سەرەکی » وتار » لەتیف فاتیح فەرەج‌ » جلە جێماوەكەی جەژن

خورجە

جلە جێماوەكەی جەژن

1
تەقینەوەكانی كەركوك هەموویان بە ئازار بون ، كەركوك و خەڵكەكەی بێ‌ پرس لە شوناس و ناسنامە لەبەردەم هەڕەشەیەكی مەترسیداردان ، هەڕەشەی تێكدانی پەیوەندی ، هەڕەشەی تێكبەربوونی پێكهاتەكان و نەهێشتنی جوانیەكان ، كەركوك لەبەردەم هەڕەشەدایە ، لەلایەكەوە دەغڵ و دانی وەرزێری كورد دەسوێنرێت و ئەویش بە كەساسیەوە باسی بێكەسی خۆی دەكات ، لەلایەكەوە بە چەندین تە قینەوە جەژن خەڵتانی شین دەكرێت و لەولاشەوە راكان ئەفەندی درێژە بە عەرەباندن ئەدات ، ئەو دۆخەی كەركوك هی ئەوە نیە كەس خۆی لێ‌ نەبان كات هەموو سەركردەو بەرپرسانی كورد ، هەموو دەسەڵاتدارانی عەرەب و توركمان لەبەردەم خوێنی ئەو مناڵەدا بەرپرسیارن كە كەس و كارەكەی لەسەر گۆڕەكەی جلی جەژنیان دانابوو ، دانانی ئەو جلە كزەی لە جەرگمەوە هێنا ،
دایە دایە نەیدۆزمەوە
ئەمشەو لای تۆ ئەمێنمەوە
لە گۆڕستان
شەوی زستان
سەرئەنێمە سەر گۆڕەكەت
بەسەرهاتم ئەگێڕمەوە
2
كەركوك دەسوتێت ، كەركوكیەكان ئاگر لە هەناویان بەردەبێت و بۆ ئەو گوڵە گەنمانە دەگرین كە وەرزێك چاوەڕێیان كردوە تا زەرد بێت بەڵام بڕندەكان و دژەكانی ئاشتی و پێكەوە ژیانی ئاشتیانە بۆ چێژ گڕیتێبەردەدەن ، بۆ ئەمە بەس دەركردنی بەیاننامەبەس نیە ، بەیاننامە نەگوڵە گەنمەسوتاوەكان دەگێڕێتەوە نەبرینەكان ساڕێژدەكات ، نەقوربانیەكان دەگەیەنێتە رۆژی جەژن ، بۆیە «ئیشی وردیشی ئەوێ‌ « كاتی دوعاو نزا نیە ، كاتی جۆشدان و بیركردنەوەیە ، جۆشدان و بیركردنەوە ئەوەیە بەر بەو خوێنبەربوون وخوێن رژان و ستەمە بگیرێت ، بۆ ئەمە پێویستمان بە خەڵكی جوامێرە ، خەڵكی جوامێری هەموو نەتەوەو پێكهاتەكان ، تەمەنی ستەمكاری درێژیش بێت هەتاهەتایی نیە ، دەبێت چیرۆكی جیاواز بۆ نەوەكانی ئایندە بە جێبێڵین ، ئەو چیرۆكانەی لیپن لە مرۆیی بوون ، نەك ئەو چیرۆكانەی رقیان لێ‌ دەچۆڕێ‌
كەركوك ئەلزاسە كفری لۆرەنە
دڵسوتاویانە هەرچی كورد هەنە
3
كە ئەو دێڕانە دەنووسم خەیاڵم لای پەشێوی شاعیرە ، كاتی خۆی سەردانی كەركوكی كردو پێكەوە چووینە سەر قەڵا ، ئەو دەم لە چاوی پڕ ئومێدی ئەودا ئەوەم دەبینی ، كە ئیدی مناڵی چاوگەشی كورد ، لە سەر ئەو سینگە نەوتاویە توشی كارەسات و نادادی نابێت ، لێ‌ ئێستا گڕی سوتانەكە خەریكە دەگاتە زەردكی ئەحمەدی مەلاو كوردە حەیاتەكەش لەبری چارەسەری كێشەكە لە تەك بەغدایە گرەوی لەسەر ئەوەیە هەر ناوێك لایەك بیڵێت لایەكەی تر دەڵێت نا .
جا ئەو ناو بایە شیعرەكەی فەرهاد پیرباڵم بیردەخاتەوە ، یەك وتی با یەك وتی نا ، ئەو فەرهادەی لە رۆژی هەڵبژاردنی سەرۆكا خەڵتانی خوێن كرا و پارلەمانتێرەكانیش سترانیان دەچڕی .

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

خوێنی كورد

خوێنی كورد 1 ئەو هەموو لاوە نەمامن نێژران لەم باخچەیە ...