانێی‌ ئیقلیمی‌‌و نێوده‌وڵه‌تی‌‌و سیاسه‌تی‌ جه‌مسه‌ربه‌ندی‌‌و ده‌بێ په‌یوه‌ندی‌ باشی‌ هه‌بێت له‌گه‌ڵ وڵاتانی‌ دراوسێ‌و جیهانیش، به‌ جۆرێك به‌رژه‌وه‌ندی‌ باڵای‌ نیشتمانی‌ پارێزراو بێت.
دوا وته‌م بۆ سه‌رۆك وه‌زیرانی‌ عیراق ئه‌وه‌یه‌، پێویسته‌ به‌ زووترین كات‌و به‌ هه‌ر نرخێك بووه‌ قه‌یرانی‌ كاره‌با چاره‌سه‌ر بكان كه‌ شاده‌ماری‌ به‌رهه‌مێهان‌و خۆشگوزه‌رانی‌ هاووڵاتیانه‌، له‌ هه‌مان كاتدا ئاماژه‌پێده‌ره‌ بۆ سه‌ركه‌وتوویی حكومه‌ت له‌ كاره‌كانیدا، جگه‌ له‌وه‌ش ده‌بێ عیراق له‌ رێگه‌ی‌ ئاسمانی‌‌و ئاوی‌‌و وشكانییه‌وه‌ به‌ سه‌رجه‌م وڵاتانی‌ جیهانه‌وه‌ ببه‌سترێته‌وه‌‌و هاوتوچۆی‌ راسته‌وخۆی‌ ئاسمانی‌ هه‌بێت له‌گه‌ڵ پایته‌خته‌ گرنگه‌كانی‌ جیهاندا، وه‌ك پاریس، له‌به‌ر ئه‌وه‌ی‌ خاوه‌نكاران‌و وه‌به‌رهێنه‌رانی‌ فه‌ره‌نسا كێشه‌ی‌ زۆریان هه‌یه‌ وه‌ك ماندووبوون‌و تێچوونیش له‌به‌ر نه‌بوونی‌ هێڵی‌ راسته‌وخۆ له‌ نێوان به‌غدا‌و پاریسدا.
ئیلاف

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

لە ساڵیادی كۆچی دوایی سەركردە عادل مراد-دا

قادر عەزیز لە (18)ی ئەم مانگەدا ساڵێك بەسەر كۆچی دوایی ...